കാട്ടാനയുടെ ശല്യം ഒഴിവാക്കുന്നതിന് വേണ്ടി നാട്ടുകാര്‍ ആരെങ്കിലും വെടിവെച്ചതാവാം എന്നാണ് വനംവകുപ്പിന്റെ നിഗമനം. ആനയുടെ ശരീരത്തില്‍ നിന്നും ഏതാനും പെല്ലെറ്റുകള്‍ വനംവകുപ്പ് അധികൃതര്‍ നീക്കം ചെയ്തു. മയക്കുവെടി വച്ച് പിടികൂടിയ ആനയെ താല്കാലികമായി ധോണി വനം ഡിവിഷന്‍ ഓഫീസിന് സമീപത്തു നിര്‍മ്മിച്ച കൂട്ടിലാണുള്ളത്.

ധോണിയില്‍ ആനയെ പാര്‍പ്പിക്കാനുള്ള കൂട് തയ്യാറാക്കിയിട്ടുണ്ട്. ധോണിയിലെ ജനവാസ മേഖലയില്‍ ഭീതി പരത്തിയ കാട്ടാനയെ മുണ്ടൂരിനും ധോണിക്കുമിടയിലെ വനാതിര്‍ത്തിക്കടുത്തു വച്ചാണ് മയക്കുവെടിവെച്ചത്. രാവിലെ 7.10നും 7.15നും ഇടയില്‍ ഇടതു ചെവിക്കു താഴെ മുന്‍കാലിന് മുകളിലായാണ് പി.ടി ഏഴാമന് വെടിയേറ്റത്. ചീഫ് ഫോറസ്റ്റ് വെറ്റിനറി സര്‍ജന്‍ അരുണ്‍ സഖറിയ ആണ് 75 അംഗ ദൗത്യ സംഘത്തിന് നേതൃത്വം നല്‍കുന്നത്. ആനയുടെ തുടര്‍ചലനങ്ങള്‍ നിരീക്ഷിച്ചുവരുന്നതായും ദൗത്യം വിജയമെന്ന സൂചനയാണ് ലഭിച്ചതെന്നും വനംമന്ത്രി എ.കെ.ശശീന്ദ്രന്‍ പറഞ്ഞു.

ആനയെ കൊണ്ടുവരാനുള്ള ലോറി ധോണി ക്യാമ്പില്‍ നിന്നും പുറപ്പെട്ടു കഴിഞ്ഞു. മുത്തങ്ങയില്‍ നിന്നും വിക്രം, ഭരതന്‍, സുരേന്ദ്രന്‍ എന്നീ കുങ്കിയാനകളും ഇതിനായി സ്ഥലത്ത് എത്തിച്ചിട്ടുണ്ട്. രണ്ട് കുങ്കികള്‍ രണ്ടു വശത്തു നിന്നു തള്ളുകയും മറ്റൊന്ന് പിന്നില്‍ നിന്ന് ഉന്തിയുമാണ് ലോറിയില്‍ കയറ്റുക.

വനം ചീഫ് വെറ്റിനറി ഓഫീസര്‍ ഡോ. അരുണ്‍ സക്കറിയയുടെ നേതൃത്വത്തില്‍ റേഞ്ച് ഓഫീസര്‍ എന്‍ രൂപേഷ് എന്നിവരടങ്ങുന്ന ഇരുപത്തിഞ്ചംഗ സംഘമാണ് കൊമ്പനെ പിടികൂടാന്‍ സജ്ഞമായി നില്‍ക്കുന്നത്. ഒലവക്കോട്ടെ ആര്‍.ആര്‍.ടിയടക്കം ജില്ലയിലെ അന്‍പതംഗ വനപാലകസംഘവും രംഗത്തുണ്ട്.