PUBG – Chandrika Daily

പബ്ജി കളിക്കുന്നതിനിടെ പരിചയപ്പെട്ടു; യുവാവിനെ തേടി നാല് കുട്ടികളുടെ മാതാവായ പാക് യുവതി ഇന്ത്യയില്‍

webdesk13 — Tue, 04 Jul 2023 01:11:47 +0000

പബ്ജി കളിക്കുന്നതിനിടെ പരിചയപ്പെട്ട യുവാവിനെ തേടി 4 കുട്ടികളുടെ മാതാവായ പാക് യുവതി ഇന്ത്യയിൽ. നിയമാനുസൃതമല്ലാതെ നേപ്പാളിലൂടെയാണ് സീമ ഗുലാം ഹൈദർ എന്ന യുവതി ഗ്രേറ്റർ നോയ്ഡയിലുള്ള സച്ചിൻ എന്ന യുവാവിനെ കാണാനെത്തിയത്. തൻ്റെ മക്കളെയും കൊണ്ടാണ് യുവതി സച്ചിനരികെ എത്തിയത്.

പബ്ജിയിലൂടെ പരിചയപ്പെട്ട ഇരുവരും പരസ്പരം ചാറ്റ് ചെയ്യാനാരംഭിച്ചു. ഇരുവരും തമ്മിൽ പ്രണയത്തിലാവുകയും ചെയ്തു. സീമ ഇന്ത്യയിലെത്തിയതിനു ശേഷം ഇരുവരും ഒരുമിച്ച് ഗ്രേറ്റർ നോയ്ഡയിൽ ഒരു അപ്പാർട്ട്മെൻ്റ് വാടകയ്ക്കെടുത്ത് അവിടെ ഒരുമിച്ചാണ് താമസം. ഏറെ വൈകാതെ, ഒരു പാക് വനിത നിയമാനുസൃതമല്ലാതെ ഇവിടെ താമസിക്കുന്നുണ്ടെന്ന് പൊലീസിന് വിവരം ലഭിച്ചു. ഇതറിഞ്ഞ സീമ മക്കളെയുമൊത്ത് സ്ഥലം വിട്ടു. എന്നാൽ, ഇരുവരെയും പൊലീസ് പിടികൂടി.

കോടതി വഴി വിവാഹം കഴിച്ചെന്നവകാശപ്പെട്ട് കഴിഞ്ഞ മെയ് മാസത്തിലാണ് ഇരുവരും അപ്പാർട്ട്മെൻ്റ് വാടകയ്ക്കെടുത്തതെന്ന് ഉടമ പൊലീസിനെ അറിയിച്ചു.

പബ്ജി തിരിച്ചെത്തുന്നു; ഇന്ത്യയില്‍ നിന്നും ജോലി ചെയ്യാന്‍ ആളെ തേടി പരസ്യം

ചന്ദ്രിക വെബ് ഡെസ്‌ക്‌ — Thu, 22 Oct 2020 13:17:17 +0000

ന്യൂഡല്‍ഹി: കൗമാരക്കാരുടെ ഹരമായിരുന്ന പബ്ജി ഗെയിം വീണ്ടും തിരിച്ചെത്തുന്നുവെന്ന് റിപ്പോര്‍ട്ട്. തൊഴില്‍ അന്വേഷണ വെബ് പോര്‍ട്ടലായ ലിങ്ക്ഡ് ഇന്‍ എന്ന സൈറ്റില്‍ പ്രത്യക്ഷപ്പെട്ട പരസ്യമാണ് പുതിയ അഭ്യൂഹങ്ങള്‍ക്ക് ആധാരം. മുഴുവന്‍ സമയ അസോസിയേറ്റ് ലെവല്‍ ജോലിക്ക് ഇന്ത്യയില്‍ നിന്നും വീട്ടിലിരുന്ന് ജോലി ചെയ്യാനായി കോര്‍പ്പറേറ്റ് ഡവലപ്‌മെന്റ് ഡിവിഷന്‍ മാനേജറെ വേണമെന്നതാണ് പബ്ജി കോര്‍പ്പറേഷന്റെ പരസ്യം. എന്തായാലും പുതിയ പരസ്യം ഇന്ത്യയിലെ ഡവലപ്പര്‍മാര്‍ പ്രതീക്ഷയോടെയാണ് കാണുന്നത്. 200ല്‍ അധികം അപേക്ഷകള്‍ നിലവില്‍ എത്തിയെന്നാണ് റിപ്പോര്‍ട്ട്.

ഇന്ത്യ-ചൈന ബന്ധം വഷളായതിനെ തുടര്‍ന്നാണ് സെപ്റ്റംബര്‍ രണ്ടിന് പബ്ജി അടക്കം 118 ആപ്പുകള്‍ കേന്ദ്രസര്‍ക്കാര്‍ നിരോധിച്ചത്. ഇന്ത്യയില്‍ നിരോധനം വന്നതോടെ, ചൈനീസ് ടെക് ഭീമനായ ടെന്‍സെന്റുമായുള്ള ബന്ധം ഉപേക്ഷിക്കുന്നതായി പബ്ജി അറിയിച്ചിരുന്നു. എന്നാല്‍ ഉടമസ്ഥാവകാശം മാറി എന്നു കരുതി നിരോധനം പിന്‍വലിക്കുന്ന കാര്യം പരിഗണിക്കാനാകില്ലെന്നാണ് ഇന്ത്യയുടെ നിലപാട്.

ഉപഭോക്താക്കളുടെ വിവരങ്ങള്‍ ചോര്‍ത്തി എന്നതടക്കം എഴുപതോളം പ്രശ്‌നങ്ങളാണ് പബ്ജി അടക്കമുള്ള ആപ്പുകള്‍ക്കെതിരെ ഇന്ത്യ ഉന്നയിച്ചത്. പബ്ജി ഗെയിം ഉപയോഗവുമായി ബന്ധപ്പെട്ട് നിരവധി അക്രമങ്ങളും ആത്മഹത്യകളും മരണങ്ങളും ഇന്ത്യയില്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.

ചങ്കാണേ, ചങ്കിടിപ്പാണേ, പബ്ജി ഞങ്ങള്‍ക്കുയിരാണേ; ആപ്പ് നിരോധത്തിനെതിരെ പ്രതിഷേധം

Test User — Thu, 03 Sep 2020 05:52:17 +0000

പത്തനംതിട്ട: വീഡിയോ ഗെയിം ആപ്ലിക്കേഷനായ പബ്ജി കേന്ദ്രസര്‍ക്കാര്‍ നിരോധിച്ചതിനെതിരെ തെരുവില്‍ ഇറങ്ങി ഒരുകൂട്ടം ചെറുപ്പക്കാര്‍. പത്തനംതിട്ടയിലെ വായ്പൂരിലാണ് യുവാക്കള്‍ മുദ്രാവാക്യം മുഴക്കി പ്രതിഷേധിച്ചത്. പ്രതിഷേധം ഗൗരവത്തിലുള്ളതായിരുന്നോ എന്നതില്‍ വ്യക്തതയില്ല. ഇതുമായി ബന്ധപ്പെട്ട വീഡിയോ സാമൂഹിക മാദ്ധ്യമങ്ങളില്‍ പ്രചരിക്കുന്നുണ്ട്.

ചങ്കാണേ ചങ്കിടിപ്പിപ്പാണേ, പബ്ജി ഞങ്ങള്‍ക്കുയിരാണേ, ലോകം മുഴുവന്‍ പബ്ജി കളിക്കും, ഇന്ത്യില്‍ മാത്രം നിരോധനം, എന്തിനാണീ നിരോധനം, ആര്‍ക്കു വേണ്ടിയീ നിരോധനം, പറയൂ പറയൂ കേന്ദ്രസര്‍ക്കാര്‍… എന്നിങ്ങനെയാണ് മുദ്രവാക്യങ്ങള്‍.

https://www.facebook.com/nissam.nizam.71/videos/1007950459627266/?t=63

ബുധനാഴ്ചയാണ് കേന്ദ്രസര്‍ക്കാര്‍ പബ്ജി അടക്കം 119 ചൈനീസ് ആപ്പുകള്‍ നിരോധിച്ചത്. അതിര്‍ത്തിയില്‍ ചൈനീസ് സംഘര്‍ഷം തുടരുന്ന സാഹചര്യത്തിലാണ് കേന്ദ്രസര്‍ക്കാര്‍ തീരുമാനം.

ലുഡോ, പബ്ജി, ആപ്പ് ലോക്ക്, ഫേസ് യു… ഡിജിറ്റല്‍ സ്‌ട്രൈക്കില്‍ കേന്ദ്രം നിരോധിച്ച ചൈനീസ് ആപ്പുകള്‍ ഇവയാണ്- പട്ടിക കാണാം

Test User — Wed, 02 Sep 2020 12:26:54 +0000

ന്യൂഡല്‍ഹി: ലഡാകിലെ സംഘര്‍ഷത്തിന് പിന്നാലെ 118 ചൈനീസ് ആപ്പുകള്‍ കൂടി കേന്ദ്രസര്‍ക്കാര്‍ നിരോധിച്ചിരിക്കുകയാണ്. ജനപ്രിയമായ പബ്ജി അടക്കമുള്ള ആപ്പുകളാണ് നിരോധിച്ചിട്ടുള്ളത്.
ഫേസ് യു, ഇന്‍ നോട്ട്, കാംകാര്‍ഡ്, വിചാറ്റ് വര്‍ക്ക്, സൈബര്‍ ഹണ്ടര്‍, ലുഡോ വേള്‍ഡ്, ചെസ് റഷ്, ഗെയിം ഓഫ് സുല്‍ത്താന്‍, സ്മാര്‍ട്ട് ആപ്പ് ലോക്ക്, ലൈഫ് ആഫ്റ്റര്‍, ആപ്പ് ലോക്ക്, ക്ലീനര്‍, മ്യൂസിക് എംപി3 പ്ലേയര്‍, കിറ്റി ലൈവ്, പെന്‍ഗ്വിന്‍ എഫ്.എം, സോള്‍ ഹണ്ടേഴ്‌സ്, മാഫിയ സിറ്റി, ലിറ്റില്‍ ക്യു ആല്‍ബം തുടങ്ങിയവയും നിരോധിത പട്ടികയില്‍ ഉണ്ട്.

നിരോധിച്ച ആപ്പുകളുടെ പട്ടിക കാണാം;

പബ്ജി ഉള്‍പ്പെടെ 118 ചൈനീസ് ആപ്പുകള്‍ നിരോധിച്ചു

Test User — Wed, 02 Sep 2020 11:56:02 +0000

ഡല്‍ഹി: പബ്ജി ഉള്‍പ്പെടെ 118 ചൈനീസ് ആപ്പുകള്‍ രാജ്യത്ത് നിരോധിച്ചു. കേന്ദ്ര ഐടി മന്ത്രാലയമാണ് ആപ്പുകള്‍ നിരോധിച്ചത്. നേരത്തെ തന്നെ ജനപ്രിയമായ പബ്ജി ലോക്ക് ഡൗൺ കാലത്ത് അൽഭുതകരമായ വള‌ർച്ചയായിരുന്നു സ്വന്തമാക്കിയത്. പബ്ജി യഥാ‌ത്ഥത്തിൽ ചൈനീസ് ഗെയിം അല്ലെങ്കിലും ഗെയിമിന്റെ മൊബൈൽ പതിപ്പിന്റെ ഉടമകൾ ടെൻസെൻ്റ് ഗെയിംസ് എന്ന ചൈനീസ് ടെക് ഭീമനാണ്. ദക്ഷിണ കൊറിയയില്‍ രജിസ്റ്റര്‍ ചെയ്‌തിട്ടുള്ള കമ്പനിയാണ് പബ്‌ജി കോര്‍പ്പറേഷന്‍. സോളാണ് കമ്പനിയുടെ ആസ്ഥാനം.

Ministry of Information & Technology bans PUBG and 118 other mobile applications pic.twitter.com/3bnFiaY9VW

— ANI (@ANI) September 2, 2020

ടെൻസെന്റിന് ഈ ഒരൊറ്റ ഗെയിം കഴിഞ്ഞ മാസത്തിൽ മാത്രം സമ്മാനിച്ചത് 1700 കോടിയിൽപരം രൂപയുടെ വരുമാനമാണ്. ആപ്പ് സ്റ്റോർ, ഗൂഗിൾ പ്ളേ എന്നിവയിൽ നിന്ന് മെയ് 1 മുതൽ മെയ് 31 വരെ ശേഖരിച്ച വിവരങ്ങൾ വെച്ചാണ് ഈ വരുമാനം കണക്കാക്കപ്പെട്ടിട്ടുള്ളത് മെയ് 2020 -ലെ ഏറ്റവും കൂടുതൽ തുക ഗ്രോസ് ചെയ്ത ഗെയിമുകളുടെ പട്ടികയിൽ ഒന്നാമതായി ഇടം പിടിച്ച ഗെയിമാണ് പബ്ജി മൊബൈൽ.

തുടര്‍ച്ചയായി ആറു മണിക്കൂര്‍ പബ്ജി കളിച്ച പതിനാറുകാരന്‍ ഹൃദയാഘാതം മൂലം മരിച്ചു

web desk 1 — Fri, 31 May 2019 16:02:58 +0000

ഭോപ്പാല്‍: ജനകീയ മൊബൈല്‍ ഗെയിം ആപ്പായ പബ്ജി കളിക്കുന്നതിനിടെ പതിനാറുകാരന്‍ ഹൃദയാഘാതം മൂലം മരിച്ചു. തുടര്‍ച്ചയായി ആറു മണിക്കൂര്‍ കളിച്ചതിനെ തുടര്‍ന്നാണ് മരണം. മധ്യപ്രദേശിലെ നീമച് സ്വദേശി ഫുര്‍ഖാന്‍ ഖുറേശി ആണ് മരിച്ചത്. പ്ലസ്ടു വിദ്യാര്‍ഥിയായിരുന്നു.

കഴിഞ്ഞ ചൊവ്വാഴ്ചയാണ് സംഭവം. ബന്ധു വീട്ടിലെ കല്യാണാഘോഷത്തില്‍ പങ്കെടുക്കുന്നതിനായി കുടുംബത്തോടൊപ്പം പോവുകയായിരുന്ന ഫുര്‍ഖാന്‍ യാത്രയിലുടനീളം പബ്ജി കളിയില്‍ വ്യാപൃതനായിരുന്നു. സഹോദരി ഫിസയും കൂടെയുണ്ടായിരുന്നു. ഗെയിം കളിക്കുന്നതിനിടെ ഫുര്‍ഖാന്‍ ‘ബോംബു വെക്കു ബോംബു വെക്കു’ എന്ന് ഉച്ചത്തില്‍ പറയുന്നുണ്ടായിരുന്നു. അല്‍പം കഴിഞ്ഞ് ഇയര്‍ഫോണ്‍ ഊരിക്കളിഞ്ഞ് നിലത്തു വീണു. ഉടന്‍ ആശുപത്രിയിലെത്തിച്ചെങ്കിലും രക്ഷപ്പെടുത്താനായില്ല.

കഴിഞ്ഞ കുറച്ചു മാസങ്ങളായി പബ്ജി മാനിയ പിടിപെട്ട വിദ്യാര്‍ഥികള്‍ രക്ഷിതാക്കളില്‍ ഉണ്ടാക്കുന്ന അങ്കലാപ്പ് വലുതാണ്. പബ്ജി മാനിയ പിടിപെട്ട പതിനഞ്ചുകാരനെ കുറച്ചു ദിവസം മുമ്പ് വീട്ടില്‍ നിന്നു കാണാതായിരുന്നു.