പഞ്ചാബില്‍ ഭൂരിപക്ഷം നേടുമെന്ന് എക്‌സിറ്റ് പോള്‍ ഫലങ്ങള്‍ പ്രവചിച്ചിരുന്നെങ്കിലും ഇവിടെ രണ്ടാം സ്ഥാനത്തെത്താനേ എ.എ.പിക്ക് കഴിഞ്ഞുള്ളൂ. ഏറെ പ്രതീക്ഷ പുലര്‍ത്തിയിരുന്ന ഗോവയില്‍ ഒരു സീറ്റ് പോലും നേടാന്‍ കഴിഞ്ഞതുമില്ല. ഡല്‍ഹിക്ക് പുറത്ത് എ.എ.പിക്ക് വിലാസം നല്‍കുന്ന തെരഞ്ഞെടുപ്പ് എന്ന പ്രതീക്ഷയാണ് ഇതോടെ അസ്തമിച്ചത്. പഞ്ചാബിലും ഗോവയിലും ഇത്തരമൊരു ഫലം പ്രതീക്ഷിച്ചിരുന്നില്ലെന്ന് ഡല്‍ഹി മന്ത്രിയും എ.എ.പി നേതാവുമായ കപില്‍ മിശ്ര പറഞ്ഞു. വോട്ടെണ്ണലിന്റെ തത്സമയ വിവരങ്ങള്‍ വിലയിരുത്തുന്നതിനായി അശുതോഷ് ഉള്‍പ്പെടെയുള്ള മുതിര്‍ന്ന നേതാക്കളെല്ലാം ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്റെ വസതിയിലെത്തിയിരുന്നു.