കുടുംബത്തില്‍ നിന്ന് പിന്‍ഗാമി വരണമെന്നത് അടക്കമുള്ള അണികളുടെ വികാരം പാര്‍ട്ടി ഉള്‍ക്കൊള്ളുന്നുണ്ട്. പുതുപ്പള്ളിയില്‍ പാര്‍ട്ടി എന്നതിന് അപ്പുറം ഉമ്മന്‍ചാണ്ടിയെന്ന വികാരമാണ് നിയമസഭാ തിരഞ്ഞെടുപ്പുകളില്‍ പ്രതിഫലിച്ചിരുന്നതെന്ന് നേതൃത്വം വിലയിരുത്തുന്നു. ഉമ്മന്‍ചാണ്ടിയുടെ പേരില്‍ നടക്കുന്ന അനുശോചന യോഗങ്ങളിലൂടെ പാര്‍ട്ടി സംവിധാനം ശക്തിപ്പെടുത്താനും ബലഹീനതകള്‍ പരിഹരിക്കാനുമുള്ള നീക്കങ്ങളിലേക്ക് കടക്കും. തൃക്കാക്കരയിലെ പോലെ സ്ഥാനാര്‍ഥി നിര്‍ണയത്തില്‍ ഉള്‍പ്പെടെ മുന്‍തൂക്കമുണ്ടാക്കി മുന്നോട്ടുനീങ്ങുമെന്നാണ് നേതൃത്വം സൂചിപ്പിക്കുന്നത്. ഇതിനായി നേതൃയോഗവും വൈകാതെ ചേരും.

വിവിധ സംസ്ഥാനങ്ങളിലെ ഉപതെരഞ്ഞെടുപ്പുകള്‍ ഒരുമിച്ചു നടത്തുകയാണു പതിവ്. രണ്ടാം പിണറായി സര്‍ക്കാര്‍ അധികാരമേറ്റതിനു ശേഷം നടക്കുന്ന രണ്ടാമത്തെ ഉപതെരഞ്ഞെടുപ്പാണിത്. തൃക്കാക്കര മണ്ഡലത്തില്‍ നിന്നുള്ള കോണ്‍ഗ്രസ് എംഎല്‍എ പി ടി തോമസ് അന്തരിച്ചതിനെത്തുടര്‍ന്നു നടത്തിയ ഉപതെരഞ്ഞെടുപ്പില്‍ ഭാര്യ ഉമ തോമസ് 25,015 വോട്ടുകളുടെ ഭൂരിപക്ഷത്തിന് വിജയിച്ചിരുന്നു.

കഴിഞ്ഞ 53 വര്‍ഷമായി ഉമ്മന്‍ചാണ്ടിയുടെ മണ്ഡലമാണ് പുതുപ്പള്ളി. 1970 ലെ ആദ്യ തെരഞ്ഞെടുപ്പില്‍ ഉമ്മന്‍ചാണ്ടിക്ക് വോട്ടു ചെയ്തവരുടെ മക്കളും പേരക്കുട്ടികളും അവരുടെ മക്കളും പിന്നീട് ഒരു തെരഞ്ഞെടുപ്പിലും തങ്ങളുടെ പ്രിയപ്പെട്ട കുഞ്ഞൂഞ്ഞിനെ കൈവിട്ടിട്ടില്ല. മണ്ഡലത്തിലെ ഓരോ മനുഷ്യന്റെയും പ്രതീക്ഷയായി ഉമ്മന്‍ചാണ്ടി എന്നും നിലകൊണ്ടു. എത്ര തിരക്കുകള്‍ക്കിടയിലും ഞായറാഴ്ചകളില്‍ അദ്ദേഹം പുതുപ്പള്ളിയിലെ തന്റെ വീട്ടിലുണ്ടാവും. ആവശ്യങ്ങളുമായി ജനക്കൂട്ടവും. ആ സ്‌നേഹബന്ധത്തിന്റെ കരുത്തില്‍ 12 തവണയാണ് പുതുപ്പള്ളിയില്‍ നിന്ന് ഉമ്മന്‍ ചാണ്ടി നിയമസഭയിലെത്തിയത്.