മുൻമുഖ്യമന്ത്രി ഉമ്മൻചാണ്ടിയുടെ മരണത്തിലുള്ള ദുഖവും സഹാനുഭൂതിയും ഒരു തരംഗമായി എന്നു വിശ്വസിക്കുന്നവർ കാണും. അത് ലളിതമായ കാഴ്ച്ചയാണ്. ഉമ്മൻ ചാണ്ടി മരണാനന്തരവും പ്രസക്തനും ശക്തനുമായി വളർന്നത് സംസ്ഥാന ഭരണവുമായി മാറ്റുരയ്ക്കാൻ പര്യാപ്തമായ പ്രതിപക്ഷ പ്രതീകം എന്ന നിലയിലാണ്. പഴയ തോണിക്കാരന്റെ കഥയാണ് കാര്യം. ജനാധിപത്യ രാഷ്ട്രീയാധികാരം തീവ്രവലതു ചായ് വു പ്രകടിപ്പിക്കുമ്പോൾ മദ്ധ്യവലതു വിഭാഗങ്ങൾ സ്വീകാര്യരാവും. ആദരണീയരാവും. ഉമ്മൻചാണ്ടിയെ മുൻ നിർത്തി യു ഡി എഫ് പിണറായി വിജയനുമായി നടത്തിയ രാഷ്ട്രീയ സമരത്തിന്റെ ഏറ്റവും പുതിയമുഖമാണ് പുതുപ്പള്ളിയിലെ ഉപതെരഞ്ഞെടുപ്പ്. അവിടത്തെ ജനവിധി സംസ്ഥാന ഭരണത്തിനുള്ള കടുത്ത ശാസനയാണ്.

ജനങ്ങൾ വിഡ്ഡികളല്ല. ഊമകളോ ബധിരരോ ആണെന്നു തോന്നാം. പക്ഷേ, സാമാന്യബോധമില്ലാത്ത വെറും അടിയാളക്കൂട്ടങ്ങളാണെന്ന് കരുതരുത്. കേരളത്തിലെ എൽ ഡി എഫ് ഗവണ്മെന്റിനെ നയിക്കുന്നവർ ജനങ്ങളെ മാനിക്കാൻ പഠിക്കണം. മാസപ്പടിയും ഡോളർ കടത്തും ധൂർത്തും മുതൽ നികുതിവർദ്ധന, വിലക്കയറ്റം, സാമൂഹിക അരക്ഷിതാവസ്ഥ, കസ്റ്റഡി കൊലപാതകം തുടങ്ങി നീളുന്ന ദുർവൃത്തികൾ വരെ ജനങ്ങൾ കാണുന്നു. അവർ പ്രതികരിക്കുന്നു. ഭരിക്കുന്നവരുടെ കുറ്റകരമായ നിശ്ശബ്ദതയ്ക്ക് ശിക്ഷ വിധിക്കുന്നു.

പുതുപ്പള്ളിയിലേത് ജെയ്ക്കിന്റെ വ്യക്തിപരമായ തോൽവിയോ ചാണ്ടി ഉമ്മന്റെ വ്യക്തിപരമായ വിജയമോ അല്ല. രാഷ്ട്രീയമായി സർക്കാറിനെതിരെ തിരിഞ്ഞ പൗരസമൂഹത്തിന്റെ ശക്തമായ വിധിയെഴുത്താണ് നടന്നത്. അത് ആ അർത്ഥത്തിൽ മനസ്സിലാക്കിയാൽ സി പി എമ്മിനും എൽ ഡി എഫിനും നന്ന്.

ആസാദ്
08 സെപ്തംബർ 2023

പ്രതിപക്ഷ നേതാവിന്റെ ഫേസ്ബുക്ക് പോസ്റ്റ്

ഏത് കേഡര്‍ പാര്‍ട്ടിയെയും വെല്ലുന്ന രീതിയില്‍ തെരഞ്ഞെടുപ്പ് പ്രവര്‍ത്തനം നടത്താനും വിജയത്തിലെത്തിക്കാനുമുള്ള സംഘടനാശേഷി യു.ഡി.എഫിനുണ്ടെന്ന് തൃക്കാക്കരയ്ക്ക് പിന്നാലെ പുതുപ്പള്ളിയിലും നമ്മള്‍ തെളിയിച്ചു. ജനവിരുദ്ധ സര്‍ക്കാരിനെതിരെ പേരാടാനും മുന്നോട്ട് കുതിക്കാനുമുള്ള ഇന്ധനമാണ് ഉമ്മന്‍ ചാണ്ടിയുടെ പുതുപ്പള്ളി ഇന്ന് യു.ഡി.എഫിന് നല്‍കിയത്.

സ്‌നേഹം കൊണ്ട് ലോകം ജയിച്ച ഉമ്മന്‍ ചാണ്ടിക്ക് പുതുപ്പള്ളി തിരിച്ച് നല്‍കിയ ആദരവാണ് യു.ഡി.എഫിന്റെ ചരിത്ര വിജയം. സര്‍ക്കാരിനെതിരായ ജനവികാരം എത്രമാത്രം വലുതാണെന്ന് തെരഞ്ഞെടുപ്പ് ഫലം തെളിയിക്കുന്നു. വോട്ടു ചെയ്തത് പുതുപ്പള്ളിയാണെങ്കിലും ഫലത്തില്‍ പ്രതിഫലിച്ചത് കേരളത്തിന്റെ പൊതുമനസാണ്.

#TeamUDF നുള്ളതാണ് ഈ വിജയത്തിന്റെ ക്രെഡിറ്റ്. രാപ്പകല്‍ വ്യത്യാസമില്ലാതെ പ്രവര്‍ത്തകരും നേതാക്കളും ഒരേ മനസോടെ പ്രവര്‍ത്തിച്ചു. പോരായ്മകള്‍ തിരിച്ചറിഞ്ഞു, അത് തിരുത്തി. സംഘടനാ സംവിധാനത്തെ കുറ്റമറ്റരീതിയില്‍ എണ്ണയിട്ട യന്ത്രം പോലെ പ്രവര്‍ത്തിപ്പിക്കാനായി. കൂട്ടായ്മയുടെയും സംഘബോധത്തിന്റെയും സ്‌നേഹത്തിന്റെയും വിജയമാണ് പുതുപ്പള്ളിയില്‍ കണ്ടത്.

ഒറ്റക്കെട്ടായി നിന്ന് പോരാടിയാല്‍ ലോക്‌സഭയിലും തദ്ദേശ തെരഞ്ഞെടുപ്പിലും നമുക്ക് വിജയം ആവര്‍ത്തിക്കാം. ജനങ്ങള്‍ ആഗ്രഹിക്കുന്നതു പോലെ ഈ ജനവിരുദ്ധ സര്‍ക്കാരിനെ 2026-ല്‍ താഴെയിറക്കാം.

പുതുപ്പള്ളിയിലെ വോട്ടര്‍മാര്‍ക്കും ഒപ്പം നിന്ന കേരള ജനതയ്ക്കും യു.ഡി.എഫ് പ്രവര്‍ത്തകര്‍ക്കും നേതാക്കള്‍ക്കും നന്ദി.

ഹൃദയാഭിവാദ്യങ്ങള്‍

ഫെയ്‌സ്ബുക്ക് കുറിപ്പ്

കേരള സർക്കാരിന്റെ ഭരണത്തിന്റെ വിലയിരുത്തലാണ് പുതുപ്പള്ളിയിലുണ്ടാവുക എന്നാണ് സി. പി.എം സെക്രട്ടറി എം. വി ഗോവിന്ദൻ പറഞ്ഞിട്ടുള്ളത്. അദ്ദേഹത്തിന്റെ വാക്കുകൾ അക്ഷരാർത്ഥത്തിൽ പുലർന്നിരിക്കുകയാണ്. റെക്കോർഡ് ഭൂരിപക്ഷത്തിലാണ് ശ്രീ ചാണ്ടി ഉമ്മൻ വിജയിച്ചിരിക്കുന്നത്. സർക്കാരിന്റെ ദുർഭരണത്തിനും അഴിമതിക്കും ജനങ്ങൾ നൽകിയ തിരിച്ചടിയാണ് ഈ ഉജ്വല വിജയം. തനിക്കും മകൾക്കുമെതിരെ ഉയർന്ന ആരോപണങ്ങളോട് മുഖം തിരിക്കുകയും ജനങ്ങളുടെ ചോദ്യങ്ങൾക്ക് ഉത്തരം നൽകാതിരിക്കുകയും ചെയ്ത മുഖ്യമന്ത്രി പിണറായി വിജയനുള്ള താക്കീതാണ് സി. പി. എമ്മിന്റെ ദയനീയ പരാജയം.
ജനങ്ങളെ മതം കൊണ്ട് വേർതിരിക്കുകയും മണിപ്പൂരിലടക്കം നിരവധി ജനങ്ങളെ കൊലക്ക് കൊടുക്കുകയും ചെയ്ത ബിജെപിക്കും കണക്കിന് കൊടുത്തിട്ടുണ്ട് പുതുപ്പള്ളിയിലെ പ്രബുദ്ധ ജനത എന്നത് ഈ വിജയത്തിന്റെ മാറ്റ് കൂട്ടുന്നുണ്ട്.
ശ്രീ ഉമ്മൻ ചാണ്ടിയുടെ നിസ്വാർത്ഥ രാഷ്ട്രീയ പ്രവർത്തനങ്ങൾക്കുള്ള അർഹിച്ച അന്ത്യോപചാരമാണ് ചാണ്ടി ഉമ്മന്റെ വിജയം.

അഭിനന്ദനങ്ങൾ ചാണ്ടി ഉമ്മൻ.