ഗള്‍ഫ് ജനതയുടെ ആഗ്രഹം സഫലമാക്കുന്ന കരാറാണിതെന്നും മേഖലയിലെ വെല്ലുവിളികള്‍ നേരിടാന്‍ ഒന്നിക്കണമെന്നും ഉദ്ഘാടന പ്രസംഗത്തില്‍ സൗദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്‍ ആവശ്യപ്പെട്ടു. ഇറാന്റെ ഭീകരവാദ പ്രവര്‍ത്തനത്തിനെതിരെ ഒറ്റക്കെട്ടായി നീങ്ങണമെന്നും ആഹ്വാനം ചെയ്തു. സുരക്ഷാഭീഷണിക്കെതിരെ രാജ്യാന്തര സമൂഹത്തിന്റെ പിന്തുണയും തേടി. ഗള്‍ഫ്, അറബ്, ഇസ്ലാമിക രാജ്യങ്ങളുടെ കൂട്ടായ്മയ്ക്ക് അടിവരയിട്ട പ്രഖ്യാപനത്തില്‍ സാഹോദര്യം ശക്തിപ്പെടുത്തണമെന്നും പൊതുതാല്‍പര്യമുള്ള വിഷയങ്ങളില്‍ കൈകോര്‍ക്കണമെന്നും പറയുന്നു.

ഗള്‍ഫ് ഐക്യം ലക്ഷ്യമിട്ട് ഏറെ പ്രയത്‌നിച്ച കുവൈത്ത് മുന്‍ അമീര്‍ ഷെയ്ഖ് സബാഹിനെയും അന്തരിച്ച ഒമാന്‍ മുന്‍ ഭരണാധികാരി സുല്‍ത്താന്‍ ഖാബൂസിനെയും ഉച്ചകോടി അനുസ്മരിച്ചു. ഉച്ചകോടിക്കെത്തിയ ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ താനി ഉള്‍പ്പെടെയുള്ളവരെ മുഹമ്മദ് ബിന്‍ സല്‍മാനാണു സ്വീകരിച്ചത്. 2017 ജൂണ്‍ 5ന് ആരംഭിച്ച ഉപരോധത്തിനുശേഷം ആദ്യമായാണു ഖത്തര്‍ അമീര്‍ സൗദിയിലെത്തിയത്. ഉപരോധം പിന്‍വലിക്കുന്നതിനു മുന്നോടിയായി, കുവൈത്തിന്റെ മധ്യസ്ഥതയില്‍ തിങ്കളാഴ്ച രാത്രി തന്നെ സൗദി കര, നാവിക, വ്യോമ അതിര്‍ത്തി തുറന്നിരുന്നു. പുതിയ അധ്യായത്തിന് തുടക്കമിട്ടതായി യുഎഇ വിദേശകാര്യസഹമന്ത്രി ഡോ. അന്‍വര്‍ ഗര്‍ഗാഷ് പ്രതികരിച്ചു.

നിയുക്ത യുഎസ് പ്രസിഡണ്ട് ജോ ബൈഡനുള്ള ‘സമ്മാന’മായാണ് ഈ തീരുമാനമെന്ന് ഫൈനാന്‍ഷ്യല്‍ ടൈംസിന്റെ റിപ്പോര്‍ട്ടിലുണ്ട്. ഡൊണാള്‍ഡ് ട്രംപ് പ്രസിഡണ്ടായ വേളയിലും മികച്ച നയതന്ത്ര ബന്ധമാണ് സൗദി യുഎസുമായി സൂക്ഷിച്ചിരുന്നത്. ജമാല്‍ ഖഷോഗി കൊല്ലപ്പെട്ട സംഭവത്തില്‍ സൗദിക്ക് അനുകൂലമായ നിലപാടാണ് യുഎസ് സ്വീകരിച്ചിരുന്നത്. എന്നാല്‍ ഇതിനു വിരുദ്ധ നിലപാടായിരുന്നു ഡെമോക്രാറ്റുകളുടേത്.

2017 ജൂണിലാണ് സൗദിയുടെ നേതൃത്വത്തില്‍ യുഎഇ, ബഹ്‌റൈന്‍, ഈജിപ്ത് എന്നീ രാഷ്ട്രങ്ങള്‍ ഖത്തറിന് ഉപരോധം ഏര്‍പ്പെടുത്തിയത്. ഇറാനുമായി ബന്ധമുള്ള തീവ്രവാദി ഗ്രൂപ്പുകളെ ഖത്തര്‍ സഹായിക്കുന്നു എന്നതായിരുന്നു സൗദിയുടെ ആരോപണം.

ആളോഹരി വരുമാനത്തില്‍ ലോകത്തെ ഏറ്റവും സമ്പന്ന രാഷ്ട്രമായ ഖത്തര്‍ ആരോപണങ്ങള്‍ നിഷേധിച്ചിരുന്നു. പ്രശ്‌നം തീര്‍ക്കാന്‍ യുഎസ് ഇടപെട്ടിരുന്നു എങ്കിലും സാധിച്ചിരുന്നില്ല. കുവൈത്ത് മധ്യസ്ഥനായി നിന്ന ചര്‍ച്ചകളും അരങ്ങേറിയിരുന്നു. എന്നാല്‍ ഇതും ഫലവത്തായില്ല.

ഖത്തര്‍ എയര്‍വേയ്‌സ് വിമാനങ്ങള്‍ സൗദിയുടെയും സഖ്യരാഷ്ട്രങ്ങളിലൂടെയും മുകളിലൂടെ വീണ്ടും പറക്കുമെന്ന് ഈയിടെ യുഎസ് ദേശീയ സുരക്ഷാ ഉപദേഷ്ടാവ് പ്രസ്താവനയിറക്കിയിരുന്നു. എഴുപത് ദിവസത്തിന് അകം ഖത്തറിന് ഏര്‍പ്പെടുത്തിയ വ്യോമയാത്രാ നിരോധം നീക്കുമെന്നായിരുന്നു അദ്ദേഹം പറഞ്ഞിരുന്നത്.

നിലവിലെ യുഎസ് ഭരണകൂടം അധികാരമൊഴിയുന്നതിന് മുമ്പു തന്നെ അതു സാധ്യമാകും. വ്യോമവിലക്ക് പരിഹരിച്ച് സൗദിയുടെയും ബഹ്‌റൈനിന്റെയും ആകാശത്തിലൂടെ ഖത്തര്‍ എയര്‍വേയ്‌സ് വിമാനങ്ങള്‍ക്ക് പറക്കാന്‍ കഴിയും. സമ്പൂര്‍ണ ഉപരോധം അവസാനിപ്പിക്കുന്നതിനുള്ള ആദ്യപടിയാണിത്- അദ്ദേഹം പറഞ്ഞു.

‘ ഇതൊരു കുടുംബത്തിലെ തര്‍ക്കം പോലെയാണ്. അതു കൊണ്ടു തന്നെ പരിഹരിക്കാന്‍ കുറച്ചു ബുദ്ധിമുട്ടുണ്ടാകും. എന്നാല്‍ ഒരു മേശയ്ക്ക് ഇരുവശവും എല്ലാവരെയും കൊണ്ടുവരാനാണ് ഞങ്ങളുടെ ശ്രമം. അങ്ങനെ സംസാരിക്കണം. അക്കാര്യത്തില്‍ ജോലികള്‍ നടന്നു കൊണ്ടിരിക്കുകയാണ്. പ്രസിഡണ്ടിന്റെ ഓഫീസിലെ മുന്‍ഗണനാ പട്ടികയില്‍ തന്നെ ഇതുണ്ട്’ – അദ്ദേഹം കൂട്ടിച്ചേര്‍ത്തു.

2017 ജൂണ്‍ അഞ്ചിന് പുലര്‍ച്ചെയാണ് സൗദിയുടെ നേതൃത്വത്തില്‍ യുഎഇ, ബഹ്‌റൈന്‍, ഈജിപ്ത് എന്നീ രാഷ്ട്രങ്ങള്‍ ഖത്തറിനെതിരെ വ്യാപാര-ഗതാഗത ഉപരോധം പ്രഖ്യാപിച്ചത്. ഉപരോധം അവസാനിപ്പിക്കാനായി നിരവധി മധ്യസ്ഥ ശ്രമങ്ങള്‍ നടന്നു എങ്കിലും അതൊന്നും യാഥാര്‍ത്ഥ്യമായിട്ടില്ല.