യൂറോപ്യന്‍ ക്ലബുകളുടെ കൂട്ടായ്മയായ യൂറോപ്യന്‍ ക്ലബ് അസോസിയേഷനും ഫിഫയും തമ്മില്‍ നേരത്തെ തന്നെ താരങ്ങളെ വിട്ടുനല്‍കുന്ന കാര്യത്തില്‍ പരസ്പര ധാരണയുണ്ട്. മൊത്തം 209 ദശലക്ഷം ഡോളറാണ് ഫിഫ ക്ലബുകള്‍ക്ക് നല്‍കുക. ഇത് പ്രകാരം ഒരു താരത്തിന് 10,950 യു.എസ് ഡോളര്‍ ലഭിക്കും. ക്ലബ് ഫുട്‌ബോളിനെ ബാധിക്കാത്ത തരത്തില്‍ ഫിഫ വിജയകരമായി നടപ്പിലാക്കുന്ന പദ്ധതി ശക്തമാവുന്നതിന്റെ വലിയ തെളിവാണ് ലാഭവിഹിത കൈമാറ്റമെന്ന് ഫിഫ തലവന്‍ ജിയാന്നി ഇന്‍ഫാന്‍ഡിനോ വ്യക്തമാക്കി. വന്‍കിട ക്ലബുകള്‍ മാത്രമല്ല ചെറിയ ക്ലബുകള്‍ക്ക് പോലും ലാഭവിഹിതം ലഭിക്കും.

ഷൈഖ് തമീം, താങ്കള്‍ ജയിച്ചു മെസ്സിയോടൊപ്പം എന്നാണ് തങ്ങള്‍ ഫേസ്ബുക്കില്‍ പങ്കുവെച്ചത്. ചിത്രത്തില്‍ അമീറിന്റെയും മെസ്സിയുടെയും ഫോട്ടോയും ഉള്‍പ്പെടുത്തിയിരുന്നു.

ഖത്തറില്‍ കഴിഞ്ഞ ഒരു മാസക്കാലമായി നടന്ന ലോകകപ്പിന്റെ സംഘാടനത്തിന് ലോകം മുഴുവനുള്ള പ്രശംസ ഖത്തര്‍ ഏറ്റുവാങ്ങിയിരുന്നു. അറബ് സംസ്‌കാരങ്ങളെ ഉയര്‍ത്തിപ്പിടിക്കുന്ന ഒരു ലോകകപ്പാണ് കടന്നുപോയത്. ഇതു സംബന്ധിച്ച് വലിയ രീതിയിലുള്ള ചര്‍ച്ചകള്‍ക്കും വഴി വച്ചിട്ടുണ്ട്.

ഒരു ലോകകപ്പ് ആതിഥ്യത്തിലൂടെ അത്യപൂര്‍വ്വമായ പല നിമിഷങ്ങളിലേക്കും ലോക ജനതയെ ആനയിച്ച ഖത്തര്‍ ഇന്നലെ മറ്റൊരു മനോഹര സന്ദര്‍ഭം കൂടി സമ്മാനിച്ചിരിക്കുന്നു. ലുസൈല്‍ ഐക്കണിക് സ്റ്റേഡിയത്തിലെ പതിനായിരങ്ങളെ സാക്ഷിയാക്കി 22ാമത് ഫിഫ ലോകകപ്പ് ചാമ്പ്യന്‍മാരായ അര്‍ജന്റീനക്ക് സുവര്‍ണ്ണ ട്രോഫി കൈമാറുന്നതിന്റെ തൊട്ടു മുമ്പാണത് സംഭവിച്ചത്. അതിഗംഭീര പോരാട്ടത്തിനൊടുവില്‍ ഫ്രാന്‍സുമായി 3 ഗോള്‍ സമനില പാലിച്ചശേഷം നടന്ന പെനാല്‍ട്ടി ഷൂട്ടൗട്ടില്‍ 2-നെതിരെ 4 ഗോള്‍നേടി വിജയിക്കുകയായിരുന്നു അര്‍ജന്റീന. വിജയികളെ ഓരോരുത്തരേയായി പേരുപറഞ്ഞാണ് സംഘാടകര്‍ സമ്മാനദാന ചടങ്ങിലേക്ക് വിളിച്ചത്. അവസാനമായി ലയണല്‍ മെസ്സിയെന്ന ക്യാപ്റ്റനെ ക്ഷണിച്ചു. വിനയത്തോടെ വേദിയിലേക്ക് കയറിയ മെസ്സിയെ ഫിഫ അധ്യക്ഷന്‍ ജിയാനി ഇന്‍ഫാന്റിനോ ആശീര്‍വദിക്കുന്നു.

ശേഷം ഖത്തര്‍ അമീര്‍ നിറപുഞ്ചിരിയോടെ മെസ്സിയുടെ അടുത്തെത്തി പിന്നില്‍ നിന്നു. ശേഷം ഖത്തറിലെ പരമോന്നത ഖത്തരി ഗൗണ്‍ ആയ ബിഷ്ത് അണിയിച്ചു. സന്തോഷത്തേരിലേറി ഇരുകൈകളും കൂട്ടിത്തിരുമ്മി മെസ്സി അടുത്തുതന്നെ നിന്നു. പിന്നീട് ഇന്‍ഫാന്റിനോ സുവര്‍ണ്ണട്രോഫി കൈമാറി. ആ ട്രോഫിയുമായി പ്രത്യേക താളത്തില്‍ നടന്ന് ടീമംഗങ്ങളുടെ അടുത്തെത്തി ട്രോഫിയുമായി തുള്ളിച്ചാടി മെസ്സി. ഒപ്പം ചാടി സഹതാരങ്ങള്‍. പിന്നില്‍ പൂത്തിരിവെളിച്ചം. സ്റ്റേഡിയവും സ്റ്റേഡിയത്തിന്റെ ആകാശവും വെടിക്കെട്ടിന്റെ തെളിച്ചത്തില്‍ ജ്വലിച്ചുനിന്നു. ആ സമയത്തെ ആരവങ്ങള്‍ക്കും താളമേളങ്ങള്‍ക്കമപ്പുറത്ത് വലിയൊരു സന്ദേശം കൂടി ഖത്തര്‍ കൈമാറുകയാണ് ചെയ്തത്. ബിഷ്ത് മേല്‍ക്കുപ്പായം വെറുതെ നല്‍കുന്ന ഒന്നല്ല. ഒരു അറബ് രാജ്യം ആദ്യമായി ഒരു ലോകകപ്പ് ഏറ്റെടുത്ത് നടത്തി വിജയകരമായി പൂര്‍ത്തിയാക്കിയപ്പോള്‍ നല്‍കാവുന്ന ഏറ്റവും വലിയ ബഹുമതിയാണത്. ഖത്തരി പൈതൃകവും പാരമ്പര്യവുമനുസരിച്ച് ഏറ്റവും ഉന്നതപദവിയിലുള്ളവര്‍ സവിശേഷ സന്ദര്‍ഭത്തില്‍ മാത്രം ധരിക്കുന്ന വസ്ത്രമാണ് ബിഷ്ത്. ഭരണാധികാരികള്‍ക്കു പുറമെ ഉന്നത കുടുംബങ്ങളിലെ ശൈഖുമാരും വിവാഹം, പെരുന്നാള്‍ നമസ്‌കാരം, ജുമുഅ നമസ്‌കാരം എന്നിവക്കാണ് ഇത് ധരിക്കുന്നത്. വെള്ളിയാഴ്ച ഖുതുബ നിര്‍വ്വഹിക്കുന്ന ഇമാമുമാര്‍ക്കും ഈ രാജകീയ മേല്‍ക്കുപ്പായം ധരിക്കുന്നതിന് അനുമതി നല്‍കുന്നു. സഹിഷ്ണുതയുടേയും ലോകമാനവികതയുടേയും അടയാളമായ ബിഷ്ത് മെസ്സിക്ക് കൈമാറിയിരിക്കുകയാണ്. ആയതിനാല്‍ തന്നെയാണ് പല നിലകളില്‍ ഖത്തറിനെതിരെ വാര്‍ത്തപ്രചരിപ്പിക്കുന്ന ചില പാശ്ചാത്യന്‍, യൂറോപ്യന്‍ മാധ്യമങ്ങള്‍ ഇക്കാര്യത്തിലും കരട് ചികഞ്ഞെടുത്തത്. ചാനല്‍ സെവന്റെ ഹാരിസണ്‍ റീഡ് നല്‍കിയ തലക്കെട്ട് തന്നെ അസഹിഷ്ണുതയുടെ നേര്‍വാക്യമാണ്. ”ലോകകപ്പ് ട്രോഫി വിതരണ സന്ദര്‍ഭത്തില്‍ പരമ്പരാഗത അറബ് വസ്ത്രം ധരിപ്പിച്ച് ലയണല്‍ മെസ്സിയെ ഹൈജാക്ക് ചെയ്തു” എന്ന ഹെഡ്ലൈന് കീഴെ തുടക്കത്തില്‍ തന്നെ ‘വിവാദ’ ആതിഥേയ രാജ്യമെന്ന പതിവു അഭിസംബോധനയും കാണാം.

Qatar World Cup ends with greatest final and a coronation for Lionel Messi…എന്ന തലക്കെട്ടിലും ഉള്ളടക്കത്തിന്റെ തുടക്കത്തിലും നല്ലതെന്ന് വായനക്കാരെ തോന്നിപ്പിക്കുകയും അനാവശ്യ സന്ദര്‍ഭങ്ങള്‍ മെനഞ്ഞ് ഖത്തറിനെതിരെ കഥ മെനയുകയും ചെയ്യുന്നു ദി ഗാര്‍ഡിയന്‍. ലുസൈല്‍ സ്റ്റേഡിയത്തില്‍ നിന്നാണത്രെ ദി ഗാര്‍ഡിയന്‍ പ്രതിനിധി ബാര്‍ണി റോണെയുടെ ‘ഗവേഷണം’. നേരത്തെ തുടര്‍ച്ചയായി ആരോപിച്ച കുടിയേറ്റ തൊഴിലാളികളുടെ പ്രശ്നം ഊതിവീര്‍പ്പിക്കാന്‍ റോണെ മറന്നിട്ടില്ല. ആയിരക്കണക്കിന് പേര്‍ ഖത്തറില്‍ ലോകകപ്പ് സ്റ്റേഡിയം നിര്‍മ്മാണത്തിനിടെ മരിച്ചെന്ന് ആദ്യം തലവാചകം നല്‍കുകയും പിന്നീട് പത്തുവര്‍ഷത്തിനിടെ എന്ന് തിരുത്തുകയും അതിന് പോലും കൃത്യമായ തെളിവ് ഹാജരാക്കാന്‍ കഴിയാതെ പോവുകയും ചെയ്തതാണ് ഗാര്‍ഡിയന്റെ പഴയ വ്യാജ കഥ. ഇന്ത്യയിലെ ചില ദേശീയമെന്ന ബ്രാന്‍ഡ് സ്വയമണിഞ്ഞ മാധ്യമങ്ങളും ഓണ്‍ലൈന്‍ തള്ളുകാരും വായില്‍തോന്നിയത് കോതക്ക് പാട്ടായി അവതരിപ്പിക്കുന്നതില്‍ പാശ്ചാത്യരോട് മത്സരിച്ച കാഴ്ചയായിരുന്നു കഴിഞ്ഞ ദിവസവും. സ്പാനിഷ് ഫുട്ബോള്‍ താരം അകേര്‍ കാസില്ലാസിനൊപ്പം 2022 ലോകകപ്പ് സ്റ്റേഡിയത്തിലേക്ക് എത്തിച്ചത് ബോളിവുഡ് നടി ദീപികാ പദുകോണ്‍ ആയിരുന്നു. ദീപിക എത്തുന്നുവെന്നറിഞ്ഞതു മുതല്‍ അവര്‍ക്കെതിരെ അധിക്ഷേപങ്ങളുമായി ചില മാധ്യമങ്ങളും സാമൂഹ്യമാധ്യമങ്ങളിലെ ഗ്രൂപ്പുകളും രംഗത്തെത്തി.

ഖത്തര്‍ ദേശീയ ദിനം കൂടിയായിരുന്നു ലോകകപ്പ് ഫൈനല്‍ നടന്ന ഡിസംബര്‍ 18. ദിനാചരണ ചടങ്ങുകള്‍ പല നിലകളില്‍ നടന്നപ്പോള്‍ കുട്ടികളോടൊപ്പം ഫുട്ബോള്‍ കളിച്ച അമീറും ജിയാനി ഇന്‍ഫാന്റിനോയും വാര്‍ത്തകളില്‍ ഇടം നേടിയിരുന്നു. തൊട്ടുതലേ ദിനത്തില്‍ പരമ്പരഗാത ഖത്തരി നൃത്തമായ അര്‍ദയും അവര്‍ ആടി. ഒപ്പം ഫ്രഞ്ച് പ്രസിഡന്റ് ഇമ്മാനുവല്‍ മാര്‍ക്കോണും മറ്റ് പ്രതിനിധികളും വാളെടുത്ത് പിന്നോട്ടും മുന്നോട്ടും പാട്ടുപാടിയുള്ള അര്‍ദ നൃത്തത്തിന്റെ ഭാഗമായി. ദോഹ സൂഖ് വാഖിഫ്, മെട്രോ, മുശൈരിബ് ഡൗണ്‍ടൗണ്‍, പേള്‍ ഖത്തര്‍, വില്ലേജിയോ, അല്‍ബിദ ഫാന്‍വില്ലേജ്, കോര്‍ണിഷ് തീരം തുടങ്ങിയ സ്ഥലങ്ങളിലെല്ലാം അറബ് വേഷവിധാനങ്ങളില്‍ വിദേശികള്‍ സ്ഥിരം കാഴ്ചയായി മാറിയിട്ട് ദിനങ്ങളായി. അവര്‍ക്കായി വേഷം ധരിക്കാന്‍ പഠിപ്പിക്കുന്ന സ്വദേശീയരുടേയും വീഡിയോ ദൃശ്യങ്ങളും നേര്‍ക്കാഴ്ചകളും അനവധി. അറബ് രുചികളാസ്വദിക്കുന്നവരും പള്ളികള്‍ സന്ദര്‍ശിച്ച് ഇസ്ലാം മതത്തിന്റെ മാനവികതയന്വേഷിക്കുന്നവരും നിരവധിയായിരുന്നു. ഖത്തര്‍ ലോകകപ്പ് ചിഹ്നവും ഭാഗ്യചിഹ്നവുമെല്ലാം ഖത്തരി പൈതൃകപ്പെരുമയെ വിളിച്ചോതിയപ്പോള്‍ അറബ് പാരമ്പര്യത്തിന്റെ താളലയങ്ങളായി ലോകകപ്പ് ഔദ്യോഗിക സംഗീത ട്രാക്കുകളും മാറി. വിദേശ ഗായകര്‍ക്കൊപ്പം ഖത്തരി ഗായിക ആയിഷ ട്രെന്‍ഡായി മാറി. അമേരിക്കന്‍ സിനിമാ ഇതിഹാസം മോര്‍ഗാന്‍ ഫ്രീമാനൊപ്പം ഖത്തരിലെ പ്രത്യേക പരിഗണന ആവശ്യമുള്ളവരുടെ പ്രതിനിധി ശരീരത്തിന്റെ കീഴ്ഭാഗമില്ലാത്ത ഗാനിം അല്‍മുഫ്ത ഉദ്ഘാടന ചടങ്ങില്‍ അതിഥികളായി ജനങ്ങളെ സംബോധന ചെയ്യുക മാത്രമല്ല ഈ ലോകകപ്പില്‍ സാധ്യമായത്. അതൊരു തുടക്കമായിരുന്നു. ഗാനം അല്‍മുഫ്തയെപ്പോലുള്ളവരെ പരിഗണിക്കാനും അര്‍ഹമായത് നല്‍കാനുമുള്ള വിളംബരം കൂടിയായിരുന്നു അത്. ലോക കപ്പ് മത്സരങ്ങളിലുടനീളം ശാരീരിക മാനസിക അവശതയുള്ളവര്‍ സ്റ്റേഡിയങ്ങളിലും അതിഥികള്‍ക്കൊപ്പവും പ്രത്യേക ഇടവും സൗകര്യങ്ങളും നല്‍കി ആദരിക്കപ്പെട്ടു. എന്തിനധികം കഴിഞ്ഞ ദിവസം ഖത്തര്‍ ലോകകപ്പിന്റെ അനുബന്ധ പരിപാടിയായി 974 സ്റ്റേഡിയത്തില്‍ നടത്തിയ ലോകത്തെ 50 രാഷ്ട്രങ്ങള്‍ പങ്കെടുത്ത ഖത്തര്‍ ഫാഷന്‍ യുണൈറ്റഡ് എന്ന ഫാഷന്‍ഷോയിലും ഇത്തരക്കാര്‍ക്കായി പ്രത്യേക സെഷന്‍ തന്നെ അവതരിപ്പിക്കപ്പെട്ടു. ആരും വികലാംഗരായില്ല. ബധിരരോ മൂകരോ ആയില്ല. അവശരായില്ല. എല്ലാവരും ഒരേ തലത്തില്‍ പരിഗണിക്കപ്പെടുകയും അര്‍ഹമായി അംഗീകരിക്കപ്പെടുകയും ചെയ്ത ആദ്യ ലോകകപ്പ് കൂടിയായി ഖത്തര്‍ ലോകകപ്പ് മാറുമ്പോള്‍ അവയെ വംശീയമായ കണ്ണിലൂടെ തന്നെ കാണുന്നത് ചിലര്‍ തുടരുകയാണ്. ഖത്തറിന് ലോകകപ്പ് ബിഡ് കിട്ടയതു മുതല്‍ ആരംഭിച്ച ഈ വംശീയാക്രമണം വിജയകരമായി ലോകകപ്പ് അവസാനിച്ചിട്ടും അന്ത്യമില്ല. പക്ഷെ ഖത്തര്‍ ലോകകപ്പിനെത്തിയ ലക്ഷക്കണക്കിന് ആരാധകര്‍ ഇവയ്ക്ക് പല തലങ്ങളില്‍ മറുപടി പറയുന്നുണ്‍; അനുഭവത്തിന്റെ ഭൂമിയും ആകാശവും അത്രമേല്‍ വിശാലമായിരുന്നു അവര്‍ക്ക്.

2018 ല്‍ റഷ്യയില്‍ നടന്ന ലോകകപ്പില്‍ മികച്ച യുവ വാഗ്ദാനമായി തിരഞ്ഞെടുക്കപ്പെട്ട എംബാപ്പെ ഖത്തറിലെത്തിയപ്പോള്‍ ഫ്രാന്‍സിന്റെ നെടും തൂണായി. കരീം ബെന്‍സേമ പരുക്കില്‍ പുറത്തായതോടെ മുന്‍നിരയുടെ ഭാരം അദ്ദേഹം ഏറ്റെടുത്തു. കിടിലന്‍ ഗോളുകള്‍ സ്‌കോര്‍ ചെയ്തു. ക്രിസ്റ്റിയാനോ റൊണാള്‍ഡോക്ക് അവസാന ലോകകപ്പില്‍ തിളങ്ങാനായില്ല. ടീമിലെ വിവാദങ്ങള്‍ താരത്തെ തളര്‍ത്തി. ഇംഗ്ലീഷ് ക്യാപ്റ്റന്‍ ഹാരി കെയ്ന്‍, ബെല്‍ജിയത്തിന്റെ റുമേലു ലുക്കാക്കു, നെതര്‍ലന്‍ഡ്‌സിന്റെ മെംഫിസ് ഡിപ്പേ, പോളണ്ടിന്റെ റോബര്‍ട്ടോ ലെവന്‍ഡോസ്‌കി, ഡെന്മാര്‍ക്കിന്റെ ക്രിസ്റ്റിയന്‍ എറിക്‌സണ്‍, സ്പാനിഷ് താരങ്ങളായ അല്‍വാരോ മൊറാട്ട, പെഡ്രി, അന്‍സു ഫാത്തി, യുറഗ്വായിയുടെ ലുയിസ് സുവാരസ് എന്നിവരെല്ലാം നിരാശപ്പെടുത്തി.

പോര്‍ച്ചുഗലിന്റെ ഗോണ്‍സാലോ റാമോസ് ഹാട്രിക്കുമായി ശ്രദ്ധ നേടി. യുവതാരങ്ങളില്‍ മിടുക്ക് തെളിയിച്ചത് ജര്‍മനിയുടെ ജമാല്‍ മുസിയാല ആയിരുന്നു. ജര്‍മനി ആദ്യ റൗണ്ടില്‍ തന്നെ പുറത്തായതിനാല്‍ അദ്ദേഹത്തിന്റെ മികവ് കൂടുതല്‍ ലോകം കണ്ടില്ല. പക്ഷേ മൂന്ന് മല്‍സരങ്ങളില്‍നിന്നായി 19 ഡ്രിബ്ലിങുകളുമായി അദ്ദേഹം മികവ് തെളിയിച്ചു. ഇക്വഡോറിന്റെ വലന്‍സിയ, ഇംഗ്ലണ്ടിന്റെ ബുക്കായോ സാക്കേ, അമേരിക്കയുടെ ക്രിസ്റ്റ്യന്‍ പുലിസിച്ച്, അര്‍ജന്റീനയുടെ ജുലിയന്‍ അല്‍വാരസ്, ബ്രസീലിന്റെ റിച്ചാര്‍ലിസണ്‍ എന്നിവര്‍ കൈയ്യടി നേടി. അല്‍ഭുത സംഘമായ മൊറോക്കോയുടെ ഗോള്‍കീപ്പര്‍ യാസിന്‍ ബൗനോ, മധ്യനിരക്കാരന്‍ ഔനഫി, മധ്യനിരക്കാരന്‍ ഹക്കിം സിയെച്ച്, അനുഭവ സമ്പന്നനായ അഷ്‌റഫ് ഹക്കീമി എന്നിവരെ ലോകം മറക്കില്ല.

ഹോം ജഴ്‌സിയുടെ ആത്മവിശ്വാസമുണ്ടായിരുന്നു അര്‍ജന്റീനിയന്‍ സംഘത്തിന്. ആദ്യ നിമിഷങ്ങളില്‍ തന്നെ അല്‍വാരസിലുടെ അര്‍ജന്റീനയുടെ അപകടകരമായ നീക്കം കണ്ടു. പതിനാറാം മിനുട്ടില്‍ മെസി ഒരുക്കിയ അവസരം ഡി മരിയക്ക് ഉപയോഗപ്പെടുത്താനായില്ല. ഹെര്‍ണാണ്ടസിനെ പെനാല്‍ട്ടി ബോക്‌സിന് സമീപം വീഴ്ത്തിയതിന് അനുവദിക്കപ്പെട്ട ഫ്രീകിക്ക് അന്റോണിയോ ഗ്രീസ്മാന്‍ സുന്ദരമായി നല്‍കിയപ്പോള്‍ ഒലിവര്‍ ജിറോര്‍ഡ് ചാടി ഉയര്‍ന്ന് തല വെച്ചിരുന്നു. പക്ഷേ പന്ത് ക്രോസ് ബാറിലൂടെ പുറത്തായി. പിറകെ അര്‍ജന്റ്റിന സ്‌ക്കോര്‍ ചെയ്തു.

ഡി മരിയ ഇടത് പാര്‍ശ്വത്തിലുടെ ബോക്‌സില്‍ കയറിയപ്പോള്‍ പിറകില്‍ നിന്നും ഉസ്മാന്‍ ഡെംപാലേ വീഴ്ത്തി.ഉടനടി റഫറി പെനാല്‍ട്ടി വിളിച്ചുമെസി സുന്ദരമായി പ്ലേസിംഗ് ഷോട്ടില്‍ പന്ത് വലയിലാക്കി. ചാമ്പ്യന്‍ഷിപ്പില്‍ നായകന്റെ ആറാമത് ഗോള്‍. പക്ഷേ അതിമനോഹര ഗോള്‍ വരാനുണ്ടായിരുന്നതേയുള്ളു. ആറ് പേരുടെ മാജിക്. സ്വന്തം ഹാഫില്‍ നിന്ന് കിട്ടിയ പന്തില്‍ ചാമ്പ്യന്‍ഷിപ്പിലെ അതിമനോഹര ഗോള്‍. പരുക്ക് കാരണം പുറത്തിരുന്ന ഡി മരിയയുടെ പവന്‍മടങ്ങ് തിരിച്ചുവരവ്.

രണ്ടാം പകുതിയും അര്‍ജന്റീനക്കാര്‍ സ്വന്തമാക്കുന്നത് കണ്ടപ്പോള്‍ ഫ്രാന്‍സ് ചിത്രത്തില്‍ ഇല്ലെന്നാണ് കരുതിയത്. എന്നാല്‍ അര്‍ജന്റിനിയന്‍ ഡിഫന്‍സിന്റെ പിഴവില്‍ പിറന്ന പെനാല്‍ട്ടി കിക്ക് കിലിയന്‍ എംബാപ്പേ ഗോളാക്കി. താമസിയാതെ കിംഗ് സ് ലേ കോമാന്‍ നല്‍കിയ പന്ത് എംബാപ്പേ മനോഹരമായി തിരിച്ച് വിട്ടു. കളി 2-2 ലേക്ക് മാറി. പിന്നെ അന്തിമ നിമിഷങ്ങളിലേക്ക്. മെസിയുടെ ബുളറ്റ് ഷോട്ട് ലോറിസ് കുത്തിയകറ്റി. മല്‍സരം അധികസമയത്തേക്ക്.

ഗ്യാലറി ഇളകി മറിഞ്ഞ നിമിഷങ്ങളിലുടെ ടെന്‍ഷന്‍ അതിന്റെ പരകോടിയില്‍. അധിക സമയത്തിന്റെ ആദ്യ പകുതിയില്‍ ഗോളില്ല. മെസിയുടെ ഗോളില്‍ അര്‍ജന്റീന ലീഡ് നേടിയെങ്കിലും എംബാപ്പേയുടെ പെനാല്‍ട്ടിയില്‍ ഫ്രാന്‍സ് തിരികെയെത്തി. പിന്നെ ഷൂട്ടൗട്ട്. ഭാഗ്യനിര്‍ഭാഗ്യങ്ങളുടെ അവസരം. ആദ്യം എംബാപ്പേഗോള്‍. പിറകെ മെസി. അതും ഗോള്‍. കോമാന്‍മാര്‍ട്ടിനസ് രക്ഷപ്പെടുത്തുന്നു. ഡിബാലേപിഴചില്ല. അര്‍ജന്റീനക്ക് ലീഡ്. തുമേനിപന്ത് പുറത്ത്. അര്‍ജന്റീനക്കായി പരേഡസ്‌ലഗാള്‍. മോലോമാനിക്ക് പിഴച്ചില്ല. അവസാന കിക്ക് അര്‍ജന്റീന ഗോളാക്കികപ്പ്.

ഫ്രഞ്ച് സൂപ്പര്‍താരം കരീം ബെന്‍സേമ ഫൈനലില്‍ ഇറങ്ങുമെന്ന പ്രപചാരണം കൊഴുക്കുമ്പോഴും അദ്ദേഹം ഖത്തറിലെത്തിയിട്ടില്ല എന്നാണ് സൂചന. സ്പാനിഷ് ക്ലബായ റയല്‍ മാഡ്രിഡ് ബെന്‍സേമക്ക് ഖത്തറില്‍ പോവാന്‍ അനുമതി നല്‍കിയതായി സ്പാനിഷ് പത്രം റിപ്പോര്‍ട്ട് ചെയ്തപ്പോഴും ഇത് സംബന്ധമായ ചോദ്യങ്ങള്‍ക്ക് കോച്ച് ദിദിയര്‍ ദെഷാംപ്‌സ് ഇന്നലെയും വ്യക്തമായി ഉത്തരം നല്‍കിയില്ല. അര്‍ജന്റീനിയന്‍ നിരയില്‍ കാര്യമായ മാറ്റങ്ങള്‍ക്ക് സാധ്യതയില്ല. ലിയോ മെസിയുടെ നേതൃത്വത്തില്‍ തന്നെയായിരിക്കും ടീം. ആക്രമണോത്സുകമായിരിക്കില്ല ഫൈനല്‍.

രണ്ട് ടീമുകളും ജാഗ്രതാ ഫുട്‌ബോളിലേക്ക് പോവുമ്പോള്‍ പെട്ടെന്ന് ലഭിക്കുന്ന അവസരങ്ങളെ പ്രയോജനപ്പെടുത്തുകയായിരിക്കും പ്രധാനം. അന്റോണിയോ ഗ്രിസ്മാന്‍ എന്ന മധ്യനിരക്കാരനെ കേന്ദ്രീകരിച്ചായിരിക്കും ഫ്രാന്‍സെങ്കില്‍ മെസി തന്നെയാകും അര്‍ജന്റീനക്കാരുടെ വജ്രായുധം. മെസിരക്കൊരു ലോകകപ്പ് എന്നതാണ് ടീമിന്റെ മുദ്രാവാക്യം. ഇതിനായി അന്തിമനിമിഷം വരെ പോരടിക്കുമെന്നാണ് ഗോള്‍ക്കീപ്പര്‍ എമിലിയാനോ മാര്‍ട്ടിനസ് വ്യക്തമാക്കിയത്. ഫ്രാന്‍സിനാവട്ടെ മൂന്ന് വലിയ താരങ്ങളുടെ അഭാവത്തിലും കിരീടം നേടാനായാല്‍ അത് വലിയ അംഗീകാരമാവും. നായകനായി 1998ലും കോച്ചായി 2018ലും കിരീടം സ്വന്തമാക്കിയ ദെഷാംപ്‌സിന് ഇന്നും വിജയിക്കാനായാല്‍ ലോകകപ്പ് ചരിത്രത്തില്‍ വിശ്രുത സ്ഥാനവും നേടാം.

ടിക്കറ്റുകളൊന്നും ബാക്കിയില്ലെന്ന് സംഘാടകര്‍ വ്യക്തമാക്കി കഴിഞ്ഞു. അന്തിമ നിമിഷത്തിലും എന്ത് വില കൊടുത്തും ടിക്കറ്റ് സ്വന്തമാക്കാനുള്ള നെട്ടോട്ടത്തിലാണ് ആരാധകര്‍. അര്‍ജന്റീനയില്‍ നിന്ന് കൂടുതല്‍ പേര്‍ ഇന്നലെയെത്തിയപ്പോള്‍ ഇവരില്‍ ഭൂരിപക്ഷത്തിനും ടിക്കറ്റില്ല. ഫ്രാന്‍സുകാര്‍ എണ്ണത്തില്‍ കുറവാണ്. ഗ്യാലറി അര്‍ജന്റീനിയന്‍ ആരാധകരെ കൊണ്ട് നിറയുമെന്നറിയുന്നതിനാല്‍ ഫ്രാന്‍സ് അക്കാര്യത്തില്‍ ജാഗ്രത പാലിക്കും. ഗ്യാലറിയിലെ ആരവങ്ങളല്ല തങ്ങളെ നയിക്കുന്നതെന്ന് ഒലിവര്‍ ജിറോര്‍ഡ് പറഞ്ഞത് അര്‍ജന്റീനക്കാരെ ലക്ഷ്യമിട്ടാണ്.

ലയണല്‍ മെസിയും ക്രിസ്റ്റ്യാനോ റൊണാള്‍ഡോയും ലോക ഫുട്‌ബോളില്‍ വാഴ്ത്തപ്പെട്ട കാലത്തു തന്നെയാണ് ലൂക്കാ മോഡ്രിച്ച് ക്രൊയേഷ്യയ്‌ക്കൊപ്പം ഫുട്‌ബോളിലെ നിശബ്ദ വിപ്ലവം തീര്‍ത്തത്. മെസിയേയും സി.ആര്‍ 7നെയും പോലെ ആഘോഷിക്കപ്പെട്ടില്ലെങ്കിലും മോഡ്രിച്ച് മിഡ്ഫീല്‍ഡില്‍ തന്ത്രങ്ങള്‍ മെനഞ്ഞ് നിശ്ശബ്ദ വിപ്ലവം സൃഷ്ടിച്ചു. ഡാവര്‍ സുക്കറും സ്യോനാവാര്‍ ബോബനും 98ല്‍ ക്രൊയേഷ്യയെ ലോകത്തിന് വിസ്മയമാക്കിയെങ്കില്‍ ഇന്ന് ലോക ഫുട്‌ബോളില്‍ ക്രൊയേഷ്യ നില്‍ക്കുന്നതിന് പിന്നില്‍ സൗമ്യനായ മോഡ്രിച്ചെന്ന 37കാരനാണ്. പോര്‍ച്ചുഗല്‍ കോച്ചുമായി പോരാടി ടീമിലിടം പോലും കിട്ടാതെ തകര്‍ന്ന മനസുമായി ക്രിസ്റ്റ്യാനോ ലോകവേദിയില്‍ നിന്ന് മടങ്ങി. മെസി ഇന്ന് കലാശക്കളിക്ക് ഇറങ്ങുന്നു. എന്നാല്‍ മോഡ്രിച്ച് മൊറോക്കോയുമായുള്ള ലൂസേഴ്‌സ് ഫൈനലിനു ശേഷം ലോകകപ്പിനോട് വിടചൊല്ലി. തല ഉയര്‍ത്തി അഭിമാനത്തോടെ തന്നെ. പ്രതിസന്ധികളോട് പടവെട്ടി അതിജീവിച്ച പോരാളിയായ ലൂക്ക മോഡ്രിച്ചിന് അങ്ങിനെ മാത്രമേ സാധിക്കൂ.

മെസി മാജിക്ക് കണ്ട അര്‍ജന്റീനക്കെതിരായ മത്സരത്തില്‍ പകരക്കാരനെ ഇറക്കാനായി റഫറി നമ്പര്‍ ഉയര്‍ത്തിയപ്പോള്‍ അവിശ്വാസത്തോടെ ലുസൈല്‍ സ്‌റ്റേഡിയം വലിയ സ്‌ക്രീനിലേക്ക് ഒന്നു കൂടി നോക്കി. ലൂക മോഡ്രിച്ചിന് പകരം ലോവ്‌റോ മായര്‍. സ്‌റ്റേഡിയം എഴുന്നേറ്റ് നിന്നാണ് മോഡ്രിച്ചിനോട് ആദരവു കാണിച്ചത്. 37-ാം വയസിലും 20കാരന്റെ ചുറുചുറുക്കോടെ കളിക്കുന്ന മോഡ്രിച്ചിന് ഇത് അവസാന സെമി ഫൈനലായിരുന്നു. മോഡ്രിച്ച് 2024ല്‍ ജര്‍മനിയില്‍ നടക്കുന്ന യൂറോകപ്പ് വരെ ടീമില്‍ തുടരണമെന്നാണ് തന്റെ ആഗ്രഹമെന്ന് ക്രൊയേഷ്യന്‍ കോച്ച് ഡാലിച് പറയുന്നു. എങ്കിലും ഇക്കാര്യം മോഡ്രിച്ചിന് വിടുന്നു. അദ്ദേഹമാണ് തീരുമാനിക്കേണ്ടത്. 2017 വരെ 11 വര്‍ഷത്തോളം ലോക ഫുട്‌ബോളര്‍ക്കുള്ള ബാലന്‍ഡിഓര്‍ പുരസ്‌കാരം മെസിയും റോണാള്‍ഡോയും പങ്കിട്ടപ്പോള്‍ ആരും എതിരാളികളായി ഉണ്ടായിരുന്നില്ല. ഇത് ഭേദിച്ചാണ് മധ്യനിരക്കാരന്‍ ലൂക മോഡ്രിച്ചിന്റെ വരവ്.

പല കളിക്കാരെയും പോലെ മെസിയുടേയും റൊണാള്‍ഡോയുടേയും നിഴലില്‍ കാണാതെ പോയ മികച്ച താരമായിരുന്നു മോഡ്രിച്. പക്ഷേ 2018ല്‍ റയല്‍ മാഡ്രിഡിനെ മൂന്നാം തവണ ചാമ്പ്യന്‍സ് ലീഗ് കിരീടം നേടിക്കൊടുക്കുന്നതിലേക്കും ക്രൊയേഷ്യയെ അപ്രതീക്ഷിതമായി ലോകകപ്പ് ഫൈനലിലെത്തിക്കുകയും ചെയ്തപ്പോള്‍ മികച്ച താരം ആരെന്നതിന് കടുത്ത വിമര്‍ശകര്‍ക്ക് പോലും മോഡ്രിച്ച് എന്ന നാമത്തെ എതിര്‍ക്കാനായില്ല. നാലു വര്‍ഷത്തിനിപ്പുറം മൊറോക്കോയ്‌ക്കെതിരായ ക്രൊയേഷ്യ ലൂസേഴ്‌സ് ഫൈനല്‍ കളിക്കുമ്പോഴും ലൂക മോഡ്രിച്ച് തന്നെയാണ് ക്രൊയേഷ്യയുടെ നെടുംതൂണ്‍. അര്‍ജന്റീനക്കെതിരായ സെമി ഫൈനല്‍ വരെ മോഡ്രിച്ചായിരുന്നു ഖത്തര്‍ ലോകകപ്പില്‍ പന്ത് തിരിച്ചുപിടിച്ചവരില്‍ മുമ്പന്‍. ബ്രസീലിനെതിരായ ക്വാര്‍ട്ടറില്‍ 16 തവണ എതിരാളികളുമായി പന്തിന് പോരടിച്ചതില്‍ ഒമ്പതും വിജയിച്ചു.

139 ടച്ചുകളാണ് 37-ാം വയസിലും അന്ന് മോഡ്രിച്ച് നേടിയത്. പ്രതിസന്ധികളില്‍ പതറാതെ അതിജീവനത്തിന്റെ പാത സ്വയം കണ്ടെത്തിയ പോരാളിയാണ് മോഡ്രിച്ച്. ആറു വയസുള്ളപ്പോള്‍ മുത്തച്ഛനെ സെര്‍ബ് റിബലുകള്‍ വെടിവെച്ചു കൊന്നതിന് സാക്ഷിയാകേണ്ടി വന്നയാളാണ് മോഡ്രിച്ച്. വീട് ചുട്ടെരിക്കപ്പെട്ടു. ജന്‍മനാട് വിട്ടോടേണ്ടിവന്നു. അഭയാര്‍ഥിയായി മാതാപിതാക്കളോടൊപ്പം താമസിച്ച ഹോട്ടലിന്റെ മുറ്റത്ത് പന്ത് തട്ടി തുടങ്ങിയ പയ്യന്‍ ലോകകപ്പ് ആരവങ്ങള്‍ക്ക് നടുവില്‍ നിന്നും മടങ്ങുമ്പോള്‍ നഷ്ടപ്പെട്ടവനായല്ല വെട്ടിപ്പിടിച്ചവനായാണ് മടക്കം. മൃദുഭാഷിയും വിനയാന്വിതനുമായ മനുഷ്യന്‍. കോലാഹലങ്ങള്‍ക്ക് പിന്നാലെ പോകാതെ ഒതുങ്ങിക്കൂടിയുള്ള ജീവിതം. എല്ലാവരെയുംകൊണ്ട് നല്ലത് പറയിപ്പിച്ച വ്യക്തിത്വം. മെസിയുടെ അവസാന ലോകകപ്പ് മത്സരത്തിനായി ലോകം കാത്തിരിക്കുമ്പോള്‍ ലോകകപ്പ് വേദിയില്‍ നിന്നും ലൂക്ക മോഡ്രിച്ച് നിശബ്ദനായി മടങ്ങുന്നു. ഒരു പോരാളിയുടെ മടക്കം.

അതേസമയം, 1986ന് ശേഷം ലോകകപ്പ് കിരീടമെന്ന സ്വപ്‌നത്തിലേക്കാണ് മെസിയും സംഘവും ബൂട്ട് കെട്ടുന്നത്. ലോകകപ്പില്‍ മൂന്ന് തവണയാണ് ഇരു ടീമുകളും നേര്‍ക്കുനേര്‍ വന്നത്. രണ്ട് തവണയും ജയം അര്‍ജന്റീനയ്‌ക്കൊപ്പമായിരുന്നു. ഒരു തവണ മാത്രമാണ് ഫ്രാന്‍സിന് അര്‍ജന്റീനയെ തോല്‍പ്പിക്കാനായത്. 35കാരനായ ലിയോ മെസിക്ക് കലാശപ്പോര് അദ്ദേഹത്തിന്റെ അവസാന ലോകകപ്പ് മത്സരമായിരിക്കും. ഏഴ് തവണ ലോക ഫുട്‌ബോളര്‍ക്കുള്ള ബാലന്‍ ഡി ഓര്‍ പുരസ്‌കാരം നേടിയ മെസിക്ക് ലോകകപ്പ് ഒഴികെയുള്ള കപ്പുകളെല്ലാം നേടാന്‍ സാധിച്ചിട്ടുണ്ട്. അതിനാല്‍ തന്നെ മെസിയുടെ അവസാന ലോകകപ്പ് മത്സരത്തില്‍ അദ്ദേഹം കപ്പ് വാനിലേക്കുയര്‍ത്തുമെന്ന പ്രതീക്ഷയില്‍ കളി എഴുത്തുകാര്‍ ഇപ്പോള്‍ തന്നെ കുറിപ്പ് തുടങ്ങിക്കഴിഞ്ഞു.

ഫൈനല്‍ വരെയുള്ള പോരാട്ടങ്ങളില്‍ ഇരു ടീമുകളുടെയും പ്രകടനം ഒപ്പത്തിനൊപ്പമാണ്. എന്നാല്‍ കണക്കുകളില്‍ നേരിയ മുന്‍തൂക്കം അര്‍ജന്റീനയ്ക്കുണ്ട്. ഈ ലോകകകപ്പില്‍ ഇതുവരെ ആറ് മത്സരങ്ങളാണ് ഇരു ടീമുകളും പൂര്‍ത്തിയാക്കിയത്. ഓരോ മത്സരങ്ങള്‍ ഇരു ടീമുകളും തോറ്റു. ഫൈനല്‍ വരെ പതിമൂന്ന് തവണ ഫ്രാന്‍സ് എതിര്‍ വല കുലുക്കിയപ്പോള്‍ അര്‍ജന്റീന പന്ത്രണ്ട് ഗോളുകള്‍ നേടി. അഞ്ചു ഗോളുകള്‍ വീതം ഇരു ടീമുകളും വഴങ്ങിയിട്ടുണ്ട്. എന്നാല്‍ ക്ലീന്‍ ഷീറ്റിന്റെ കാര്യത്തില്‍ അര്‍ജന്റീനയാണ് മുന്നില്‍. മൂന്ന് തവണ അര്‍ജന്റീനന്‍ പ്രതിരോധം എതിരാളികളെ ഗോള്‍ അടിക്കാന്‍ അനുവദിക്കാതെ കോട്ട കാത്തു. ഫ്രാന്‍സ് ആകട്ടെ ടൂര്‍ണമെന്റില്‍ ഒരു വട്ടം മാത്രമാണ് ഗോള്‍ വഴങ്ങാതിരുന്നത്. മൊറോക്കോയ്‌ക്കെതിരെ സെമിയിലായിരുന്നു ആ പ്രകടനം. എതിര്‍ പോസ്റ്റില്‍ ഭീതി വിതക്കുന്നതില്‍ ഫ്രഞ്ച് പടയാണ് അര്‍ജന്റീനയെക്കാളും മുന്നില്‍. 91 തവണയാണ് ഫ്രാന്‍സ് എതിരാളികളുടെ വലകുലുക്കാന്‍ ശ്രമിച്ചത്. അതില്‍ 30 ശ്രമങ്ങളും ലക്ഷ്യം കണ്ടു. അര്‍ജന്റീനയുടെ കണക്കില്‍ 83 ശ്രമങ്ങളില്‍ 39 എണ്ണം ലക്ഷ്യത്തിലേക്കെത്തി.

ഫ്രാന്‍സിനായി ഈ ലോകകപ്പില്‍ കൂടുതല്‍ ഗോളുകള്‍ നേടിയ (അഞ്ച്) കിലിയന്‍ എംബാപ്പെയാണ് കൂടുതല്‍ ഗോള്‍ ശ്രമങ്ങള്‍ നടത്തിയത്. 25 തവണയാണ് എംബാപ്പെ ഗോളിനായി ശ്രമിച്ചത്. 27 ഗോള്‍ ശ്രമത്തില്‍ നിന്നാണ് മെസിയുടെ അഞ്ച് ഗോള്‍. അര്‍ജ ന്റീന ടീമില്‍ സഹതാരങ്ങളുടെ ഗോളിന് വഴിയൊരുക്കിയവരുടെ കണക്കിലും മെസിയാണ് മുന്നില്‍. മൂന്ന് തവണ സഹതാരങ്ങള്‍ക്ക് ഗോള്‍ അടിക്കാ ന്‍ മെസി അവസരം ഒരുക്കി. ഫ്രഞ്ച് പടയില്‍ ഇത് അന്റോയി ന്‍ ഗ്രീസ്മാനാണ്. മൂന്ന് തവണ. ഫ്രാന്‍സ് മൊത്തം കളികളിലായി 3140 പാസുകള്‍ക്ക് ശ്രമിച്ചു. അതില്‍ 2773 പാസുകള്‍ വിജയകരമായി പൂര്‍ത്തിയാക്കി. 399 പാസ്സുകളുമായി യുവതാരം ഔറേലിയന്‍ ചൗമേനിയാണ് വ്യക്തികളില്‍ മുന്നില്‍. അര്‍ജന്റീന കളിച്ച 3727 പാസുകളില്‍ 3297 എണ്ണം വിജയകരമായി പൂര്‍ത്തിയാക്കി. റോഡ്രിഗോ ഡി പോളാണ് 476 പാസുമായി അര്‍ജന്റീനിയന്‍ നിരയില്‍ മുന്നില്‍. ഇവര്‍ ഇരുവരും തന്നെയാണ് ഇരു ടീമുകള്‍ക്കായും ലോകകപ്പില്‍ കൂടുതല്‍ ദൂരം താണ്ടിയിരിക്കുന്നതും. ചൗമേനി 63.4 കിലോമീറ്റര്‍ ഓടിയപ്പോള്‍ ഡി പോള്‍ 61.03 കിലോമീറ്റര്‍ ഓടി. ക്രോസുകളുടെ എണ്ണത്തില്‍ ഫ്രാന്‍സിനായി ഗ്രീസ്മാനും (37) അര്‍ജന്റീനയ്ക്കായി എയ്ഞ്ചല്‍ ഡി മരിയയുമാണ് (24) മുന്നില്‍.

പതിവ് തണുപ്പനായ മെസിയല്ല ദോഹയിലെ ലിയോ മെസി. സബലേറ്റ എന്ന മുന്‍ അര്‍ജന്റീനക്കാരന്‍ ഉപദേശിച്ചത് പോലെ നായകന്‍ കടന്നാക്രമണകാരിയാവുകയാണ്. ആവശ്യം വന്നാല്‍ അത്യാക്രമണത്തിലേക്ക് പോവണമെന്നതായിരുന്നു സബലേറ്റയുടെ നിര്‍ദ്ദേശം. കളത്തില്‍ ശാന്തനാണ് സാധാരണ മെസി. ഇനിയൊരു ലോകകപ്പ് ഫൈനല്‍ മെസിക്കില്ലെന്നിരിക്കെ കപ്പ് സ്വന്തമാക്കാന്‍ മൈതാനത്ത് കൂടുതല്‍ ആക്രമണത്തിനാണ് സീനിയേഴ്‌സിന്റെ ഉപദേശം. ദോഹയിലെ മെസി ആത്മവിശ്വാസത്തിന്റെ പ്രതിരൂപമാണ്. ആദ്യ മല്‍സരത്തില്‍ സഊദി അറേബ്യക്കെതിരായ തോല്‍വിക്ക് ശേഷം അദ്ദേഹം അടിമുടിയങ്ങ് മാറി. നെതര്‍ലന്‍ഡ്‌സിനെതിരായ മല്‍സരത്തില്‍ റഫറിയോട് കയര്‍ത്തു അദ്ദേഹം. മഞ്ഞക്കാര്‍ഡുകള്‍ റഫറി വാരി വിതറിയപ്പോള്‍ അതിലൊന്ന് മെസിയിലുമെത്തിയിരുന്നു. ആ മല്‍സരത്തിന് ശേഷം നടത്തിയ വാര്‍ത്താ സമ്മേളനത്തിലും അദ്ദേഹം ക്ഷുഭിതനായിരുന്നു. സെമി ഫൈനലില്‍ ക്രൊയേഷ്യക്കെതിരെ പതിവ് മെസിയായിരുന്നില്ല ഗംഭീരമായി പന്ത് വാങ്ങിയും നല്‍കിയും കളിച്ചു. ആ മെസിയെയാണ് ആരാധകര്‍ ഫൈനലില്‍ പ്രതീക്ഷിക്കുന്നത്. ഇന്നലെ പരിശീലനത്തില്‍ നായകന്‍ സജീവമായിരുന്നു. ഇന്നുമുണ്ട് പരിശീലനം.

ഗ്രൂപ്പ് ഘട്ടത്തില്‍ ഫ്രാന്‍സ്-ഡെന്‍മാര്‍ക് മത്സരവും അര്‍ജന്റീന-ഓസ്‌ട്രേലിയ പ്രീ ക്വാര്‍ട്ടര്‍ മത്സരവും നിയന്ത്രിച്ചത് സൈമണാണ്. ലോകകപ്പില്‍ ഇതുവരെ ചുവപ്പു കാര്‍ഡും പെനാല്‍റ്റിയും അനുവദിക്കാത്ത റഫറിയാണ് ഇദ്ദേഹം. എന്നാല്‍ രണ്ട് കളികളിലായി അഞ്ചു മഞ്ഞക്കാര്‍ഡുകള്‍ ഇദ്ദേഹം പുറത്തെടുത്തിരുന്നു.

നേരത്തെ നോക്കൗട്ട് ഘട്ടത്തിലെ പല മത്സരങ്ങളിലും റഫറിമാര്‍ക്കെതിരെ വലിയ ആക്ഷേപങ്ങള്‍ ഉയര്‍ന്നിരുന്നു. അര്‍ജന്റീന-നെതര്‍ലന്‍ഡ്‌സ് മത്സരം നിയന്ത്രിച്ച സ്പാനിഷ് റഫറി അന്റോണിയോ മത്യാവു ലാഹോസിനെതിരേ അര്‍ജന്റീന താരങ്ങള്‍ രൂക്ഷ വിമര്‍ശനമാണ് ഉന്നയിച്ചത്. മത്സരത്തില്‍ 18 കാര്‍ഡുകളാണ് റഫറി പുറത്തെടുത്തിരുന്നത്. ഫ്രാന്‍സിന് എതിരായ സെമിയില്‍ തോറ്റ് പുറത്തായതിന് പിന്നാലെ മത്സരം നിയന്ത്രിച്ച റഫറി സീസര്‍ റാമോസിനെതിരേ ഫിഫയ്ക്ക് പരാതിയുമായി മൊറോക്കോ രംഗത്തെത്തിയിരുന്നു. അര്‍ജന്റീന-ക്രൊയേഷ്യ മത്സരത്തിലും പോര്‍ച്ചുഗല്‍-മൊറോക്കോ മത്സരത്തിലും റഫറിമാര്‍ക്കെതിരേ പരാതികള്‍ ഉയര്‍ന്നിരുന്നു.

ചരിത്രത്തില്‍ ആദ്യമായാണ് ഒരു ആഫ്രിക്കന്‍ അറബ് ടീം ലോകകപ്പിന്റെ സെമി കളിക്കുന്നത്. അല്‍ബൈത്ത് സ്‌റ്റേഡിയത്തില്‍ നടന്ന ടീമിന്റെ സെമി പോരാട്ടം ആസ്വദിക്കാനെത്തിയവരില്‍ ഭൂരിഭാഗവും മടങ്ങിയിട്ടില്ല. അവധി ദിവസങ്ങളില്‍ അവര്‍ ഖത്തര്‍ കണ്ടു. ഇന്ന് ലൂസേഴ്‌സ് ഫൈനലില്‍ സ്വന്തം ടീം വിജയിക്കുന്നതും കണ്ട് മടങ്ങാനാണ് മോഹമെന്ന് മൊറോക്കോക്കാരനായ അലി വാസിവ് മഹ്തും ‘ചന്ദ്രിക’യോട് പറഞ്ഞു. ക്രൊയേഷ്യക്കാരില്‍ ഭൂരിഭാഗവും പക്ഷേ മടങ്ങിയതായാണ് റിപ്പോര്‍ട്ട്.

1998ലെ ലോകകപ്പ് ലൂസേഴ്‌സ് ഫൈനലില്‍ പാട്രിക് ക്ലുവര്‍ട്ട് ഉള്‍പ്പെടുന്ന വിഖ്യാത ഡച്ച് സംഘത്തെ 1 – 2ല്‍ തോല്‍പ്പിച്ച് നേടിയ മൂന്നാം സ്ഥാനത്തിന് ശേഷം ക്രൊയേഷ്യ അവസാന ലോകകപ്പില്‍ രണ്ടാം സ്ഥാനത്ത് വരെയെത്തിയിരുന്നു . അവരുടെ നായകന്‍ ലുക്കാ മോഡ്രിച്ചിന് ഇന്ന് അവസാന ലോകകപ്പ് മല്‍സരം കൂടിയാണിത്.