qatari – Chandrika Daily

ഇന്ത്യയില്‍ ഖത്തരി പൗരന് മര്‍ദ്ദനമേറ്റ സംഭവം; പരിശോധിച്ചുവരുന്നതായി എംബസി

chandrika — Mon, 16 Jul 2018 08:28:27 +0000

ദോഹ:കര്‍ണാടകയിലെ ബിദാറില്‍ ഖത്തരി പൗൗരന് മര്‍ദ്ദനമേറ്റ സംഭവഹത്തില്‍ കാര്യങ്ങള്‍ പരിശോധിച്ചുവരുന്നതായി ന്യൂഡല്‍ഹിയിലെ ഖത്തര്‍ എംബസി അറിയിച്ചു. ഖത്തരി പൗരന് മര്‍ദ്ദനമേറ്റകാര്യം എംബസി സ്ഥിരീകരിച്ചിട്ടുണ്ട്. ഇന്ത്യയിലെ ബന്ധപ്പെട്ട അതോറിറ്റികളുമായി ഇക്കാര്യത്തില്‍ തുടര്‍നടപടികള്‍ സ്വീകരിച്ചുവരികയാണെന്ന് ഖത്തര്‍ എംബസി ട്വിറ്ററില്‍ പോസ്റ്റ് ചെയ്ത സന്ദേശത്തില്‍ വ്യക്തമാക്കി.

മുഹമ്മദ് അസം(32)

കഴിഞ്ഞ ദിവസമാണ് ആള്‍കൂട്ടത്തിന്റെ ആക്രമണത്തില്‍ ഗുരുതരമായി പരിക്കേറ്റ ഹൈദരാബാദ് സ്വദേശിയും ഗൂഗിള്‍ കമ്പനിയില്‍ സോഫ്റ്റ്‌വെയര്‍ എഞ്ചിനിയറുമായിരുന്ന മുഹമ്മദ് അസം(32) ആസ്പത്രിയില്‍വെച്ച് മരിച്ചത്. ഖത്തറില്‍ നിന്ന് കൊണ്ടുവന്ന മിഠായികള്‍ തെരുവിലെ സ്‌കൂളിന് സമീപത്ത് വെച്ച് കുട്ടികള്‍ക്ക് വിതരണം ചെയുന്നതിനിടെയാണ് ഇവര്‍ക്കുനേരെ ആക്രമണമുണ്ടായത്. ആക്രമത്തില്‍ അസമിന്റെ സുഹൃത്തും ഖത്തര്‍ സ്വദേശിയുമായ മുഹമ്മദ് സലാമിന് പരിക്കേല്‍ക്കുകയായിരുന്നു. ഇദ്ദേഹത്തെ അടുത്ത ആസ്പത്രിയില്‍ ചികിത്സയിലാണ്. കുട്ടികളെ തട്ടികൊണ്ടു പോകുന്നതുമായി ബന്ധപ്പെട്ട് വ്യജ പ്രചാരണം നടക്കുന്ന പ്രദേശത്താണ് ഇവര്‍ മിഠായി വിതരണം നടത്തിയത്. ഇതാണ് ആള്‍ക്കൂട്ട ആക്രമത്തിന് കാരണമായതെന്ന് പ്രാദേശിക വൃത്തങ്ങളെ ഉദ്ധരിച്ച് ഇന്ത്യന്‍ മാധ്യമങ്ങള്‍ റിപ്പോര്‍ട്ട് ചെയ്തു.

അതേസമയം ഇന്ത്യയിലേക്ക് യാത്ര ചെയ്യുന്ന ഖത്തരി പൗരന്‍മാര്‍ തങ്ങളുടെ പേരുകള്‍ ന്യൂഡല്‍ഹിയിലെ എംബസിയില്‍ രജിസ്റ്റര്‍ ചെയ്യണമെന്നും എംബസി നിര്‍ദേശിച്ചു. എന്തെങ്കിലും അടിയന്തര സാഹചര്യങ്ങളുണ്ടായാല്‍ വേഗത്തില്‍ ഇടപെടാന്‍ ഇതിലൂടെ സാധിക്കും. കഴിഞ്ഞദിവസമാണ് ഖത്തരി പൗരനെ ബിദാറില്‍വെച്ച് ഒരു സംഘം ചേര്‍ന്ന് മര്‍ദ്ദിച്ചത്.

കര്‍ണാടക സന്ദര്‍ശനത്തിനിടെ ഒരു കൂട്ടം ആളുകള്‍ ചേര്‍ന്ന് മര്‍ദിക്കുകയായിരുന്നുവെന്ന് ആക്രമണത്തിനിരയായ ഖത്തരി പൗരനും ട്വിറ്ററില്‍ പോസ്റ്റ് ചെയ്ത മെസേജില്‍ വ്യക്തമാക്കിയിരുന്നു. സംഭവത്തെക്കുറിച്ച് കര്‍ണാടക പോലീസ് അന്വേഷിച്ചുവരികയാണ്. ഇന്ത്യയിലെ ഖത്തര്‍ എംബസി ഇക്കാര്യത്തില്‍ തുടര്‍നിരീക്ഷണം നടത്തിവരുന്നുണ്ട്.

ഖത്തരി പുരുഷന്‍മാര്‍ക്ക് സൈനിക സേവനം നിര്‍ബന്ധം; പ്രായ പരിധി 18നും 35നും ഇടക്ക്

chandrika — Fri, 06 Apr 2018 11:03:26 +0000

ദോഹ: ഖത്തരി പൗരന്‍മാരായ പുരുഷന്‍മാര്‍ക്ക് സൈനിക സേവനം നിബന്ധമാക്കി. 18നും 35നും വയസ്സന് ഇടയില്‍ പ്രായമാകുകയോ ഹൈസ്‌കൂള്‍ ഡിപ്ലോമ തത്തുല്യ പഠനം നേടുകയോ ചെയ്തവര്‍ക്കാണ് നിര്‍ബന്ധിത സൈനിക സേവനം നിയമം മൂലം പ്രാബല്യത്തിലാക്കിയത്. രണ്ട് വ്യവസ്ഥകളിലും ആദ്യം ഏതാണോ സംഭവിക്കുന്നത് അതിനനുസരിച്ചാണ് സൈനിക സേവനം നടത്തേണ്ടത്. ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍താനിയാണ് ഈ നിയമം ബുധനാഴ്ച പുറത്തിറക്കിയത്. സൈനിക സേവനത്തിന് പങ്കെടുക്കാത്തവര്‍ക്ക് സര്‍ക്കാരിന്റെ ആനുകൂല്യങ്ങള്‍ ലഭിക്കില്ലെന്ന് നിയമത്തില്‍ വ്യവസ്ഥ ചെയ്തിട്ടുണ്ട്. സര്‍ക്കാര്‍ ജോലികള്‍, സ്വതന്ത്ര വ്യാപാരം നടത്തുന്നതിനുള്ള ലൈസന്‍സുകള്‍, മറ്റ് പ്രവര്‍ത്തനങ്ങള്‍ക്കായുള്ള സര്‍ക്കാര്‍ രജിസ്‌ട്രേഷന്‍ തുടങ്ങിയവയൊന്നും നിര്‍ബന്ധിത സൈനിക സേവനത്തില്‍ പങ്കാളികളാവാത്തവര്‍ക്ക് ലഭിക്കില്ലെന്ന് നിയമം അനുശാസിക്കുന്നു. പ്രധാന സേവനങ്ങള്‍ പൂര്‍ത്തിയാക്കിയവര്‍ക്കും സര്‍വീസില്‍ നിന്ന് പുറത്താക്കപ്പെടുകയോ സേവനം നിരാകരിക്കപ്പെടുകയോ ചെയ്തവര്‍ക്ക് നിയമം ബാധകമല്ല.
18 വയസ്സ് തികയുന്ന പുരുഷന്‍മാരുടെ വിവരങ്ങള്‍ ഒരോ വര്‍ഷവും ആദ്യത്തെ ആറ്മാസത്തില്‍ നാഷണല്‍ സര്‍വീസ് അക്കാഡമിക്ക് നല്‍കണമെന്ന് ആഭ്യന്തര മന്ത്രാലയത്തോടും ആരോഗ്യ മന്ത്രാലയത്തോടും മറ്റു ബന്ധപ്പെട്ട വകുപ്പകളോടും നിര്‍ദേശിച്ചിട്ടുണ്ട്. 18 വയസ്സ് തികയുന്നതിന് 60 ദിവസം മുമ്പ് ഖത്തരി യുവാക്കള്‍ നാഷണല്‍ സര്‍വീസ് അക്കാഡയമില്‍ റിപ്പോര്‍ട്ട് ചെയ്യണമെന്നും നിര്‍ദേശമുണ്ട്. ഹൈസ്‌കുള്‍ പഠനം തത്തുല്യ പഠനം പൂര്‍ത്തിയാക്കിയവരും അക്കാഡമയില്‍ റിപ്പോര്‍ട്ട് ചെയ്യണം. ഇതില്‍ ഏതാണോ ആദ്യം സംഭവിക്കുന്നത് അതിന് സമാനമായാണ് റിപ്പോര്‍ട്ട് ചെയ്യേണ്ടതെന്നും നിയമത്തില്‍ പറയുന്നു.
സര്‍വീസിന് എത്തണമെന്ന് കാണിച്ച് നോട്ടീസ് ലഭിക്കുന്നവര്‍ ഉടനെ സേവനത്തിന് എത്തണമെന്നും അവരുടെ ജോലികളും മറ്റും പിന്നീട് നിലനില്‍ക്കില്ലെന്നും നിയമം അനുശാസിക്കുന്നു. നിയോഗിക്കപ്പെട്ട സൈനിക സര്‍വീസ് പുര്‍ത്തിയാക്കിയെന്ന ബന്ധപ്പെട്ട മിലിട്ടറി അതോറിറ്റിയുടെ കത്ത് ലഭിച്ച ശേഷം മാത്രമേ ജോലി പുനരാരംഭിക്കാന്‍ സാധിക്കുകയുള്ളൂ. 18 പൂര്‍ത്തിയായ സ്ത്രീകള്‍ക്ക് സൈനിക സേവനത്തിന് അവര്‍ താത്പര്യപ്പെടുകയാണെങ്കില്‍ അവസരം ലഭിക്കും.

സ്ത്രീ സ്വാതന്ത്ര്യവും ശാക്തീകരണവും: മേഖലയില്‍ ഖത്തര്‍ മുന്നില്‍

chandrika — Mon, 12 Mar 2018 12:40:00 +0000

ദോഹ: ഖത്തരി വനിതകള്‍ കൂടുതല്‍ സ്വാതന്ത്ര്യം ആസ്വദിക്കുകയും ശാക്തീകരിക്കപ്പെടുകയും ചെയ്തതായി ദോഹ ഇന്റര്‍നാഷണല്‍ ഫാമിലി ഇന്‍സ്റ്റിറ്റിയൂട്ട്(ഡിഐഎഫ്‌ഐ) എക്‌സിക്യുട്ടീവ് ഡയറക്ടര്‍ നൂര്‍ അല്‍മാലികി അല്‍ജെഹാനി പറഞ്ഞു. രാജ്യത്തെ 40ശതമാനം വനിതകളും തൊഴിലെടുക്കുകയോ തൊഴില്‍ തേടുകയോ ചെയ്യുന്നുണ്ട്.മേഖലയിലെ ശരാശരി 25ശതമാനം മാത്രമായിരിക്കുമ്പോഴാണിത്. വനിതാസ്വാതന്ത്ര്യത്തിലും ശാക്തീകരണത്തിലും മേഖലയില്‍ ഖത്തര്‍ മുന്നിലാണെന്നും അവര്‍ കൂട്ടിച്ചേര്‍ത്തു. രാജ്യാന്തര വനിതാദിനത്തോടനുബന്ധിച്ച് സംഘടിപ്പിച്ച പാനല്‍ചര്‍ച്ചയില്‍ സംസാരിക്കുകയായിരുന്നു അവര്‍.
വനിതകളെ പിന്തുണയ്ക്കുന്ന കാര്യത്തില്‍ അറബ് സര്‍ക്കാരുകള്‍ സ്ത്രീകള്‍ക്കെതിരായ വിവേചനത്തിന്റെ പാരമ്പര്യങ്ങള്‍ നീക്കം ചെയ്യുന്നതില്‍ തങ്ങളുടെ പ്രതിബദ്ധത തീര്‍ച്ചയായും പുതുക്കേണ്ടതുണ്ട്. സാംസ്‌കാരിക ലിംഗഭേദഗതികള്‍ മാറേണ്ടതുണ്ടെന്നും അവര്‍ കൂട്ടിച്ചേര്‍ത്തു. മീ റ്റൂ പോലെയുള്ള ക്യാമ്പയിനുകള്‍ക്ക് മിഡില്‍ഈസ്റ്റില്‍ ഗുണപരമായ പ്രതിഫലനങ്ങള്‍ ഉളവാക്കാനാകില്ല. അറബ് മനസ്ഥിതിയുടെ പ്രത്യേകത മൂലം മിഡില്‍ഈസ്റ്റിലെ വനിതകളുടെ അവകാശങ്ങളെ പ്രതിരോധിക്കുന്നതില്‍ വ്യത്യസ്തമാ ദിശ വേണം. പുരുഷന്‍മാര്‍ ശത്രുക്കളല്ലെന്നും അവര്‍ ചൂണ്ടിക്കാട്ടി. പുരുഷന്‍മാരിലും വനിതകളിലും ലിംഗസമത്വ മനോഭാവത്തെ സ്വാധീനിക്കുന്നതില്‍ പിതാവ് വഹിക്കുന്ന പങ്കിനെക്കുറിട്ടും അവര്‍ വിശദീകരിച്ചു. ലിംഗ സമത്വവിഷയങ്ങളില്‍ തങ്ങളുടെ പിതാവിന്റെ കാഴ്ചപ്പാടാണ് ഒരു കുടുംബത്തിലെ മകനും മകളും സ്വീകരിക്കുന്നതെന്ന് മിഡില്‍ഈസ്റ്റില്‍ നടത്തിയ പഠനത്തില്‍ നിന്നും വ്യക്തമായതായും അവര്‍ ചൂണ്ടിക്കാട്ടി.
ഖത്തറിന്റെ കാര്യത്തില്‍ പിതാവ് അമീര്‍ ശൈഖ് ഹമദ് ബിന്‍ ഖലീഫ അല്‍താനി വനിതാശാക്തീകരണ മുന്നേറ്റത്തിന തുടക്കമിടുകയായിരുന്നു. തന്റെ മകള്‍ ശൈഖ അല്‍മയാസയുടെ ബിരുദദാന ചടങ്ങില്‍ അദ്ദേഹം പങ്കെടുക്കുകയും അതിന്റെ ചിത്രങ്ങള്‍ പത്രങ്ങള്‍ പ്രസിദ്ധീകരിക്കുകയും ചെയ്തിരുന്നു. അതിനുശേഷം തങ്ങളുടെ പെണ്‍മക്കളുടെ ബിരുദദാനചടങ്ങില്‍ പങ്കെടുക്കുന്ന പിതാക്കളുടെ ചിത്രങ്ങള്‍ ഒരു പതിവാകുകയായിരുന്നു- ജനാഹി പറഞ്ഞു. വാര്‍ത്താമാധ്യമങ്ങളിലും മള്‍ട്ടിമീഡിയകളിലും പ്രത്യക്ഷപ്പെട്ട ആദ്യ ഖത്തരി വനിതയായി ശൈഖ മൗസ ബിന്‍ത് നാസറിന്റെ മാതൃകയും ഖത്തരി വനിതകള്‍ പിന്തുടരുന്നതായും അവര്‍ പറഞ്ഞു.

ഖത്തര്‍ ചാരിറ്റിയുടെ സഹായം ലഭിച്ചത് 16 മില്യണ്‍ സിറിയക്കാര്‍ക്ക്

chandrika — Mon, 05 Mar 2018 08:02:59 +0000

ദോഹ: കഴിഞ്ഞ ആറ് വര്‍ഷത്തിനിടെ ഖത്തര്‍ ചാരിറ്റിയുടെ സഹായം ലഭിച്ചത് ഒരു കോടി അറുപത് ലക്ഷം സിറിയക്കാര്‍ക്ക്. സിറിയക്കകത്തും പുറത്തുമുള്ള അഭയാര്‍ഥികള്‍ക്കാണ് സഹായം ലഭിച്ചത്. 2011 ഏപ്രില്‍ മുതല്‍ 2017 ഡിസംബര്‍ വരെയുള്ള കാലയളവിലാണ് ഈ സഹായം കൈമാറിയത്. ഭക്ഷണം, അഭയകേന്ദ്രങ്ങള്‍, ആരോഗ്യ, വിദ്യാഭ്യസ സഹായങ്ങള്‍ എന്നിവയാണ് പ്രധാനമായും നല്‍കിയത്. 544.5 മില്യണ്‍ ഖത്തര്‍ റിയാലാണ് ഈ സഹായ വിതരണത്തിന് ഖത്തര്‍ ചാരിറ്റി ചെലവിട്ടത്. സിറിയന്‍ അഭയാര്‍ഥികള്‍ക്ക് വലിയ സഹായമാകുന്ന പദ്ധതികളാണ് ഇക്കാലയളവില്‍ തങ്ങള്‍ നടപ്പിലാക്കിയതെന്ന് ഖത്തര്‍ ചാരിറ്റി പ്രസ്താവനയില്‍ വ്യക്തമാക്കി.

ഭക്ഷണ വിതരണ പദ്ധതികള്‍, റിലീഫ് സാധനങ്ങള്‍, ബേക്കറികള്‍ എന്നിവയുടെ സഹായം ലഭിച്ചത് 8,584,755 പേര്‍ക്കാണ്. 20,012704 പേര്‍ക്ക് വീട് വെക്കുന്നതിനും മറ്റ് ഭക്ഷ്യേതര സഹായങ്ങളും ലഭിച്ചു. 2,769,085 പേര്‍ക്ക് ആരോഗ്യ സഹായങ്ങളും 2,841,046 പേര്‍ക്ക് വിദ്യാഭ്യാസ സഹായങ്ങളും ഇക്കാലയളവില്‍ ലഭിച്ചു.

സിറിയക്കകത്തും പുറത്തും കഴിയുന്ന നിരവധി സിറിയന്‍ അഭയാര്‍ഥികള്‍ക്കും സഹായം എത്തിക്കാന്‍ തങ്ങള്‍ക്ക് കഴിഞ്ഞിട്ടുണ്ടെന്ന് ഖത്തര്‍ ചാരിറ്റി വ്യക്തമാക്കി. തുര്‍ക്കി, ലബനാന്‍, ജോര്‍ദാന്‍, ഇറാഖ് എന്നിവിടങ്ങളില്‍ കഴിയുന്ന സിറിയന്‍ അഭയാര്‍ഥികള്‍ക്കെല്ലം സഹായമെത്തിക്കാന്‍ ഖത്തര്‍ ചാരിറ്റിക്ക് കഴിഞ്ഞിട്ടുണ്ട്. മുന്‍ വര്‍ഷങ്ങളെ അപേക്ഷിച്ച് 2017ലാണ് സിറിയക്കകത്തും പുറത്തുമുള്ള അഭയാര്‍ഥികളില്‍ കൂടുതല്‍ പേര്‍ക്ക് സഹായം എത്തിക്കാന്‍ കഴിഞ്ഞതായും ഖത്തര്‍ ചാരിറ്റി അറിയിച്ചു.

വോഡഫോണിന് ആദ്യ ഖത്തരി സി.ഇ.ഒ; ശൈഖ് ഹമദ് അബ്ദുല്ല അല്‍താനി ഉടന്‍ ചുമതലയേല്‍ക്കും

chandrika — Tue, 27 Feb 2018 06:31:57 +0000

ദോഹ: വോഡഫോണ്‍ ഖത്തര്‍ ചീഫ് എക്‌സിക്യുട്ടീവ് ഓഫീസര്‍ പദവിയില്‍ ആദ്യമായി ഒരു സ്വദേശി ചുമതലയേല്‍ക്കുന്നു. ശൈഖ് ഹമദ് ബിന്‍ അബ്്ദുല്ലാ അല്‍താനിയാണ് മാര്‍ച്ച് രണ്ടാം വാരം ഈ പദവിയിലെത്തുക. വോഡഫോണ്‍ ഖത്തര്‍ സീനിയര്‍ ബിസിനസ്സ് ഡവലപ്‌മെന്റ് മാനേജര്‍, ഹെഡ് ഓഫ് പബ്ലിക് സെക്ടര്‍ സെയില്‍സ് ആന്റ് സെയില്‍സ് ഡയരക്ടര്‍ തുടങ്ങി വിവിധ ചുമതലകള്‍ അദ്ദേഹം വഹിച്ചിരുന്നു.
നേരത്തെ ഐ സി ടി ഖത്തറില്‍ ഉന്നത പദവി വഹിച്ചിരുന്ന ശൈഖ് ഹമദ് ബിന്‍ അബ്്ദുല്ല കാനഡയിലെ ഒട്ടോവ സര്‍വ്വകലാശാലയില്‍ നിന്ന് കമ്പ്യൂട്ടര്‍ സയന്‍സില്‍ ബി എ ബിരുദം നേടിയിട്ടുണ്ട്. പരേതനായ ഗ്രഹാമി മാഹിര്‍ ആയിരുന്നു ആദ്യ ചീഫ് ഓപ്പറേറ്റിംഗ് ഓഫീസര്‍. വോഡഫോണ്‍ ഖത്തര്‍ ജനകീയമാക്കുന്നതില്‍ പങ്കുവഹിച്ച അദ്ദേഹം ദോഹയില്‍ ജോലിയിലിരിക്കെ ഹൃദായാഘാതം വന്ന് മരിക്കുകയായിരുന്നു അദ്ദേഹം. 2009ലായിരുന്നു അദ്ദേഹം ചുമതലയേറ്റിരുന്നത്. ഗ്രഹാമിയുടെ പെട്ടെന്നുള്ള മരണത്തെത്തുടര്‍ന്ന് റിച്ചാര്‍ഡ് ഡാലി സി ഇ ഒ ആയി ചുമേലയേറ്റു. 2015ലാണ് നിലവിലുള്ള സി ഇ ഒ ഇയാന്‍ ഗ്രേ പദവിയിലെത്തുന്നത്. 2018 മാര്‍ച്ച് 19വരെ ഇയാന്‍ ചുമതലയിലുണ്ടാവും. 19ന് ചേരുന്ന വാര്‍ഷിക പൊതുസഭയ്ക്ക് ശേഷം പുതിയ സി ഇ ഒ പദവി ഔദ്യോഗികമായി ഏറ്റെടുക്കുമെന്ന് വോഡഫോണ്‍ ഖത്തര്‍ അറിയിച്ചു.

ദോഹ ഫിലിം ഇന്‍സ്റ്റിറ്റിയൂട്ടിന്റെ സഹായത്തോടെ നിര്‍മിച്ച ആറു സിനിമകള്‍ ബെര്‍ലിന്‍ ചലച്ചിത്രമേളയില്‍

chandrika — Mon, 12 Feb 2018 04:33:22 +0000

ദോഹ: ദോഹ ഫിലിം ഇന്‍സ്റ്റിറ്റിയൂട്ടി(ഡി.എഫ്‌.ഐ)ന്റെ സഹായത്തോടെ വിവിധ രാജ്യങ്ങളില്‍ നിര്‍മിച്ച ആറു സിനിമകള്‍ 68-ാമത് ബെര്‍ലിന്‍ രാജ്യാന്തര ചലച്ചിത്രോത്സവത്തില്‍ പ്രദര്‍ശിപ്പിക്കും. ഫെബ്രുവരി 15 മുതല്‍ 25 വരെയാണ് മേള നടക്കുന്നത്.
ഖത്തര്‍ പിന്തുണയോടെ നിര്‍മിച്ച ചിത്രങ്ങളുടെ വേള്‍ഡ്, യൂറോപ്യന്‍ പ്രീമിയറുകള്‍ ബെര്‍ലിന്‍ മേളയിലുണ്ടാകും. ലോകത്തിലെ ഏറ്റവും പ്രശസ്തവും പ്രാധാന്യമര്‍ഹിക്കുന്നതുമായ ബെര്‍ലിന്‍ ചലച്ചിത്രമേളയിലെ പ്രധാന വിഭാഗങ്ങലായ പനോരമ, ഫോറം ആന്റ് ജനറേഷന്‍ കെപ്ലസ്, 14 പ്ലസ് ഉള്‍പ്പടെയുള്ള വിഭാഗങ്ങളിലാണ് ഡിഎഫ്‌ഐ ധനസഹായത്തോടെ നിര്‍മിക്കപ്പെട്ട സിനിമകള്‍ പ്രദര്‍ശിപ്പിക്കുന്നത്.

പനോരമ വിഭാഗത്തിലെ വേള്‍ഡ് പ്രീമിയറില്‍ ഖുംറ വര്‍ക്ക് ഇന്‍ പ്രോഗസ്സ് പദ്ധതിയിലുള്‍പ്പെട്ട, റീം സാലേഹിന്റെ ലബനാന്‍ ഈജിപ്ത് ഗ്രീസ് സ്ലൊവേനിയ ഖത്തര്‍ സംയുക്ത സംരംഭമായ വാട്ട് കംസ് എറൗണ്ട്, ബബാക് ജലാലിയുടെ യുകെ ഇറ്റലി ഫ്രാന്‍സ് നെതര്‍ലന്‍ഡ്‌സ് മെക്‌സിക്കോ ഖത്തര്‍ സംയുക്ത സംരംഭമായ ലാന്‍ഡ് എന്നിവയും ഫോറം വിഭാഗത്തിലെ വേള്‍ഡ് പ്രീമിയറില്‍ ജൊആവോ വിയാനയുടെ പോര്‍ച്ചുഗല്‍ മൊസാംബിക് ഗ്വിനിയ ബിസ്സോ ഫ്രാന്‍സ് ഖത്തര്‍ സംരംഭമായ ഔവര്‍ മാഡ്‌നസ്സ്, നാര്‍ജിസ് നെജാറിന്റെ മൊറോക്കോ ഫ്രാന്‍സ് ഖത്തര്‍ സംരംഭമായ സ്റ്റേറ്റ്‌ലെസ്സ് എന്നിവ പ്രദര്‍ശിപ്പിക്കും. ജെനറേഷന്‍ കെപ്ലസ് വിഭാഗത്തില്‍ കാമില അന്‍ദിനിയുടെ ഇന്തോനേഷ്യ നെതര്‍ലന്‍ഡ് ഓസ്‌ട്രേലിയ, ഖത്തര്‍ സംയുക്ത സംരംഭമായ ദി സീന്‍ ആന്റ് അണ്‍സീനിന്റെ യൂറോപ്യന്‍ പ്രീമിയര്‍ നടക്കും.
ജനറേഷന്‍ 14 പ്ലസില്‍ ക്രിസ്റ്റി ഗാര്‍ലാന്‍ഡിന്റെ കാനഡ ഡെന്‍മാര്‍ക്ക് ഖത്തര്‍ സംരംഭമായ വാട്ട് വാല വാണ്ട്‌സിന്റെ ആദ്യ പ്രദര്‍ശനവും നടക്കും.
മികച്ച നിലവാരമുള്ള സിനിമകള്‍ക്ക് പിന്തുണ നല്‍കുന്ന ഇന്‍സ്റ്റിറ്റിയൂട്ടിന്റെ മറ്റൊരു നേട്ടമാണ് ഇത്രയും ചിത്രങ്ങള്‍ ബെര്‍ലിന്‍ ചലചിത്രമേളയിലേക്കു തെരഞ്ഞെടുക്കപ്പെട്ടത്.
സ്വതന്ത്ര സിനിമകളെയും ആര്‍ട്ട്ഹൗസ് പ്രൊഡക്ഷനുകളെയും ആഘോഷിക്കുന്ന ബെര്‍ലിന്‍ രാജ്യാന്തര ഫെസ്റ്റിവല്‍ ഏറ്റവും ശക്തമായ സിനിമകളുടെ ബാരോമീറ്ററാണെന്ന് ഡിഎഫ്‌ഐ ചീഫ് എക്‌സിക്യൂട്ടീവ് ഓഫിസര്‍ ഫാത്തിമ അല്‍ റുമൈഹി ചൂണ്ടിക്കാട്ടി.
ബെര്‍ലിനിലെ ചിത്രങ്ങള്‍ ചര്‍ച്ച ചെയ്യപ്പെടുകയും സമകാല സിനിമകളെ പുനര്‍നിര്‍വചിക്കുന്ന വിധത്തില്‍ അടയാളപ്പെടുത്തലുകള്‍ നടത്തുന്നതുമാണെന്നും അവര്‍ കൂട്ടിച്ചേര്‍ത്തു.

ഖത്തര്‍ ഉപരോധം; അറബ് രാജ്യങ്ങള്‍ക്കെതിരെ കടുത്ത ആരോപണങ്ങളുമായി ശൈഖ് അബ്ദുല്ല

chandrika — Sat, 20 Jan 2018 11:47:13 +0000

ദോഹ: ഉപരോധ രാജ്യങ്ങളായ സഊദി അറേബ്യയ്ക്കും യുഎഇക്കുമെതിരെ കടുത്ത ആരോപണങ്ങളുമായി ഖത്തരി രാജ കുടുംബത്തിലെ അംഗമായ ശൈഖ് അബ്ദുല്ല ബിന്‍ അലിഅല്‍താനി. യുഎഇയില്‍ തടവിലായിരുന്ന ഇദ്ദേഹം മോചിതനായി കഴിഞ്ഞദിവസം കുവൈത്തിലേക്ക് പോയിരുന്നു. ഉപരോധരാജ്യങ്ങള്‍ക്കെതിരെ കടുത്ത വിമര്‍ശനവും ആരോപണവും ഉയര്‍ത്തുന്ന ഓഡിയോ ക്ലിപ്പിങുകള്‍ അല്‍ജസീറ പുറത്തുവിട്ടു. ഖത്തറിന്റെ സ്വത്ത് പിടിച്ചെടുക്കാന്‍ സഊദിയും യുഎഇയും ആസൂത്രണം ചെയ്തതാണ് ഗള്‍ഫ് പ്രതിസന്ധിയെന്ന് അദ്ദേഹം പറയുന്നു.

ഖത്തര്‍ സര്‍ക്കാരിനെതിരായി സഊദിയും യുഎഇയും ആദ്യം ചിത്രീകരിച്ച വ്യക്തിത്വമായിരുന്നു ശൈഖ് അബ്ദുല്ല. ജനുവരി പതിനഞ്ചിന് റെക്കോര്‍ഡ് ചെയ്ത ഓഡിയോയിലാണ് െൈശെഖ് അബ്ദുല്ല ഉപരോധരാജ്യങ്ങളെ വിമര്‍ശിക്കുന്നത്. താന്‍ അസാധാരണമായ സമ്മര്‍ദ്ദത്തിനടിമപ്പെടുകയായിരുന്നു താനെന്നും തന്റെ ജീവിതം അവസാനിപ്പിക്കാനുള്ള തീരുമാനത്തിലേക്കുവരെ സമ്മര്‍ദ്ദം എത്തിച്ചതായും ഈ ക്ലിപ്പിങില്‍ അദ്ദേഹം പറയുന്നു. അബുദാബി കിരീടാവകാശി മുഹമ്മദ് ബിന്‍ സായിദ്, സഊദി കിരീടാവകാശി മുഹമ്മദ് ബിന്‍ സല്‍മാന്‍ എന്നിവരുടെ താല്‍പര്യങ്ങളുടെയും ആഗ്രഹങ്ങളുടെയും അടിസ്ഥാനത്തിലാണ് ഗള്‍ഫ് പ്രതിസന്ധി രൂപപ്പെട്ടത്. ഖത്തറിന്റെ സമ്പാദ്യം പിടിച്ചെടുക്കുകയായിരുന്നു ഇതിന്റെ ലക്ഷ്യം. ഖത്തരികളെല്ലാം തങ്ങളുടെ നിലപാടിനെ പ്രതിരോധിക്കണമെന്നും അവരെ സൂക്ഷിക്കണമെന്നും നിങ്ങളുടെ സ്വന്തം നാട് നശിപ്പിക്കാന്‍ പണം ഉള്‍പ്പടെയുള്ള വാഗ്ദാനങ്ങള്‍ നല്‍കുമെന്നും അദ്ദേഹം കൂട്ടിച്ചേര്‍ക്കുന്നു. സമ്മര്‍ദ്ദങ്ങളെത്തുടര്‍ന്ന് രണ്ടു പെണ്‍മക്കള്‍ ഉള്‍പ്പടെ മറ്റു കുടുംബാംഗങ്ങള്‍ക്ക് ഒന്നും സംഭവിക്കാതിരിക്കാന്‍ ജീവിതം അവസാനിപ്പിക്കുന്നതിനുവരെ തീരുമാനിച്ചതായും ശൈഖ് അബ്ദുല്ല പറയുന്നു. ഈ റെക്കോര്‍ഡിങില്‍ അത്ഭുതങ്ങളൊന്നുമില്ലെന്ന് ഖത്തര്‍ യൂണിവേഴ്‌സിറ്റിയിലെ പ്രൊഫ. മാജിദ് അല്‍അന്‍സാരി പ്രതികരിച്ചു.