rain news – Chandrika Daily

വേനല്‍മഴ സംഭരിക്കുക; കാളിന്ദിയില്‍ വനംവകുപ്പിന്റെ വക തടയണ

chandrika — Fri, 03 May 2019 10:38:05 +0000

കാട്ടിക്കുളം: തിരുനെല്ലി കാളിന്ദി പുഴക്ക് കുറുകെ വയനാട് വൈല്‍ഡ് ലൈഫ് തടയണ നിര്‍മ്മിച്ചു. ബ്രഹ്മഗിരി താഴ് വരയിലെ ചോലവനത്തില്‍ നിന്ന് ഒഴികിവനത്തിലൂടെ ഒഴുകി കുറുവ ദ്വീപ് കമ്പനി കൂടല്‍ കടവ് സംഗമത്തിലെത്തി കര്‍ണാടകത്തിലേക്ക് ഒഴുകുന്ന പുഴക്ക് കുറുകെ തോല്‍പെട്ടി വൈല്‍ഡ് ലൈഫ് ബേഗുര്‍ റെയിഞ്ച് ഓഫീസിന് സമീപമാണ് തടയണ നിര്‍മ്മിച്ചത്. താല്‍ക്കാലികമായ് ലഭിക്കുന്ന വേനല്‍മഴവെള്ളം പരമാവധി സംഭരിക്കുകയാണ് വനം വകുപ്പിന്റെ ലക്ഷ്യം വയനാട് വൈല്‍ഡ് ലൈഫ് വാര്‍ഡന്‍ കെ ആസിഫ്, അസിസ്റ്റ വാര്‍ഡന്‍ സുനില്‍ പി, ഫോറസ്റ്റ് ഓഫീസര്‍മാരായ എ പ്രസന്നന്‍, മഹേഷ് രാമകൃഷ്ണന്‍, നികേഷ് ട്രൈബല്‍ വാച്ചര്‍മാര്‍ എന്നിവരുടെ നേതൃത്വത്തിലാണ് തടയണ നിര്‍മ്മിച്ചത്.

വയനാട് വന്യജീവി സങ്കേതത്തിലെ തോല്‍പെട്ടി റെയിഞ്ചില്‍ വനപാലകരുടെ നേതൃത്വത്തില്‍ തടയണ നിര്‍മ്മിക്കുന്നു

ആയിരത്തോളം ചാക്കുകളില്‍ മണല്‍ നിറച്ച് പുഴക്ക് കുറുകെ വിരിച്ചാണ് ഈ ദൗത്യം നാല്‍ പത്തിയഞ്ചോളം വനം ജീവനക്കാരാണ് പ്രകൃതിക്ക് ഒഴികിപ്പോകുന്ന വെള്ളം കെട്ടി നിര്‍ത്തി പ്രദേശവാസികള്‍ക്കും വന്യ ജീവികള്‍ക്കും ഉപകാരപ്രദമാകുന്ന രീതിയിലാണ് താല്‍ക്കാലിക തടയണ നിര്‍മ്മിച്ചത്.

11, 12 തീയതികളില്‍ സംസ്ഥാന വ്യാപകമായി മഴക്കാലപൂര്‍വ്വ ശുചീകരണം

chandrika — Fri, 03 May 2019 07:39:49 +0000

തിരുവനന്തപുരം: മഴക്കാലപൂര്‍വ്വ ശുചീകരണം, പകര്‍ച്ച വ്യാധി പ്രതിരോധം എന്നിവ സംസ്ഥാനത്ത് കാര്യക്ഷമമായി നടപ്പാക്കുന്നതിനുള്ള പരിപാടിക്ക് രൂപരേഖയായി. ആരോഗ്യജാഗ്രതാ പരിപാടിയുടെ ഭാഗമായി മെയ് 11, 12 തീയതികളില്‍ സംസ്ഥാന വ്യാപകമായി ജനപങ്കാളിത്തത്തോടെ ശുചീകരണം നടത്തുന്നതിന് മന്ത്രിസഭ തീരുമാനിച്ചു.
മെയ് 3, 4 തീയതികളില്‍ ജില്ലകളില്‍ മന്ത്രിമാരുടെ സാന്നിധ്യത്തില്‍ അവലോകനയോഗങ്ങള്‍ ചേരും. തദ്ദേശസ്വയംഭരണ സ്ഥാപനങ്ങളുടെ അധ്യക്ഷന്‍മാരും മറ്റു ജനപ്രതിനിധികളും ഈ യോഗത്തില്‍ പങ്കെടുക്കും.

മഴക്കാലത്തിനു മുന്നോടിയായി കുളങ്ങളും നദികളും തോടുകളും വൃത്തിയാക്കി ഒഴുക്കു സുഗമമാക്കുന്നതിനുള്ള നടപടികള്‍ തദ്ദേശസ്വയംഭരണ വകുപ്പ് സ്വീകരിക്കണം. മാലിന്യ സംസ്‌കരണത്തിന് ജനവാസമില്ലാത്ത സ്ഥലം കണ്ടെത്തി തുടര്‍ നടപടികള്‍ സ്വീകരിക്കുവാന്‍ ജില്ലാ കളക്ടര്‍മാരെയും ചുമതലപ്പെടുത്തി. ജില്ലാതലത്തില്‍ തുടര്‍ പ്രവര്‍ത്തനങ്ങള്‍ ഏകോപിപ്പിക്കുന്നതിന് മന്ത്രിമാര്‍ക്കും സെക്രട്ടറിമാര്‍ക്കും ചുമതല നല്‍കി.
തിരുവനന്തപുരം-കടകംപള്ളി സുരേന്ദ്രന്‍, കൊല്ലം-ജെ. മേഴ്‌സിക്കുട്ടിയമ്മ, പത്തനംതിട്ട-കെ. രാജു, ആലപ്പുഴ-ഡോ. ടി. എം. തോമസ് ഐസക്, ജി. സുധാകരന്‍, പി. തിലോത്തമന്‍, കോട്ടയം-പി. തിലോത്തമന്‍, ഇടുക്കി-എം.എം. മണി, എറണാകുളം-സി. രവീന്ദ്രനാഥ്, തൃശ്ശൂര്‍-എ.സി. മൊയ്തീന്‍, വി.എസ് സുനില്‍കുമാര്‍, പാലക്കാട്-എ.കെ. ബാലന്‍, മലപ്പുറം-കെ.ടി ജലീല്‍, കോഴിക്കോട്-ടി.പി. രാമകൃഷ്ണന്‍, എ.കെ ശശീന്ദ്രന്‍, വയനാട്-രാമചന്ദ്രന്‍ കടന്നപ്പള്ളി, കണ്ണൂര്‍-കെ.കെ ശൈലജ ടീച്ചര്‍, കാസര്‍കോഡ്-ഇ. ചന്ദ്രശേഖരന്‍.

കൊടുംചൂടില്‍ ആശ്വാസമായി വേനല്‍ മഴയെത്തി

ചന്ദ്രിക വെബ് ഡെസ്‌ക്‌ — Wed, 17 Apr 2019 12:02:40 +0000

കൊടുംചൂടില്‍ വലയുന്ന കേരളത്തിന് ആശ്വാസമായി സംസ്ഥാനത്ത് പലയിടത്തും വേനല്‍മഴയെത്തി. ഇന്നലെ രാത്രി മുതല്‍ സംസ്ഥാനത്തെ ഒട്ടുമിക്ക ജില്ലകളിലും മഴ കിട്ടി. തെക്കന്‍ ജില്ലകളില്‍ ഇന്നും നാളെയും ശക്തമായ മഴ തുടരും എന്ന് കാലാവസ്ഥാ നിരീക്ഷണകേന്ദ്രം അറിയിച്ചിട്ടുണ്ട്. ഇവയ്ക്ക് പുറമേ മലബാറിലും നാളെ വേനല്‍ മഴ പ്രതീക്ഷിക്കാം. നാളെ പാലക്കാട്, മലപ്പുറം,കോഴിക്കോട് ജില്ലകളില്‍ ശക്തമായ മഴയ്ക്ക് സാധ്യതയുണ്ട്. ഇതില്‍ തന്നെ മലപ്പുറം ജില്ലയുടെ ചില ഒറ്റപ്പെട്ട ഭാഗങ്ങളില്‍ അതിശക്തമായ മഴ ലഭിക്കുമെന്നും കാലാവസ്ഥാ വിദഗ്ദ്ധര്‍ മുന്നറിയിപ്പ് നല്‍കുന്നു. തെക്കന്‍ ജില്ലകളിലും തിരുവനന്തപുരത്തും കോട്ടയത്തും ശക്തമായ മഴയാണ് ഇന്ന് ലഭിച്ചത്. തിരുവനന്തപുരം, കൊല്ലം, പത്തനംതിട്ട, കോട്ടയം, ആലപ്പുഴ, ഇടുക്കി എന്നീ ജില്ലകളില്‍ ശക്തമായ ഇടിയോട് കൂടി മഴ തുടരും എന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
കൊടും ചൂടില്‍ വെന്തുരുകുന്ന സംസ്ഥാനത്തിന് അപ്രതീക്ഷിതമായി എത്തിയ വേനല്‍ മഴ വലിയ ആശ്വാസമായെങ്കിലും സംസ്ഥാനത്തെ ഉയര്‍ന്ന താപനിലയില്‍ വലിയ മാറ്റമൊന്നും ഉണ്ടാവില്ല് എന്നാണ് കാലാവസ്ഥാ വിദഗ്ദ്ധരുടെ അഭിപ്രായം. വരും ദിവസങ്ങളില്‍ വയനാട് ഒഴികെ എല്ലാ ജില്ലകളിലും താപനില ശരാശരിയിലും രണ്ട് ഡിഗ്രീ വരെ കൂടിയേക്കാം.
രാജ്യത്ത് ഇക്കുറി ശരാശരി മഴ ലഭിക്കും എന്ന് കേന്ദ്ര കാലാവസ്ഥാ നിരീക്ഷണകേന്ദ്രം അറിയിച്ചുവെങ്കിലും കാലവര്‍ഷം കുറയും എന്നാണ് സ്വകാര്യ കാലാവസ്ഥാ നിരീക്ഷകരായ സ്‌കൈമെറ്റ് റിപ്പോര്‍ട്ട് ചെയ്യുന്നത്.

കനത്ത മഴയെ തുടർന്ന് ഉത്തര്‍പ്രദേശില്‍ 33 പേർ മരിച്ചു

chandrika — Fri, 27 Jul 2018 15:41:00 +0000

ലക്‌നോ: കനത്ത മഴയെ തുടർന്ന് ഉത്തര്‍പ്രദേശില്‍ 33 പേർ മരിച്ചു. ഉത്തർപ്രദേശിലെ പല ജില്ലകളിലും ദിവസങ്ങളായി തുടരുന്ന കനത്ത മഴയില്‍ ജനജീവിതം സ്തംഭിച്ചു. സംസ്ഥാനത്തിന്റെ വിവിധ ഭാഗങ്ങളിലായി ഇതുവരെ 23 പേര്‍ക്ക് പരിക്കേറ്റതായും റിപ്പോര്‍ട്ടുണ്ട്. ഇതില്‍ നാല് കുട്ടികളും ഉള്‍പെടും.

വെള്ളിയാഴ്ച രാവിലെ വരെ 33 പേരുടെ മരണം സ്ഥിരീകരിച്ചതായി ദുരിതാശ്വാസ കമ്മീഷണര്‍ സഞ്ജയ് കുമാര്‍ അറിയിച്ചു.

ലക്‌നോ, കാണ്‍പൂര്‍സ കനൗജ്, മഥുര, ആഗ്ര, മെയിന്‍പുരി, ഗാസിയാബാദ്, മീററ്റ്, ഹാപൂര്‍ എന്നിവിടങ്ങളിലാണ് മഴ കനത്ത നാശം വിതച്ചത്. നിരവധി വീടുകള്‍ തകര്‍ന്നു വീഴുകയും റോഡുകളില്‍ വെള്ളം കയറി ഗതാഗതം സ്തംഭിക്കുകയും ചെയ്തു. ഹാപൂരില്‍ മതിലിടിഞ്ഞ് വീണു മൂന്നു വയസ്സുള്ള കുഞ്ഞും മീററ്റില്‍ വീട് തകര്‍ന്ന് സ്ത്രീയും മരിച്ചു. മുസഫര്‍നഗറില്‍ പൊട്ടിവീണ വൈദ്യുതി കമ്പിയില്‍ നിന്ന് ഷോക്കേറ്റ് രണ്ടു യുവാക്കള്‍ക്കും ജീവന്‍ നഷ്ടമായി. ട്രാക്കില്‍ വെള്ളം കയറിയതിനെ തുടര്‍ന്ന് ഷംലി ജില്ലയില്‍ ട്രെയിന്‍ പാളം തെറ്റി. അപകടത്തില്‍ അഞ്ചുപേര്‍ക്ക് പരിക്കേറ്റു. രണ്ടു ദിവസം കൂടി കനത്ത മഴ തുടരുമെന്നാണ് കാലാവസ്ഥ മുന്നറിയിപ്പ്.

ഉത്തരേന്ത്യന്‍ സംസ്ഥാനങ്ങളില്‍ കനത്ത മഴയില്‍ 40 പേര്‍ മരിച്ചു; സംസ്ഥാനത്ത് കാലവര്‍ഷമെത്തി

chandrika — Tue, 29 May 2018 07:43:56 +0000

ലക്‌നോ: ഉത്തരേന്ത്യന്‍ സംസ്ഥാനങ്ങളില്‍ കനത്ത മഴയിലും കാറ്റിലും 40 പേര്‍ മരിച്ചു. 35 പേര്‍ക്ക് പരിക്കേറ്റു. ഉത്തര്‍പ്രദേശ്, ബിഹാര്‍, ജാര്‍ഖണ്ഡ് എന്നിവിടങ്ങളിലാണ് ഇത്രയധികം മരണങ്ങളുണ്ടായത്. വലിയ തോതില്‍ ഇടിയും മിന്നലും ഉണ്ടായതായും അധികൃതര്‍ അറിയിച്ചു.

നിരവധി സ്ഥലങ്ങളില്‍ റോഡ് ഗതാഗതവും, വൈദ്യുതി ബന്ധവും താറുമാറായിരിക്കുകയാണ്. ഉത്തരേന്ത്യയില്‍ വിവിധ സംസ്ഥാനങ്ങളില്‍ ശക്തമായ പൊടിക്കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കി.

അതേസമയം, കേരളത്തില്‍ കാലവര്‍ഷമെത്തി. തെക്കുപടിഞ്ഞാറന്‍ കാലവര്‍ഷം മൂന്നു ദിവസം മുമ്പുതന്നെ കേരള തീരത്തെത്തിയിരുന്നു. ശക്തമായ കാറ്റിന് സാധ്യതയുണ്ടെന്നും മത്സ്യത്തൊഴിലാളികളില്‍ കടലില്‍ പോകരുതെന്നും കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കി.