rajan – Chandrika Daily

കനിമൊഴിക്കും എ. രാജക്കും കരുണാനിധിയുടെ വസതിയില്‍ രാജകീയ വരവേല്‍പ്

chandrika — Sat, 23 Dec 2017 15:51:42 +0000

ചെന്നൈ: ടുജി സ്‌പെക്ട്രം അഴിമതിക്കേസില്‍ കോടതി കുറ്റവിമുക്തരാക്കിയ മുന്‍ ടെലികോം മന്ത്രി എ രാജ, ഡി.എം.കെ എം.പിയും കരുണാനിധിയുടെ മകളുമായ കനിമൊഴി എന്നിവര്‍ക്ക് രാജകീയ വരവേല്‍പ്. ചെന്നൈ വിമാനത്താവളത്തില്‍ നിന്നും കരുണാനിധിയുടെ വസതി വരെ തിങ്ങി നിറഞ്ഞ പ്രവര്‍ത്തകര്‍ ആര്‍പ്പുവിളികളോടെയാണ് ഇരുവരെയും എതിരേറ്റത്.

Tamil Nadu: DMK workers & supporters gather at Chennai Airport as Kanimozhi & A. Raja arrive, they were recently acquitted in the #2GScam case. pic.twitter.com/2vdLA3VdE4

— ANI (@ANI) December 23, 2017

കരുണാനിധിയും അര്‍ധ സഹോദരന്‍ എം.കെ സ്റ്റാലിനുമായും ഇരുവരും കൂടിക്കാഴ്ച നടത്തി. സ്റ്റാലിന്‍ സുവര്‍ണ നിറത്തിലുള്ള പൊന്നാടയണിയിച്ചാണ് ഇരുവരേയും വരവേറ്റത്. തന്നെ കുറ്റവിമുക്തയാക്കിയ ശേഷം കണ്ടതില്‍ പിതാവ് കരുണാനിധിക്ക് അതിയായ സന്തോഷമുണ്ടെന്ന് കനിമൊഴി പറഞ്ഞു.

ടുജി കേസ്; 7 വര്‍ഷം തെളിവിനായി കാത്തിരുന്നെന്ന് ജഡ്ജി

chandrika — Thu, 21 Dec 2017 15:29:19 +0000

ന്യൂഡല്‍ഹി: അന്വേഷണത്തിലെ പോരായ്മകള്‍ ചൂണ്ടിക്കാട്ടിയാണ് ടുജി കേസില്‍ പ്രത്യേക കോടതി വിധി പ്രഖ്യാപിച്ചത്. പ്രതികള്‍ക്കെതിരെ ഒരു ആധികാരിക തെളിവും ഹാജരാക്കാന്‍ പ്രോസിക്യൂഷനായില്ല. പിഴവുകള്‍ ചൂണ്ടിക്കാട്ടുന്നതിനൊപ്പം അന്വേഷണ ഏജന്‍സിക്കെതിരെ കടുത്ത വിമര്‍ശനവും കോടതി ഉയര്‍ത്തി. പ്രോസിക്യൂഷന്‍ ദിശാബോധമില്ലാത്തവിധം അധ:പതിച്ചെന്നുവരെ കോടതി കുറ്റപ്പെടുത്തി. പ്രോസിക്യൂഷനുമെതിരെ കടുത്ത വിമര്‍ശനമാണ് 1552 പേജുള്ള വിധിന്യായത്തിലൂടെ കോടതി ഉയര്‍ത്തിയത്. പ്രവര്‍ത്തി ദിവസങ്ങളും അവധിക്കാലവും ഉള്‍പ്പെടെ ഏഴു വര്‍ഷം തെളിവിനായി കാത്തിരുന്നെന്നും എ രാജയോ മറ്റ് പ്രതികളോ ഏതെങ്കിലും തരത്തില്‍ കുറ്റം നടത്തിയതായി തെളിയിക്കുന്ന ഒരു തെളിവുകളും ഹാജരാക്കാന്‍ സി.ബി.ഐക്ക് കഴിഞ്ഞിട്ടില്ലെന്നും ജഡ്ജി ഒ.പി സെയ്‌നി വ്യക്തമാക്കി. സാക്ഷികള്‍ നല്‍കിയ വാക്കാലുള്ള മൊഴികളുടെ അടിസ്ഥാനത്തില്‍ മാത്രം തയ്യാറാക്കി കുറ്റപത്രത്തില്‍ വസ്തുതാപരമായുള്ള പിഴവുകളേറെയാണ്. ലൈസന്‍സ് ഫീ കുറയ്ക്കുന്നതിനോ അപേക്ഷ സ്വീകരിക്കേണ്ട തീയ്യതികളിലോ മറ്റും മാറ്റം വരുത്താനോ എ രാജ ഇടപെട്ടുവെന്നതിന് തെളിവുകളില്ല. ധനകാര്യമന്ത്രാലയവും ട്രായിയുമെല്ലാം എന്‍ട്രന്‍സ് ഫീ ഉയര്‍ത്തണമെന്നാവശ്യപ്പെട്ടുവെന്ന വാദത്തിനും അടിസ്ഥാനമില്ല. പ്രധാനമന്ത്രിയെ ആരാണ് തെറ്റിദ്ധരിപ്പിച്ചതെന്നതിനും കൃത്യമായ ഉത്തരം നല്‍കാനായിട്ടില്ല. കനിമൊഴിയും രാജയും തമ്മില്‍ ഗൂഢാലോചന നടത്തിയെന്നത് സാക്ഷിയായ ആശിര്‍വാദം ആചാരിയുടെ മൊഴിയെമാത്രം അടിസ്ഥാനപ്പെടുത്തിയുള്ളതാണ്. എന്നാല്‍ കേസിലെ പ്രധാനസാക്ഷിമൊഴിയെന്ന് അവകാശപ്പെടുന്ന ഇത് രേഖപ്പെടുത്തിയത് കുറ്റപത്രം സമര്‍പ്പിക്കുന്നതിന് കുറച്ചുനാളുകള്‍ മുമ്പണെന്നത് ആശ്ചര്യമുളവാക്കുന്നു. വിചാരണയുടെ ആദ്യഘട്ടത്തില്‍ വലിയ ആത്മവിശ്വാസം കാണിച്ച പ്രോസിക്യൂഷന്‍ വിചാരണ പുരോഗമിക്കവെ എന്താണ് തെളിയിക്കാന്‍ ശ്രമിക്കുന്നതെന്ന് പോലും അറിയാതെ ദിശാബോധമില്ലാത്തവിധം അധപതിച്ചെന്നും കോടതി കുറ്റപ്പെടുത്തി. പ്രധാനകേസ് തന്നെ നിലനില്‍ക്കില്ലെന്ന വസ്തുത ചൂണ്ടിക്കാട്ടിയാണ് എന്‍ഫോഴ്സ്മെന്റ് ഡയറക്ടറേറ്റിന്റെതടക്കമുള്ള മറ്റ് കേസുകള്‍ കോടതി തള്ളിയത്.

പോലീസ് മര്‍ദ്ദനം; മനം നൊന്ത് വിമുക്ത ഭടന്‍ ആത്മഹത്യ ചെയ്തു

chandrika — Tue, 04 Apr 2017 11:16:25 +0000

കോഴിക്കോട്: പോലീസിന്റെ മര്‍ദ്ദനത്തില്‍ മനംനൊന്ത് കോഴിക്കോട് വിമുക്ത ഭടന്‍ ആത്മഹത്യ ചെയ്തു. ബാലുശ്ശേരി എരമംഗലം സ്വദേശി രാജന്‍ നായര്‍ (58)ആണ് ആത്മഹത്യ ചെയ്തത്. കണ്ടെടുത്ത ആത്മഹത്യ കുറിപ്പില്‍ പോലീസിന്റെ മര്‍ദ്ദനം മൂലമാണ് ആത്മഹത്യ ചെയ്യുന്നതെന്ന് എഴുതിയിട്ടുണ്ട്.

കഴിഞ്ഞ 25-നാണ് രാജന്‍ നായര്‍ വീടിനടുത്ത പറമ്പിലെ മരത്തില്‍ തൂങ്ങിമരിക്കുന്നത്. എന്നാല്‍ ആത്മഹത്യാകുറിപ്പ് ലഭിക്കുന്നത് ഇന്നലെയാണ്. ബൈക്കില്‍ യാത്ര ചെയ്തിരുന്ന രാജന്‍ നായര്‍ ബസ്സുമായി ഉരസിയതിനെ തുടര്‍ന്ന് തര്‍ക്കമുണ്ടായിരുന്നു. തുടര്‍ന്ന് പോലീസ് സ്‌റ്റേഷനിലെത്തിയ രാജനെ രണ്ട് തവണ പോലീസ് കരണത്തടിച്ചിരുന്നു. ബസ് ഉടമകളുമായി ബന്ധമുള്ള പോലീസുകാര്‍ രാജനെ അപമാനിച്ചതിന് നാട്ടുകാരും സാക്ഷികളാണ്. ഈ അപമാനമാണ് മരണത്തിന് കാരണമെന്ന് രാജന്‍ കുറിപ്പില്‍ എഴുതിയിട്ടുണ്ട്. സംഭവത്തില്‍ ബാലുശ്ശേരി സി.ഐക്കെതിരെ ആത്മഹത്യാ പ്രേരണക്കുറ്റം ചുമത്തി കേസെടുക്കണമെന്ന് രാജന്റെ ബന്ധുക്കള്‍ ആവശ്യപ്പെട്ടു.