rajasthan congress – Chandrika Daily

രാജസ്ഥാനിലെ തദ്ദേശ തെരഞ്ഞെടുപ്പില്‍ കോണ്‍ഗ്രസ് മുന്നേറ്റം

ചന്ദ്രിക വെബ് ഡെസ്‌ക്‌ — Mon, 14 Dec 2020 11:06:44 +0000

ജയ്പൂര്‍: രാജസ്ഥാനില്‍ നഗരപ്രദേശങ്ങളിലെ തദ്ദേശ സ്ഥാപനങ്ങളിലേക്ക് നടന്ന തെരഞ്ഞെടുപ്പില്‍ ബിജെപിയെ വീഴ്ത്തി കോണ്‍ഗ്രസ് മുന്നേറ്റം. 50 തദ്ദേശ സ്ഥാപനങ്ങളിലെ 1775 വാര്‍ഡുകളില്‍ ഫലം പ്രഖ്യാപിച്ചപ്പോള്‍ 620 സീറ്റുകളില്‍ കോണ്‍ഗ്രസ് വിജയിച്ചു. 548 വാര്‍ഡുകള്‍ മാത്രമാണ് ബിജെപിക്ക് നേടാനായത്. സ്വതന്ത്ര സ്ഥാനാര്‍ത്ഥികള്‍ 595 സീറ്റുകള്‍ നേടി.

ബിഎസ്പി ഏഴ് സീറ്റുകളില്‍ വിജയിച്ചു. സിപിഎം, സിപിഐ പാര്‍ട്ടികള്‍ ഓരോ സീറ്റ് വീതം നേടി.

12 ജില്ലകളിലെ അര്‍ബന്‍ ലോക്കല്‍ ബോഡി തെരഞ്ഞെടുപ്പില്‍ 14.32 ലക്ഷം പേര്‍ക്കാണ് വോട്ടവകാശം ഉണ്ടായിരുന്നത്. 2622 ബൂത്തുകള്‍ സജ്ജീകരിച്ച തെരഞ്ഞെടുപ്പില്‍ 7249 സ്ഥാനാര്‍ത്ഥികളാണ് മത്സരരംഗത്തുണ്ടായിരുന്നത്.

രാജസ്ഥാന്‍ തദ്ദേശ തെരഞ്ഞെടുപ്പ്; ബിജെപിയുടെ കോട്ടകള്‍ തകര്‍ത്ത് കോണ്‍ഗ്രസിന്റെ വന്‍ തിരിച്ചുവരവ്

Test User — Wed, 04 Nov 2020 08:47:01 +0000

ജയ്പൂര്‍: രാജസ്ഥാനിലെ ആറ് മുനിസിപ്പല്‍ കോര്‍പറേഷനിലേക്ക് നടന്ന തെരഞ്ഞെടുപ്പില്‍ മൂന്നിടത്തും കോണ്‍ഗ്രസിന് മേല്‍ക്കൈ. രണ്ടിടത്ത് പാര്‍ട്ടി വ്യക്തമായ ഭൂരിപക്ഷം നേടിയപ്പോള്‍ ഒരിടത്ത് ഏറ്റവും വലിയ ഒറ്റക്കക്ഷിയായി. ഇവിടെ ഭൂരിപക്ഷത്തിന് ഏതാനും സീറ്റുകളുടെ കുറവുണ്ട്. ഒരിടത്ത് ഇരുകക്ഷികളും തുല്യനിലയിലായി.

ജോധ്പൂര്‍ നോര്‍ത്ത്, കോട്ട നോര്‍ത്ത് എന്നിവിടങ്ങളിലാണ് കോണ്‍ഗ്രസ് ഭൂരിപക്ഷം നേടിയത്. ജെയ്പൂര്‍ ഹെറിറ്റേജിലാണ് ഏറ്റവും വലിയ ഒറ്റക്കക്ഷി. ജയ്പൂര്‍ സൗത്ത്, ജോധ്പൂര്‍ സൗത്ത് കോര്‍പറേഷനുകള്‍ ബിജെപി നേടി. കോട്ട സൗത്തില്‍ ഇരുപാര്‍ട്ടികളും 36 സീറ്റു നേടി തുല്യത പാലിച്ചു. എണ്‍പത് അംഗങ്ങളാണ് കോര്‍പറേഷനില്‍ ഉള്ളത്.

ജയ്പൂര്‍, ജോധ്പൂര്‍, കോട്ട നഗരങ്ങളിലെ മുനിസിപ്പല്‍ സ്ഥാപനങ്ങളിലായിരുന്നു തെരഞ്ഞെടുപ്പ്. ജയ്പൂരില്‍ 26 വര്‍ഷത്തിന് ശേഷമാണ് കോണ്‍ഗ്രസിന്റെ നേതൃത്വത്തിലുള്ള ഭരണസമിതി അധികാരത്തില്‍ വരുന്നത്.

മൊത്തം 560 സീറ്റില്‍ 261 സീറ്റാണ് കോണ്‍ഗ്രസ് നേടിയത്. ബിജെപിക്ക് ലഭിച്ചത് 242 സീറ്റുകളും. 560 സീറ്റുകളില്‍ 2238 സ്ഥാനാര്‍ത്ഥികളാണ് മത്സരരംഗത്തുണ്ടായിരുന്നത്. എല്ലാ സാമൂഹ്യ മത വിഭാഗങ്ങളില്‍പ്പെട്ടവരും തങ്ങള്‍ക്ക് വോട്ടു ചെയ്തു എന്നാണ് ഫലം തെളിയിക്കുന്നത് എന്ന് കോണ്‍ഗ്രസ് പിസിസി അധ്യക്ഷന്‍ ഗോവിന്ദ് സിങ് ദൊതാസ്ര പറഞ്ഞു.

പാര്‍ട്ടിയുടെ പരമ്പരാഗത ശക്തി കേന്ദ്രമായ ജയ്പൂര്‍ നഷ്ടപ്പെട്ടത് ബിജെപിക്ക് വന്‍ തിരിച്ചടിയായി. ജെയപൂര്‍ ഹെറിറ്റേജിലെ 100 സീറ്റില്‍ 47 ഇടത്താണ് കോണ്‍ഗ്രസ് ജയിച്ചത്. ബിജെപി 42 ഇടത്തും. 11 സീറ്റില്‍ സ്വതന്ത്രര്‍ ജയിച്ചു. ഇതില്‍ മിക്കവരും കോണ്‍ഗ്രസ് വിമതരാണ് എന്നതാണ് ശ്രദ്ധേയം.

ജയ്പൂര്‍ ഗ്രേറ്ററിലെ 250 സീറ്റില്‍ ബിജെപി 88 സീറ്റാണ് നേടിയത്. കോണ്‍ഗ്രസ് 49 ഇടത്ത് ജയിച്ചു. 11 സീറ്റില്‍ സ്വതന്ത്രരും.

മുഖ്യമന്ത്രി അശോക് ഗെലോട്ടിന്റെ കോട്ടയായ ജോധ്പൂരില്‍ 80ല്‍ 53 സീറ്റും കോണ്‍ഗ്രസ് പിടിച്ചടക്കി. ബിജെപിക്ക് 19 സീറ്റേ കിട്ടിയുള്ളൂ. എന്നാല്‍ ജോധ്പൂര്‍ സൗത്തില്‍ ബിജെപി 43 സീറ്റുകള്‍ നേടി. കോണ്‍ഗ്രസിന് വിജയിക്കാനായത് 29 സീറ്റുകളില്‍.

കോട്ട നോര്‍ത്തില്‍ ആകെയുള്ള 80 സീറ്റില്‍ 47 ഇടത്തും ജയിച്ച് കോണ്‍ഗ്രസ് വ്യക്തമായ ഭൂരിപക്ഷം നേടി. 14 സീറ്റു മാത്രമാണ് ബിജെപിക്ക് കിട്ടിയത്. കോട്ട സൗത്തിലെ 80 സീറ്റില്‍ 36 സീറ്റു വീതം ജയിച്ച് ഇരുകക്ഷികളും തുല്യത പാലിച്ചു. എട്ടു സീറ്റുകളില്‍ ജയിച്ചത് വിമതരാണ്.

രാജസ്ഥാനില്‍ ആര്‍.എസ്.എസ് മുക്ത ബ്യൂറോക്രസി നടപ്പാക്കുന്നു

chandrika — Mon, 29 Jul 2019 09:40:11 +0000

ജയ്പൂര്‍: ആര്‍.എസ്.എസ്- ബി.ജെ.പി ആദര്‍ശവുമായി ബന്ധപ്പെട്ടു നില്‍ക്കുന്ന ഉദ്യോഗസ്ഥരെ മാറ്റാനൊരുങ്ങി രാജസ്ഥാന്‍ സര്‍ക്കാര്‍. ഉദ്യോഗസ്ഥരെ ട്രാന്‍സ്ഫര്‍ ചെയ്യുകയോ അപ്രധാന പദവികളിലേക്ക് മാറ്റുകയോ ആയിരിക്കും ചെയ്യുക.
ആര്‍.എസ്.എസ്- ബി.ജെ. പി പ്രവര്‍ത്തകരായ ഉദ്യോഗസ്ഥരുടെ നിസ്സഹകരണം ഭരണത്തെ ബാധിച്ച സാഹചര്യത്തിലാണ് ഇത്തരക്കാരെ നിലയ്ക്കു നിര്‍ത്താന്‍ രാജസ്ഥാന്‍ സര്‍ക്കാര്‍ തീരുമാനിച്ചത്. മുഖ്യമന്ത്രി അശോക് ഗെഹ്‌ലോട്ടിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാരാണ് രാജസ്ഥാനില്‍ ആര്‍.എസ്.എസ് മുക്ത ബ്യൂറോക്രസി ലക്ഷ്യമിട്ട് ജോലി തുടങ്ങിയിരിക്കുന്നത്. ബി.ജെ.പി സര്‍ക്കാരിന്റെ കാലത്ത് നിയമിച്ച ആര്‍.എസ്.എസ് അനുഭാവമുള്ള ഉന്നത ഉദ്യോഗസ്ഥരെയായിരിക്കും സ്ഥലംമാറ്റുക. ഇതിന്റെ ഭാഗമായി ആര്‍.എസ്.എസ് അംഗങ്ങളായ ഉദ്യോഗസ്ഥര്‍ക്ക് വിപ്പ് നല്‍കും.
നിസ്സഹകരണം പ്രഖ്യാപിച്ച ഉദ്യോഗസ്ഥര്‍ക്കെതിരെ എം.എല്‍.എമാരും പ്രദേശ് കോണ്‍ഗ്രസ് ഭാരവാഹികളും (പി.സി.സി) മുന്നോട്ടുവച്ച ആവശ്യം വളരെ പ്രധാനമാണെന്നും പാര്‍ട്ടിയുടെയും സര്‍ക്കാരിന്റെയും നയങ്ങള്‍ നടപ്പാക്കാത്ത ഉദ്യോഗസ്ഥരെ നീക്കുമെന്നും ഗെഹ്‌ലോട്ട് പറഞ്ഞു. നേരത്തെ പഞ്ചായത്ത്, മുനിസിപ്പല്‍ തെരഞ്ഞെടുപ്പ് വേളയില്‍ ആര്‍.എസ്.എസ് ആദര്‍ശമുള്ള ഉദ്യോഗസ്ഥരെ മാറ്റിനിര്‍ത്തണമെന്ന് നിരവധി കോണ്‍ഗ്രസ് നേതാക്കളും എം.എല്‍.എമാരും മുഖ്യമന്ത്രിയോട് ആവശ്യപ്പെട്ടിരുന്നെന്ന് സംസ്ഥാന കോണ്‍ഗ്രസ് ജനറല്‍ സെക്രട്ടറി രൂപേഷ് കന്ത് വ്യാസ് പറഞ്ഞു.
അതേസമയം, സര്‍ക്കാരില്‍ നിന്നും ഉദ്യോഗസ്ഥരെ വേര്‍പ്പെടുത്താനുള്ള കോണ്‍ഗ്രസിന്റെ തീരുമാനത്തെ എതിര്‍ക്കുമെന്ന് ബി.ജെ.പി എം.എല്‍.എ രാംലാല്‍ ശര്‍മ വ്യക്തമാക്കി. ഒരു ഉദ്യോഗസ്ഥനെ അയാളുടെ ആദര്‍ശം കൊണ്ടല്ല അളക്കേണ്ടതെന്നും അയാളുടെ ജോലിയിലെ പ്രകടനത്തിന്റെ അടിസ്ഥാനത്തിലാണെന്നും രാം ലാല്‍ പറഞ്ഞു.

ആള്‍ക്കൂട്ടം തല്ലിക്കൊന്ന പെഹലു ഖാനെയും മക്കളേയും പശുക്കടത്ത് കേസില്‍ കുറ്റക്കാരാക്കി രാജസ്ഥാന്‍ പൊലീസ്

chandrika — Sat, 29 Jun 2019 09:24:45 +0000

പശുക്കളെ കടത്തിയെന്ന് ആരോപിച്ച് രാജസ്ഥാനില്‍ ഹിന്ദുത്വ ഭീകരര്‍ തല്ലികൊന്ന അല്‍വാറിലെ പെഹലുഖാനെ പ്രതി ചേര്‍ത്ത് രാജസ്ഥാന്‍ പൊലീസിന്റെ കുറ്റപത്രം. പുതിയ കോണ്‍ഗ്രസ് സര്‍ക്കാര്‍ അധികരാത്തിലെത്തിയതിന് പിന്നാലെ ഡിസംബര്‍ 30നാണ് കുറ്റപത്രം സമര്‍പ്പിച്ചത്. തുടര്‍ന്ന് 2019 മെയ് 29നാണ് ബെഹ്‌റോറിലെ അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റിന് മുമ്പാകെയാണ് പെഹലുഖാനെയും മക്കളെയും ഗോവധ നിരോധന നിയമപ്രകാരം പ്രതി ചേര്‍ത്ത് കുറ്റപത്രം സമര്‍പ്പിച്ചിരിക്കുന്നത്. കശാപ്പിനായി പെഹലുഖാനും മക്കളായ ഇര്‍ഷാദ്, ആരിഫ് എന്നിവരും പശുക്കളെ കടത്തികൊണ്ടുപോയെന്നാണ് കുറ്റപത്രത്തിലെ ആരോപണം. പശുക്കളെ കടത്താന്‍ ഉപയോഗിച്ച ട്രക്കിന്റെ ഉടമ മുഹമ്മദും പ്രതിപട്ടികയിലുണ്ട്. കന്നുകാലി കശാപ്പും കയറ്റുമതിയും നിരോധിച്ചുകൊണ്ടുള്ള രാജസ്ഥാന്‍ ബൊവിന്‍ ആനിമല്‍ ആക്ടിലെ 5, 8, 9 വകുപ്പുകള്‍ പ്രകാരമാണ് ഇവര്‍ക്കെതിരെ കേസെടുത്തിരിക്കുന്നത്.

രണ്ട് വര്‍ഷം മുമ്പ് 2017 ഏപ്രില്‍ ഒന്നിനാണ് പശുക്കടത്ത് ആരോപിച്ച് പെഹലു ഖാനെ ഹിന്ദുത്വ ഭീകരര്‍ തല്ലിക്കൊന്നത്.
ക്ഷീരകര്‍ഷകനായ പെഹ്ലുഖാന്‍ രണ്ട് ട്രക്കുകളിലായി പശുക്കളെ കൊണ്ടുപോയിരുന്നത്.

അതേസമയം പ്രതിചേര്‍ത്ത നടപടിക്കെതിരെ കുടുംബം രംഗത്ത് വന്നു. ”ഗോ സംരക്ഷകരുടെ ആക്രമണത്തില്‍ പിതാവിനെ നഷ്ടമായി. ഇപ്പോള്‍ പശുക്കടത്ത് ആരോപിച്ച് ഞങ്ങള്‍ക്കെതിരെ കേസെടുത്തിരിക്കുകയാണ്”, പെഹലു ഖാന്റെ മകന്‍ ഇര്‍ഷാദ് ദേശീയ മാധ്യമങ്ങളോട് പ്രതികരിച്ചു. പുതിയ സര്‍ക്കാരില്‍ നിന്ന് ഞങ്ങള്‍ നീതി പ്രതീക്ഷിച്ചു. പക്ഷേ അതും ഉണ്ടായില്ലെന്നും ഇര്‍ഷാദ് കൂട്ടിച്ചേര്‍ത്തു.

സംഭവത്തില്‍ കടുത്ത പ്രതിഷേധമാണ് സാമൂഹ്യമാധ്യമങ്ങളില്‍ നടക്കുന്നത്. കോണ്‍ഗ്രസ് ബി.ജെ.പിയുടെ മറ്റൊരു പതിപ്പാണെന്ന് തെളിയിക്കുന്നതാണ് കുറ്റപത്രമെന്ന് ആള്‍ ഇന്ത്യ എം.ഐ.എം പ്രസിഡന്റ് അസദുദ്ദീന്‍ ഉവൈസി ട്വീറ്റ് ചെയ്തു.

https://twitter.com/asadowaisi/status/1144845075572117504

കഴിഞ്ഞ വര്‍ഷം രാജസ്ഥാനിലെ ബിജെപി സര്‍ക്കാര്‍ സമാനമായ കുറ്റപത്രമാണ് തയ്യാറാക്കിയിരുന്നത്. പെഹലു ഖാന്റെ സഹായികളായ അസ്മത്ത്, റഫീഖ് എന്നിവര്‍ക്കെതിരെയും മറ്റൊരു ട്രക്ക് ഉടമ ജഗ്ദീഷ് പ്രസാദ് ഡ്രൈവര്‍ അര്‍ജുന്‍ എന്നിവര്‍ക്കെതിരെയും കേസെടുത്തിരുന്നു.

സവര്‍ക്കറുടെ ജീവചരിത്രത്തിലെ ആര്‍.എസ്.എസ് അജണ്ട തിരുത്തി രാജസ്ഥാനിലെ കോണ്‍ഗ്രസ് സര്‍ക്കാര്‍

chandrika — Tue, 14 May 2019 05:55:40 +0000

ജെയ്പൂര്‍: സവര്‍ക്കറുടെ ജീവചരിത്രത്തിലെ ആര്‍.എസ്.എസ് അജണ്ട തിരുത്തി രാജസ്ഥാനിലെ കോണ്‍ഗ്രസ് സര്‍ക്കാര്‍. പാഠ്യപദ്ധതിയിലെ വീര്‍ സവര്‍ക്കറുടെ ജീവചരിത്രത്തില്‍ മാറ്റം വരുത്തുമെന്ന് സര്‍ക്കാര്‍ അറിയിച്ചു. വസുന്ധര രാജെ സര്‍ക്കാരാണ് ഹിന്ദുത്വ സിദ്ധാന്തത്തിന്റെ ഉപജ്ഞാതാവും ആര്‍ എസ് എസ് സൈദ്ധാന്തികനുമായിരുന്ന സവര്‍ക്കറെ ഇന്ത്യന്‍ സ്വാതന്ത്ര്യസമരത്തിന്റെ ആണിക്കല്ലായി ചിത്രീകരിക്കുന്ന പാഠഭാഗം സിലബസില്‍ ഉള്‍പ്പെടുത്തിയത്. എന്നാല്‍ സ്വാതന്ത്ര്യസമര പോരാളികളെ കുറിച്ച് വേണ്ട പരിഗണന ബിജെപി സര്‍ക്കാര്‍ സിലബസില്‍ നല്‍കിയിരുന്നിമില്ല.

ചരിത്രത്തെ വളച്ചൊടിക്കുന്ന രീതിയില്‍ ബിജെപി ഭരണകാലത്ത് നടത്തിയ തെറ്റുകളാണ് ഇപ്പോള്‍ കോണ്‍ഗ്രസ് സര്‍ക്കാര്‍ തിരിത്തുന്നത്.
സിലബസ് പരിശോധനക്കായി ചുമതലപ്പെടുത്തിയ സമിതി സവര്‍ക്കറുടെ പാഠഭാഗത്ത് ചരിത്രത്തോട് നീതി പുലര്‍ത്തുന്ന തരത്തിലുള്ള മാറ്റങ്ങള്‍ വേണമെന്ന് നിര്‍ദ്ദേശിച്ചിരുന്നു.
സവര്‍ക്കറെ ചിത്രീകരിച്ചിരിക്കുന്നത് യാഥാര്‍ത്ഥ്യവുമായി ഒരു ബന്ധവുമില്ലാത്ത രീതിയിലാണ്. ഇത് വസുന്ധര രാജെയുടെ ആര്‍.എസ്.എസ് അജണ്ടയാണെന്നും അതാണ് തിരുത്തുന്നതെന്നും രാജസ്ഥാന്‍ വിദ്യാഭ്യാസ മന്ത്രി ഗോവിന്ദ് ദൊത്താസര പറഞ്ഞു.

ബി.ജെ.പി സര്‍ക്കാര്‍ വിദ്യാഭ്യാസ വകുപ്പിനെ രാഷ്ട്രീയ ലക്ഷ്യങ്ങള്‍ക്കായി ഉപയോഗപ്പെടുത്താനുള്ള പരീക്ഷണശാലയായിട്ടാണ് കണ്ടതെന്നും അതുകൊണ്ടാണ് സര്‍ക്കാര്‍ ചുമതലപ്പെടുത്തിയ സമിതി സവര്‍ക്കറുടെ ജീവചരിത്രത്തില്‍ അതൃപ്തി രേഖപ്പെടുത്തിയതെന്നും മന്ത്രി പറഞ്ഞു. സ്വാതന്ത്ര്യസമരത്തിന്റെ എല്ലാ കീര്‍ത്തിയും സവര്‍ക്കര്‍ക്ക് നല്‍കി മറ്റു സ്വാതന്ത്ര്യസമര സേനാനികളെ തമസ്‌കരിക്കുകയായിരുന്നു മുന്‍ ബി.ജെ.പി സര്‍ക്കാര്‍. സവര്‍ക്കര്‍ ഇനിമുതുല്‍ വീര്‍ സവര്‍ക്കറായിരിക്കില്ല. ബ്രീട്ടീഷ് സര്‍ക്കാരിന് പലതവണ മാപ്പെഴുതി നല്‍കി രക്ഷപ്പെട്ടയാളാണ് സവര്‍ക്കര്‍. എന്നാല്‍ ജീവന്‍ നല്‍കി പോരാടിയ സമരഭടന്‍മാരെ സിലബസില്‍ നിന്ന് ഒഴിവാക്കിയെന്നും കൂട്ടിച്ചേര്‍ത്തു.

രാജസ്ഥാനില്‍ കാവിക്കോട്ട തകര്‍ന്നടിഞ്ഞു

ചന്ദ്രിക വെബ് ഡെസ്‌ക്‌ — Wed, 12 Dec 2018 03:00:26 +0000

ജയ്പ്പൂര്‍: പ്രവചനങ്ങളും എക്‌സിറ്റ് പോള്‍ ഫലങ്ങളുമൊന്നും പിഴച്ചില്ല. രാജസ്ഥാനില്‍ ബി.ജെ.പിയുടെ കോട്ട തകര്‍ത്ത് കോണ്‍ഗ്രസ് അധികാരം പിടിച്ചെടുത്തു. കഴിഞ്ഞ തവണ ബി.ജെ.പിയുടെ തേരോട്ടത്തില്‍ തകര്‍ന്നടിഞ്ഞ കോണ്‍ഗ്രസ് ഇത്തവണ ഒറ്റക്ക് കേവല ഭൂരിപക്ഷം നേടി അധികാരത്തില്‍ തിരിച്ചെത്തി. പാര്‍ട്ടിയുടെ ജനകീയ മുഖങ്ങളായ അശോക് ഗെഹ്‌ലോട്ടും യുവരക്തം സച്ചിന്‍ പൈലറ്റുമാണ് കോണ്‍ഗ്രസിന്റെ തേരുതെളിച്ചത്. ജാതിരാഷ്ട്രീയം പിന്തുടരുന്ന രാജസ്ഥാനില്‍ 2013-ല്‍ മൃഗീയ ഭൂരിപക്ഷത്തോടെയാണ് വസുന്ധര രാജെയുടെ നേതൃത്വത്തില്‍ ബി.ജെ.പി അധികാരത്തിലേറിയത്. അന്ന് ലഭിച്ചത് 163 സീറ്റുകള്‍. കോണ്‍ഗ്രസ് വെറും 21 സീറ്റുകളിലൊതുങ്ങി. എന്നാല്‍ ഇത്തവണ കാര്യങ്ങള്‍ മാറിമറിഞ്ഞു. കേന്ദ്ര-സംസ്ഥാന സര്‍ക്കാരുകളുടെ ദുര്‍ഭരണത്തിനെതിരെ ജനം വിധിയെഴുതി. ജാട്ട്, ഗുജ്ജാര്‍, ബ്രാഹ്മിണ്‍, രജ്പുത് സമുദായങ്ങളെല്ലാം ബി.ജെ.പിയെ കൈവിട്ടു. തൊഴിലില്ലായ്മ, വികസന മുരടിപ്പ്, ആള്‍ക്കൂട്ട ആക്രമണം, വിലക്കയറ്റം, എസ്.സി-എസ്.ടി ആക്ട്, റഫാല്‍ അഴിമതിയെല്ലാം ചര്‍ച്ചയായി. ജാട്ട് വിഭാഗക്കാരനായ ഹനുമാന്‍ ബെന്‍വേല്‍ ബി.ജെ.പി വിട്ട് രാഷ്ട്രീയ ലോക് താന്ത്രിക് പാര്‍ട്ടി രൂപീകരിച്ചതും ബി.ജെ.പി എം.എല്‍.എ ആയിരുന്ന ഘന്‍ശ്യാം തിവാരി ഭാരത് വാഹനി പാര്‍ട്ടി രൂപീകരിച്ചതും ജാട്ട് വോട്ടുകളില്‍ ഭിന്നിപ്പുണ്ടാക്കി. അതേസമയം എസ്.സി-എസ്.ടി, മുസ്‌ലിം, മീണ, ഗുജ്ജാര്‍, മേഘ്‌വാള്‍, ഭീല്‍ എന്നീ വിഭാഗങ്ങളുടെ വോട്ട് ഉറപ്പിക്കാന്‍ കോണ്‍ഗ്രസിന് കഴിഞ്ഞു. ന്യൂനപക്ഷങ്ങള്‍ക്ക് സീറ്റ് നല്‍കാതിരുന്ന ബി.ജെ.പി മുസ്‌ലിം സ്വാധീന മേഖലയായ ടോങ്ക് മണ്ഡലത്തില്‍ കോണ്‍ഗ്രസിലെ സച്ചിന്‍ പൈലറ്റിനെതിരെ യൂനസ് ഖാനെ ഗോദയിലിറക്കിയെങ്കിലും ഫലമുണ്ടായില്ല. അതേസമയം സംസ്ഥാനത്ത് രാഷ്ട്രീയ സ്വാധീനമില്ലാത്ത സി.പി.എം ഇത്തവണ രണ്ട് സീറ്റുകളില്‍ വിജയിച്ചു. ബാദ്ര, ദന്തര്‍ഘഢ് മണ്ഡലങ്ങളിലാണ് സി.പി.എം നേട്ടമുണ്ടാക്കിയത്. എന്നാല്‍ പാര്‍ട്ടി സെക്രട്ടറി അമ്രാറാം തോറ്റത് സി.പി.എമ്മിന് ക്ഷീണമായി.