യത്‌നാല്‍ ലൈംഗിക പരാമര്‍ശങ്ങള്‍ നടത്തിയെന്നും ഇത് മാനനഷ്ടത്തിന് തുല്യമാണെന്നും ആരോപിച്ചാണ് പരാതി നല്‍കിയത്. ഇതില്‍ ഭാരതീയ ന്യായ് സംഹിത സെക്ഷന്‍ 79 (സ്ത്രീയെ അപമാനിക്കല്‍) പ്രകാരമാണ് കേസ് രജിസ്റ്റര്‍ ചെയ്തത്. സ്വര്‍ണക്കടത്ത് കേസില്‍ നടിക്കെതിരെ ശക്തമായ നടപടി സ്വീകരിക്കണമെന്ന് ആവശ്യപ്പെട്ടാണ് എംഎല്‍എ അശ്ലീല പരാമര്‍ശം നടത്തിയത്.

കര്‍ണാടക ഡിജിപി രാംചന്ദ്ര റാവുവിന്റെ വളര്‍ത്തുമകളായ രന്യ റാവു ദുബൈയില്‍ നിന്ന് 12.56 കോടി വിലമതിക്കുന്ന 14.2 കിലോ സ്വര്‍ണവുമായി വരുന്നതിനിടെ മാര്‍ച്ച് മൂന്നിന് ബെംഗളൂരു വിമാനത്താവളത്തില്‍ നിന്നാണ് പിടിയിലായത്. തുടര്‍ന്ന് രന്യയുടെ വീട്ടില്‍ നടത്തിയ പരിശോധനയില്‍ 2.6 കോടി വിലമതിക്കുന്ന സ്വര്‍ണവും 2.67 കോടി രൂപയും പൊലീസ് പിടിച്ചെടുത്തു. ഇതിനു പിന്നാലെ അറസ്റ്റിലായ രന്യയുടെ ജാമ്യാപേക്ഷ കോടതി തള്ളിയിരുന്നു.

കഴിഞ്ഞ 15 ദിവസത്തിനുള്ളില്‍ നടി രന്യ നാല് തവണ ദുബൈ സന്ദര്‍ശിച്ചിരുന്നു. ഇതേ തുടര്‍ന്ന് നടി ഡിആര്‍ഐയുടെ നിരീക്ഷണത്തിലായിരുന്നു. ഏകദേശം 12 കോടിയോളം വില വരുന്ന സ്യര്‍ണം ദേഹത്ത് അണിഞ്ഞും ശരീരത്തിന്റെ വിവിധ ഭാഗങ്ങളില്‍ ഒളിപ്പിച്ച നിലയിലുമായിരുന്നു കണ്ടെടുത്തത്. കര്‍ണാടയിലെ മുന്‍ ഐപിഎസ് ഉദ്യോഗസ്ഥന്റെ മകളാണ് താനെന്ന് രന്യ അവകാശപ്പെട്ടതായും വിമാനത്താവളത്തില്‍ നിന്ന് വീട്ടിലേക്ക് എസ്‌കോര്‍ട്ട് പോകാന്‍ പ്രാദേശിക പൊലീസ് ഉദ്യോഗസ്ഥരോട് നടി ആവശ്യപ്പെട്ടിരുന്നെന്ന് ഇന്ത്യ ടുഡേ റിപ്പോര്‍ട്ട് ചെയ്യുന്നു. എന്നാല്‍ ഡിആര്‍ഐ നടത്തിയ പരിശോധനയിലാണ് നടിയുടെ പക്കലില്‍ നിന്ന് സ്വര്‍ണം കണ്ടെടുക്കുകയായിരുന്നു.

സ്വര്‍ണക്കടത്തുമായി മറ്റാര്‍ക്കെങ്കിലും ബന്ധമുണ്ടോ എന്നതും ഡിആര്‍ഐ അന്വേഷിക്കുന്നുണ്ട്. അറസ്റ്റിന് പിന്നാലെ കോടതിയില്‍ ഹാജരാക്കിയ നടിയെ 14 ദിവസത്തെ ജുഡീഷ്യല്‍ കസ്റ്റഡിയില്‍ വിട്ടു. നടന്‍ സുദീപ് നായകനായി 2014ല്‍ പുറത്തിറങ്ങിയ ‘മാണിക്യ’യിലൂടെയാണ് രന്യ റാവു അഭിനയ രംഗത്തേക്ക് കടക്കുന്നത്. നിരവധി ദക്ഷിണേന്ത്യന്‍ സിനിമകളില്‍ വേഷമിട്ടിട്ടുണ്ട്.