rasila raju murder – Chandrika Daily

മരണത്തില്‍ ദുരൂഹത ഏറെയെന്ന് ബന്ധുക്കള്‍

chandrika — Tue, 31 Jan 2017 18:49:38 +0000

കോഴിക്കോട്: പൂനെ ഇന്‍ഫോസിസിലെ ജീവനക്കാരി കെ. രസിലയുടെ മരണം സംബന്ധിച്ചുള്ള ദുരൂഹത വര്‍ധിച്ചതായി സംഭ വസ്ഥലം സന്ദര്‍ശിച്ച ബന്ധുക്കള്‍ പറഞ്ഞു. രസിലയുടെ അച്ഛന്‍ രാജു, അമ്മാവന്‍ സുരേഷ്, രാജുവിന്റെ സഹോദരന്‍ വിനോദ്കുമാര്‍ എന്നിവരാണ് പൂനെയില്‍ പോയത്. തിങ്കളാഴ്ച രാത്രി പതിനൊന്നുമണിയോടെയാണ് പൂനെയില്‍ എത്തിയതെന്ന് സുരേഷ് പറഞ്ഞു. തങ്ങള്‍ എത്തുന്നതിന് മുമ്പുതന്നെ പോസ്റ്റ്‌മോര്‍ട്ടം നടപടികള്‍ പൂര്‍ത്തിയാക്കാന്‍ ഇന്‍ഫോസിസ് അധികൃതര്‍ തിടുക്കം കാണിച്ചതായി സുരേഷ് വ്യക്തമാക്കി. മൃതദേഹം ഏറ്റുവാങ്ങുന്നതിന് മുമ്പ് സംഭവം നടന്ന സ്ഥലം കാണണമെന്ന് ആവശ്യപ്പെട്ടിരുന്നു. ആദ്യം അവര്‍ അനുമതി നല്‍കിയില്ല. പിന്നീട് മഹാരാഷ്ട്ര മുന്‍ ഗവര്‍ണര്‍ കെ. ശങ്കരനാരായണന്‍ ഉള്‍പ്പെടെയുള്ളവര്‍ ഇടപെട്ടതോടെയാണ് അവര്‍ സന്നദ്ധരായത്.ഒമ്പതാം നിലയിലാണ് സംഭവം നടന്നത്. ഇവിടെ 36 പേര്‍ക്ക് ഇരിക്കാവുന്ന സംവിധാനമാണുള്ളത്. പഴയ കമ്പ്യൂട്ടറുകളും മറ്റും മൂലയില്‍ കൂട്ടിയിട്ടതായി കണ്ടു. തൊട്ടടുത്തുള്ള കോണ്‍ഫറന്‍സ് ഹാളിന്റെ സുരക്ഷാ ജീവനക്കാരനാണ് ബബന്‍ സൈക്കിയ. ഒമ്പതാം നിലയിലേക്ക് കയറാന്‍ സൈ്വപിങ് സംവിധാനത്തിലൂടെ കടന്നുപോകണം. രസില ജോലി ചെയ്യുന്നിടത്ത് സുരക്ഷാ ജീവനക്കാരന്‍ എങ്ങനെ എത്തി എന്നത് ദുരൂഹമാണ്. സുരക്ഷാക്രമീകരണങ്ങളില്‍ വന്‍ വീഴ്ച വന്നതായി ഇതോടെ തെളിയുകയാണെന്ന് സുരേഷ് പറഞ്ഞു. കേബിള്‍ കൊണ്ട് മുറുക്കിയത് കാരണം രസിലയുടെ കഴുത്തില്‍ ആഴത്തിലുള്ള മുറിവുണ്ട്. ഒരാള്‍ക്ക് മാത്രം കൃത്യം നിര്‍വഹിക്കാന്‍ കഴിയുമെന്ന് കരുതാനാവില്ല. കൃത്യം നടത്തിയത് ബബന്‍ സൈക്കിയ ആണെങ്കിലും മറ്റാരോ സഹായിക്കാനുണ്ടായിരുന്നു എന്നാണ് സൂചന. രാത്രി ഷിഫ്റ്റില്‍ രസിലയെ മാത്രം ഡ്യൂട്ടിക്ക് നിയോഗിച്ചതും സംശയാസ്പദമാണെന്ന് ബന്ധുക്കള്‍ പറഞ്ഞു. സ്ഥാപനത്തിലെ സുരക്ഷാ പാളിച്ചയാണ് ഇത്തരം മൃഗീയ കൊലപാതകത്തിന് വഴിതെളിയിച്ചതെന്നും ബന്ധുക്കള്‍ കുറ്റപ്പെടുത്തി. ഏതായാലും നിയമനടപടികളുമായി മുന്നോട്ട് പോകുമെന്ന് ബന്ധുക്കള്‍ വ്യക്തമാക്കി.

രസിലയുടെ കൊല: ഒരു കോടി നഷ്ടപരിഹാരവും ബന്ധുവിന് ജോലിയും നല്‍കുമെന്ന് കമ്പനി

chandrika — Tue, 31 Jan 2017 16:02:29 +0000

പുനെ: ഇന്‍ഫോസിസ് ജീവനക്കാരി രസിലയെ കൊലപ്പെടുത്തിയ കേസില്‍ അറസ്റ്റിലായ സുരക്ഷാ ജീവനക്കാരന്‍ ആത്മഹത്യക്ക് ശ്രമിച്ചിരുന്നെന്ന് പൊലീസ്. ചോദ്യം ചെയ്യലിനിടെയാണ് കൊലപാതകത്തിനു ശേഷം ആത്മഹത്യക്ക് ശ്രമിച്ചതായി ജീവനക്കാരന്‍ വെളിപ്പെടുത്തിയത്. എന്നാല്‍ പൊലീസ് ഇത് മുഖവിലക്കെടുത്തിട്ടില്ല. സഹതാപം പിടിച്ചു പറ്റാനുള്ള നീക്കമാണിതെന്ന് പൊലീസ് പറഞ്ഞു. കൊല നടത്താന്‍ ഇയാള്‍ നേരത്തെ പദ്ധതിയിട്ടിരുന്നെന്നാണ് സൂചന. രസിലയെ കൊല്ലപ്പെട്ട നിലയില്‍ കണ്ടെത്തി മണിക്കൂറുകള്‍ക്കുള്ളില്‍ ഭാബെന്‍ സൈകിയ(26) പൊലീസ് പിടിയിലായിരുന്നു. കൊലക്കു ശേഷം കെട്ടിടത്തിന്റെ ഏറ്റവും മുകള്‍ നിലയില്‍ കയറി അത്മഹത്യ ചെയ്യാന്‍ ഉദ്ദേശിച്ചിരുന്നു. എന്നാല്‍ അവിടെ എത്തിയപ്പോള്‍ താഴെ സുരക്ഷാ ജീവനക്കാരെ കണ്ടതോടെ പിന്‍മാറി. പിന്നീട് അസമിലുള്ള മാതാവിനെ വിളിച്ച് കാര്യം പറഞ്ഞു. അവരുടെ നിര്‍ദ്ദേശാനുസരണം പൊലീസില്‍ കീഴടങ്ങുകയായിരുന്നു. എന്നാല്‍ ഈ മൊഴി കണക്കിലെടുക്കേണ്ടെന്നാണ് പൊലീസ് ഭാഷ്യം. പ്രതിക്ക് മനഃസാക്ഷിക്കുത്തുള്ളതിന്റെ സൂചനപോലുമില്ലെന്നും പൊലീസ് പറഞ്ഞു. സംഭവത്തിനുശേഷം ഭാബെന്‍ അന്നത്തെ ഡ്യൂട്ടി പൂര്‍ത്തിയാക്കി. പിന്നീട് അസമിലേക്ക് രക്ഷപ്പെടാന്‍ തീരുമാനിച്ചു. മുംബൈയില്‍ നിന്ന് പിടിയിലാകുേമ്പാള്‍ ഇയാള്‍ അസമിലേക്ക് കടക്കാനുള്ള നീക്കത്തിലായിരുന്നെന്നും പൊലീസ് പറഞ്ഞു. തന്നെ തുറിച്ചു നോക്കിയ ഭാബെന്നിനെതിരെ പരാതി നല്‍കുമെന്ന് രസില പറഞ്ഞിരുന്നു. പരാതി നല്‍കരുതെന്ന് ഇയാള്‍ അപേക്ഷിച്ചെങ്കിലും അതിന് തയാറാകത്തതിന്റെ പകയാണ് കൊലയില്‍ കലാശിച്ചതെന്ന് പൊലീസ് അറിയിച്ചു. കമ്പ്യൂട്ടറിന്റെ കേബിള്‍ കഴുത്തില്‍ മുറുക്കിയാണ് കൊന്നത്. അതേസമയം രസിലയുടെ ബന്ധുക്കള്‍ക്ക് ഒരു കോടി രൂപ നഷ്ടപരിഹാരവും ബന്ധുവിന് ജോലിയും നല്‍കാമെന്ന് ഇന്‍ഫോസിസ് രേഖാമൂലം അറിയിച്ചു.

പൂനെ ഇന്‍ഫോസിസില്‍ കോഴിക്കോട് സ്വദേശിനി കൊല്ലപ്പെട്ടു; സുരക്ഷാ ജീവനക്കാരന്‍ കസ്റ്റഡിയില്‍

chandrika — Mon, 30 Jan 2017 05:18:41 +0000

പൂനെ: പൂനെ ഹിഞ്ചേവാടി ഐ.ടി പാര്‍ക്കിലെ ഇന്‍ഫോസിസ് ഓഫിസില്‍ മലയാളി യുവതിയായ രസില രാജുവിനെ(25) കൊല്ലപ്പെട്ട നിലയില്‍ കണ്ടെത്തി. സംഭവത്തെ തുടര്‍ന്ന് കാണാതായ അസം സ്വദേശിയായ സുരക്ഷാ ജീവനക്കാരന്‍ ബാബന്‍ സൈക്യയെ പൊലീസ് കസ്റ്റഡിയില്‍ എടുത്തിട്ടുണ്ട്. മുംബൈയില്‍ നിന്നാണ് ഇയാളെ അറസ്റ്റ് ചെയ്തത്. അന്വേഷണത്തിനായി ഇയാളെ പൂനെയിലേക്ക് കൊണ്ടുവരുകയാണ്. കോഴിക്കോട് കുന്ദമംഗലം സ്വദേശിനിയാണ് രസില രാജു ഒ.പി.

സുരക്ഷാ ജീവനക്കാരനായ അസം സ്വദേശി ബാബന്‍ സൈക്കിയ

ഒരു പ്രൊജക്ടറ്റിന്റെ ഭാഗമായാണ് രസില ഇന്നലെ ഞായറാഴ്ച്ചയായിട്ടും ഓഫീസില്‍ ജോലിക്കെത്തുന്നത്. വൈകുന്നേരം മൂന്നുമണിക്കെത്തിയ രസിലയെ രാത്രി ഏറെ വൈകിയിട്ടും ഫോണില്‍ കിട്ടാത്തതിനെ തുടര്‍ന്ന് സൂപ്പര്‍വൈസര്‍ക്കൊപ്പം സഹപ്രവര്‍ത്തകര്‍ ഓഫീസില്‍ അന്വേഷിച്ചെത്തുകയായിരുന്നു. ഓഫീസില്‍ കമ്പ്യൂട്ടര്‍ വയറുകള്‍ കഴുത്തില്‍ ചുറ്റി കൊല്ലപ്പെട്ട നിലയില്‍ രസിലയെ കാണുകയായിരുന്നു. തുടര്‍ന്ന് പോലീസില്‍ വിവരമറിയിച്ചു.

മരണ വിവരം അറിഞ്ഞതിനെ തുടര്‍ന്ന് യുവതിയുടെ അച്ഛനുള്‍പ്പെടെയുള്ള സംഘം പൂനെയിലേക്ക് തിരിച്ചിട്ടുണ്ട്. കുടുംബാംഗങ്ങള്‍ എത്തിയതിന് ശേഷം മാത്രമേ പോസ്റ്റ്‌മോര്‍ട്ടം നടത്താവൂ എന്നും വിവരം നല്‍കിയിട്ടുണ്ട്. സംഭവത്തില്‍ വിശദമായ അന്വേഷണം നടത്തി വരികയാണ്. സി.സി.ടി.വി ഉള്‍പ്പെടെയുള്ള ദൃശ്യങ്ങള്‍ പോലീസ് പരിശോധിക്കുന്നുണ്ട്.