ദേശീയ വനിതാകമ്മീഷന്റെ കണ്ടെത്തല്‍ പോലെ ഹാദിയ സുരക്ഷിതയാണെങ്കിലും സന്തോഷവതിയല്ല. ഹാദിയക്ക് സന്തോഷം നല്‍കേണ്ടത് കുടുംബമാണ്. എന്നാല്‍ സംസ്ഥാന വനിതാ കമ്മീഷനെ സന്ദര്‍ശിക്കാന്‍ അശോകന്‍ സമ്മതിക്കുന്നില്ല. അതേസമയം ഹാദിയയെ സന്ദര്‍ശിക്കാന്‍ ദേശീയ വനിത കമ്മിഷനെ അനുവദിക്കുകയും ചെയ്തിരിക്കുകയാണെന്ന് ജോസഫൈന്‍ പറഞ്ഞു. എന്നാല്‍ സുരക്ഷാ പ്രശ്‌നത്തിന്റെ പേര് പറഞ്ഞാണ് കമ്മീഷന് അശോകന്‍ അനുമതി നിഷേധിക്കുന്നതെന്നും രേഖാ ശര്‍മ സന്ദര്‍ശിച്ചപ്പോള്‍ ഇല്ലാത്ത എന്ത് സുരക്ഷാപ്രശ്‌നമാണ് സംസ്ഥാന കമ്മിഷന്‍ സന്ദര്‍ശിച്ചാല്‍ ഉണ്ടാവുകയെന്നും ജോസഫൈന്‍ ചോദിച്ചു. ഹാദിയയുടെ പിതാവിന് ഇഷ്ടമുള്ളവരെ മാത്രമാണോ സന്ദര്‍ശിക്കാന്‍ അനുവദിക്കുന്നതെന്നും ഇത് സംശയമുണ്ടാക്കുന്ന നിലപാടാണെന്നും കമ്മീഷന്‍ വ്യക്തമാക്കി. ഹാദിയയുടെ കാര്യത്തില്‍ 27ന് ശേഷം ഈ നില തുടരാനാവില്ലന്നും ജോസഫൈന്‍ കൂട്ടിച്ചേര്‍ത്തു.

നേരത്തെ രേഖാശര്‍മ്മയുടെ പരാമര്‍ശങ്ങള്‍ക്കെതിരെ വിമര്‍ശനവുമായി ജോസഫൈന്‍ രംഗത്തെത്തിയിരുന്നു. കേരളത്തില്‍ നിര്‍ബന്ധിത മതപരിവര്‍ത്തനമുണ്ടെന്നായിരുന്നു രേഖാശര്‍മ്മയുടെ പരാമര്‍ശം. എന്നാല്‍ ഇത് തള്ളിക്കൊണ്ടായിരുന്നു ജോസഫൈന്‍ പ്രതികരിച്ചത്. ഹാദിയയെ സന്ദര്‍ശിക്കുകയും ഹാദിയയുടെ ചിത്രം മാധ്യമങ്ങള്‍ക്ക് പങ്കുവെക്കുകയും ചെയ്തിരുന്നു രേഖാശര്‍മ്മ.

കഴിഞ്ഞ മൂന്നു മാസമുണ്ടായിട്ടും ദേശീയ വനിതാ കമ്മീഷന്‍ ഹാദിയ സന്ദര്‍ശിക്കാനെത്തിയില്ല. രേഖ ശര്‍മ്മയുടെ സന്ദര്‍ശനത്തിന് പിന്നില്‍ രാഷ്ട്രീയമുണ്ടെന്ന് സംശയിക്കുന്നതായും ജോസഫൈന്‍ പറഞ്ഞു. ഹാദിയയുടെ സുരക്ഷയുമായി ബന്ധപ്പെട്ട് പൊലീസില്‍ നിന്നും വിവരങ്ങള്‍ ശേഖരിക്കും. ഹാദിയയാണ് തന്റെ നിലപാട് സുപ്രീംകോടതിയില്‍ അറിയിക്കേണ്ടത്. അതിന് വേണ്ടി കാത്തിരിക്കുകയാണ്. ഹാദിയയെ സന്ദര്‍ശിക്കാന്‍ ഈ മാസം 27 വരെ സമയമുണ്ടെന്നും ജോസഫൈന്‍ കൂട്ടിച്ചേര്‍ത്തു.

ഇന്നലെയും രേഖാ ശര്‍മ്മക്കെതിരെ ജോസഫൈന്‍ രംഗത്തെത്തിയിരുന്നു. കേരളത്തില്‍ നിര്‍ബന്ധിത മതപരിവര്‍ത്തനമുണ്ടെന്ന് രേഖാശര്‍മ്മ ആവര്‍ത്തിച്ചിരുന്നു. കേരളത്തിലെ നിര്‍ബന്ധിത മതപരിവര്‍ത്തനം അതീവ ഗൗരവതരമാണെന്നും കഴിഞ്ഞ രണ്ടു ദിവസങ്ങളില്‍ ഇതുസംബന്ധിച്ച് നിരവധി പരാതികള്‍ ലഭിച്ചുവെന്നും അവര്‍ പറഞ്ഞിരുന്നു. കേരളത്തില്‍ നിര്‍ബന്ധിത പരിവര്‍ത്തനമില്ലെന്നും പരാമര്‍ശം രാഷ്ട്രീയ ലക്ഷ്യത്തോടെയാണെന്ന സംശയുമുണ്ടെന്നും എം.സി ജോസഫൈന്‍ പറഞ്ഞിരുന്നു. മതേതര മൂല്യങ്ങള്‍ ഉയര്‍ത്തി പിടിക്കുന്ന കേരളം പോലെയുള്ള സംസ്ഥാനത്തെ ദേശിയ തലത്തില്‍ ഇകഴ്ത്തി കാണിക്കാനുള്ള കേന്ദ്ര സര്‍ക്കാര്‍ ശ്രമത്തിന്റെ ഭാഗമാണ് രേഖാ ശര്‍മയുടെ പ്രസ്താവനയെന്നും ജോസഫൈന്‍ കുറ്റപ്പെടുത്തി. ഹാദിയ വിഷയത്തില്‍ മനുഷ്യാവകാശ ലംഘനം നടന്നിട്ടുണ്ടോ എന്ന് കോടതിയില്‍ എത്തുമ്പോള്‍ വ്യക്തമാകുമെന്നും ഈ വിഷയത്തില്‍ ഇടപെട്ട സംസ്ഥാന വനിതാ കമ്മീഷനില്‍ നിന്നും ദേശീയ വനിതാ കമ്മീഷന്‍ റിപ്പോര്‍ട്ട് തേടിയില്ലെന്നും കേരളത്തെ കുറിച്ച് മനസിലാകാതെയാണ് രേഖ ശര്‍മ പരാമര്‍ശം നടത്തിയതെന്നും ജോസഫൈന്‍ ഇന്നലെ പറഞ്ഞിരുന്നു.

ഹാദിയയെ ഈ മാസം 27-നാണ് സുപ്രീംകോടതിയില്‍ ഹാജരാക്കുന്നത്. അന്നേദിവസം ഹാദിയയുടെ കൂടെ പോകുമോ എന്ന ചോദ്യത്തിന് ഇല്ല എന്നായിരുന്നു ജോസഫൈന്റെ മറുപടി. നിയമതടസം ചൂണ്ടിക്കാട്ടി ഹാദിയയെ സന്ദര്‍ശിക്കാതിരിക്കുന്നത് നീതികേടാണെന്ന് വിദ്യാര്‍ഥികള്‍ പറഞ്ഞു. ആര്‍.എസ്.എസ് താല്‍പ്പര്യം സംരക്ഷിക്കാനാണ് വനിതാകമ്മീഷന്‍ ശ്രമിക്കുന്നതെന്ന് വിദ്യാര്‍ഥികള്‍ ആരോപിക്കുന്നു.

ഇന്നലെ ദേശീയ വനിതാ കമ്മീഷന്‍ അധ്യക്ഷ രേഖാ ശര്‍മ്മ ഹാദിയയെ വൈക്കത്തുള്ള വീട്ടില്‍ സന്ദര്‍ശിച്ചിരുന്നു. ഹാദിയ സന്തോഷവതിയാണെന്നും സുരക്ഷിതയാണെന്നും രേഖാ ശര്‍മ്മ പറഞ്ഞിരുന്നു. ഹാദിയയുമൊത്തുള്ള ചിത്രം മാധ്യമങ്ങള്‍ക്ക് നല്‍കിയാണ് അവര്‍ മടങ്ങിയത്. ഈ മാസം 27-നാണ് ഹാദിയയെ കോടതിയില്‍ ഹാജരാക്കുന്നത്. തുറന്ന കോടതിയില്‍ ഹാദിയയെ ഹാജരാക്കണമെന്നാണ് സുപ്രീംകോടതി ഉത്തരവ്.

She is in good health and happy. Her security is under no threat: Rekha Sharma (National Commission for Women) after meeting Hadiya #Kerala pic.twitter.com/ad73whANM5

— ANI (@ANI) November 6, 2017

കോടതിയുടെ പരിഗണനയിലുള്ള കേസായതിനാല്‍ ഹാദിയയോട് സംസാരിച്ചത് പൂര്‍ണ്ണമായും പുറത്ത് പറയാന്‍ കഴിയില്ലെന്ന് അവര്‍ വ്യക്തമാക്കി. മൂന്ന് വനിതാ പോലീസുകാരുടെ സംരക്ഷണത്തില്‍ വീടിനുള്ളില്‍ കഴിയുന്ന ഹാദിയ ആരോഗ്യവതിയാണ്. അവള്‍ സന്തോഷവതിയാണ്. അവളുടെ സുരക്ഷയില്‍ ആശങ്കയില്ല. അച്ഛന്‍ അശോകന്‍ മര്‍ദ്ദിച്ചതായി ആരോപിക്കുന്ന പാടുകളൊന്നും ശരീരത്തില്‍ കണ്ടെത്താനായില്ല. ആഹാരം കൃത്യമായി കഴിക്കുന്നുണ്ട് ഹാദിയയെന്നും അധ്യക്ഷ പറഞ്ഞു. ഇത്തരം കേസുകളെ ലൗജിഹാദെന്ന് താന്‍ പറയില്ല. എന്നാല്‍ നിര്‍ബന്ധിത മതപരിവര്‍ത്തനമാണോ എന്ന് അന്വേഷിക്കേണ്ടതുമാണ്. ഇത്തരം ആരോപണങ്ങളുമായി ബന്ധപ്പെട്ടുള്ള കൂടുതല്‍ പെണ്‍കുട്ടികളെ താന്‍ കേരളത്തില്‍ വരുംദിവസങ്ങളില്‍ സന്ദര്‍ശിക്കുമെന്നും അവര്‍ കൂട്ടിച്ചേര്‍ത്തു. സന്ദര്‍ശനവുമായി ബന്ധപ്പെട്ടുള്ള റിപ്പോര്‍ട്ട് ഒരാഴ്ച്ചക്കകം സര്‍ക്കാരിന് സമര്‍പ്പിക്കും. ഹാദിയയുമായി ഒരു മണിക്കൂറിലധികം രേഖാശര്‍മ്മ സംസാരിച്ചിരുന്നു. കൂടാതെ ഹാദിയയുടെ മാതാപിതാക്കളുമായും അവര്‍ സംസാരിച്ചു. മാധ്യമപ്രവര്‍ത്തകര്‍ക്ക് ഹാദിയയുടെ ചിരിച്ചുനില്‍ക്കുന്ന ചിത്രം കാണിച്ചുകൊണ്ടാണ് രേഖാ ശര്‍മ്മ വൈക്കത്തുനിന്നും മടങ്ങിയത്.

സുപ്രീംകോടതിയുടെ പരിഗണനയിലിരിക്കുന്ന കേസില്‍ ഈ മാസം 27ന് ഹാദിയയെ കോടതിയില്‍ ഹാജരാക്കാനുള്ള നിര്‍ദ്ദേശമുണ്ട്. 27ന് വൈകുന്നേരം മൂന്നിനാണ് ഹാജരാക്കേണ്ടത്. വിവാഹം വ്യക്തിപരമാണെന്നും ക്രിമിനലുകളെ വിവാഹം കഴിക്കാന്‍ പാടില്ലെന്ന് നിയമത്തില്‍ പറയുന്നില്ലെന്നും കോടതി പറഞ്ഞിരുന്നു. അടച്ചിട്ട മുറിയില്‍ ഹാദിയയെ കേള്‍ക്കണമെന്ന അച്ഛന്‍ അശോകന്റെ വാദം തള്ളിയാണ് തുറന്ന കോടതിയില്‍ ഹാദിയയെ കേള്‍ക്കണമെന്ന് കോടതി ഉത്തരവിട്ടത്.