retired – Chandrika Daily

അന്റോണിയോ ഗ്രീസ്മാന്‍ ദേശീയ ടീമില്‍ നിന്നും വിരമിച്ചു

webdesk13 — Mon, 30 Sep 2024 12:00:10 +0000

ഫ്രഞ്ച് മുന്നേറ്റ താരം അന്റോയിന്‍ ഗ്രീസ്മാന്‍ അന്താരാഷ്ട ഫുട്ബോളില്‍നിന്ന് വിരമിച്ചു. സാമൂഹികമാധ്യങ്ങളില്‍ വിരമിക്കല്‍ അറിയിച്ചുള്ള വീഡിയോ താരം പങ്കുവെച്ചു. 2018-ല്‍ ഫിഫ ലോകകപ്പ് നേടിയ ഫ്രാന്‍സ് ടീമിലെ പ്രധാന അംഗമായിരുന്നു. ഫൈനലില്‍ ക്രൊയേഷ്യക്കെതിരേ ഗ്രീസ്മാന്റെ ഗോളിന്റെകൂടി ബലത്തിലായിരുന്നു ഫ്രാന്‍സിന്റെ വിജയം.

രാജ്യത്തിനായി 137 മത്സരങ്ങളില്‍ ബൂട്ടുകെട്ടിയ മുപ്പത്തിമൂന്നുകാരന്‍, 44 ഗോളുകളാണ് സ്വന്തംപേരില്‍ ചേര്‍ത്തത്. വിരമിക്കല്‍ പ്രഖ്യാപിച്ചുള്ള വീഡിയോയില്‍ ഫ്രഞ്ച് ടീമിനൊപ്പമുണ്ടായിരുന്ന യാത്രകളെക്കുറിച്ചും മറ്റും താരം വിശദീകരിക്കുന്നുണ്ട്. പിന്തുണച്ച എല്ലാവര്‍ക്കും നന്ദിയറിയിക്കുകയും ചെയ്തു. ഗോളുകളിലോ മുന്നേറ്റത്തിലോ മാത്രം ഒതുങ്ങിനില്‍ക്കുന്ന കരിയറായിരുന്നില്ല ഗ്രീസ്മാന്റേത്. ആക്രമണത്തിലും പ്രതിരോധത്തിലും വീറുറ്റ പ്രകടനം കാഴ്ചവെച്ച താരം, മികച്ച പ്ലേമേക്കറായിരുന്നു.

2018-ലെ ഫിഫ ലോകകപ്പ് കിരീടം നേടിയ ടീമിലെ അംഗമാവാന്‍ കഴിഞ്ഞതാണ് ഗ്രീസ്മാനെ സംബന്ധിച്ച ഏറ്റവും വലിയ നേട്ടം. ഗ്രീസ്മാന്റെ മികച്ച പ്രകടനം ലോകകപ്പ് നേട്ടത്തില്‍ നിര്‍ണായകമായി. ഏഴ് മത്സരങ്ങളില്‍നിന്നായി നാല് ഗോളുകളാണ് 2018 ലോകകപ്പില്‍ താരം നേടിയിരുന്നത്. ഫൈനലില്‍ ക്രൊയേഷ്യക്കെതിരേ നേടിയ ഒരു ഗോളും ഇതില്‍ ഉള്‍പ്പെടും. 4-2നായിരുന്നു അന്ന് ഫ്രാന്‍സിന്റെ ജയം.

ദേശീയ ടീമില്‍ 2014-ലാണ് അരങ്ങേറ്റം. തുടര്‍ന്ന് കളിമികവുകൊണ്ട് പരിശീലകന്‍ ദിദിയര്‍ ദെഷാംപ്സിന്റെ പ്രീതി പിടിച്ചുപറ്റി. വിങ്ങിലും മുന്നേറ്റത്തിലും പ്ലേമേക്കിങ് റോളിലുമെല്ലാം ഗ്രീസ്മാന്റെ ഫുട്ബോള്‍ വൈദഗ്ധ്യം നിറഞ്ഞുനിന്നു. ഇതാണ് ഗ്രീസ്മാനെ ടീമിലെ സ്ഥിരസാന്നിധ്യമാക്കി മാറ്റിയത്.

ഇംഗ്ലണ്ട് ക്രിക്കറ്റ് താരം മൊയീന്‍ അലി അന്താരാഷ്ട്ര ക്രിക്കറ്റില്‍ നിന്ന് വിരമിച്ചു

webdesk13 — Sun, 08 Sep 2024 06:15:01 +0000

ഇംഗ്ലണ്ട്ക്രിക്കറ്റ് ടീം ഓൾ റൗണ്ടർ മൊയീൻ അലി അന്താരാഷ്ട്ര ക്രിക്കറ്റിൽ നിന്ന് വിരമിച്ചു. 37കാരനായ മൊയീൻ അലിയെ ഓസ്ട്രേലിയയ്ക്കെതിരെ ഈ മാസം തുടങ്ങുന്ന ട്വന്റി 20 പരമ്പരയ്ക്കുള്ള ടീമിൽ ഉൾപ്പെടുത്തിയിരുന്നില്ല. ‘താൻ ഇംഗ്ലണ്ട് ക്രിക്കറ്റിനായി ഒരുപാട് മത്സരങ്ങൾ കളിച്ചു.

ഇപ്പോൾ അടുത്ത തലമുറയ്ക്ക് വഴിമാറി കൊടുക്കേണ്ട സമയമായിരിക്കുന്നു. ഇതാണ് ക്രിക്കറ്റിൽ നിന്ന് വിരമിക്കാൻ ശരിയായ സമയമെന്ന് തോന്നുന്നു.’ മൊയീൻ അലി വിരമിക്കൽ തീരുമാനം പ്രഖ്യാപിച്ചുകൊണ്ട് പറ‍ഞ്ഞത് ഇങ്ങനെ.

ഇംഗ്ലണ്ടിന് വേണ്ടി കളിച്ചതിൽ ഏറെ അഭിമാനമുണ്ട്. ആദ്യമായി ഇംഗ്ലണ്ടിന് വേണ്ടി കളിക്കാനിറങ്ങിയപ്പോൾ താൻ എത്രകാലം ക്രിക്കറ്റിൽ ഉണ്ടാകുമെന്ന് അറിയില്ലായിരുന്നു. ദേശീയ ടീമിനായി 300നടുത്ത് മത്സരങ്ങൾ കളിക്കാൻ കഴിഞ്ഞു. ടെസ്റ്റ് ക്രിക്കറ്റ് കളിക്കാനാണ് തുടക്കകാലത്ത് താൻ ആഗ്രഹിച്ചത്. എന്നാൽ ഇയാൻ മോർഗൻ തന്നെ ഏകദിന ടീമിലേക്കും വിളിക്കുകയായിരുന്നു. അത് മികച്ച അനുഭവമായിരുന്നു. എങ്കിലും ടെസ്റ്റ് ക്രിക്കറ്റാണ് ഏറ്റവും മികച്ച ഫോർമാറ്റെന്ന് ഞാൻ കരുതുന്നു. മൊയീൻ അലി പറയുന്നു.

2014ലാണ് അന്താരാഷ്ട്ര ക്രിക്കറ്റിലേക്ക് മൊയീൻ അലി കടന്നുവന്നത്. 68 ടെസ്റ്റുകളും 138 ഏകദിനങ്ങളും 92 ട്വന്റി 20യും അലി ഇംഗ്ലണ്ടിനായി കളിച്ചു. 6,678 റൺസാണ് മൂന്ന് ഫോർമാറ്റുകളിലുമായി അലി അടിച്ചുകൂട്ടിയത്. എട്ട് സെഞ്ച്വറിയും 28 അർധ സെഞ്ച്വറിയും 366 വിക്കറ്റുകളും താരത്തിന്റെ കരിയറിന്റെ ഭാഗമാണ്. 2024ലെ ട്വന്റി 20 ലോകകപ്പിൽ ഇന്ത്യയ്ക്കെതിരെയായിരുന്നു മൊയീൻ അലി ഇംഗ്ലണ്ടിനായി അവസാനം കളിച്ചത്.

സ്വിറ്റ്സര്‍ലന്‍ഡ് സൂപ്പര്‍താരം ഷാഖിരി വിരമിച്ചു

webdesk13 — Tue, 16 Jul 2024 07:41:58 +0000

14 വര്‍ഷത്തെ അന്താരാഷ്ട്ര കരിയര്‍ അവസാനിപ്പിച്ച് സൂപ്പര്‍താരം ഷാഖിരി (ജേര്‍ദാന്‍ ഷാചീരി) സ്വിസ് ദേശീയ ഫുട്‌ബോള്‍ ടീമില്‍ നിന്ന് വിരമിച്ചു. 32 കാരനായ താരം തന്റെ സോഷ്യല്‍ മീഡിയ വഴിയാണ് വിരമിക്കുന്നത് സംബന്ധിച്ച കുറിപ്പ് പങ്കുവെച്ചിരിക്കുന്നത്. ”ഏഴ് ടൂര്‍ണമെന്റുകള്‍, നിരവധി ഗോളുകള്‍, സ്വിറ്റ്‌സര്‍ലന്‍ഡ് ദേശീയ ടീമിനൊപ്പം 14 വര്‍ഷം, അവിസ്മരണീയ നിമിഷങ്ങള്‍.

ദേശീയ ടീമിനോട് വിടപറയാനുള്ള സമയമാണിത്. മികച്ച ഓര്‍മ്മകള്‍ അവശേഷിക്കുന്നു, ഞാന്‍ നിങ്ങളോട് എല്ലാവരോടും നന്ദി പറയുന്നു”. സോഷ്യല്‍ മീഡിയ വാളില്‍ ഷാഖിരി എഴുതുന്നു. നിലവില്‍ യുഎസ്എ ലീഗായ മേജര്‍ ലീഗ് സോക്കറില്‍ ചിക്കാഗോ ഫയറിന് വേണ്ടി കളിക്കുകയാണ് ഷാഖിരി.

തോമസ് മുള്ളർ അന്താരാഷ്ട്ര ഫുട്ബോളിൽ നിന്ന് വിരമിച്ചു

webdesk13 — Mon, 15 Jul 2024 15:11:29 +0000

ജർമ്മൻ സൂപ്പര്‍ താരം തോമസ് മുള്ളർ അന്താരാഷ്ട്ര ഫുട്ബോളിൽ നിന്ന് വിരമിച്ചു. 14 വർഷം നീണ്ട അന്താരാഷ്ട്ര കരിയറിനാണ് താരം അവസാനം കുറിച്ചത്. യൂറോ കപ്പിൽ ജർമ്മനി പുറത്തായതിന് പിന്നാലെയാണ് താരത്തിന്റെ വിരമിക്കൽ പ്രഖ്യാപനം. ജർമ്മൻ കുപ്പായത്തിൽ 131 മത്സരങ്ങൾ കളിച്ച താരം 45 ഗോളുകൾ നേടിയിട്ടുണ്ട്. 2014ൽ ലോകചാമ്പ്യനായ ജർമ്മൻ നിരയിൽ മുള്ളർ അംഗമായിരുന്നു.

2010ലെ ലോകകപ്പിൽ ജർമ്മനി മൂന്നാം സ്ഥാനത്ത് ഫിനിഷ് ചെയ്തപ്പോൾ മികച്ച യുവതാരമായതും ഗോൾഡൻ ബൂട്ട് പുരസ്കാരം നേടിയതും മുള്ളറാണ്. രാജ്യത്തിന് വേണ്ടി കളിച്ചത് എപ്പോഴും അഭിമാനമായിരുന്നുവെന്ന് താരം പ്രതികരിച്ചു. ഓരോ നേട്ടങ്ങളും നമ്മൾ ഒരുമിച്ച് സന്തോഷിച്ചതായും എന്നാൽ ചിലസമയം ഒന്നിച്ച് കരയേണ്ടി വന്നതായും തോമസ് മുള്ളർ ആരാധകരോടായി പറഞ്ഞു.

ജർമ്മനിക്കായി അന്താരാഷ്ട്ര ഫുട്ബോളിൽ അരങ്ങേറ്റം നടക്കുമ്പോൾ ഇത്രയധികം നേട്ടങ്ങളിലേക്ക് എത്തിച്ചേരുമെന്ന് താൻ ഒരിക്കലും കരുതിയിരുന്നില്ല. ഇതൊന്നും താൻ സ്വപ്നം കണ്ടിട്ടുമില്ല. ഈ അവസരത്തിൽ ജർമ്മൻ ഫുട്ബോളിന്റെ എല്ലാ ആരാധകരോടും ഇക്കാലമത്രയും തന്നെ പിന്തുണച്ച സഹതാരങ്ങളോടും നന്ദി അറിയിക്കുന്നതായും തോമസ് മുള്ളർ വ്യക്തമാക്കി.

ഓസ്‌ട്രേലിയന്‍ താരം ഷോണ്‍ മാര്‍ഷ് കളി മതിയാക്കുന്നു

webdesk13 — Sun, 14 Jan 2024 09:12:19 +0000

ക്രിക്കറ്റ് കരിയർ മതിയാക്കാൻ ഓസ്ട്രേലിയൻ താരം ഷോൺ മാർഷ്. മെല്‍ബണ്‍ റെനഗേഡ്‌സിന്റെ സിഡ്നി തണ്ടേഴ്സിനെതിരായ മത്സരത്തോടെ ഷോൺ മാർഷിന്റെ ക്രിക്കറ്റ് കരിയറിന് അവസാനമാകും. റെനഗേഡ്സിന്റെ മറ്റൊരു താരമായ ആരോൺ ഫിഞ്ചും ഏതാനും ദിവസങ്ങൾക്ക് മുമ്പ് ക്രിക്കറ്റ് കരിയറിന് അവസാനമിട്ടിരുന്നു.

ഓസ്ട്രേലിയൻ ബിഗ് ബാഷിൽ ഇപ്പോഴും മികച്ച പ്രകടനമാണ് മാർഷ് പുറത്തെടുക്കുന്നത്. ഈ സീസണിൽ 181 റൺസാണ് 40കാരനായ മാർഷ് അടിച്ചെടുത്തത്. റെനഗേഡ്സിനായി കളിക്കുന്നത് വളരെ ഇഷ്മായിരുന്നുവെന്ന് മാർഷ് പ്രതികരിച്ചു.

കഴിഞ്ഞ 5 വർഷത്തിൽ നിരവധി സൗഹൃദങ്ങൾ തനിക്ക് ലഭിച്ചു. തന്റെ യാത്രയിൽ ഒപ്പം നിന്ന ആരാധകരുടെയും താരങ്ങളുടെയും പിന്തുണയ്ക്ക് നന്ദി പറയുന്നതായും മാർഷ് വ്യക്തമാക്കി.

2019-20 സീസണിലാണ് മാർഷ് റെനഗേഡ്സിലേക്ക് എത്തിയത്. അതിന് മുമ്പ് പെർത്ത് സ്‌കോര്‍ച്ചേഴ്സിന്റെ താരമായിരുന്നു മാർഷ്. ഓസ്ട്രേലിയൻ ടീമിൽ 38 ടെസ്റ്റുകളും 73 ഏകദിനങ്ങളും 15 ട്വന്റിയും മാർഷ് കളിച്ചിട്ടുണ്ട്. 2019 വരെ ഓസ്ട്രേലിയൻ ടീമിൽ മാർഷ് ഉണ്ടായിരുന്നു. ഐപിഎല്ലിൽ കിംഗ്സ് ഇലവൻ പഞ്ചാബിന്റെ (പഞ്ചാബ് കിംഗ്സ്) മികച്ച താരങ്ങളിൽ ഒരാളായിരുന്നു മാർഷ്. ഇപ്പോൾ ഓസീസ് ടീമിലെ നിർണായ താരമായ മിച്ചൽ മാർഷിന്റെ സഹോദരനാണ്.

ഏഡന്‍ ഹസാര്‍ഡ് അന്താരാഷ്ട്ര ഫുട്‌ബോളില്‍ നിന്ന് വിരമിച്ചു

webdesk13 — Tue, 10 Oct 2023 12:01:23 +0000

ബെല്‍ജിയം സൂപ്പര്‍ താരം ഏഡന്‍ ഹസാര്‍ഡ് അന്താരാഷ്ട്ര ഫുട്‌ബോളില്‍ നിന്ന് വിരമിച്ചു. 32-ാംവയസിലാണ് ഫുട്‌ബോളിലെ എക്കാലത്തെയും മികച്ച അറ്റാക്കിങ് മിഡ്ഫീല്‍ഡര്‍മാരിലൊരാളായ ഹസാര്‍ഡ് ബൂട്ടഴിക്കുന്നത്. കഴിഞ്ഞ ജൂണില്‍ റയല്‍ മാഡ്രിഡ് വിട്ട താരം വേറെ ഒരു ക്ലബ്ബിലും ചേര്‍ന്നിരുന്നില്ല. ഖത്തര്‍ ലോകകപ്പില്‍ നിന്നും ബെല്‍ജിയം പുറത്തായതിന് പിന്നാലെ ഹസാര്‍ഡ് അന്താരാഷ്ട്ര ഫുട്‌ബോളില്‍ നിന്ന് വിരമിക്കല്‍ പ്രഖ്യാപിച്ചിരുന്നു. ഇന്നാണ് 16 വര്‍ഷം നീണ്ട കരിയര്‍ അവസാനിപ്പിക്കുന്നുവെന്ന് ഇന്‍സ്റ്റഗ്രാമിലൂടെ ഔദ്യോഗികമായി ഹസാര്‍ഡ് അറിയിച്ചത്.

‘നിങ്ങള്‍ നിങ്ങളെത്തന്നെ ശ്രദ്ധിക്കുക. എന്നിട്ട് ശരിയായ സമയമാകുമ്പോള്‍ നിര്‍ത്താന്‍ പറയുക. ഏതാണ്ട് 700ഓളം മത്സരങ്ങള്‍ കളിച്ച 16 വര്‍ഷങ്ങള്‍ക്ക് ശേഷം പ്രൊഫഷണല്‍ ഫുട്‌ബോള്‍ കരിയര്‍ അവസാനിപ്പിക്കാന്‍ തീരുമാനിച്ചു. എന്റെ സ്വപ്‌നം ഞാന്‍ സാക്ഷാത്കരിച്ചു. ലോകമെമ്പാടുമുള്ള നിരവധി പിച്ചുകളില്‍ കളിക്കാനും ആസ്വദിക്കാനും എനിക്ക് കഴിഞ്ഞിട്ടുണ്ട്. എന്റെ കരിയറില്‍ മികച്ച പരിശീലരെയും ടീമംഗങ്ങളെയും കണ്ടുമുട്ടാന്‍ എനിക്ക് ഭാഗ്യം ലഭിച്ചിട്ടുണ്ട്. ഞാന്‍ നിങ്ങളെ എല്ലാവരേയും മിസ്സ് ചെയ്യും’, ഇന്‍സ്റ്റഗ്രാമില്‍ വൈകാരിക കുറിപ്പില്‍ ഹസാര്‍ഡ് പറഞ്ഞു.

‘ഞാന്‍ മത്സരിച്ചിട്ടുള്ള ക്ലബ്ബുകള്‍ക്കും നന്ദി പറയാന്‍ ഞാന്‍ ആഗ്രഹിക്കുന്നു. ലോസ്‌ക് ലില്ലെ, ചെല്‍സി, റയല്‍ മാഡ്രിഡ്, പിന്നെ ബെല്‍ജിയന്‍ ദേശീയ ടീമിലേക്ക് എന്നെ തിരഞ്ഞെടുത്ത റോയല്‍ ബെല്‍ജിയന്‍ ഫുട്‌ബോള്‍ അസോസിയേഷനും (ആര്‍ബിഎഫ്എ) നന്ദി അറിയിക്കുന്നു. എന്റെ കുടുംബത്തിനും സുഹൃത്തുക്കള്‍ക്കും ഉപദേശകര്‍ക്കും നല്ല സമയത്തും മോശം സമയത്തും എന്റെ കൂടെ നിന്ന എല്ലാവര്‍ക്കും നന്ദി.

അവസാനമായി ഇത്രയും കാലം എന്നെ പിന്തുടര്‍ന്ന ഞാന്‍ കളിച്ച എല്ലായിടത്തും എന്നെ പ്രോത്സാഹിപ്പിച്ച എന്റെ ആരാധകര്‍ക്കും വലിയ നന്ദി’, ഹസാര്‍ഡ് ഇന്‍സ്റ്റഗ്രാമില്‍ കുറിച്ചു. ‘ഇപ്പോള്‍ എന്റെ പ്രിയപ്പെട്ടവരുടെ കൂടെയുള്ള സമയം ആസ്വദിക്കാനും പുതിയ അനുഭവങ്ങള്‍ നേടാനുമുള്ള സമയമാണ്. മൈതാനത്തിന് പുറത്ത് ഉടന്‍ കാണാം സുഹൃത്തുക്കളെ’, ഹസാര്‍ഡ് ഇങ്ങനെ പറഞ്ഞവസാനിപ്പിച്ചു.

ഡിജിപിമാരായ ഡോ.ബി.സന്ധിയും എസ്. ആനന്ദകൃഷ്ണനും നാളെ വിരമിക്കുന്നു

webdesk13 — Tue, 30 May 2023 15:39:42 +0000

ഡിജിപിമാരായ ഡോ.ബി.സന്ധ്യയും എസ്.ആനന്ദകൃഷ്ണനും നാളെ സര്‍വീസില്‍ നിന്ന് വിരമിക്കും.
ഡോ. ബി. സന്ധ്യ, ശ്രീ എസ്. ആനന്ദകൃഷ്ണന്‍ എന്നിവര്‍ക്ക് പൊലീസ് സേന നല്‍കുന്ന യാത്രയയപ്പ് പരേഡ് നാളെ പേരൂര്‍ക്കട എസ്എപി പരേഡ് ഗ്രൗണ്ടില്‍ നടക്കും. ആനന്ദകൃഷ്ണന്റെ യാത്രയയപ്പ് പരേഡ് രാവിലെ 7.15 നും ഡോ. ബി. സന്ധ്യയുടേത് 8.15 നുമാണ് നടക്കുക.

സര്‍വീസില്‍ നിന്ന് നാളെ തന്നെ വിരമിക്കുന്ന ഒമ്പത് എസ്പിമാര്‍ക്ക് പൊലീസ് ആസ്ഥാനത്ത് ഡിജിപിയുടെ സാന്നിധ്യത്തില്‍ യാത്രയയപ്പ് നല്‍കി.

മാഞ്ചസ്റ്റര്‍ സിറ്റി ഇതിഹാസം വിന്‍സന്റ് കൊമ്പനി വിരമിച്ചു

Test User — Mon, 17 Aug 2020 13:57:28 +0000

ലണ്ടന്‍: ഇംഗ്ലീഷ് പ്രീമിയര്‍ ലീഗ് ക്ലാബ്ബായ മാഞ്ചസ്റ്റര്‍ സിറ്റിയുടെ ഇതിഹാസതാരം വിന്‍സന്റ് കൊമ്പനി അന്താരാഷ്ട്ര ഫുട്‌ബോളില്‍ നിന്ന് വിരമിച്ചു. ബെല്‍ജിയം ക്ലബ്ബ് ആന്‍ഡെര്‍ലെചിലായിരുന്നു കൊമ്പനി കരിയറിന്റെ അവസാന ഘട്ടത്തില്‍ കളിച്ചത്. കളിക്കാരനെന്ന നിലയില്‍ ഇനി ഇല്ലെന്നും പരിശീലകന്റെ റോളിലായിരുക്കും ഇനിയുണ്ടാകുകയെന്നും അദ്ദേഹം തന്നെയാണ് വ്യക്തമാക്കിയത്.

കഴിഞ്ഞ വര്‍ഷം താരം മാഞ്ചസ്റ്റര്‍ സിറ്റി വിട്ടിരുന്നു.ആന്‍ഡെര്‍ലെചില്‍ കളിക്കാരനും പരിശീലകനുമായാണ് ചുമതലയേറ്റിരുന്നത്. ഇനിയും ക്ലബ്ബിന്റെ പരിശീലകനായി താരം തുടരും. മാഞ്ചസ്റ്റര്‍ സിറ്റിയുടെ ക്യാപ്റ്റനായിരുന്ന കൊമ്പനി ക്ലബ്ബിനൊപ്പം 14 കിരീടങ്ങള്‍ നേടിയിട്ടുണ്ട്. ഇതില്‍ നാലു പ്രീമിയര്‍ ലീഗ് കിരീടവും രണ്ടു എഫ്.എ കപ്പും ഉള്‍പ്പെടുന്നു. 11 വര്‍ഷം സിറ്റിയില്‍ കളിച്ച താരം 360 മത്സരങ്ങളില്‍ ജഴ്‌സിയണിഞ്ഞു.