RIHANNA – Chandrika Daily

നൂറു മില്യന്‍ ഫോളോവേഴ്‌സുള്ള റിഹാനയോട് താങ്കളാരാണെന്ന് ബിജെപി നേതാവ്; ട്രോളിക്കൊന്ന് സോഷ്യല്‍ മീഡിയ

web desk 1 — Wed, 03 Feb 2021 17:09:55 +0000

കര്‍ഷക സമരത്തെ പിന്തുണച്ച പോപ്പ് ഗായിക റിഹാനക്കെതിരെ പ്രതികരിച്ച് ബിജെപി നേതാവ് ബേബി കുമാരി. ട്വിറ്ററിലൂടെയാണ് ബേബി കുമാരിയുടെ പ്രതികരണം.

‘ഒരു നിമിഷം, താങ്കളാരാണ്?’ എന്നാണ് റിഹാനയോട് ബേബി കുമാരിയുടെ പ്രതികരണം. ബീഹാര്‍ ബിജെപി സംസ്ഥാന ഉപാദ്ധ്യക്ഷയും മുന്‍ എംഎല്‍എയുമാണ് ബേബി കുമാരി. ഇതിനെ തുടര്‍ന്ന് നിരവധി ട്രോളുകളാണ് ബേബി കുമാരിക്കെതിരെ വന്നിട്ടുള്ളത്.

‘അവര്‍ റിഹാന, നൂറ് മില്യണ്‍ ഫോളോവേഴ്സ് ട്വിറ്ററിലുണ്ട്, മോഡിജിയേക്കാള്‍ അധികം, 600 മില്യണ്‍ ഡോളറിന്റെ സമ്പാദ്യം. ആറ് ഗിന്നസ് ലോക റെക്കോര്‍ഡുകള്‍. ഫോര്‍ബ്സിന്റെ ഏറ്റവുമധികം വേതനം കൈപ്പറ്റുന്ന ആദ്യ പത്തുപേരുടെ പട്ടികയില്‍ ഇടം നേടിയ സെലിബ്രിറ്റി. ടൈംസിന്റെ ലോകത്ത് ഏറ്റവുമധികം സ്വാധീനമുള്ള 100 പേരില്‍ ഇടം നേടിയവര്‍. ഇനി പറയൂ നിങ്ങളാരാണ്’, പാട്രിക് മാലിക്കെന്ന ട്വിറ്റര്‍ ഉപഭോക്താവിന്റെ പ്രതികരണം ഇങ്ങനെയായിരുന്നു.

കര്‍ഷക സമരത്തെ പിന്തുണച്ചതിനു പിന്നാലെ റിഹാനയുടെ മതമന്വേഷിച്ച് ഇന്ത്യക്കാര്‍

web desk 1 — Wed, 03 Feb 2021 14:50:06 +0000

രാജ്യത്തെ കര്‍ഷക സമരത്തെ പിന്തുണച്ച് ട്വീറ്റ് ചെയ്തതിനു പിന്നാലെ പോപ്പ് താരം റിഹാനയുടെ മതം അന്വേഷിച്ച് ഇന്ത്യക്കാര്‍. ഗൂഗിള്‍ സെര്‍ച്ചിലാണ്‌ റിഹാനയെ കുറിച്ചുള്ള വിവരങ്ങള്‍ ഇന്ത്യയില്‍ നിന്ന് കൂടുതലായി തേടുന്നത്. പോപ്പ് താരം മുസ്‌ലിമാണോ എന്നതാണ് കൂടുതല്‍ പേര്‍ക്കും അറിയേണ്ടത്.

റിഹാനയുടെ നാട്, തൊഴില്‍ രംഗം അടക്കമുള്ള എല്ലാ കാര്യങ്ങളുടെയും അന്വേഷണമാണ് ഇന്ത്യയില്‍ നിന്ന് വര്‍ധിച്ചത്.

നേരത്തെ കര്‍ഷക സമരത്തെ പിന്തുണച്ച് താരം രംഗത്തെത്തിയിരുന്നു. ഇതേ കുറിച്ചുള്ള സിഎന്‍എന്‍ വാര്‍ത്ത പങ്കുവച്ചു കൊണ്ട് എന്തുകൊണ്ട് നാം ഇതേ കുറിച്ച് സംസാരിക്കുന്നില്ലെന്ന് ട്വീറ്റ് ചെയ്തിരുന്നു. ഇതോടെ ഇന്ത്യയിലെ കര്‍ഷക സമരത്തെ കുറിച്ചുള്ള ഹാഷ്ടാഗ് യുഎസ് ട്വിറ്ററിലും ട്രെന്റിങ്ങായി. 101 മില്യണ്‍ ആളുകളാണ് ട്വിറ്ററില്‍ റിഹാനയെ ഫോളോ ചെയ്യുന്നത്. ട്വിറ്ററില്‍ ഏറ്റവും കൂടുതല്‍ ഫോളോ ചെയ്യുന്ന നാലാമത്തെ വ്യക്തിയാണ്.

ലിംഗറി മ്യൂസിക് ഷോയില്‍ ഹദീസ് ഉപയോഗിച്ചു; പോപ് ഗായിക റിഹാനയ്‌ക്കെതിരെ വന്‍ പ്രതിഷേധം- മാപ്പു പറഞ്ഞു

Test User — Fri, 09 Oct 2020 14:26:25 +0000

ന്യൂയോര്‍ക്ക്: ലിംഗറി മ്യൂസിക് ഷോയില്‍ പ്രവാചകന്റെ വാക്കുകള്‍ (ഹദീസ്) ഉപയോഗിച്ച പോപ് ഗായിക റിഹാനയ്‌ക്കെതിരെ വ്യാപക പ്രതിഷേധം. വിമര്‍ശനങ്ങളെ തുടര്‍ന്ന് ഇവര്‍ മാപ്പു പറഞ്ഞു. മ്യൂസിക് വീഡിയോയുടെ വരികളിലാണ് പ്രവാചക വചനം ഉള്‍പ്പെടുത്തിയിരുന്നത്.

സാവേജ് എക്‌സ് ഫെന്റി ലിംഗറി ഷോ എന്ന പരിപാടിയാണ് വിവാദത്തിന് ആധാരം. ആമസോണ്‍ പ്രൈം വഴി സംപ്രേഷണം ചെയ്ത ഫാഷന്‍ ഷോയിലെ പശ്ചാത്തല സംഗീതത്തിലാണ് റിഹാന പ്രവാചക വചനം ഉപയോഗിച്ചത്.

അപ്രതീക്ഷിതമായി സംഭവിച്ച തെറ്റാണ് എന്നും മനഃപൂര്‍വ്വമായി സംഭവിച്ചതല്ല എന്നും റിഹാന ഇന്‍സ്റ്റഗ്രാമില്‍ എഴുതിയ കുറിപ്പില്‍ വ്യക്തമാക്കി. ആത്മാര്‍ത്ഥമായി, ഈ തെറ്റിന് മാപ്പു ചോദിക്കുന്നു. ദൈവത്തിനോ ഏതെങ്കിലും മതത്തിനോ നേരെ അനാദരവു കാണിക്കുന്നയാളല്ല താന്‍. ഇത് ഉത്തരവാദിത്വമില്ലാത്ത പ്രവൃത്തിയായിപ്പോയി- അവര്‍ കൂട്ടിച്ചേര്‍ത്തു.

https://www.instagram.com/p/CGA48rEBYh3/?utm_source=ig_web_copy_link

ഒരുപാട് മുസ്‌ലിം സഹോദരങ്ങളെ വാക്കുകള്‍ വേദനിപ്പിച്ചു എന്നറിയാം. ഇത്തരം തെറ്റുകള്‍ ഒരിക്കലും ആവര്‍ത്തിക്കില്ല. മാപ്പു ചോദിക്കുന്നു. നിങ്ങളുടെ ദയാവായ്പിനു നന്ദി- റിഹാന എഴുതി.

https://twitter.com/coucou_chloe/status/1313137644226908162?s=20

പാട്ട് എല്ലാ സ്ട്രീമിങ് പ്ലാറ്റ്‌ഫോമുകളില്‍ നിന്നും ഒഴിവാക്കിയതായി പരിപാടിയുടെ നിര്‍മാതാവ് കോകു ചോലെ പറഞ്ഞു. ഇത് പ്രവാചക വാക്യമാണ് എന്നറിയില്ലായിരുന്നു. ആവശ്യമായ ഗവേഷണം നടത്താതെ ഹദീസ് ഉപയോഗിച്ചതിന്റെ ഉത്തരവാദിത്വം സമ്പൂര്‍ണമായി ഏല്‍ക്കുന്നു. കാര്യങ്ങള്‍ മനസ്സിലാക്കി തന്നവര്‍ക്ക് നന്ദി- നിര്‍മാതാവ് കൂട്ടിച്ചേര്‍ത്തു.