വെള്ളിയാഴ്ച്ച പുലര്‍ച്ചെ 5.30ന് ഡല്‍ഹി-ഹരിദ്വാര്‍ ഹൈവേയില്‍വെച്ചാണ് റിഷഭ് പന്തിന് അപകടം സംഭവിച്ചത്. താരം സഞ്ചരിച്ച കാര്‍ ഡിവൈഡറിലിടിച്ച് തീപിടിക്കുകയായിരുന്നു. ഉറങ്ങിപോയതാകാം അപകടത്തിന് കാരണമെന്ന് ഉത്തരാഖണ്ഡ് ഡി.ജി.പി അശോക് കുമാറിനെ ഉദ്ധരിച്ച് ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നു. ഉറങ്ങിയതിനെ തുടര്‍ന്ന് കാറിന്റെ നിയന്ത്രണം നഷ്ടപ്പെടുകയും തുടര്‍ന്ന് റോഡിലെ ഡിവൈഡറില്‍ ഇടിക്കുകയുമായിരുന്നു. എന്നാല്‍ റോഡില്‍ മൂടല്‍മഞ്ഞ് ഇല്ലായിരുന്നെന്നും അതിനാല്‍ അപകടകാരണം അതല്ല എന്നുമാണ് പൊലീസ് പറയുന്നത്.