rk nagar bye elelction – Chandrika Daily

ദിനകരന്‍ ജയിച്ചത് പണക്കൊഴുപ്പില്‍: കമല്‍ഹാസന്‍

chandrika — Thu, 04 Jan 2018 19:27:50 +0000

ചെന്നൈ: ആര്‍.കെ നഗര്‍ ഉപതെരഞ്ഞെടുപ്പില്‍ എ. ഐ. എ. ഡി.എം.കെ വിമത വിഭാഗം നേതാവ് ടി.ടി.വി ദിനകരന്‍ വിജയിച്ചത് പണക്കൊഴുപ്പിന്റെ ബലത്തിലാണെന്ന് തെന്നിന്ത്യന്‍ താരം കമല്‍ഹാസന്‍.

അതേസമയം വോട്ടര്‍മാരെ അവഹേളിക്കുകയാണ് കമല്‍ഹാസന്‍ ചെയ്യുന്നതെന്ന് ദിനകരന്‍ തിരിച്ചടിച്ചു. ആനന്ദ വികടന്‍ മാസികക്ക് നല്‍കിയ അഭിമുഖത്തിലാണ് കമല്‍ഹാസന്‍ ദിനകരനെ വിമര്‍ശിക്കുന്നത്. ആര്‍. കെ നഗര്‍ ഉപതെരഞ്ഞെടുപ്പ് ഫലം വിലക്കു വാങ്ങിയതാണെന്ന് ദിനകരന്റെ പേരു പറയാതെ അദ്ദേഹം കുറ്റപ്പെടുത്തി.

തമിഴ് രാഷ്ട്രീയത്തിനു തന്നെ വലിയ കളങ്കമാണ് ഈ തെരഞ്ഞെടുപ്പ് ഫലം. പകല്‍ വെളിച്ചത്തില്‍ നടന്ന ഈ കുറ്റകൃത്യം ഇന്ത്യന്‍ രാഷ്ട്രീയത്തിനു തന്നെ കളങ്കമാണെന്ന് കമല്‍ഹാസന്‍ ആരോപിച്ചു.എന്നാല്‍ കമല്‍ഹാസന്‍ ജനങ്ങളെയാണ് അധിക്ഷേപിക്കുന്നതെന്ന് ദിനകരന്‍ ആരോപിച്ചു. ആര്‍.കെ നഗര്‍ ഫലം അംഗീകരിക്കാനോ അംഗീകരിക്കാതിരിക്കാനോ കമല്‍ഹാസന് സ്വാതന്ത്ര്യമുണ്ട്. എന്നാല്‍ പണം വാങ്ങിയാണ് ജനങ്ങള്‍ തനിക്കു വോട്ടു നല്‍കിയതെന്ന് പറഞ്ഞാല്‍, അത് ആര്‍.ഗെ നഗറിലെ വോട്ടര്‍മാരെയാണ് അദ്ദേഹം അധിക്ഷേപിക്കുന്നതെന്നും ദിനകരന്‍ പ്രതികരിച്ചു.

ഭീമമായ ഭൂരിപക്ഷവുമായി ദിനകരന്‍; സര്‍ക്കാര്‍ മൂന്ന് മാസത്തിനകം വീഴുമെന്നും വിമത നേതാവ്

chandrika — Sun, 24 Dec 2017 10:46:26 +0000

ചെന്നൈ: ആര്‍.കെ നഗര്‍ ഉപതെരഞ്ഞെടുപ്പു ഫലം അനുകൂലമായതോടെ തമിഴ് രാഷ്ട്രീയത്തെ പിടിച്ചുലക്കുന്ന പ്രതികരണവുമായി അണ്ണാ ഡിഎംകെ വിമതവിഭാഗം നേതാവ് ടി.ടി.വി. ദിനകരന്‍.
ചിഹ്നവും പാര്‍ട്ടിയുമല്ല. തെരഞ്ഞെടുപ്പില്‍ ജനങ്ങളാണ് പ്രധാനമെന്നും ഭാവിലക്ഷ്യം തമിഴ്‌നാടിന്റെ ഭരണം പിടിച്ചെടുക്കുകയെന്നതാണെന്നും ആര്‍.കെ നഗര്‍ ഉജ്ജ്വല വിജയത്തിലേക്ക് അടുക്കുന്ന സ്ഥാനാര്‍ത്ഥി കൂടിയായാ ടി.ടി.വി ദിനകരന്‍ വ്യക്തമാക്കി.
ആര്‍.കെ നഗറിലെ തെരഞ്ഞെടുപ്പില്‍ ഭീമമായ ഭൂരിപക്ഷത്തോടെ മുന്നേറുന്നതിനിടെയാണ് തമിഴ് രാഷ്ട്രീയത്തെ ഞെട്ടിക്കുന്ന പ്രതികരണവുമായി ദിനകരന്‍ രംഗത്തുവന്നത്. മധുര വിമാനത്താവളത്തില്‍വച്ച് മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

I firmly believe that it is time for this government to go, and in the coming 3 months you will see this government go: TTV Dhinakaran in Madurai #RKNagarByPoll pic.twitter.com/v5uhgQ6T3J

— ANI (@ANI) December 24, 2017

#RKNagarByPoll – The people of RK Nagar are reflecting the mindset of the people of Tamil Nadu: TTV Dinakaran

LIVE: https://t.co/TMFD26MDBh pic.twitter.com/ed3fJFD7Eg

— News18 (@CNNnews18) December 24, 2017

ഭാവിലക്ഷ്യം തമിഴ്‌നാടിന്റെ ഭരണം പിടിച്ചെടുക്കുകയെന്നതാണെന്നു വ്യക്തമാക്കിയ ദിനകരന്‍ തമിഴ്‌നാട് സര്‍ക്കാറിനെതിരായ ജനവിധിയാണ് ആര്‍കെ നഗര്‍ തെരഞ്ഞെടുപ്പു ഫലത്തില്‍ പ്രതിഫലിക്കുന്നതെന്നും പറഞ്ഞു

മൂന്നുമാസത്തിനുള്ളില്‍ എടപ്പാടി കെ. പളനിസാമി-ഒ. പനീര്‍സെല്‍വം (ഇപിഎസ്-ഒപിഎസ്) സഖ്യത്തിന്റെ സര്‍ക്കാര്‍ താഴെവീഴുമെന്നും ദിനകരന്‍ മുന്നറിയിപ്പു നല്‍കി.

ആര്‍.കെ നഗറില്‍ സ്വതന്ത്ര സ്ഥാനാര്‍ഥിയായാണ് ദിനകരന്‍ മത്സരിച്ചത്. അതിനിടെ ദിനകരന്റെ ഭൂരിപക്ഷം 36000 കടന്നു. എ.ഐ.ഡിഎംകെയുടെ ഇ മധുസാദനന്‍ ആണ് രണ്ടാമത്. ഡിഎംകെ സ്ഥാനാര്‍ഥി മരുധുഗണേഷ് മൂന്നാം സ്ഥാനത്താണ്. അതേസമയം ബിജെപി നോട്ടെക്കും പിന്നിലായി. അയിരത്തിലധികം വോട്ടുകളാണ് നോട്ട നേടിയത്.

അമ്മയുടെ പിന്‍ഗാമി ആരാണെന്ന് ഇപ്പോള്‍ ആര്‍കെ നഗറിലെ ജനങ്ങള്‍ വിധിയെഴുതിയിരിക്കുന്നു. ഞങ്ങളാണു യഥാര്‍ഥ അണ്ണാഡിഎംകെ, ദിനകരന്‍ വ്യക്തമാക്കി.

അതേസമയം കടുത്ത തോല്‍വി ഏറ്റുവാങ്ങിയ ഇപിഎസ്-ഒപിഎസ് സഖ്യത്തെ പരിഹസിക്കാനും ദിനകരന്‍ മടിച്ചില്ല. രണ്ടില ചിഹ്നവുമായി മത്സരിച്ചിട്ടും ഇ. മധുസൂദന്‍ ഏറ്റുവാങ്ങിയ കടുത്ത തോല്‍വി തോല്‍വി യഥാര്‍ഥ അണ്ണാഡിഎംകെ ഞങ്ങളാണെന്നാണു വ്യക്തമാക്കുന്നത് . എം.എന്‍. നമ്പ്യാര്‍ക്കും പി.എസ്. വീരപ്പയ്ക്കും രണ്ടില ചിഹ്നം കൊടുത്താല്‍ ആരെങ്കിലും വോട്ടുചെയ്യുമോ? എന്നും ദിനകരന്‍ പരിഹസിച്ചു. എംജിആറിനെതിരെ ഒട്ടേറെ സിനിമകളില്‍ വില്ലന്‍ കഥാപാത്രമായിരുന്നു എം.എന്‍. നമ്പ്യാര്‍.

ആര്‍.കെ നഗര്‍ ഉപതെരഞ്ഞെടുപ്പ് ഫലം ഇന്ന്

chandrika — Sun, 24 Dec 2017 02:55:57 +0000

ന്യൂഡല്‍ഹി: തമിഴ്‌നാട് മുന്‍ മുഖ്യമന്ത്രി ജയലളിതയുടെ മണ്ഡലമായ ആര്‍.കെ നഗറിന്റെ ഉപതെരഞ്ഞെടുപ്പിന്റെ ഫലം ഇന്നു പുറത്തുവരും. എ.ഐ.എ.ഡി.എം.കെയിലെ ഇരുവിഭാഗങ്ങളും ഡി.എം.കെയും വാശിയോടെ പോരാടിയ തെരഞ്ഞെടുപ്പില്‍ ശക്തമായ ത്രികോണ മത്സരമാണ് നടന്നത്.

പണമൊഴുകിയ തെരഞ്ഞെടുപ്പില്‍ ഒരു പാര്‍ട്ടിക്കും അനായാസ ജയം അവകാശപ്പെടാനാവാത്ത സാഹചര്യമാണ്. ഭരണകക്ഷിയെന്ന നിലയില്‍ ഒ.പി.എസ്-ഇ.പി.എസ് വിഭാഗത്തിനു ഏറെ നിര്‍ണായകമാണ് തെരഞ്ഞെടുപ്പു ഫലം.

ഒ.പി.എസ്-ഇ.പി.എസ് കൂട്ടുക്കെട്ടിന് അധികാരം നിലനിര്‍ത്താനുള്ള വലിയ കണ്ണിയാണ് ആര്‍.കെ നഗര്‍. ഭരണത്തിലിരിക്കെ ആര്‍.കെ നഗറില്‍ പരാജയമുണ്ടായാല്‍ സര്‍ക്കാര്‍ പരാജയമായാണ് കണക്കാക്കുക. തെരഞ്ഞെടുപ്പിലെ തോല്‍വി പാര്‍ട്ടിയിലും പ്രതികൂല ചലനങ്ങളുണ്ടാക്കാം.

ആര്‍കെ നഗറില്‍ ഇന്ന് വോട്ടെണ്ണല്‍; ഫലം ദിനകരന് അനുകൂലമെന്ന് എക്‌സിറ്റ് പോളുകള്‍

chandrika — Sat, 23 Dec 2017 15:41:37 +0000

ചെന്നൈ: വിവാദങ്ങള്‍ വിട്ടൊഴിയാതെ പിന്തുടര്‍ന്ന ആര്‍കെ നഗര്‍ ഉപതെരഞ്ഞെടുപ്പിന്റെ ഫലം ഇന്ന്. സ്വതന്ത്രനായി മത്സരിക്കുന്ന വിമത അണ്ണാഡി.എം.കെ നേതാവ് ടിടിവി ദിനകരന്‍ ജയിക്കുമെന്നാണ് എക്‌സിറ്റ് പോള്‍ പ്രവചനങ്ങള്‍ പറയുന്നത്. കാവേരി ടിവി നടത്തിയ എക്‌സിറ്റ് പോളിലാണ് ദിനകരന് വിജയിക്കുമെന്ന് പ്രവചിച്ചിരിക്കുന്നത്. 21 നായിരുന്നു രാധാകൃഷ്ണ നഗറില്‍ തെരഞ്ഞെടുപ്പ് നടന്നത്. 37% വോട്ടോടെ ദിനകരന്‍ ഒന്നാമതെത്തുമെന്നാണ് പ്രചവചനം. അണ്ണാഡിഎംകെയുടെ ഇ മധുസൂദനന്‍ 26% വോട്ട് നേടി രണ്ടാമതും, ഡിഎംകെയുടെ മരുത് ഗണേശ് 18% വോട്ടോടെ മൂന്നാമതെത്തുമെന്നും എക്‌സിറ്റ് പോള്‍ പറയുന്നു. മുന്‍ മുഖ്യമന്ത്രി ജയലളിതയുടെ മരണത്തെ തുടര്‍ന്നാണ് ആര്‍കെ നഗറില്‍ ഉപതെരഞ്ഞെടുപ്പ് നടന്നത്. 59 സ്ഥാനാര്‍ത്ഥികളാണ് മത്സരിച്ചത്. അണ്ണാ ഡിഎംകെയുടെ ഇ മധുസൂദനനും, ഡിഎംകെയുടെ മരുത് ഗണേശും സ്വതന്ത്രനായി രംഗത്തുള്ള അണ്ണാഡിഎംകെ വിമതപക്ഷത്തെ ടിടിവി ദിനകരനും തമ്മിലാണ് പ്രധാന മത്സരം. തമിഴ് രാഷ്ട്രീയത്തില്‍ ഏറെ നിര്‍ണായകമാണ് ഉപതെരഞ്ഞെടുപ്പ് ഫലം. തെരഞ്ഞെടുപ്പ് നടക്കാന്‍ മണിക്കൂറുകള്‍ ശേഷിക്കെ മുന്‍ മുഖ്യമന്ത്രി ജയലളിതയുടെ അവസാനനാളുകളിലെ ആസ്പത്രി ദൃശ്യങ്ങള്‍ കഴിഞ്ഞ ദിവസം പുറത്തുവന്നിരുന്നു. ഉപതെരഞ്ഞെടുപ്പില്‍ മത്സരിക്കുന്ന എഐഎഡിഎംകെ ശശികല പക്ഷത്തിന്റെ സ്ഥാനാര്‍ത്ഥി ടിടിവി ദിനകരന്‍ പക്ഷനേതാവായ പിവി വെട്രിവേല്‍ ആണ് ജയലളിതയുടെ ആസ്പത്രിയിലെ സിസിടിവി ദൃശ്യങ്ങള്‍ പുറത്തുവിട്ടത്. ഇത് തെരഞ്ഞെടുപ്പിനെ സ്വാധീനിച്ചേക്കുമെന്നാണ് രാഷ്ട്രീയ വിലയിരുത്തല്‍.

ആര്‍.കെ നഗര്‍ 73.45 ശതമാനം പോളിങ്

chandrika — Thu, 21 Dec 2017 15:44:51 +0000

ചെന്നൈ: തമിഴ്‌നാട്ടിലെ ആര്‍.കെ നഗര്‍ മണ്ഡലത്തിലേക്കുള്ള നിയമസഭാ ഉപതെരഞ്ഞെടുപ്പില്‍ 73.45 ശതമാനം പോളിങ്. അണ്ണാഡി.എം.കെ, ഡി.എം.കെ, ടി.ടി.വി ദിനകരന്‍ ത്രികോണ മത്സരത്തിന് സാക്ഷ്യം വഹിക്കുന്ന മണ്ഡലത്തില്‍ ടുജി സ്‌പെക്ട്രം കേസിന്റെ വിധി ഫലം ഡി.എം.കെക്ക് അനുകൂലമാക്കുമോ എന്നാണ് ഏവരും ഉറ്റുനോക്കുന്നത്. ജയലളിതയുടെ മരണത്തെ തുടര്‍ന്നാണ് മണ്ഡലത്തില്‍ ഉപതെരഞ്ഞെടുപ്പ് ആവശ്യമായി വന്നത്. 2004നു ശേഷം തമിഴകത്ത് ഒരു ഉപതെരഞ്ഞെടുപ്പിലും ഭരണകക്ഷി തോറ്റിട്ടില്ല. ജയലളിതയുടെ ആസ്പത്രി ദൃശ്യങ്ങള്‍ കഴിഞ്ഞ ദിവസം പുറത്തുവിട്ടത് വഴി സ്വതന്ത്രനായി മത്സരിക്കുന്ന ടിടിവി ദിനകരന്‍ ഉണ്ടാക്കിയ മേല്‍ക്കൈ ടുജി വിധിയോടെ നഷ്ടമാകുമോ എന്നറിയാന്‍ ഞായറാഴ്ച വരെ കാത്തിരിക്കണം. ഫലം എന്തായാലും തമിഴ്‌നാട് രാഷ്ട്രീയത്തില്‍ അത് വലിയ അലയൊലികള്‍ സൃഷ്ടിക്കും.

ആര്‍കെ നഗര്‍ തിരഞ്ഞെടുപ്പ്: വിശാലിന്റെയും ദീപയുടെയും നാമനിര്‍ദേശപത്രിക തള്ളി

chandrika — Tue, 05 Dec 2017 14:05:05 +0000

ചെന്നൈ: ജയലളിതയുടെ വിയോഗത്തെ തുടര്‍ന്ന് ഒഴിവു വന്ന നിര്‍ണായകമായ ആര്‍കെ നഗര്‍ ഉപതിരഞ്ഞെടുപ്പില്‍ മല്‍സരിക്കാന്‍ തയാറെടുത്ത നടന്‍ വിശാലിന്റെയും ജയലളിതയുടെ സഹോദര പുത്രി ദീപ ജയകുമാറിന്റെയും നാമനിര്‍ദേശ പത്രിക തള്ളി. പത്രികയില്‍ നിരവധി അപാകതകള്‍ കണ്ടെത്തിയതിനെ തുടര്‍ന്നാണ് തള്ളിയത്.

Actor Vishal's nomination for #RKnagarByElection in Chennai has also been rejected by the Election Commission.

— ANI (@ANI) December 5, 2017

തിരഞ്ഞെടുപ്പ് കമ്മിഷന്‍ നടത്തിയ സൂക്ഷ്മ പരിശോധനയിലാണു പത്രികകളില്‍ അപാകത കണ്ടെത്തിയത്. വിശാലിനെ നാമനിര്‍ദേശം ചെയ്തു രണ്ടുപേര്‍ സമര്‍പ്പിച്ച രേഖകളില്‍ തെറ്റായ പേരാണു രേഖപ്പെടുത്തിയിരിക്കുന്നത് എന്നാരോപിച്ചാണ് തള്ളിയത്. എന്നാല്‍ ഡിഎംകെ, എഐഎഡിഎംകെ, ബിജെപി, എഐഎഡിഎംകെ വിമത നേതാവ് ടി.ടി.വി. ദിനകരന്‍ എന്നിവരുടെ പത്രികകള്‍ കമ്മിഷന്‍ സ്വീകരിച്ചു.

എഎന്‍ഐയാണ് ഇക്കാര്യം ട്വീറ്റ് ചെയ്തത്. അപ്രതീക്ഷിതമായാണ് നടന്‍ വിശാല്‍ ആര്‍കെ നഗര്‍ ഉപതിരഞ്ഞെടുപ്പില്‍ സ്ഥാനാര്‍ത്ഥിത്വം പ്രഖ്യാപിച്ചത്. നടന്മാരായ കമലഹാസനും രജനീകാന്തിന്റെയും രാഷ്ട്രീയ പ്രവേശനം ചര്‍ച്ച ചെയ്യുന്നതിനിടെയായിരുന്നു വിശാലിന്റെ രാഷ്ട്രീയ പ്രവേശന പ്രഖ്യാപനം.

അതേസമയം പത്രിക പിന്തള്ളിയതില്‍ പ്രതിഷേധിച്ചു വിശാലും പ്രവര്‍ത്തകരും ആര്‍കെ നഗറിലെ തിരുവൊട്ടിയൂര്‍ ഹൈറോഡില്‍ പ്രതിഷേധം നടത്തി. ഗതാഗത തടസ്സം ഉണ്ടാക്കിയതിനെത്തുടര്‍ന്ന് അന്‍പതോളം വരുന്ന പ്രവര്‍ത്തകര്‍ക്കൊപ്പം വിശാലിനെയും പൊലീസ് തൊണ്ടിയാര്‍പേട്ട് പൊലീസ് സ്‌റ്റേഷനിലേക്കു മാറ്റി. പിന്നീടു പരാതി ബോധിപ്പിക്കാന്‍ റിട്ടേണിങ് ഓഫിസറെ കാണാന്‍ വിശാലിനെ പൊലീസ് അനുവദിച്ചു. സ്വതന്ത്ര സ്ഥാനാര്‍ഥിയായാണു വിശാല്‍ മല്‍സരിക്കാന്‍ തീരുമാനിച്ചിരുന്നത്.