എന്നാല്‍ വാഗ്ദാനം സദ്ദാം നിരസിച്ചെന്നും ശൈഖ് മുഹമ്മദ് പറയുന്നു. അഞ്ച് മണിക്കൂറോളം നീണ്ട കൂടിക്കാഴ്ച്ചക്കിടെ നാല് തവണ സദ്ദാം മുറി വിട്ടുപോയി. മികച്ച നിര്‍ദേശങ്ങള്‍ മുന്നോട്ട് വെച്ചെങ്കിലും അതൊന്നും സദ്ദാമിന് സ്വീകാര്യമായിരുന്നില്ല. അന്തിമമായി ഇറാഖ് വിടാന്‍ സദ്ദാം നിര്‍ബന്ധിതനാവുകയാണെങ്കില്‍ ദുബായ് അദ്ദേഹത്തിന്റെ രണ്ടാം നഗരമായിരിക്കുമെന്ന് പറഞ്ഞപ്പോള്‍ അദ്ദേഹത്തിന്റെ മറുപടി ‘പക്ഷെ ശൈഖ് മുഹമ്മദ് ഞാന്‍ സംസാരിക്കുന്നത് ഇറാഖിനെ രക്ഷിക്കുന്നതിനെ കുറിച്ചാണ്. എന്നെ രക്ഷിക്കുന്നതിനെ കുറിച്ചല്ല’ എന്നായിരുന്നു. ഇതിന് ശേഷം താന്‍ സദ്ദാമിനെ കൂടുതല്‍ ബഹുമാനത്തോടെ കണ്ടതായും ശൈഖ് മുഹമ്മദ് പറയുന്നു.

2003ലെ ഇറാഖിലെ അമേരിക്കന്‍ അധിനിവേശ കാലത്ത് സദ്ദാം ഹുസൈനെ ഒളിത്താവളത്തില്‍ നിന്നും കണ്ടെത്തിയ സഖ്യ സേനയോടൊപ്പെ ജോണ്‍ നിക്സണ്‍ ഉണ്ടായിരുന്നു. തുടര്‍ന്നു സദ്ദാമിനെ ചോദ്യം ചെയ്ത ഉദ്യോഗസ്ഥരില്‍ ഒരാള്‍ കൂടിയാണ് നിക്സണ്‍.

അമേരിക്കയുടെ ഇറാഖ് അധിനിവേശവും സദ്ദാം ഹുസൈനെ തൂക്കിലേറ്റിയ നടപടികളും എല്ലാം അമേരിക്കയുടെ തെറ്റായ തീരുമാനമായിരുന്നെന്ന് പുസ്തകത്തില്‍ നിക്സണ്‍ വ്യക്തമാക്കുന്നു.

സദ്ദാമിനെ ഞാന്‍ ചോദ്യം ചെയ്തപ്പോള്‍ അദ്ദേഹം ഇങ്ങനെ പറയുകയുണ്ടായി. ‘ഇറാഖിനെ ഭരിക്കുക എന്നത് അത്ര എളുപ്പമുള്ള കാര്യമല്ലെന്ന് നിങ്ങള്‍ക്കു താമസിയാതെ മനസിലാവും. നിങ്ങള്‍ ഇവിടെ തോല്‍ക്കാന്‍ പോവുകയാണ്.’

എന്തുകൊണ്ടെന്ന് നിങ്ങള്‍ അങ്ങനെ പറയുന്നതെന്ന് നിക്സണ്‍ ചോദിച്ചപ്പോള്‍ സദ്ദാമിന്റെ മറുപടി ഇങ്ങനെയായിരുന്നു.
‘നിങ്ങള്‍ പരാജയപ്പെടും, കാരണം നിങ്ങള്‍ക്ക് ഞങ്ങളുടെ ഭാഷയറിയില്ല, ഞങ്ങളുടെ ചരിത്രവും; എല്ലാത്തിന്നുമുപരി ഒരു അറബിയുടെ മനസ്സെന്തെന്ന് വായിക്കാന്‍ പോലും നിങ്ങള്‍ക്കാവില്ല’.
സദ്ദാമിന്റെ മറുപടി ശരിയാണെന്ന് ഇന്നത്തെ ഇറാഖിന്റെ അവസ്ഥ കാണുമ്പോള്‍ മനസിലാക്കുന്നുണ്ടെന്ന് തുടര്‍ന്നു നിക്‌സണ്‍ പുസ്തകത്തില്‍ കുമ്പസാരം നടത്തുന്നു.

അന്നു സദ്ദാമിനോട് ഒരും ബഹുമാനവും തോന്നിയിരുന്നില്ലെന്നു പറഞ്ഞ നിക്‌സണ്‍. എന്നാല്‍ ഇന്ന് ഇറാഖിന്റെ അവസ്ഥ കാണുമ്പോള്‍ സദ്ദാം എങ്ങനെയാണ് രാജ്യത്തെ നയിച്ചതെന്നു ചിന്തിപ്പിക്കുന്നതായും നിക്‌സണ്‍ പറയുന്നു. രാജ്യത്തെ സുന്നി ഷിയാ ശക്തികളെയും സമീപരാഷ്ട്രമായ ഷിയാ ഭൂരിപക്ഷമുള്ള ഇറാനെയും ഒരു പോലെ ഒതുക്കാന്‍ കെല്‍പുള്ള സദ്ദാമിന്റെ ഭരണമാണ് ഇറാഖിന് വേണ്ടിയിരുന്നതെന്ന്’ നിക്സണ്‍ പുസ്തകത്തില്‍ വ്യക്തമാക്കുന്നു.

ഒരര്‍ത്ഥത്തില്‍ മുന്‍ സി.ഐ.എ ഉദ്യോഗസ്ഥന്‍ തന്റെ പുസ്തകത്തിലൂടെ സദ്ദാമായിരുന്നു ശരിയെന്ന് പറയാതെ പറയുകയാണ്.

വിവിധ വംശീയ ഘടകങ്ങളുള്ള സമൂഹമായ ഇറാഖ് എന്ന രാഷ്ട്രത്തെ നിയന്ത്രിക്കാന്‍ സദ്ദാമിനെപ്പോലെ അനുകമ്പയില്ലാത്ത ശക്തനായ ഒരു ഭരണാധികാരിയാണ് വേണ്ടിയിരുന്നതെന്നും നിക്‌സണ്‍ അഭിപ്രായപ്പെടുന്നു്.

ഭീകരസംഘടനായ ഇസ്‌ലാമിക് സ്റ്റേറ്റിന്റെ പ്രവര്‍ത്തനവും ഇറാഖിനെയും സിറിയയെയും കാര്‍ന്നു തിന്നുന്ന ആഭ്യന്തര പ്രശ്നങ്ങളും തുടര്‍ന്നുണ്ടായ കലാപങ്ങളും പലായനവും ഒന്നും സദ്ദാം ഭരണം തുടര്‍ന്നിരുന്നെങ്കില്‍ സംഭവിക്കില്ലായിരുന്നെന്നും നിക്സണ്‍ സൂചിപ്പിക്കുന്നു.

തനിക്കു മുമ്പേ കലാപവും ശണ്ഠയും മാത്രമായിരുന്നു ഇറാഖിലെന്നും്. എന്നാല്‍ അതെല്ലാം ഞാന്‍ അവസാനിപ്പിച്ചതായും ചോദ്യം ചെയ്യലില്‍ സദ്ദാം പറഞ്ഞിരുന്നെന്നും നിക്സണ്‍ പറയുന്നു. രാജ്യത്തെ ജനങ്ങളെ യോജിച്ചു നിര്‍ത്താനും അനുസരിപ്പിക്കാനും പഠിപ്പിച്ചത് താനാണെന്നും സദ്ദാം അവകാശപ്പെതായും നിക്‌സണ്‍ പുസ്തകത്തില്‍ വ്യക്തമാക്കുന്നുണ്ട്.’

പിടികൂടുന്ന സമയത്ത് സദ്ദാം ഹുസൈന്‍ നോവലെഴുതുന്ന തിരക്കിലായിരുന്നുവെന്നാണ് പുതിയ വെളിപ്പെടുത്തല്‍. എഴുത്തില്‍ മുഴുകിയ സദ്ദാം ആ സമയത്തൊന്നും സര്‍ക്കാരിനേയും സൈന്യത്തേയും നിയന്ത്രിച്ചിരുന്നില്ല. ഭരണത്തില്‍ യാതൊരു തരത്തിലുള്ള ശ്രദ്ധയും ഉണ്ടായിരുന്നില്ലെന്നും ദേശീയ മാധ്യമങ്ങള്‍ റിപ്പോര്‍ട്ടു ചെയ്യുന്നു. ഇറാഖിലെ അമേരിക്കയുടേയും ബ്രിട്ടന്റേയും ഇടപെടലുകളൊന്നും സദ്ദാം അറിയുന്നുണ്ടായിരുന്നില്ല. ഇറാഖിനെ അമേരിക്കയുടെ കരങ്ങളില്‍ നിന്നും എങ്ങനെ പ്രതിരോധിക്കാമെന്നോ അതിന് വേണ്ട നടപടികളെടുക്കാനോ സദ്ദാമിന് കഴിഞ്ഞില്ല. എന്നിരുന്നാലും സദ്ദാം ഒളിച്ചോടിയില്ലെന്നും നിക്‌സണ്‍ പറയുന്നു.

അമേരിക്കന്‍ അധിനിവേശത്തിലൂടെയാണ് സദ്ദാം ഹുസൈനെ അമേരിക്ക പിടികൂടുന്നത്. ഇറാഖില്‍ വന്‍ആയുധശേഖരണമുണ്ടെന്ന് ആരോപിച്ചായിരുന്നു പിടികൂടിയത്. പിടികൂടി മൂന്ന് വര്‍ഷത്തിനുശേഷം സദ്ദാം ഹുസൈനെ അമേരിക്ക തൂക്കിലേറ്റി.