കൊച്ചി: കണ്ണൂര്‍ ആന്തൂരിലെ പ്രവാസി വ്യവസായി സാജന്‍ ആത്മഹത്യ ചെയ്ത സംഭവത്തില്‍ ഹൈക്കോടതി സ്വമേധയാ എടുത്ത കേസ് ഇന്ന് പരിഗണിക്കും. ആന്തൂര്‍ മുനിസിപ്പാലിറ്റിക്കെതിരെയാണ് ജസ്റ്റിസ് അനില്‍ കെ നരേന്ദ്രന്‍ കേസ് എടുത്തത്.

അതേസമയം സഹോദരന്റെ ആത്മഹത്യയിലേക്ക് നയിച്ച കാര്യത്തില്‍ നഗരസഭയിലെ ചില ഉദ്യോഗസ്ഥര്‍ക്കും ജനപ്രതിനിധികള്‍ക്കും പങ്കുണ്ടെന്നും കണ്‍വന്‍ഷന്‍ സെന്ററിന് അനുമതി വൈകിപ്പിച്ചതിലുള്ള പങ്കിനെക്കുറിച്ച് കൂടുതല്‍ കാര്യങ്ങള്‍ തനിക്കറിയാമെന്നും ഈ കാര്യങ്ങള്‍ കോടതിയെ അറിയിക്കാന്‍ തന്നെ കേസില്‍ കക്ഷിയാക്കണമെന്നും ആവശ്യപ്പെട്ട് സാജന്റെ സഹോദരന്‍ പാറയില്‍ ശ്രീജിത് നല്‍കിയ അപേക്ഷയും കോടതി ഇന്ന് പരിഗണിക്കും.

സാജന്‍ ആത്മഹത്യ ചെയ്ത സംഭവത്തില്‍ നഗരസഭയ്ക്ക് വീഴ്ച പറ്റിയിട്ടില്ലെന്ന് ചൂണ്ടിക്കാട്ടി സര്‍ക്കാര്‍ ഹൈക്കോടതിയെ അറിയിച്ചിരുന്നു. കണ്‍വെന്‍ഷന്‍ സെന്ററിന് അനുമതി നല്‍കുന്ന കാര്യത്തില്‍ ഉദ്യോഗസ്ഥര്‍ക്ക് പിഴവ് പറ്റിയിട്ടില്ലെന്നും നി!ര്‍മ്മാണത്തിലെ അപാകതകളടക്കം പലപ്പോഴായി അപേക്ഷകനെ അറിയിച്ചിരുന്നെന്നും സത്യവാങ്മൂലത്തില്‍ സര്‍ക്കാര്‍ വ്യക്തമാക്കി.

കണ്‍വന്‍ഷന്‍ സെന്ററിന് ആന്തൂര്‍ നഗരസഭയില്‍ നിന്ന് അനുമതി കിട്ടാത്തതിലെ വിഷമമാണു സാജന്റെ ആത്മഹത്യയ്ക്കു കാരണമെന്നു കണ്ടെത്തിയതായി അന്വേഷണ സംഘത്തലവന്‍ ഡി.വൈ.എസ്.പി വി.എ.കൃഷ്ണദാസ് കഴിഞ്ഞ ദിവസം പറഞ്ഞിരുന്നു.

പ്രവാസി വ്യവസായിയായ സാജന്‍ 15 കോടിയോളം രൂപ ചിലവഴിച്ചാണ് ആന്തൂരില്‍ കണ്‍വെന്‍ഷന്‍ സെന്റര്‍ നിര്‍മ്മിച്ചത്. സി.പി.എം അപ്രമാധിത്യമുള്ള ആന്തൂര്‍ നഗരസഭ കെട്ടിടത്തിന് പ്രവര്‍ത്തനാനുമതി നല്‍കിയില്ല. ഞാന്‍ ഈ കസേരയില്‍ ഇരിക്കുന്ന കാലത്തോളം അനുമതി നല്‍കില്ലെന്നായിരുന്നു നഗരസഭാ അധ്യക്ഷയും സി.പി.എം കേന്ദ്രകമ്മിറ്റി അംഗം എം.വി ഗോവിന്ദന്റെ ഭാര്യയുമായി പി.കെ ശ്യാമള സാജനോട് പറഞ്ഞത്.

നാല് മാസം നിരന്തരം നഗരസഭാ അധികൃതരെ സമീപിച്ചിട്ടും അനുമതി കിട്ടാതായതോടെ സാജന്‍ കടുത്ത മാനസിക സംഘര്‍ഷത്തിലായിരുന്നു. തുടര്‍ന്ന് കുറ്റാളിയിലെ വീട്ടിലെ കിടപ്പുമുറിയില്‍ സാജന്‍ തൂങ്ങിമരിക്കുകയായിരുന്നു.

ആന്തൂര്‍ നഗരസഭ അധ്യക്ഷ രാജിവെക്കുക, പൊലീസ് അന്വേഷണം ഊര്‍ജിതമാക്കുക എന്നീ ആവശ്യങ്ങള്‍ ഉന്നയിച്ചാണ് മാര്‍ച്ച്. യൂത്ത് ലീഗ് സംസ്ഥാന ജനറല്‍ സെക്രട്ടറി പികെ ഫിറോസ്, മുസ്‌ലിം ലീഗ് സംസ്ഥാന വൈസ് പ്രസിഡന്റ് വികെ അബ്ദുല്‍ഖാദര്‍മൗലവി, സെക്രട്ടറി അബ്ദുറഹ്മാന്‍ കല്ലായി, ജില്ലാ പ്രസിഡന്റ് പി. കുഞ്ഞിമുഹമ്മദ്, ജനറല്‍ സെക്രട്ടറി കരീം ചേലേരി, കെപി ത്വാഹിര്‍, യൂത്ത് ലീഗ് സംസ്ഥാന വൈസ് പ്രസിഡന്റ് പികെ സുബൈര്‍ പ്രസംഗിക്കും.

നാട്ടില്‍ എന്തെങ്കിലും തുടങ്ങണമെന്ന് വലിയ മോഹമായിരുന്നു സാജനെന്ന് ഭാര്യയും ബന്ധുക്കളും പറഞ്ഞു. അതുകൊണ്ടാണ് ഇത്രയും വലിയ തുക മുടക്കിയത്. അന്യരാജ്യങ്ങളിലെ നിയമങ്ങള്‍ കൃത്യമായി പാലിച്ചാണ് പ്രവാസികള്‍ വളരുന്നത്. അതുകൊണ്ട് നാട്ടിലെ ‘പിന്നാമ്പുറ’ങ്ങള്‍ അറിയുന്നുണ്ടാവില്ല. ഇവിടുത്തെ പകയും പ്രതികാരവും ധാര്‍ഷ്ട്യവും, അവര്‍ക്കുശീലമുണ്ടാവില്ല.

അന്യനാട്ടുകാരായിരുന്നിട്ടുകൂടി മറ്റൊരു രാജ്യത്തും അവര്‍ ഇതൊന്നും കണ്ടുകാണില്ല. വലിയ സംരംഭങ്ങള്‍ തുടങ്ങുമ്പോള്‍ കൂടെ നില്‍ക്കുന്നവരാണ് മറ്റുരാജ്യത്തെ ഭരണാധികാരികള്‍. ഇവിടെ ഇല്ലാത്ത കാരണങ്ങളുണ്ടാക്കി ഒരു മനുഷ്യന്റെ സ്വപ്‌നവും ഒരു കുടുംബത്തിന്റെ ഭാവിയുമാണ് നശിപ്പിച്ചത്. മുടക്കിയ പണത്തിന്റെ വലുപ്പത്തേക്ക്ാള്‍ അപമാനിക്കപ്പെട്ടതിലുള്ള വേദനയാണ് ആ പ്രവാസി സംരംഭകനെ സ്വയം ഇല്ലാതാവാന്‍ പ്രേരിപ്പിച്ചതെന്നാണ് മനസ്സിലാവുന്നത്. ഇതും ഒരു ഒറ്റപ്പെട്ട സംഭവമായി കണക്കാക്കരുത്. കഴിഞ്ഞവര്‍ഷം കൊല്ലത്തും ഏതാണ്ട് സമാനമായ സംഭവമുണ്ടായി. ഇത് വച്ചുപൊറുപ്പിക്കാനാവില്ല. നാട്ടില്‍ വല്ലതും തുടങ്ങി ഇവിടെ ജീവിക്കാമെന്ന് കൊതിക്കുന്ന പ്രവാസികളെ ഇങ്ങനെ ആട്ടിയോടിക്കരുത്. അവരുടെ വിശ്വാസം ഇത്തരത്തില്‍ നഷ്ടപ്പെടുത്തരുത്. കൊലയ്ക്കു കൊടുക്കരുത്.

ഈ സംഭവത്തിനുശേഷം ഒട്ടേറെ പ്രവാസി സുഹൃത്തുക്കള്‍ സമാനമായ അനുഭവങ്ങള്‍ പങ്കിടുകയുണ്ടായി. സംരംഭകരെ തിരിച്ചയയ്ക്കുന്ന നികൃഷ്ടമായ സമീപനം വലിയ നഷ്ടമാണ് നാടിന് വരുത്തുക. സാജന്‍ ഒരു പാഠമാവണം. അകാരണമായി പദ്ധതികള്‍ വൈകിപ്പിക്കുകയും മുടക്കുകയും ചെയ്യുന്നവര്‍ക്കുള്ള പാഠം. അതിനുതക്ക ശിക്ഷ, ഈ കേസുമായി ബന്ധമുള്ളവര്‍ക്കെല്ലാം ഉറപ്പാക്കണം. കൊലയ്ക്കു കൊടുത്തവര്‍ക്ക് കുരുക്കൊരുക്കണം.സംരംഭകരുടെ വിശ്വാസത്തിനൊപ്പം നാഥനില്ലാതായ ആ കുടുംബത്തിനും നീതി ലഭിക്കണമെന്നും നേതാക്കള്‍ ആവശ്യപ്പെട്ടു.

കഴിഞ്ഞ ദിവസം പൊലീസ് സാജന്റെ കുടുംബാംഗങ്ങളില്‍ നിന്നും മക്കളില്‍ നിന്നും മൊഴിയെടുത്തിരുന്നു. കുടുംബ പ്രശ്‌നങ്ങളുമായി ബന്ധപ്പെട്ട ചോദ്യങ്ങളാണ് പൊലീസ് കൂടുതലായി ചോദിച്ചത്. കേസ് വഴിതിരിച്ചുവിടാനുള്ള ആസൂത്രിതമായ നീക്കമാണ് ഇത്. നഗരസഭാ അധ്യക്ഷക്ക് വീഴ്ച സംഭവിച്ചുവെന്ന സി.പി.എം മുന്‍ ജില്ലാ സെക്രട്ടറി പി.ജയരാജന്‍ തന്നെ പല തവണ തുറന്നു പറഞ്ഞിട്ടും ഇതുവരെ അത് അംഗീകരിക്കാന്‍ പാര്‍ട്ടി നേതൃത്വം തയ്യാറായിട്ടില്ല.

കണ്ണൂര്‍: പ്രവാസി വ്യവസായി സാജന്‍ ആത്മഹത്യ ചെയ്ത സംഭവത്തില്‍ ആന്തൂര്‍ നഗരസഭാ അധ്യക്ഷ പി.കെ ശ്യാമളക്കെതിരെ ആത്മഹത്യ പ്രേരണാ കുറ്റത്തിന് ക്രിമിനല്‍ കേസെടുക്കണമെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍. ഈ ആവശ്യം ഉന്നയിച്ചുള്ള കത്ത് മുല്ലപ്പള്ളി മുഖ്യമന്ത്രി പിണറായി വിജയന് കൈമാറി. സാജന്റെ ഭാര്യ ബീന മുല്ലപ്പള്ളി രാമചന്ദ്രനു നല്‍കിയ നിവേദനത്തിന്റെ പശ്ചാതലത്തിലാണ് മുഖ്യമന്ത്രിക്ക് കത്തു നല്‍കിയത്.
നഗരസഭാധ്യക്ഷ പി.കെ ശ്യാമളയും സഹജീവനക്കാരും ചേര്‍ന്ന് സാജന്‍ നാട്ടില്‍ പണിത ഓഡിറ്റോറിയത്തിന് മന:പൂര്‍വം അനുമതി നിഷേധിക്കുകയായിരുന്നുവെന്ന് മുല്ലപ്പള്ളി രാമചന്ദ്രന്‍ പറഞ്ഞു. നിയമവിധേയമായി നിര്‍മിച്ചിട്ടും കെട്ടിടത്തിന് കംപ്ലീഷന്‍ സര്‍ട്ടിഫിക്കറ്റ് നല്‍കുന്നതില്‍ നിന്ന് കരുതിക്കൂട്ടി പിന്തിരിയുകയായിരുന്നവെന്നും മുല്ലപ്പള്ളി പറഞ്ഞു.

താന്‍ നഗരസഭാ ചെയര്‍പേഴ്‌സന്റെ കസേരയിലിരിക്കുന്ന കാലം വരെ കംപ്ലീഷന്‍ സര്‍ട്ടിഫിക്കറ്റ് ലഭിക്കുമെന്ന് കരുതേണ്ടെന്ന് സാജനോടും മാനേജര്‍ സജീവനോടും ശ്യാമള പറഞ്ഞിരുന്നു.

സാജന്റെ മരണത്തിനു കാരണക്കാരിയായ ശ്യാമളയെയും സഹജീവനക്കാരെയും സി.പി.എം സംരക്ഷിക്കുകയാണ്. കുറ്റക്കാരിയായ ഉദ്യോഗസ്ഥനെ സംരക്ഷിക്കുന്നത് സാജന്റെ കുടുംബത്തോട് കാണിക്കുന്ന ഏറ്റവും വലിയ അനീതിയാണെന്നും മുല്ലപ്പള്ളി പറഞ്ഞു.

നാര്‍ക്കോട്ടിക് ഡിവൈഎസ്പി കൃഷ്ണദാസിന്റെ നേതൃത്വത്തിലുള്ള സംഘമാണ് ഇപ്പോള്‍ കേസന്വേഷിക്കുന്നത്. അന്വേഷണത്തിന്റെ ചുമതല ഡിവൈഎസ്പിക്ക് കൈമാറിക്കൊണ്ട് ഇന്നലെ ആഭ്യന്തരവകുപ്പ് ഉത്തരവിറക്കിയിരുന്നു.

അതേസമയം സാജന്റെ ആത്മഹത്യയുമായി ബന്ധപ്പെട്ട് സി.പി.എം കടുത്ത പ്രതിരോധത്തിലായതോടെ രാജി സന്നദ്ധത അറിയിച്ച് ആന്തൂര്‍ നഗരസഭ അധ്യക്ഷ പി.കെ ശ്യാമള രംഗത്തെത്തി. എന്നല്‍ പാര്‍ട്ടി പറയാതെ രാജിവെക്കാനാവില്ലെന്നും അവര്‍ അറിയിച്ചു. ഇന്നലെ സി.പി.എം ജില്ലാ സെക്രട്ടറിയേറ്റ് യോഗം നടക്കുന്നതിനിടെയാണ് അവര്‍ രാജി സന്നദ്ധത അറിയിച്ചത്. എന്നാല്‍ പാര്‍ട്ടി ജില്ലാ കമ്മിറ്റിയുടെ അനുമതിക്കായി കാത്തിരിക്കുകയാണ്. ജൂണ്‍ 30ന് ചേരുന്ന യോഗം ഈ കാര്യം പരിഗണിക്കും.
”എനിക്ക് ഇഷ്ടമുണ്ടെങ്കില്‍ ഇരിക്കാനും അല്ലെങ്കില്‍ ഇറങ്ങിപ്പോകാനും പറ്റില്ല. എന്നെ ഈ സീറ്റിലിരുത്തിയതും ഞാന്‍ പറ്റില്ലെന്നും തീരുമാനിക്കേണ്ടതും പാര്‍ട്ടിയാണ്. സാജന്‍ ആത്മഹത്യ ചെയ്ത സംഭവത്തില്‍ ചെയര്‍പേഴ്‌സണ്‍ എന്ന നിലയില്‍ തന്റെ ഭാഗത്ത് നിന്ന് വീഴ്ചകള്‍ പറ്റിയിട്ടില്ല. ഇതുമായി ബന്ധപ്പെട്ട് കൂടുതല്‍ ഒന്നും പറയാനില്ല” അവര്‍ പറഞ്ഞു.
ഇന്നലെ ചേര്‍ന്ന ജില്ലാ സെക്രട്ടറിയേറ്റില്‍ ശക്തമായ വിമര്‍ശനമാണ് ഉണ്ടായത്. ഇതിനു പുറമെ കഴിഞ്ഞ ദിവസം തളിപ്പറമ്പ് ഏരിയാ കമ്മിറ്റി യോഗത്തിലും ശക്തമായ പ്രതിഷേധം ഉയര്‍ന്നിരുന്നു. ഈ സാഹചര്യത്തിലാണ് രാജി സന്നദ്ധത അറിയിച്ചത്.

15 കോടി രൂപ മുതല്‍ മുടക്കില്‍ നിര്‍മ്മിച്ച ഓഡിറ്റോറിയത്തിന് പ്രവര്‍ത്തനാനുമതി നല്‍കാത്തതില്‍ മനം നൊന്താണ് പ്രവാസി വ്യവസായിയായ കണ്ണൂര്‍ കൊറ്റാളി സ്വദേശി സാജന്‍ പാറയില്‍ ആത്മഹത്യ ചെയ്തത്. നൈജീരിയയില്‍ ജോലി ചെയ്ത് മൂന്ന് വര്‍ഷം മുമ്പ് നാട്ടില്‍ തിരിച്ചെത്തിയ ശേഷമാണ് കണ്ണൂര്‍ ബക്കളത്ത് സാജന്‍ കണ്‍വെന്‍ഷന്‍ സെന്റര്‍ നിര്‍മ്മാണം തുടങ്ങിയത്. തുടക്കം മുതല്‍ ഓഡിറ്റോറിയത്തിനെതിരെ നഗരസഭ പലവിധത്തിലുള്ള തടസങ്ങള്‍ ഉന്നയിച്ചിരുന്നു. ഒരു ഘട്ടത്തില്‍ കെട്ടിടത്തിന്റെ ഒരു ഭാഗം പൊളിച്ച് നീക്കാന്‍ പോലും നഗരസഭാ ഉദ്യോഗസ്ഥര്‍ നിര്‍ദ്ദേശിച്ചിരുന്നു. ഇതില്‍ മനം നൊന്താണ് പ്രവാസി ആത്മഹത്യ ചെയ്തതെന്നാണ് ബന്ധുക്കളുടെ ആരോപണം.

കണ്ണൂർ: പ്രവാസി വ്യവസായി സാജന്റെ ആത്മഹത്യക്ക് കാരണം സി.പി.എമ്മിലെ വിഭാഗീയതയാണെന്ന് പ്രതിപക്ഷ നേതാവ് രമേശ് ചെന്നിത്തല. നഗരസഭാധ്യക്ഷയുടെ ധാർഷ്ട്യവും ധിക്കാരവുമാണ് സാജന്റെ ആത്മഹത്യയിലേക്ക് നയിച്ചതെന്നും ചെന്നിത്തല പറഞ്ഞു. സാജന്റെ കുടുംബാംഗങ്ങളെ സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു പ്രതിപക്ഷ നേതാവ്.

നഗരസഭാധ്യക്ഷ ശ്യാമളയെ സി.പി.എം രക്ഷിക്കാൻ ശ്രമിക്കുകയാണ്. പാർട്ടിയും സർക്കാറും അവരെ സംരക്ഷിക്കുകയാണ്. സി.പി.എമ്മിനകത്ത് എന്തൊക്കെയോ ഒത്തുകളി നടക്കുന്നുണ്ട്. സർക്കാർ വേണ്ടത്ര നടപടി സ്വീകരിച്ചില്ല. സർക്കാർ ഈ വിഷയത്തിൽ അലംഭാവം കാണിക്കുകയാണ്. അന്വേഷണ സംഘത്തിൽ തൃപ്തിയില്ലെന്നും പ്രതിപക്ഷ നേതാവ് പറഞ്ഞു. ഐ.ജി തലത്തിൽ അന്വേഷണം വേണം. ഇനിയൊരു പ്രവാസിക്കും ഇങ്ങനെ സംഭവിക്കരുതെന്നും അദ്ദേഹം സൂചിപ്പിച്ചു. 24 മണിക്കൂറിനുള്ളിൽ നീതി നടപ്പാക്കണമെന്ന് പ്രതിപക്ഷ ഉപനേതാവ് ഡോ.എം.കെ മുനീർ പറഞ്ഞു. നഗരസഭാധ്യക്ഷക്കെതിരെയും നിയമ നടപടി സ്വീകരിക്കണം. അധ്യക്ഷ സ്ഥാനത്ത് നിന്ന് പി.കെ ശ്യാമളയെ പുറത്താക്കണമെന്നും മുനീർ പറഞ്ഞു. നിഷ്പക്ഷമായ അന്വേഷണമാണ് ഞങ്ങൾ ആവശ്യപ്പെടുന്നത്. നടപടിയുണ്ടായില്ലെങ്കിൽ ശക്തമായി പ്രതികരിക്കുമെന്നും അദ്ദേഹം പറഞ്ഞു. കെ.എം ഷാജി എം.എൽ.എ, മുസ്‌ലിംലീഗ് ജില്ലാ ജനറൽ സെക്രട്ടറി അബ്ദുൽ കരീം ചേലേരി, യു.ഡി.എഫ് ചെയർമാൻ എ.ഡി മുസ്തഫ, ഡി.സി.സി പ്രസിഡന്റ് സതീശൻ പാച്ചേനി എന്നിവരും പ്രതിപക്ഷ നേതാവിനൊപ്പമുണ്ടായിരുന്നു.