ആര്‍എസ്എസ് പ്രവര്‍ത്തകരായ ചൂണ്ടയിലെ അജ്ജു നിവാസില്‍ അമല്‍ രാജ്, ധന്യ നിവാസില്‍ പ്രിബിന്‍, അഷ്‌ന നിവാസില്‍ ആഷിഖ് ലാല്‍ എന്നിവരാണ് അറസ്റ്റിലായത്. ഗൂഢാലോചന, പ്രതികള്‍ക്ക് സഹായം ചെയ്യല്‍ തുടങ്ങിയ കുറ്റങ്ങളാണ് ഇരുവര്‍ക്കുമെതിരെ ചുമത്തിയിരിക്കുന്നത്. എന്നാല്‍ സലാഹുദ്ദീനെ വെട്ടിക്കൊലപ്പെടുത്തിയ പ്രതികളെ ഇതുവരെ അറസ്റ്റ് ചെയ്യാന്‍ പൊലീസിനായിട്ടില്ല.

ചൂണ്ടയിലെ അമല്‍രാജാണ് കോളയാട് സ്വദേശിയില്‍ നിന്ന് കാര്‍ വാടകക്കെടുത്തത്. സലാഹുദ്ദീന്റെ കാറിലിടിച്ച ബൈക്കുകള്‍ അടക്കം പൊലീസ് തിരിച്ചറിഞ്ഞിട്ടുണ്ട്. കൃത്യം നടന്നത് കണ്ണവം വനമേഖലയോട് ചേര്‍ന്ന പ്രദേശത്തായതിനാല്‍ പ്രതികള്‍ക്ക് രക്ഷപ്പെടാന്‍ എളുപ്പമായെന്നാണ് പൊലീസ് പറയുന്നത്.

ഫ്‌ളക്‌സിലെ വാചകങ്ങളുടെ പൂര്‍ണ്ണരൂപം:

”വര്‍ഗീയ കലാപം ലക്ഷ്യമാക്കി നരാധമന്‍മാര്‍ വെട്ടിയരിഞ്ഞത് ഞങ്ങളുടെ പ്രിയപ്പെട്ട സഹോദരന്‍ ശ്യാമപ്രസാദിനെ, ഹേ സുഡാപ്പികളെ ഒരു ലുക്കൗട്ട് നോട്ടീസില്‍ ഒന്നും ഇതവസാനിക്കാന്‍ പോകുന്നില്ല. കനലെരിയുന്ന വഴിയില്‍ ഞങ്ങള്‍ കാത്തിരിക്കുന്നുണ്ട്. ഉപ്പ് തിന്നവന്‍ വെള്ളം കുടിക്കും അല്ലെങ്കില്‍ ഞങ്ങള്‍ കുടിപ്പിക്കും. അതാണ് ഞങ്ങളുടെ പാരമ്പര്യം-ശിവജി ബോയ്‌സ് കണ്ണവം’

അതേസമയം എസ്ഡിപിഐ പ്രവര്‍ത്തകന്‍ സെയ്ദ് മുഹമ്മദ് സലാഹുദ്ദീനെ കൊലപ്പെടുത്തിയ കേസില്‍ മൂന്ന് പേരെ കസ്റ്റഡിയിലെടുത്തു. കൊലയ്ക്ക് സഹായം നല്‍കിയവരെന്നു കരുതുന്ന ബിജെപി പ്രവര്‍ത്തകരാണ് പിടിയിലായത്.

ഇന്നലെ വൈകീട്ടോടെയാണ് കണ്ണവത്ത് എസ്ഡിപിഐ പ്രവര്‍ത്തകനായ സലാഹുദ്ദീന്‍ കൊല്ലപ്പെട്ടത്. കൂത്തുപറമ്പില്‍ നിന്ന് സഹോദരിമാര്‍ക്കൊപ്പം കാറില്‍ വീട്ടിലേക്ക് പോവുകയായിരുന്ന സലാഹുദ്ദീനെ ബൈക്ക് ഇടിച്ച് അപകടമുണ്ടാക്കിയ ശേഷം ആസൂത്രിതമായി വെട്ടിക്കൊല്ലുകയായിരുന്നു. എബിവിപി പ്രവര്‍ത്തകനായിരുന്ന ശ്യാമപ്രസാദിന്റെ കൊലപാതകത്തിന് പ്രതികാരമായാണ് സലാഹുദ്ദീനെ കൊലപ്പെടുത്തിയത് എന്നാണ് പൊലീസ് നിഗമനം.

അതിനിടെ സലാഹുദ്ദീന് കോവിഡ് പോസിറ്റീവായതില്‍ ദുരൂഹതയുണ്ടെന്ന് എസ്ഡിപിഐ ആരോപിച്ചു. പൊലീസിന്റെ ആസൂത്രിത നീക്കമാണ് ഇതിന് പിന്നിലെന്നാണ് നേതാക്കള്‍ പറയുന്നത്. ജനാസ അനുഗമിക്കുന്നതില്‍ നിന്ന് പ്രവര്‍ത്തകരെയും ബന്ധുക്കളെയും ഒഴിവാക്കാനുള്ള പൊലീസ് ഗൂഢാലോചനയുടെ ഭാഗമായാണ് കോവിഡ് പോസിറ്റീവ് എന്ന് പ്രചരിപ്പിക്കുന്നതെന്നാണ് എസ്ഡിപിഐ ആരോപണം.