samstha – Chandrika Daily

ഫലസ്തീന്‍ ജനതക്ക് ഐക്യദാര്‍ഢ്യം; സമസ്ത പ്രാര്‍ത്ഥനാ സംഗമങ്ങള്‍ നാളെ

webdesk11 — Mon, 30 Oct 2023 10:29:03 +0000

കോഴിക്കോട് : ഫലസ്തീന്‍ ജനതക്ക് ഐക്യദാര്‍ഢ്യം പ്രകടിപ്പിച്ച് നാളെ 14 ജില്ലകളിലുംസമസ്ത പ്രാര്‍ത്ഥനാ സംഗമങ്ങള്‍ നടക്കും. മലപ്പുറം വെസ്റ്റ് ജില്ല ഒഴികെ മറ്റ് ജില്ലകളില്‍ വൈകുന്നേരം 4 മണി മുതല്‍ 6 മണി വരെയാണ് സംഗമങ്ങള്‍ നടക്കുക. മലപ്പുറം വെസ്റ്റ് ജില്ലയില്‍ 6.30 മുതല്‍ രാത്രി 8 മണി വരെയാണ് നടക്കുന്നത്. കാസര്‍കോട് മുനിസിപ്പല്‍ ടൗണ്‍ഹാള്‍ പരിസരത്തും, കണ്ണൂരില്‍ സ്‌റ്റേഡിയം കോര്‍ണറിലും, വയനാട്ടില്‍ കല്‍പറ്റയിലും കോഴിക്കോട് മുതലക്കുളം മൈതാനിയിലും മലപ്പുറം ഈസ്റ്റില്‍ സുന്നി മഹല്‍ പരിസരത്തും മലപ്പുറം വെസ്റ്റില്‍ തിരൂര്‍ വാഗണ്‍ ട്രാജഡി ടൗണ്‍ ഹാള്‍ പരിസരത്തും പാലക്കാട് വല്ലപ്പുഴയിലും, തൃശൂര്‍ ശക്തന്‍ തമ്പുരാന്‍ നഗര്‍ എം.ഐ.സി പരിസരത്തും, എറണാകുളത്ത് ആലുവയിലും, കോട്ടയം ടൗണിലും, ആലപ്പുഴ വണ്ടാനത്തും, ഇടുക്കി തൊടുപുഴയിലും പത്തനം തിട്ട സമസ്ത മഹല്‍ പരിസരത്തും, കൊല്ലം കൊല്ലൂര്‍ വിളയിലും, തിരുവനന്തപുരം ആലങ്കോട് ജംഗ്ഷനിലുമാണ് പ്രാര്‍ത്ഥന സംഗമങ്ങള്‍ നടക്കുക.

സമസ്ത കേരള ജംഇയ്യത്തുല്‍ ഉലമ പാലക്കാട് ജില്ലാ ഉപാധ്യക്ഷന്‍ പി. കുഞ്ഞുമുഹമ്മദ് മുസ്‌ലിയാര്‍ വിടവാങ്ങി

webdesk11 — Sat, 10 Jun 2023 11:09:43 +0000

സമസ്ത കേരള ജംഇയ്യത്തുല്‍ ഉലമ പാലക്കാട് ജില്ലാ ഉപാധ്യക്ഷന്‍ പി. കുഞ്ഞുമുഹമ്മദ് മുസ്‌ലിയാര്‍ വിടവാങ്ങി.

മര്‍ഹൂം സ്വദഖതുള്ള മുസ്ലിയാരുടെയും കെ.കെ. ഉസ്താദിന്റെയും പ്രമുഖ ശിഷ്യനായിരുന്നു അദ്ദേഹം. വെല്ലൂര്‍ ബാഖിയാത്തു സ്വാലിഹാതില്‍ നിന്ന് ബാഖവി ബിരുദം നേടിയിട്ടുണ്ട്. കാന്തപുരം എ പി അബൂബക്കര്‍ മുസ്‌ലിയാര്‍
,മര്‍ഹൂം പി.കെ.പി ഉസ്താദ് തുടങ്ങിയവര്‍ വെല്ലൂര്‍ ബാഖിയാത്തു സ്വാലിഹാത്തിലെ സഹപാഠികളായിരുന്നു. കണിയാപുരം,പെരുമ്പാവൂര്‍ കണ്ടന്തറ, കുഞ്ഞുണ്ണിക്കര, (എറണാകുളം) പുതിയകാവ്, സാഹിബിന്റെ പള്ളി (തൃശ്ശൂര്‍), കൊപ്പം, നാട്യമംഗലം തുടങ്ങിയ സ്ഥലങ്ങളില്‍ ദര്‍സ് നടത്തി. കോവിഡിന് മുമ്പുള്ള വര്‍ഷങ്ങളില്‍ വളാഞ്ചേരി മര്‍ക്കസുത്തര്‍ബിയ്യയിലെ മുദരിസായിരുന്നു.

നിര്യാണത്തില്‍ പാണക്കാട് സയ്യിദ് സാദിഖലി തങ്ങള്‍ അനുശോചിച്ചു. ഇസ്ലാമിനെ കുറിച്ച് പഠിക്കാനും പഠിപ്പിക്കാനും മതപ്രബോധനത്തിനും വിശ്വാസികളെ ഉദ്ബോധിപ്പിക്കാനും ഒരായുഷ്‌കാലം ചെലവഴിച്ച ഉസ്താദ് പി കുഞ്ഞഹമ്മദ് മുസ്ലിയാര്‍ നാഥനിലേക്ക് മടങ്ങി. സമസ്ത പാലക്കാട് ജില്ലാ ഉപാധ്യക്ഷനും അഗാധജ്ഞാനിയുമായിരുന്ന ഉസ്താദിന്റെ ഉപദേശങ്ങളും വാത്സല്യവും അനുഭവിച്ച അനേകം സന്ദര്‍ഭങ്ങളുണ്ടായിട്ടുണ്ട്. ഒട്ടനേകം വിദ്യാര്‍ഥികളാണ് അദ്ദേഹത്തില്‍ നിന്നും അറിവ് നുകര്‍ന്ന് അറിയപ്പെടുന്ന പണ്ഡിതന്മാരായി മാറിയത്. മരണംവരെയും കര്‍മമേഖലയില്‍ സജീവമായിരുന്ന ഉസ്താദ് നെടുങ്ങോട്ടൂരില്‍ മജ്മഉല്‍ അബ്റാര്‍ എന്ന പേരില്‍ ഒരു പഠന കേന്ദ്രം ആരംഭിക്കാനിരിക്കുകയായിരുന്നു. ഉസ്താദിന്റെ ആഗ്രഹമായിരുന്ന പഠന കേന്ദ്രത്തെ സര്‍വശക്തനായ അല്ലാഹു അറിവിന്റെ പ്രകാശ ഗോപുരമാക്കി തീര്‍ക്കട്ടെ… അദ്ദേഹത്തിന് ജന്നാത്തുല്‍ ഫിര്‍ദൗസ് കനിഞ്ഞേകട്ടെ തങ്ങള്‍ പറഞ്ഞു.

സമസ്ത ദേശീയ ജംഇയ്യത്തുല്‍ ഉലമാ രൂപീകരിക്കും

Test User — Thu, 10 Nov 2022 05:46:48 +0000

കോഴിക്കോട്: സമസ്ത കേരള ജംഇയ്യത്തുല്‍ ഉലമായുടെ പ്രവര്‍ത്തനങ്ങളും വിദ്യാഭ്യാസ സംവിധാനങ്ങളും ദേശീയ തലത്തില്‍ കൂടുതല്‍ വ്യാപിപ്പിക്കുന്നതിന്റെ ഭാഗമായി സമസ്ത ദേശീയ ജംഇയ്യത്തുല്‍ ഉലമാക്ക് രൂപം നല്‍കാന്‍ കോഴിക്കോട് ചേര്‍ന്ന സമസ്ത കേരള ജംഇയ്യത്തുല്‍ ഉലമാ കേന്ദ്ര മുശാവറയ യോഗം തീരുമാനിച്ചു.

പരിശുദ്ധ അഹ്ലുസുന്നത്തി വല്‍ജമാഅത്തിന്റെ ആശയാദര്‍ശങ്ങള്‍ക്കും സമസ്തയുടെ ഉദ്ദേശ്യലക്ഷ്യങ്ങള്‍ക്കും വിരുദ്ധമായി പ്രചാരണം നടത്തുകയും സംഘടനാവിരുദ്ധ പ്രവര്‍ത്തനങ്ങളില്‍ ഏര്‍പ്പെടുകയും ചെയ്തതായി സമസ്ത മുശാവറക്കു ലഭിച്ച രേഖാമൂലമുള്ള പരാതികളില്‍ നിന്നും ഇതുസംബന്ധമായി നിയോഗിച്ച സമിതിയുടെ അന്വേഷണ റിപ്പോര്‍ട്ടില്‍നിന്നും ബോധ്യപ്പെട്ടതിന്റെ അടിസ്ഥാനത്തില്‍ അബ്ദുല്‍ ഹക്കീം ഫൈസി ആദൃശ്ശേരിയെ സമസ്ത കേരള ജംഇയ്യത്തുല്‍ ഉലമായുടെ എല്ലാ ഘടകങ്ങളില്‍ നിന്നും നീക്കം ചെയ്യാനും മുശാവറ യോഗം തീരുമാനിച്ചു. തുടര്‍നടപടികളെ കുറിച്ച് പാണക്കാട് സയ്യിദ് സാദിഖലി ശിഹാബ് തങ്ങള്‍ വിദേശത്തുനിന്ന് തിരിച്ചെത്തിയ ശേഷം കൂടിയാലോചിച്ച് തീരുമാനിക്കുന്നതാണെന്നും മുശാവറ യോഗം അറിയിച്ചു.

പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനായി. ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ സ്വാഗതം പറഞ്ഞു. എം.ടി അബ്ദുല്ല മുസ്‌ലിയാര്‍, പി.പി ഉമര്‍ മുസ്‌ലിയാര്‍ കൊയ്യോട്, എം.കെ മൊയ്തീന്‍ കുട്ടി മുസ്‌ലിയാര്‍ കോട്ടുമല, എം.പി കുഞ്ഞി മുഹമ്മദ് മുസ്‌ലിയാര്‍, കെ. ഉമര്‍ ഫൈസി മുക്കം, കെ.ടി ഹംസ മുസ്‌ലിയാര്‍, വി. മൂസക്കോയ മുസ്‌ലിയാര്‍, പി.കെ മൂസക്കുട്ടി ഹസ്രത്ത്, ടി.എസ് ഇബ്രഹിം കുട്ടി മുസ്‌ലിയാര്‍, കെ. ഹൈദര്‍ ഫൈസി പനങ്ങാങ്ങര, ഡോ. ബഹാഉദ്ദീന്‍ മുഹമ്മദ് നദ്‌വി കൂരിയാട്, എം. മൊയ്തീന്‍ കുട്ടി മുസ്‌ലിയാര്‍ വാക്കോട്, എ.വി അബ്ദുറഹിമാന്‍ മുസ്‌ലിയാര്‍, കെ.കെ.പി അബ്ദുല്ല മുസ് ലിയാര്‍, ഇ.എസ് ഹസ്സന്‍ ഫൈസി, ഐ.ബി ഉസ്മാന്‍ ഫൈസി, എം.എം അബ്ദുല്ല ഫൈസി, എം.പി മുസ്തഫല്‍ ഫൈസി, മാഹിന്‍ മുസ്‌ലിയാര്‍ തൊട്ടി, പി.എം അബ്ദുസ്സലാം ബാഖവി, എം.വി ഇസ്മാഈല്‍ മുസ്‌ലിയാര്‍, കാടേരി മുഹമ്മദ് മുസ്‌ലിയാര്‍, സി.കെ സൈതാലിക്കുട്ടി ഫൈസി, അസ്ഗറലി ഫൈസി പട്ടിക്കാട്, സി.കെ അബ്ദുറഹിമാന്‍ ഫൈസി അരിപ്ര, കെ.എം ഉസ്മാന്‍ ഫൈസി തോടാര്‍, ഒളവണ്ണ അബൂബക്കര്‍ ദാരിമി, എന്‍. അബ്ദുല്ല മുസ്‌ലിയാര്‍ നടമ്മല്‍പൊയില്‍, പി.വി അബ്ദുസ്സലാം ദാരിമി ആലംപാടി എന്നിവര്‍ ചര്‍ച്ചയില്‍ പങ്കെടുത്തു.

മുസ്‌ലിം ലീഗ്-സമസ്ത ബന്ധം സുശക്തം

chandrika — Mon, 23 Oct 2017 18:10:11 +0000

മലപ്പുറം: സമീപകാലത്ത് പത്ര മാധ്യമങ്ങളിലുടെയും സാമൂഹ്യ മാധ്യമങ്ങള്‍ വഴിയും ഉയര്‍ന്നുവന്ന ചില പ്രശ്‌നങ്ങള്‍ സമസ്ത കേരള ജംഇയ്യത്തുല്‍ ഉലമയുടെയും മുസ്‌ലിംലീഗിന്റെയും നേതാക്കള്‍ പാണക്കാട് സയ്യിദ് ഹൈദരലി ശിഹാബ് തങ്ങളുടെ വസതിയില്‍ യോഗം ചേര്‍ന്ന് വിശദമായി ചര്‍ച്ച ചെയ്തു. സമസ്ത കേരള ജംഇയ്യത്തുല്‍ ഉലമയും മുസ്‌ലിംലീഗും തമ്മില്‍ കാലങ്ങളായി നിലനില്‍ക്കുന്ന നല്ല ബന്ധത്തിന് കോട്ടം തട്ടുന്ന യാതൊന്നും തന്നെ ആരുടെ ഭാഗത്തുനിന്നും ഉണ്ടാവരുതെന്ന് യോഗം ആവശ്യപ്പെടുകയും ഇത് സംബന്ധിച്ച നിര്‍ദ്ദേശങ്ങള്‍ എല്ലാവര്‍ക്കും നല്‍കാന്‍ തീരുമാനിക്കുകയും ചെയ്തു. ആവശ്യമില്ലാത്ത പ്രസ്താവനകളും വിവാദങ്ങളുമൊന്നും പത്ര വാര്‍ത്താ മാധ്യമങ്ങളിലൂടെ ആരും തന്നെ നടത്തരുതെന്നും അതിന് വേണ്ട നിര്‍ദ്ദേശങ്ങള്‍ അതാത് പ്രസ്ഥാനങ്ങള്‍ താഴേ തട്ടിലേക്ക് കൈമാറാനും യോഗം തീരുമാനിച്ചു. വിശദാംശങ്ങള്‍ സംബന്ധിച്ച് ഇരുകൂട്ടരും തുടര്‍ന്നുള്ള ദിവസങ്ങളില്‍ വിശദമായ ചര്‍ച്ച നടത്താനും തീരുമാനിച്ചു.
പാണക്കാട് സയ്യിദ് ഹൈദരലി ശിഹാബ് തങ്ങള്‍, പി.കെ കുഞ്ഞാലിക്കുട്ടി എം.പി, സയ്യിദ് ജിഫ്രി മുത്തുക്കോയ തങ്ങള്‍, പ്രൊഫ. കെ. ആലിക്കുട്ടി മുസ്‌ലിയാര്‍, പാണക്കാട് സയ്യിദ് സാദിഖലി ശിഹാബ് തങ്ങള്‍, പി.വി അബ്ദുല്‍ വഹാബ് എം.പി, എം.ടി അബ്ദുല്ല മുസ്‌ലിയാര്‍, സി.കെ.എം സാദിഖ് മുസ്‌ലിയാര്‍, കൊയ്യോട് ഉമര്‍ മുസ്‌ലിയാര്‍, കോഴിക്കോട് ഖാസി സയ്യിദ് മുഹമ്മദ്‌കോയ ജമലുല്ലൈലി തങ്ങള്‍, പി.എ ജബ്ബാര്‍ ഹാജി യോഗത്തില്‍ പങ്കെടുത്തു.