റിയാദ് : അല്‍ഉലായില്‍ സൗഹൃദത്തിന്റെയും സമാധാനത്തിന്റെയും സുസ്ഥിരതയുടെയും സന്തോഷത്തിന്റെയും പൂക്കള്‍ വിരിയും. ഇന്ന് നടക്കുന്ന ഉച്ചകോടിയില്‍ ഖത്തര്‍ അമീര്‍ ശൈഖ് തമീം പങ്കെടുക്കും. സൗദിയുമായുള്ള ഉപരോധം അവസാനിപ്പിച്ച ഉടനെയാണ് അമീര്‍ ഉച്ചകോടിയില്‍ പങ്കെടുക്കുമെന്ന വാര്‍ത്ത ഖത്തര്‍ പുറത്തുവിട്ടത്.

നേരത്തെ തിരുഗേഹങ്ങളുടെ സേവകന്‍ സല്‍മാന്‍ രാജാവ് ഖത്തര്‍ അമീറിന് ഉച്ചകോടിയില്‍ പങ്കെടുക്കാന്‍ പ്രത്യേക ക്ഷണക്കത്ത് അയച്ചിരുന്നു. അതോടൊപ്പം സൗദി കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരനും ഖത്തര്‍ അമീര്‍ ശൈഖ് തമീമുമായി ഇന്നലെ വൈകീട്ട് ഫോണില്‍ സംസാരിച്ചിരുന്നു.

ഗള്‍ഫ് മേഖലയില്‍ അസ്ഥിരതയുണ്ടാക്കാന്‍ ശ്രമിക്കുന്ന ഇറാന്റെ പിന്തുണയോടെ നീങ്ങുന്ന തീവ്രവാദ ഗ്രൂപ്പുകളുമായുള്ള ബന്ധം അവസാനിപ്പിക്കണമെന്നതുള്‍പ്പെടെ 12 വ്യവസ്ഥകള്‍ നടപ്പാക്കണമെന്നാവശ്യപ്പെട്ട് 2017 ജൂണ്‍ അഞ്ചിനാണ് ജിസിസി അംഗ രാജ്യങ്ങളായ സൗദിയും യുഎഇയും ബഹ്റൈനും ഖത്തറുമായുള്ള നയതന്ത്ര ബന്ധം അവസാനിപ്പിച്ചത്. തുടര്‍ന്ന് കുവൈത്തിന്റെയും ഒമാന്റെയും നേതൃത്വത്തില്‍ പല ഘട്ടങ്ങളിലായി ചര്‍ച്ചകള്‍ നടന്നുവരികയായിരുന്നു.

വിടപറഞ്ഞ കുവൈത്ത് അമീര്‍ ശൈഖ് സബാഹിന്റെ നേതൃത്വത്തില്‍ തുടങ്ങിയ മധ്യസ്ഥ ശ്രമങ്ങള്‍ അദ്ദേഹത്തിന്റെ കാലശേഷവും പുതുതായി അധികാരമേറ്റ അമീര്‍ ശൈഖ് നവാഫിന്റെ നേതൃത്വത്തില്‍ തുടരുകയായിരുന്നു. ഗള്‍ഫ് രാജ്യങ്ങളെ കൂടാതെ ഈജിപ്ത്, മാലിദ്വീപ്, മൗറിറ്റാനിയ, സെനഗല്‍, ജിബൂട്ടി, കൊമോറോസ്, ജോര്‍ദാന്‍, ലിബിയ, യെമന്‍ തുടങ്ങിയ രാജ്യങ്ങളും ഉപരോധത്തിന് പിന്തുണ പ്രഖ്യാപിച്ചിരുന്നു.

സൗദിയിലെ ചര്‍ച്ചകള്‍ക്കു പിന്നാലെ സംഘം ഖത്തറിലെത്തും. ഖത്തര്‍ അമീര്‍ തമീം ബിന്‍ ഹമദ് അല്‍ഥാനിയുമായും കുഷ്‌നര്‍ ചര്‍ച്ച നടത്തും. യുഎസിലെ മധ്യേഷ്യന്‍ പ്രതിനിധി അവി ബെര്‍കോവിസ്റ്റ്‌സ്, മുതിര്‍ന്ന നയതന്ത്ര ഉദ്യോഗസ്ഥരായ ബ്രൈന്‍ ഹൂക്, ആദം ബോഹ്ലര്‍ എന്നിവരും യുഎസ് സംഘത്തിലുണ്ട്.

സൗദിക്കും ഖത്തറിനുമിടയിലുള്ള നയതന്ത്ര പരിഹാരമാണ് സന്ദര്‍ശന ലക്ഷ്യമെന്ന് വാള്‍സ്ട്രീറ്റ് ജേര്‍ണല്‍ റിപ്പോര്‍ട്ട് ചെയ്തു.

ഇസ്രയേലുമായി സൗദിയെ നയതന്ത്ര ബന്ധത്തിന് പ്രേരിപ്പിക്കുക എന്ന ലക്ഷ്യവും കുഷ്‌നര്‍ക്കുണ്ട്. ട്രംപ് അധികാരമൊഴിയും മുമ്പ് ബന്ധം സാധ്യമാക്കാനാണ് യുഎസ് ആലോചിക്കുന്നത്. ജനുവരി 20നാണ് യുഎസില്‍ അധികാരക്കൈമാറ്റം നടക്കുന്നത്.

നേരത്തെ, യുഎഇയും ബഹ്‌റൈനും ഇസ്രയേലുമായി നയതന്ത്ര ബന്ധം സ്ഥാപിച്ചിരുന്നു. എന്നാല്‍ സൗദിയും ഖത്തറും അതിനു തയ്യാറായിരുന്നില്ല.

ഇറാന്റെ ആണവ ശാസ്ത്രജ്ഞന്‍ മുഹ്‌സിന്‍ ഫഖ്‌രിസദ ടെഹ്‌റാനില്‍ കൊല്ലപ്പെട്ടതിന് പിന്നാലെയാണ് കുഷ്‌നര്‍ സൗദിയിലെത്തുന്നത് എന്ന പ്രത്യേകതയുമുണ്ട്. കൊലപാതകത്തിന് പിന്നില്‍ ഇസ്രയേല്‍ ആണ് എന്നാണ് ഇറാന്റെ ആരോപണം. ഇറാനെതിരെ അറബ് ലോകത്ത് പിന്തുണയുണ്ടാക്കുക എന്ന ലക്ഷ്യവും സന്ദര്‍ശനത്തിന് പിന്നില്‍ ഉണ്ട് എന്ന് കരുതപ്പെടുന്നു.