sayed mushtaq ali trophy – Chandrika Daily

കേരളത്തിന് മികച്ച തുടക്കം നല്‍കി; പിടിച്ചു നില്‍ക്കാനാവാതെ സഞ്ജു വീണു

webdesk18 — Thu, 04 Dec 2025 05:39:55 +0000

ലക്‌നൗ: സയ്യിദ് മുഷ്താഖ് അലി ടി20യില്‍ മുംബൈക്കെതിരായ മത്സരത്തില്‍ കേരളത്തിന് മികച്ച തുടക്കം നല്‍കി സഞ്ജു. ഒരു സിക്‌സും എട്ട് ഫോറും ഉള്‍പ്പെടുന്നതായിരുന്നു സഞ്ജുവിന്റെ ഇന്നിംഗ്‌സ്. എന്നാല്‍ 28 പന്തില്‍ 48 റണ്‍സുമായി സഞ്ജു മടങ്ങുകയായിരുന്നു.

ഷാര്‍ദുല്‍ താക്കൂറിനായിരുന്നു വിക്കറ്റ്. ലക്‌നൗവില്‍ ടോസ് നേടി ബാറ്റിംഗ് തെരഞ്ഞെടുത്ത കേരളം ഒടുവില്‍ വിവരം ലഭിക്കുമ്പോള്‍ ഏഴ് ഓവറില്‍ രണ്ട് വിക്കറ്റ് മാത്രം നഷ്ടത്തില്‍ 62 റണ്‍സെടുത്തിട്ടുണ്ട്. വിഷ്ണു വിനോദ് (4), മുഹമ്മദ് അസറുദ്ദീന്‍ (5) എന്നിവരാണ് ക്രീസില്‍. നേരത്തെ രോഹന്‍ കുന്നുമ്മലിന്റെ (2) വിക്കറ്റും കേരളത്തിന് നഷ്ടമായിരുന്നു. ഷംസ് മുലാനിയുടെ പന്തില്‍ ബൗള്‍ഡാവുകയായിരുന്നു രോഹന്‍.

വിദര്‍ഭയ്‌ക്കെതിരെ കഴിഞ്ഞ മത്സരം കളിച്ച സാലി സാംസണ്‍, അഹമ്മദ് ഇമ്രാന്‍, അങ്കിത് ശര്‍മ എന്നിവരില്ലാതെയാണ് കേരളം ഇറങ്ങുന്നത്. മുഹമ്മദ് അസറുദ്ദീന്‍, അഖില്‍ സ്‌കറിയ, കെ എം ആസിഫ് എന്നിവര്‍ തിരിച്ചെത്തി.

ഹരിയാനയോട് നാല് റണ്‍സ് തോല്‍വി; മുഷ്താഖ് അലി ട്രോഫിയില്‍ കേരളം പുറത്ത്

ചന്ദ്രിക വെബ് ഡെസ്‌ക്‌ — Tue, 19 Jan 2021 10:51:28 +0000

മുംബൈ: സയ്യിദ് മുഷ്താഖ് അലി ട്രോഫിയില്‍ ഹരിയാനയ്‌ക്കെതിരെ തോല്‍വിയേറ്റുവാങ്ങിയ കേരളം ടൂര്‍ണമെന്റില്‍ നിന്ന് പുറത്തായി. മുംബൈയിലെ വാങ്കഡെ സ്റ്റേഡിയത്തില്‍ നടന്ന നിര്‍ണായക മത്സരത്തില്‍ നാല് റണ്‍സിനാണ് കേരളം അടിയറവ് പറഞ്ഞത്. ഹരിയാന ഉയര്‍ത്തിയ 199എന്ന വലിയ ടോട്ടല്‍ പിന്തുടര്‍ന്ന കേരളത്തിന് 20 ഓവറില്‍ ആറുവിക്കറ്റ് നഷ്ടത്തില്‍ 194 റണ്‍സ്മാത്രമാണ് നേടാനായത്. തുടര്‍ച്ചയായി അഞ്ചാംമത്സരവും വിജയിച്ച ഹരിയാന 20പോയന്റോടെ നോക്കൗട്ടില്‍കടന്നു.
കേരളത്തിനായി സച്ചിന്‍ ബേബി 36 പന്തില്‍ 68 റണ്‍സും ക്യാപ്റ്റന്‍ സഞ്ജു സാംസണ്‍ 31 പന്തില്‍ 51 റണ്‍സുമെടുത്ത് പോരാട്ടം നയിച്ചെങ്കിലും അവസാന ഓവറുകളില്‍ കാലിടറി. മുഹമ്മദ് അസ്ഹറുദ്ദീന്‍ 35 റണ്‍സ് നേടിയപ്പോള്‍ റോബിന്‍ ഉത്തപ്പ എട്ട് റണ്‍സും വിഷ്ണുവിനോദ് പത്ത് റണ്‍സെടുത്തും പുറത്തായി. ഹരിയാനയ്ക്കായി സുമിത് കുമാര്‍, അരുണ്‍ ചപ്രാന എന്നിവര്‍ രണ്ട് വിക്കറ്റ് വീഴ്ത്തി.

സയിദ് മുഷ്താഖലി ട്രോഫി; കേരളം നാളെ ആന്ധ്രക്കെതിരെ

web desk 1 — Sat, 16 Jan 2021 17:18:58 +0000

സയിദ് മുഷ്താഖലി ടി20 ട്രോഫിയില്‍ കേരളം നാളെ ആന്ധ്ര പ്രദേശിനെ നേരിടും. ശരത് പവാര്‍ ക്രിക്കറ്റ് അക്കാദമി മൈതാനത്ത് ഉച്ചയ്ക്ക് 12.00നാണ് മത്സരം. പുതുച്ചേരി,ഡല്‍ഹി, മുംബൈ എന്നീ വമ്പന്‍ ടീമുകളെ തോല്‍പിച്ച ആത്മവിശ്വാസത്തിലാണ് കേരളംി നാളെ ഇറങ്ങുക.

മൂന്ന് മത്സരങ്ങളും ജയിച്ച കേരളം നിലവില്‍ ഗ്രൂപ്പില്‍ ഒന്നാമതാണ്. മികച്ച ഫോമില്‍ കളിക്കുന്ന ബാറ്റിംഗ് നിരയാണ് കേരളത്തിന്റെ കുന്തമുന. കാസര്‍ക്കോട്ടുകാരന്‍ മുഹമ്മദ് അസ്ഹറുദ്ദീന്‍, റോബിന്‍ ഉത്തപ്പ, വിഷ്ണു വിനോദ് എന്നിവരുടെ പ്രകടനം കളിയില്‍ നിര്‍ണായകമായേക്കും. അതേ സമയം ബൗളിങ്ങിലും കേരളം തിളങ്ങി നില്‍ക്കുന്നു. നീണ്ട ഇടവേളക്കു ശേഷം മടങ്ങി വന്ന എസ് ശ്രീശാന്തില്‍ തന്നെയാണ് ആരാധകരുടെ പ്രതീക്ഷ.

ഗ്രൂപ്പില്‍ ആന്ധ്രയെ കൂടാതെ ഹരിയാനയാണ് കേരളത്തിന് അടുത്തതായി വരുന്ന എതിരാളികള്‍. ഹരിയാനയും ഇതുവരെ ഒരു മത്സരവും തോറ്റിട്ടില്ല. അതുകൊണ്ട് ഇരു ടീമും തമ്മിലുള്ള മത്സരം തീപാറും.

ഡല്‍ഹിക്കെതിരെ അസ്ഹര്‍ ആദ്യ പന്തില്‍ പുറത്ത്; കേരളത്തിന് 213 റണ്‍സ് വിജയലക്ഷ്യം

web desk 1 — Fri, 15 Jan 2021 09:36:52 +0000

മുംബൈ: സയ്യിദ് മുഷ്താഖ് അലി ടി 20 ടൂര്‍ണമെന്റില്‍ ഡല്‍ഹിക്കെതിരെ കേരളത്തിന് 213 റണ്‍സ് വിജയലക്ഷ്യം. കഴിഞ്ഞ കളിയില്‍ മുംബൈയ്‌ക്കെതിരെ തട്ടുതകര്‍പ്പന്‍ സെഞ്ച്വറി നേടിയ മുഹമ്മദ് അസ്ഹറുദ്ദീന്‍ നേരിട്ട ആദ്യ പന്തില്‍ തന്നെ പുറത്തായി. ഇശാന്ത് ശര്‍മ്മയുടെ പന്തില്‍ വിക്കറ്റ് കീപ്പര്‍ അഞ്ജു റാവത്ത് പിടിച്ചാണ് അസ്ഹര്‍ പുറത്തായത്. 213 വിജയ ലക്ഷ്യത്തിനെതിരെ ബാറ്റിങ്ങിനിറങ്ങിയ കേരളം മൂന്ന് വിക്കറ്റില്‍ 179 റണ്‍സെടുത്തിട്ടുണ്ട്. 24 ബോളുകളില്‍ 34 റണ്‍സാണ് ഇനി വേണ്ടത്. 80 റണ്‍സുമായി റോബിന്‍ ഉത്തപ്പയും 58 റണ്‍സുമായി വിഷ്ണു വിനോദുമാണ് ക്രീസില്‍.

കേരളത്തിന് വേണ്ടി ശ്രീശാന്ത് രണ്ട് വിക്കറ്റ് വീഴ്ത്തി. കെഎം ആസിഫ്, എസ് മിഥുന്‍ എന്നിവര്‍ക്ക് ഓരോ വിക്കറ്റുണ്ട്.

48 പന്തില്‍ മൂന്ന് സിക്‌സിന്റേയും ഏഴ് ഫോറിന്റേയും സഹായത്തോടെയാണ് ഇന്ത്യന്‍ ഓപ്പണര്‍ കൂടിയായ ധവാന്‍ 77 റണ്‍സ് നേടിയത്. ഒരറ്റത്ത് കൃത്യമായ ഇടവേളകളില്‍ വിക്കറ്റ് നഷ്ടപ്പെടുമ്പോഴും റണ്‍റേറ്റ് കൂട്ടിയത് ധവാന്റെ ഇന്നിങ്‌സാണ്. അവസാനങ്ങളില്‍ ലളിത് യാദവ് (25 പന്തില്‍ 52) കത്തിക്കയറിയപ്പോള്‍ ദില്ലിയുടെ സ്‌കോര്‍ 200 കടന്നു. ലളിതിനൊപ്പം അനുജ് റാവത്ത് (10 പന്തില്‍ 27) പുറത്താവാതെ നിന്നു. ഇരുവരും 56 റണ്‍സ് കൂട്ടിച്ചേര്‍ത്തു.

ഹിതന്‍ ദലാല്‍ (11), ഹിമ്മത് സിംഗ് (26), നിതീഷ് റാണ (16) എന്നിവരുടെ വിക്കറ്റുകള്‍ കൂടെയാണ് ഡല്‍ഹിക്ക് നഷ്ടമായത്. ധവാന്‍, റാണ എന്നീ വമ്പന്മാരെ ശ്രീശാന്താണ് മടക്കിയത്.