അടുത്ത സ്ഥലമായതുകൊണ്ട് സംശയം തോന്നിയില്ലെന്ന് സജീഷ് പറഞ്ഞു. ‘പെണ്ണുകാണല്‍ ചടങ്ങിന് രണ്ടോ മൂന്നോ ദിവസത്തേക്ക് വേണമെന്നാണ് പറഞ്ഞത്. ദിവസം 1200 രൂപയാണ് വാടക നിശ്ചയിച്ചത്. ആധാര്‍ കാര്‍ഡും മറ്റ് രേഖകളും അഡ്വാന്‍സ് ആയി കുറച്ച് പണവും വാങ്ങിയ ശേഷം കാര്‍ കൊടുത്തു. അഭി എന്ന് വിളിക്കുന്ന അമല്‍ ആണ് രേഖകളുടെ കോപ്പി നല്‍കി കാര്‍ കൊണ്ടുപോയത്.

ഇരുവരും മാസ്‌ക് ധരിച്ചിരുന്നതിനാല്‍ മുഖം വ്യക്തമായി ഓര്‍ക്കാന്‍ കഴിഞ്ഞില്ല. ആധാര്‍ കാര്‍ഡില്‍ ഫോട്ടോയുണ്ടെങ്കിലും വ്യക്തതക്കുറവുണ്ടായിരുന്നു. മൂന്നോ നാലോ ദിവസത്തിനകം കാര്‍ തിരികെത്തരുമെന്നാണ് പറഞ്ഞത്.

പക്ഷേ, കിട്ടാതിരുന്നപ്പോള്‍ വിളിച്ചു. രണ്ടുദിവസത്തിനകം തരാം എന്നാണ് പറഞ്ഞത്. ഇങ്ങനെ പറഞ്ഞ് രണ്ടു മൂന്നു തവണ നീട്ടിക്കൊണ്ടുപോയി. കഴിഞ്ഞ ദിവസം പോലീസ് അന്വേഷിച്ചെത്തിയപ്പോഴാണ് കുറ്റകൃത്യത്തിനാണ് കാര്‍ കൊണ്ടുപോയതെന്ന് മനസ്സിലായതെന്ന് സജേഷ് പറഞ്ഞു.’

ബാംഗളൂരുവില്‍ ബിസിനസ് നടത്തിയിരുന്ന സജേഷ് അഞ്ചാറു വര്‍ഷം മുമ്പ് അത് അവസാനിപ്പിച്ച് നാട്ടില്‍ പലചരക്കുകട തുടങ്ങിയെങ്കിലും വിജയിച്ചില്ല. തുടര്‍ന്നാണ് അനൗപചാരികമായി റെന്റ് എ കാര്‍ പരിപാടി തുടങ്ങിയതെന്ന് സജേഷ് പറഞ്ഞു. നമ്പൂതിരിക്കുന്ന് അമ്മാറമ്പ് കോളനി റോഡില്‍ റബ്ബര്‍തോട്ടത്തിന് സമീപം വിജനസ്ഥലത്തുനിന്നാണ് കാര്‍ കണ്ടെടുത്തത്.

വിരലടയാളഫോറന്‍സിക് വിദഗ്ധര്‍ ഇത് വിശദമായി പരിശോധിച്ചു. അതേസമയം, രണ്ടാം തീയതിതന്നെ കാര്‍ വാടകയ്‌ക്കെടുക്കുകയും എട്ടാം തീയതി കൃത്യം നടത്തുകയും ചെയ്തത് ഗൂഢാലോചനയുടെ ആഴം വെളിവാക്കുന്നു. സലാഹുദ്ദീന്‍ നിരന്തര നിരീക്ഷണത്തിലായിരുന്നുവെന്നും പ്രതികള്‍ തക്കംപാര്‍ത്തിരിക്കുകയായിരുന്നുവെന്നും പോലീസ് കേന്ദ്രങ്ങള്‍ പറഞ്ഞു.

മുഖ്യമായും അഞ്ചോ ആറോ പേരാണ് കൊലപാതകത്തില്‍ പങ്കെടുത്തതെന്ന് പോലീസ് കരുതുന്നു. ബൈക്കില്‍ വന്ന് കാറിനിടിച്ച ആളെ കൂടാതെ നാലോ അഞ്ചോ പേര്‍ ആക്രമണസംഘത്തില്‍ ഉള്‍പ്പെട്ടിരുന്നു. ഒരാള്‍ സലാഹുദ്ദീന്റെ കാലിനും മറ്റൊരാള്‍ കൈയ്ക്കും പിടിച്ചുവെച്ചുവെന്നും മറ്റ് രണ്ടുപേര്‍ ചേര്‍ന്ന് വെട്ടിയെന്നും സലാഹുദ്ദീന്റെ സഹോദരി റായിദ പോലീസിന് മൊഴി നല്‍കിയിരുന്നു.

ആക്രമണത്തില്‍ പരിക്കേറ്റ റായിദ തലശ്ശേരി സഹകരണാസ്പത്രിയിലായിരുന്നു. കഴിഞ്ഞ രാത്രി ഡിസ്ചാര്‍ജ് ചെയ്ത ഇവരില്‍നിന്ന് കൂത്തുപറമ്പ് പോലീസ് സ്റ്റേഷനില്‍വെച്ച് നാര്‍ക്കോട്ടിക് സെല്‍ എ.എസ്.പി. രേഷ്മ സംഭവം വിശദമായി ചോദിച്ചറിഞ്ഞു.

ബുധനാഴ്ച രാത്രി കൂത്തുപറമ്പ് കോടതിയില്‍ ഹാജരാക്കിയ പ്രതികളെ കോടതി രണ്ടാഴ്ചത്തേക്ക് റിമാന്‍ഡ് ചെയ്തു. കൊലയില്‍ ഇവര്‍ നേരിട്ട് പങ്കെടുത്തോ എന്ന് വ്യക്തമല്ല. കുറ്റകൃത്യത്തില്‍ കൂടുതല്‍പേര്‍ പങ്കെടുത്തിട്ടുണ്ടെന്നും ഇവരെ തിരിച്ചറിഞ്ഞുവെന്നും പോലീസ് അറിയിച്ചു.

ചിറ്റാരിപ്പറമ്പിനടുത്ത് ചുണ്ടയില്‍ എന്ന സ്ഥലത്ത് വച്ചാണ് സംഭവമുണ്ടായത്. രണ്ടു സഹോദരിമാര്‍ക്കൊപ്പം കൂത്തുപറമ്പില്‍ നിന്ന് കണ്ണവത്തെ വീട്ടിലേക്ക് കാറില്‍ യാത്ര ചെയ്യുന്നതിനിടെയാണ് ആക്രമണം. ഇവര്‍ സഞ്ചരിച്ചിരുന്ന കാറിന് പിന്നിലേക്ക് ഒരു ബൈക്ക് ഇടിക്കുകയായിരുന്നു. തുടര്‍ന്ന് കാര്‍ സൈഡിലേക്ക് ഒതുക്കി നിര്‍ത്തി പുറത്തിറങ്ങിയ സലാഹുദ്ദീനെ പിന്നിലൂടെ മറ്റൊരു ബൈക്കിലെത്തിയ സംഘം കഴുത്തിന് വെട്ടുകയായിരുന്നു.

എ.ബി.വി.പി നേതാവ് ശ്യാമപ്രസാദ് വധക്കേസിലെ ഏഴാം പ്രതിയാണ് സലാഹുദ്ദീന്‍. ബിജെപിയാണ് കൊലപാതകത്തിന് പിന്നിലെന്ന് ഇന്നലെ എസ്ഡിപിഐ ആരോപിച്ചിരുന്നു.

ഒരാള്‍ കൊല്ലപ്പെട്ടു കഴിഞ്ഞാല്‍ പകരമെന്നോണമാണ് മറ്റു പല കൊലപാതകങ്ങളും കണ്ണൂരില്‍ നടന്നിട്ടുള്ളത്. അങ്ങനെ നാലു വര്‍ഷത്തിനിടെ പതിമൂന്ന് രാഷ്ട്രീയ കൊലപാതകങ്ങള്‍ കണ്ണൂര്‍ ജില്ലയിലും മാഹിയിലുമായി നടന്നു. പതിമൂന്നാമത്തെ രാഷ്ട്രീയ കൊലപാതകമാണു കണ്ണവത്തെ എസ്ഡിപിഐ പ്രവര്‍ത്തകന്‍ സലാഹുദ്ദീന്റേത്. 2018 മേയ് ഏഴിനു മാഹിയിലും തുടര്‍ച്ചയായി അന്നു തന്നെ കണ്ണൂരിലും ഇരട്ടക്കൊലപാതകം നടന്നശേഷം 27 മാസത്തെ ഇടവേളക്കു ശേഷമാണ് സ്വലാഹുദ്ദീന്റേത്.

2016 മേയ് 19 ഏറാങ്കണ്ടി രവീന്ദ്രന്‍ (സിപിഎം) എല്‍ഡിഎഫിന്റെ വിജയാഹ്ലാദ പ്രകടനത്തിനിടെയുണ്ടായ സംഘര്‍ഷത്തില്‍ കൊല്ലപ്പെട്ടു. 2016 ജൂലൈ 11 സി.വി.ധനരാജ് (സിപിഎം)- ഒരു സംഘം പയ്യന്നൂരിലെ വീട്ടില്‍ കയറി വെട്ടിക്കൊലപ്പെടുത്തി.
സി.കെ.രാമചന്ദ്രന്‍ (ബിജെപി)- സി.വി.ധനരാജ് കൊല്ലപ്പെട്ടു മണിക്കൂറുകള്‍ക്കുള്ളില്‍ ഒരു സംഘം വീടാക്രമിച്ചു വെട്ടിക്കൊലപ്പെടുത്തി. 2016 സെപ്റ്റംബര്‍ 3 ന് മാവില വിനീഷ് (ബിജെപി)- തില്ലങ്കേരിയില്‍ ഒരു സംഘം വെട്ടിക്കൊലപ്പെടുത്തി. 2016 ഒക്ടോബര്‍ 10 കെ.മോഹനന്‍ പാതിരിയാട് (സിപിഎം)- ജോലി ചെയ്യുന്ന കള്ളുഷാപ്പില്‍ കയറി വെട്ടിക്കൊലപ്പെടുത്തി. 2016 ഒക്ടോബര്‍ 12 വി.രമിത്ത് പിണറായി (ബിജെപി)- കെ.മോഹനന്‍ കൊല്ലപ്പെട്ട് 48 മണിക്കൂറുകള്‍ക്കുള്ളില്‍ ഒരു സംഘം രമിത്തിനെ വെട്ടിക്കൊലപ്പെടുത്തി .

2017 ജനുവരി 18-ധര്‍മടം അണ്ടല്ലൂര്‍ എഴുത്തന്‍ സന്തോഷ് (ബിജെപി)- ഒരു സംഘം വീട്ടില്‍ക്കയറി വെട്ടിക്കൊലപ്പെടുത്തി. 2017 മേയ് 12 ചൂരക്കാട് ബിജു (ബിജെപി)- ധനരാജ് വധക്കേസിലെ പന്ത്രണ്ടാം പ്രതിയായിരുന്ന ബിജു ബൈക്കില്‍ വരുമ്പോള്‍, കാറില്‍ പിന്തുടര്‍ന്നെത്തിയ സംഘം വെട്ടി വീഴ്ത്തി. 2018 ജനുവരി 19 ശ്യാമപ്രസാദ് (ബിജെപി)- ആര്‍എസ്എസ് പ്രാദേശിക ഭാരവാഹിയും എബിവിപി പ്രവര്‍ത്തകനുമായിരുന്ന ശ്യമപ്രസാദിനെ ബൈക്ക് തടഞ്ഞു വെട്ടിക്കൊലപ്പെടുത്തി. 2018 ഫെബ്രുവരി 12 എസ്പി ഷുഹൈബ് (യൂത്ത് കോണ്‍ഗ്രസ്)- മട്ടന്നൂര്‍ ബ്ലോക്ക് സെക്രട്ടറിയായ ഷുഹൈബിനെ വെട്ടിക്കൊലപ്പെടുത്തി. 2018 മേയ് 7 കണ്ണിപ്പൊയില്‍ ബാബു (സിപിഎം) – മാഹി പള്ളൂരില്‍ ബൈക്ക് തടഞ്ഞു വെട്ടിക്കൊലപ്പെടുത്തി. കെ.പി.ഷമേജ് (ബിജെപി)- ബാബു കൊല്ലപ്പെട്ട് ഒരു മണിക്കൂറിനുള്ളില്‍ പ്രതികാരമെന്നവണ്ണം കൊല്ലപ്പെട്ടു. -ഇവരാണ് നാലു വര്‍ഷത്തിനിടെ കണ്ണൂരില്‍ രാഷ്ട്രീയ അക്രമത്തില്‍ കൊല്ലപ്പെട്ടവര്‍.

ഈ കൊലപാതകങ്ങളെല്ലാം ഒന്നിനു പിറകെ ഒന്നായി നടന്നതാണ്. പല കൊലപാതകങ്ങളും മുന്‍ കൊലപാതകത്തിന്റെ പകരംവീട്ടല്‍ എന്നു സംശയിക്കാവുന്നവയാണ്. 2016 ജൂലൈയില്‍ പയ്യന്നൂരില്‍ സിപിഎം പ്രവര്‍ത്തകനായ സി.വി.ധനരാജ് കൊല്ലപ്പെട്ടു മണിക്കൂറുകള്‍ക്കുള്ളിലാണു പയ്യന്നൂരിലെ ബിജെപി പ്രവര്‍ത്തകനായ രാമചന്ദ്രന്‍ കൊലക്കത്തിക്കിരയായത്. എന്നാല്‍ കഴിഞ്ഞ 28 മാസം കണ്ണൂര്‍ ശാന്തമായിരുന്നു. അതിനിടയിലാണ് ഇന്നലെ വീണ്ടും ഒരാള്‍കൂടി കൊലക്കത്തിക്ക് ഇരയാവുന്നത്.

കൃത്യമായ ആസൂത്രണത്തിന് ശേഷമാണ് സലാഹുദ്ദീന്റെ കൊലപാതകം നടപ്പിലാക്കിയതെന്നാണ് പോലീസിന്റെ നിഗമനം. കൂത്തുപറമ്പില്‍ നിന്ന് സഹോദരിമാര്‍ക്കൊപ്പം വീട്ടിലേക്ക് മടങ്ങിയ സലാഹുദ്ദീനെ ഒരു സംഘം പിന്തുടര്‍ന്നിരുന്നു. മറ്റൊരു സംഘം ചുണ്ടയിലെ റോഡിനോട് ചേര്‍ന്ന് പുഴക്കരയില്‍ കാത്ത് നിന്നിരുന്നു. ഇവിടെ നിന്ന് ഒഴിഞ്ഞ മദ്യക്കുപ്പിയും ഭക്ഷണസാധനങ്ങളുടെ അവശിഷ്ടങ്ങളും പോലീസ് കണ്ടെടുത്തിട്ടുണ്ട്. ആളൊഴിഞ്ഞ പ്രദേശമാണ് കൊലപാതകത്തിനായി സംഘം തെരഞ്ഞെടുത്തത്.

സലാഹുദ്ദീനെ പിന്തുടര്‍ന്ന സംഘത്തിന്റെ നിര്‍ദേശപ്രകാരമാണ് ഇദ്ദേഹത്തിന്റെ കാറില്‍ ബൈക്ക് ഇടിച്ച് അപകടം സൃഷ്ടിച്ചത്. അപകടം നടന്ന ഉടന്‍ കാറില്‍ നിന്നിറങ്ങിയ സലാഹുദ്ദീനെ പ്രദേശത്ത് കാത്തിരുന്ന സംഘം വടിവാള്‍ ഉപയോഗിച്ച് വെട്ടുകയായിരുന്നു. എ.ബി.വി.പി പ്രവര്‍ത്തകന്‍ ശ്യാമപ്രസാദിന്റെ കൊലക്കുളള പ്രതികാരമായിട്ടാണ് സലാഹുദ്ദീനെ വധിച്ചതെന്നാണ് പോലീസിന്റെ നിഗമനം. പ്രദേശത്ത് അക്രമം വ്യാപിക്കാതിരിക്കാന്‍ നടപടികള്‍ സ്വീകരിച്ചതായി ജില്ലാ പോലീസ് മേധാവി പറഞ്ഞു.

തലശേരി താലൂക്ക് ആശുപത്രിയില്‍ സൂക്ഷിച്ചിട്ടുളള സലാഹുദ്ദീന്റെ മൃതദേഹം പോസ്റ്റ്‌മോര്‍ട്ടത്തിന് ശേഷം ഇന്ന് സംസ്‌കരിക്കും. ഇതിനിടെ കൊലപാതകത്തില്‍ പ്രതിഷേധിച്ച് ഉളിയില്‍ പടിക്കച്ചാലില്‍ എസ്.ഡി.പി.ഐ പ്രവര്‍ത്തകര്‍ നടത്തിയ പ്രകടനത്തിന് നേരെ ബോംബേറുണ്ടായി. സംഭവത്തില്‍ ഒരാള്‍ക്ക് പരിക്കേറ്റിട്ടുണ്ട്.