തിരുവനന്തപുരം: ഹാദിയ ഇനി വെറും ഹാദിയ അല്ല. പേരിനൊപ്പം ഡോക്ടര്‍ എന്നുകൂടി തുന്നിച്ചേര്‍ത്തിരിക്കുകയാണ് ഈ മിടുക്കി. ഭര്‍ത്താവ് ഷെഫിന്‍ ജഹാനാണ് ഹാദിയ ഡോക്ടര്‍ ആയ വിവരം ഫെയ്‌സ്ബുക്കിലൂടെ അറിയിച്ചത്.

‘ഈ തിളങ്ങുന്ന വിജയം ഒരു അസുലഭ നേട്ടമാണ്. എണ്ണമറ്റ പ്രാര്‍ത്ഥനകളുടെയും വിഭ്രാന്തികളുടെയും തടങ്കലിന്റെയും സ്‌നേഹത്തിന്റെയും ക്ഷമയുടെയും പ്രതിഫലം കൂടിയാണിത്. സര്‍വ ശക്തന് സ്തുതി, അവസാനം എല്ലാ പ്രതിസന്ധികളില്‍ നിന്നും നീ ലക്ഷ്യസ്ഥാനത്ത് എത്തിച്ചേര്‍ന്നിരിക്കുന്നു. ഡോക്ടര്‍ എന്ന് നിന്നെ വിളിക്കാന്‍ സാധിച്ചതില്‍ ഞാന്‍ അഭിമാനിക്കുന്നു.’ ഡോക്ടര്‍ വേഷത്തിലുള്ള ഹാദിയയുടെ ഫോട്ടോക്കൊപ്പം ഷെഫിന്‍ ജഹാന്‍ ഫെയ്‌സ്ബുക്കില്‍ കുറിച്ചു. ജയിലും പ്രണയവും പ്രാര്‍ത്ഥനയും നിറഞ്ഞ പോരാട്ട ജീവിതത്തിനൊടുവിലാണ് ഹാദിയയുടെ ഈ നേട്ടം.

ദേശീയ തലത്തില്‍ വരെ ശ്രദ്ധിക്കപ്പെട്ട കേസായിരുന്നു ഹാദിയയുടേത്. കോട്ടയം ജില്ലയിലെ വൈക്കം സ്വദേശികളായ അശോകന്റെയും പൊന്നമ്മയുടെയും മകളായ അഖില ഇസ്ലാം മതം സ്വീകരിച്ച് ഹാദിയ എന്ന പേര് സ്വീകരിക്കുകയായിരുന്നു. ഹോമിയോ ഡോക്ടറാവാന്‍ പഠിച്ചു കൊണ്ടിരിക്കെയാണ് ഹാദിയയുടെ മതം മാറ്റവും അനുബന്ധ സംഭവങ്ങളും. ദീര്‍ഘകാലം വീട്ടുതടങ്കലിലായിരുന്ന ഹാദിയയ്ക്ക് നിയമത്തിന്റെ സഹായത്തോടെയായിരുന്നു ഷെഫിന്‍ ജഹാനൊപ്പം ജീവിക്കാന്‍ അനുമതി ലഭിച്ചത്.

വാട്‌സ്ആപ്പ് വഴിയും മെസഞ്ചര്‍ വഴിയും ഷെഫിനുമായി ബന്ധപ്പെട്ടിരുന്നെന്നും എന്നാല്‍ അത് പോപ്പുലര്‍ഫ്രണ്ട് പ്രവര്‍ത്തകന്‍ എന്ന രീതിയിലാണെന്നും പ്രതികള്‍ മൊഴി നല്‍കി. കനകമല കേസിലെ ഒന്നാം പ്രതി കണ്ണൂര്‍ സ്വദേശി മന്‍സീദ്, ഒമ്പതാം പ്രതി തിരൂര്‍ സ്വദേശി സെഫ്വാന്‍ എന്നിവരെയാണ് ചോദ്യം ചെയ്തത്.

ജയില്‍ സൂപ്രണ്ട് എം.കെ വിനോദ്കുമാറിന്റെ സാന്നിധ്യത്തിലായിരുന്നു ചോദ്യം ചെയ്യല്‍. ചോദ്യം ചെയ്യുന്നതിന്റെ വീഡിയോ ദൃശ്യങ്ങള്‍ പൊലീസ് പകര്‍ത്തിയിട്ടുണ്ട്. മന്‍സീദ് അംഗമായ തണല്‍ വാട്‌സ്ആപ്പ് ഗ്രൂപ്പിലെ അംഗമായിരുന്നു ഷെഫിന്‍ ജഹാനെന്നാണ് എന്‍.എ.ഐ കോടതിയില്‍ പറഞ്ഞിരുന്നത്. ഈ സാഹചര്യത്തില്‍ വ്യക്തത വരുത്തുന്നതിനാണ് ചോദ്യം ചെയ്യല്‍.

വിയ്യൂര്‍: ഹാദിയയുടെ ഭര്‍ത്താവ് ഷെഫിന്‍ ജഹാനുമായി ബന്ധമുണ്ടെന്ന് ആരോപിക്കുന്ന ഐ.എസ് കേസ് അന്വേഷിക്കാന്‍ എന്‍.ഐ.എ സംഘം വിയ്യൂര്‍ ജയിലില്‍ എത്തി. കനകമല ഐ.എസ് തീവ്രവാദ കേസിലെ കണ്ണൂര്‍ തലശ്ശേരി സ്വദേശികളായ ഒന്നാം പ്രതി മന്‍സീദ്, ഒമ്പതാം പ്രതി റയ്യാന്‍ എന്ന സഫ്‌വാന്‍ എന്നിവരെയാണ് വിയ്യൂര്‍ ജയിലിലെത്തി എന്‍.ഐ.എ സംഘം ചോദ്യം ചെയ്യുക. എറണാകുളം എന്‍.ഐ.എ പ്രത്യേക കോടതിയുടെ അനുമതി പ്രകാരമാണ് വിയ്യൂര്‍ ജയിലിലെത്തി എന്‍.ഐ.എ സംഘം ചോദ്യം ചെയ്യുന്നത്.

മന്‍സീദും ഷെഫിന്‍ ജഹാനും ഒരേ വാട്‌സ് ആപ് ഗ്രൂപ്പില്‍ അംഗങ്ങളായതാണ് എന്‍.ഐ.എ സംശയത്തിന് കാരണമായി പറയുന്നത്. കൂടാതെ, സഫ്‌വാനുമായി ഷെഫിന്‍ ജഹാന് അടുപ്പമുള്ളതായും എന്‍.ഐ.എ ആരോപിക്കുന്നുണ്ട്. കനകമല കേസന്വേഷണം നടക്കുന്നതിനിടെയാണെത്ര എന്‍.ഐ.എക്ക് ഇതുസംബന്ധിച്ച് വിവരം ലഭിച്ചത്.

അതേസമയം ജയില്‍ സൂപ്രണ്ടിന്റെ സാന്നിധ്യത്തില്‍ രാവിലെ 10 മുതല്‍ വൈകീട്ട് അഞ്ച് വരെയാണ് ചോദ്യം ചെയ്യാന്‍ കോടതി അനുമതി നല്‍കിയത്. എന്‍.ഐ.എക്കൊപ്പം ഐ.ടി വിദഗ്ധരും ജയിലിലെത്തുമെന്നാണ് വിവരം. ചോദ്യം ചെയ്യലിനിടെ മാനസിക, ശാരീരിക പീഡനങ്ങള്‍ പാടില്ലെന്ന് കോടതി എന്‍.ഐ.എയോട് നിര്‍ദേശിച്ചിട്ടുണ്ട്.

കേസുമായി ബന്ധപ്പെട്ട് ഷെഫിന്‍ ജഹാന്‍ അടക്കം 30 പേരില്‍ നിന്ന് എന്‍.ഐ.എ മൊഴിയെടുത്തിട്ടുണ്ട്. ഹാദിയ കേസ് വീണ്ടും സുപ്രീംകോടതി പരിഗണിക്കുമ്പോള്‍ കേസിന്റെ വിശദാംശങ്ങള്‍ എന്‍.ഐ.എ ഹാജരാക്കും.