അബുദാബി: യു.എഇ രാഷ്ട്രപിതാവ് ശൈഖ് സായിദ് ബിന്‍ സുല്‍ത്താന്‍ ആല്‍ നഹ്‌യാനോടുള്ള ആദര സൂചകമായി പണിത ശൈഖ് സായിദ് സ്മാരകം ഈ മാസം തുറക്കും. ആറു വര്‍ഷമെടുത്തു നിര്‍മിച്ച സ്മാരകം ഈ മാസം 22ന് പൊതു ജനങ്ങള്‍ക്ക് തുറന്നു കൊടുക്കുമെന്ന് ഗവണ്‍മെന്റിനെ ഉദ്ധരിച്ച് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.
ശൈഖ് സായിദിന്റെ ഓര്‍മകളും സന്ദേശങ്ങളും ദൃശ്യങ്ങളുമെല്ലാം കോര്‍ത്തിണക്കിക്കൊണ്ട് അബുദാബി കോര്‍ണിഷില്‍ നിര്‍മിച്ച സ്മാരകം സായിദ് വര്‍ഷാചരണത്തിന്റെ ഭാഗമായാണ് പൊതുജനങ്ങള്‍ക്ക് തുറന്നുകൊടുക്കുന്നത്. അബുദാബി കിരീടാവകാശിയും യു.എ.ഇ സായുധസേന ഉപ സര്‍വസൈന്യാധിപനുമായ ശൈഖ് മുഹമ്മദ് ബിന്‍ സായിദ് ആല്‍ നഹ്‌യാന്‍ പുതിയ സ്മാരകത്തിന് ‘സ്ഥാപകന്റെ സ്മാരകം’ എന്നാണ് പേര് നല്‍കിയിട്ടുള്ളത്. അബുദാബി കോര്‍ണിഷില്‍ ഒന്നും രണ്ടും സ്ട്രീറ്റിലെ പ്രധാന കവലകളില്‍ ഒന്നിനോട് ചേര്‍ന്നാണ് 3.3 ഹെക്ടറില്‍ സ്മാരകം നിര്‍മിച്ചിരിക്കുന്നത്. ശൈഖ് സായിദിന്റെ ആശയങ്ങള്‍ പ്രതിഫലിപ്പിക്കും വിധമാണ് സ്മാരകത്തിന്റെ നിര്‍മിതി. പച്ചപ്പിനോടുള്ള ശൈഖ് സായിദിന്റെ പ്രിയം ലോകത്തിന് പകര്‍ന്ന് നല്‍കും വിധം മനോരഹരമായ ചെടികളും മരങ്ങളും മനോഹരമായ നടവഴിയുമെല്ലാം ചേര്‍ന്നതാണ് സ്മാരകം.

ദുബൈ: സായിദ് വര്‍ഷാചരണത്തിന്റെ ഭാഗമായി രാഷ്ട്രപിതാവ് ശൈഖ് സായിദ് ബിന്‍ സുല്‍ത്താന്‍ ആല്‍ നഹ്യാന്റെ ചിത്രം പതിച്ച പത്ത് വിമാനങ്ങള്‍ എമിറേറ്റ്‌സിനു വേണ്ടി സര്‍വീസ് നടത്തുന്നു. 40 ലക്ഷം കിലോമീറ്റര്‍ ഇതിനകം പിന്നിട്ട ഈ വിമാനങ്ങള്‍ ആറു ഭൂഖണ്ഡങ്ങളിലെ 90 ലക്ഷ്യ സ്ഥാനങ്ങളില്‍ യുഎഇ രാഷ്ട്രപിതാവിന്റെ ചിത്രം വഹിച്ചെത്തി. അഞ്ച് എയര്‍ബസ് വിമാനങ്ങളും അഞ്ച് ബോയിങ് വിമാനങ്ങളുമാണ് റോം, സിഡ്‌നി, ഹോങ്കോങ്, ലോസ് ആഞ്ചലസ് തുടങ്ങി ലോകത്തെ പ്രമുഖ നഗരങ്ങളിലേക്ക് ശൈഖ് സായിദിന്റെ തലയെടുപ്പുമായി യാത്ര ചെയ്യുന്നത്.
സായിദ് വര്‍ഷത്തില്‍ രാഷ്ട്രപിതാവിന് ആദരവര്‍പ്പിച്ച് കഴിഞ്ഞ നവംബറിലാണ് ശൈഖ് സായിദിന്റെ ചിത്രവുമായി ആദ്യ എമിറേറ്റ്‌സ് വിമാനം യാത്രപുറപ്പെട്ടത്. കൂടുതല്‍ വിമാനങ്ങള്‍ വന്നതോടെ ഇതുവരെ 1500 സര്‍വീസുകളാണ് നടത്തിയതെന്നും ഈ വര്‍ഷം മുഴുവന്‍ വിമാനങ്ങള്‍ സര്‍വീസുകള്‍ നടത്തുമെന്നും എമിറേറ്റ്‌സ് അറിയിച്ചു.

വ്യോമ ഗതാഗത പുരസ്‌കാരങ്ങള്‍: എമിറേറ്റ്‌സിന് എയര്‍ലൈന്‍ ഓഫ് ദി ഇയര്‍ അവാര്‍ഡ്

ദുബൈ: എമിറേറ്റ്‌സ് എയര്‍ലൈനിന് 2018ലെ ഏറ്റവും മികച്ച വിമാനക്കമ്പനിക്കുള്ള പുരസ്‌കാരം. 2018ലെ എയര്‍ ട്രാന്‍സ്‌പോര്‍ട്ട് അവാര്‍ഡുകളിലാണ് എമിറേറ്റ്‌സ് ‘എയര്‍ ലൈന്‍ ഓഫ് ദി ഇയര്‍’ അവാര്‍ഡിന് തെരഞ്ഞെടുക്കപ്പെട്ടത്. കമ്പനിക്കു വേണ്ടി എമിറേറ്റ്‌സിന്റെ എക്‌സി. വൈസ് പ്രസിഡന്റും ചീഫ് കമേഴ്‌സ്യല്‍ ഓഫീസറുമായ തിയറി ആന്റിനോറി പുരസ്‌കാരം ഏറ്റുവാങ്ങി.
ലോകത്തെ ഏറ്റവും വലിയ യാത്രാ വിമാനമാണ് എമിറേറ്റ്‌സ്. 85 രാജ്യങ്ങളിലായി 159 നഗരങ്ങളിലേക്കാണ് എമിറേറ്റ്‌സ് സര്‍വീസ് നടത്തുന്നത്.