ഷിബു ബേബി ജോണിന്റെ ഫേസ്ബുക്ക് പോസ്റ്റ്
ഈ ചിത്രങ്ങള്‍ നേരത്തെ എന്റെ കയ്യില്‍ ഉണ്ടായിരുന്നതാണ്. എന്നാല്‍ ഉണ്ണികൃഷ്ണന്‍ പോറ്റി സോണിയ ഗാന്ധിയുമായി നില്‍ക്കുന്ന ചിത്രത്തില്‍ മുഖ്യമന്ത്രിക്ക് ദുരൂഹത തോന്നുമ്പോള്‍ ഈ ചിത്രത്തിലും ദുരൂഹത തോന്നേണ്ടതല്ലേ?

പോറ്റി സോണിയ ഗാന്ധിയെ കണ്ടപ്പോഴല്ല ശബരിമലയില്‍ മോഷണം നടന്നത്. സോണിയ ഗാന്ധി വിചാരിച്ചാല്‍ ഒരാളെയും ശബരിമലയില്‍ കയറ്റാനും കഴിയില്ല. മറിച്ച് ഈ ചിത്രത്തില്‍ പോറ്റിക്കൊപ്പം നില്‍ക്കുന്ന മഹാന്‍ ദേവസ്വം മന്ത്രി ആയിരുന്നപ്പോഴാണ് ശബരിമലയിലെ സ്വര്‍ണ്ണം പമ്പ കടന്നുപോയത്.

ഇവര്‍ ഇരിക്കുന്നത് ബാംഗ്ലൂര്‍ എയര്‍പോര്‍ട്ടില്‍ ആണെന്ന് തോന്നുന്നു. കടകംപള്ളിയും പോറ്റിയും തമ്മില്‍ എന്താണ് ഇടപാട്? കൂടെ ഇരിക്കുന്ന ഉന്നത പോലീസ് ഉദ്യോഗസ്ഥന് ഇവരുമായി എന്താണ് ബന്ധം? മുഖ്യമന്ത്രിക്ക് എന്തുകൊണ്ടാണ് ഇതില്‍ യാതൊരു ദുരൂഹതയും തോന്നാത്തത്?

ജനപ്രതിനിധികള്‍ ദൈവപുത്രന്മാരല്ല. സമൂഹത്തില്‍ നിന്നും വളര്‍ന്നുവരുന്ന മനുഷ്യര്‍ക്ക് സമൂഹത്തിന്റേതായ നന്മതിന്മകളും ഉണ്ടാകും. രാഹുല്‍ മാങ്കൂട്ടത്തിലിനെതിരായ ആരോപണത്തില്‍ മാതൃകാപരമായ നിലപാടാണ് കോണ്‍ഗ്രസ് പാര്‍ട്ടി കൈക്കൊണ്ടിട്ടുള്ളത്. അദ്ദേഹത്തെ ഉത്തരവാദിത്തപ്പെട്ട സ്ഥാനത്തുനിന്ന് നീക്കം ചെയ്യുകയും പാര്‍ട്ടിയുടെ പ്രാഥമിക അംഗത്വത്തില്‍ നിന്നുപോലും സസ്‌പെന്‍ഡ് ചെയ്യുകയും ചെയ്ത നടപടി സമീപകാല ചരിത്രത്തില്‍ മറ്റൊരു രാഷ്ട്രീയ പാര്‍ട്ടിക്കും അവകാശപ്പെടാന്‍ കഴിയുന്നതല്ല. എന്നിട്ടും തൃപ്തരാകാതെ രാഹുലിന്റെയും ഷാഫിയുടെയും രക്തത്തിനു വേണ്ടി ദാഹിക്കുകയാണ് സി.പി.എമ്മും ബി.ജെ.പിയും.

ഷാഫി പറമ്പിലിനെ എന്തിനാണ് വഴിയില്‍ തടയുന്നത് എന്ന് വിശദീകരിക്കാന്‍ ഡി.വൈ.എഫ്.ഐ സംസ്ഥാന സെക്രട്ടറിക്ക് പോലും സാധിച്ചിട്ടില്ല. ന്യൂനപക്ഷ സമുദായത്തില്‍ നിന്ന് മതേതര കേരളത്തിന്റെ മനസ്സ് കവരുന്ന നിലയില്‍ ഒരു ചെറുപ്പക്കാരന്‍ വളര്‍ന്നു വരുന്നതില്‍ ബി.ജെ.പിയ്‌ക്കൊപ്പം സി.പി.എമ്മും അസ്വസ്ഥരാണ്. വിവാഹേതര ബന്ധങ്ങള്‍ക്കും പീഡനങ്ങള്‍ക്കും ഒരു യൂണിവേഴ്‌സിറ്റി തന്നെ തുടങ്ങാവുന്ന സര്‍ക്കാരാണ്് ഇന്ന് കേരളം ഭരിക്കുന്നത്. അതിന്റെ ചാന്‍സിലര്‍ ആവാന്‍ യോഗ്യതയുള്ള വ്യക്തി മന്ത്രിസഭയില്‍ തന്നെയുണ്ട്. അങ്ങനെയുള്ളവരാണ് ഒരു പരാതിക്കാരി പോലുമില്ലാതെ രാഹുല്‍ മാങ്കൂട്ടത്തിലിനെതിരെ കേസെടുക്കാന്‍ നിര്‍ദ്ദേശം നല്‍കിയതെന്നും അദ്ദേഹം പരിഹസിച്ചു.