shivaraj sigh chauhan – Chandrika Daily

ആരെങ്കിലും മതപരിവര്‍ത്തനം ആസൂത്രണം ചെയ്താല്‍ അവര്‍ നശിപ്പിക്കപ്പെടുമെന്ന് ശിവരാജ് സിങ് ചൗഹാന്‍

ചന്ദ്രിക വെബ് ഡെസ്‌ക്‌ — Thu, 03 Dec 2020 17:51:07 +0000

ഭോപ്പാല്‍: ലൗ ജിഹാദിന്റെ പേരില്‍ ഭീഷണിയുമായി മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍. ആരെങ്കിലും മതപരിവര്‍ത്തനം ആസൂത്രണം ചെയ്യുകയോ അതുപോലെ പ്രവര്‍ത്തിക്കുകയോ ചെയ്താല്‍ അവര്‍ നശിപ്പിക്കപ്പെടുമെന്ന് ശിവരാജ് സിങ് ചൗഹാന്‍ പറഞ്ഞു.

‘സര്‍ക്കാര്‍ എല്ലാവര്‍ക്കുമുള്ളതാണ്, എല്ലാ മതങ്ങള്‍ക്കും ജാതികള്‍ക്കും. ഒരു വിവേചനവുമില്ല. പക്ഷേ ആരെങ്കിലും ഞങ്ങളുടെ പെണ്‍മക്കളോട് വെറുപ്പുളവാക്കുന്ന എന്തെങ്കിലും ചെയ്യാന്‍ ശ്രമിച്ചാല്‍ ഞാന്‍ നിങ്ങളെ തകര്‍ക്കും’, ചൗഹാന്‍ പറഞ്ഞു. മതപരിവര്‍ത്തനം ലക്ഷ്യമിട്ടുള്ള വിവാഹങ്ങള്‍ നിരോധിക്കാന്‍ ഓര്‍ഡിനന്‍സ് പാസാക്കാന്‍ സംസ്ഥാനം ഒരുങ്ങുന്നതിനിടെയാണ് ചൗഹാന്റെ പരാമര്‍ശം.

ഉത്തര്‍പ്രദേശ് സര്‍ക്കാരിന്റെ ചുവടുപിടിച്ച് മധ്യപ്രദേശും വിവാഹത്തിനുവേണ്ടിയുള്ള മതംമാറ്റത്തിനെതിരായ നിയമം കൊണ്ടുവരുമെന്ന് ആഭ്യന്തരമന്ത്രി നരോത്തം മിശ്ര പറഞ്ഞിരുന്നു. അടുത്ത നിയമസഭാ സമ്മേളനത്തില്‍ നിയമം കൊണ്ടുവരാന്‍ സാധ്യതയുണ്ട്. ഓര്‍ഡിനന്‍സ് അനുസരിച്ച്, ബലപ്രയോഗം, വഞ്ചന, പ്രലോഭനം അല്ലെങ്കില്‍ പ്രേരണ എന്നിവയിലൂടെ വിവാഹത്തിന് പ്രേരിപ്പിക്കുന്നവര്‍ക്ക് പരമാവധി 10 വര്‍ഷം വരെ തടവുശിക്ഷ ലഭിക്കുമെന്ന് മിശ്ര വ്യക്തമാക്കിയിരുന്നു.

മധ്യപ്രദേശിലും തിരിച്ചടി; ക്യാബിനറ്റ് മന്ത്രി ബി.ജെ.പിയില്‍ നിന്ന് രാജിവച്ച് കോണ്‍ഗ്രസില്‍ ചേര്‍ന്നു

chandrika — Mon, 24 Sep 2018 10:00:33 +0000

ഭോപ്പാല്‍: മധ്യപ്രദേശിലെ ക്യാബിനറ്റ് മന്ത്രി പത്മ ശുക്ല ബിജെപിയില്‍ നിന്ന് രാജിവച്ച് കോണ്‍ഗ്രസില്‍ ചേര്‍ന്നു. ശിവരാജ് സിങ് ചൗഹാന്‍ മന്ത്രി സഭയില്‍ സാമൂഹ്യ ക്ഷേമ ബോര്‍ഡ് അധ്യക്ഷയായ പത്മ ശുക്ല ക്യാബിനറ്റ് പദവിയുള്ള നേതാവാണ്.
കോണ്‍ഗ്രസില്‍ ചേരുന്നതിന് മുന്നോടിയായി പത്മ മധ്യപ്രദേശിലെ കോണ്‍ഗ്രസ് പ്രസിഡന്റ് കമല്‍ നാഥുമായി കൂടിക്കാഴ്ച്ച നടത്തിരുന്നു. തുടര്‍ന്ന് ഇന്ന് രാവിലെയാണ് പത്മ ബി.ജെ.പിയിലെ പ്രാഥമിക അംഗത്വത്തില്‍ നിന്നും മറ്റു രണ്ട് അധികാര പദവികളില്‍ നിന്നും രാജിവെച്ചത്.

തെരഞ്ഞെടുപ്പ് നടക്കാനിരിക്കെ ബി.ജെ.പി വിട്ട പത്മ കോണ്‍ഗ്രസില്‍ ചേര്‍ന്നത് ബിജെപിക്ക് കനത്ത തിരിച്ചടിയായിരിക്കുകയാണ്. കമല്‍നാഥിന്റെ സാന്നിധ്യത്തില്‍ നടന്ന ചടങ്ങില്‍ പദ്മ ശുക്ല കോണ്‍ഗ്രസില്‍ ചേര്‍ന്നു.

Madhya Pradesh Social Welfare Board Chief Padma Shukla resigns from primary membership of BJP. She also held a state cabinet rank.Further details awaited (file pic) pic.twitter.com/1WllY7JXrQ

— ANI (@ANI) September 24, 2018

എന്നാല്‍ പത്മ ബിജെപി വിടാനുള്ള കാരണമെന്താണെന്ന് വ്യക്തമല്ല. മധ്യപ്രദേശിൽ ശിവരാജ് സിങ് ചൗഹാനെതിരെയും ബിജെപിക്കെതിരെയും ശക്തമായ പ്രതിഷേധങ്ങൾ നിലനിൽക്കുന്നുവെന്നും രണ്ട് മാസത്തിന് ശേഷം നടക്കുന്ന നിയമ സഭ തെരഞ്ഞെടുപ്പിൽ കോൺഗ്രസ് തിരിച്ചുവരുമെന്നുള്ള സർവ്വേ റിപ്പോർട്ടുകൾ പുറത്ത് വന്നിരുന്നു.

ബി.ജെ.പി മുഖ്യമന്ത്രി സുരക്ഷാ ജീവനക്കാരനെ നടുറോഡില്‍ തല്ലുന്ന ദൃശ്യം പുറത്ത്: കേസെടുക്കണമെന്ന ആവശ്യവുമായി പ്രതിപക്ഷം

chandrika — Fri, 19 Jan 2018 06:11:17 +0000

ഭോപ്പാല്‍: മധ്യപ്രദേശ് മുഖ്യമന്ത്രിയും ബി.ജെ.പി നേതാവുമായ ശിവരാജ്‌സിങ് ചൗഹാന്‍ സുരക്ഷാജീവനക്കാരനെ നടുറോഡില്‍ മര്‍ദിക്കുന്ന ദൃശ്യം പുറത്ത്. തെരഞ്ഞെടുപ്പിനോടനുബന്ധിച്ച് ദാര്‍ ജില്ലയിലെ സര്‍ദാര്‍പുരില്‍ പഞ്ചായത്തില്‍ നടന്ന റോഡ്‌ഷോക്കിടെയാണ് ശിവരാജ് സിങ് സുരക്ഷാഉദ്യോഗസ്ഥനെ മര്‍ദിച്ചത്. കഴിഞ്ഞ 16ന് നടന്ന സംഭവം സോഷ്യല്‍ മീഡിയയിലൂടെ വൈറലായതോടെയാണ് വാര്‍ത്തയാവുന്നത്. സുരക്ഷാജീവനക്കാരനെ തല്ലിയ മുഖ്യമന്ത്രിക്കെതിരെ കേസെടുക്കണമെന്ന ആവശ്യവുമായി കോണ്‍ഗ്രസും മറ്റു പ്രതിപക്ഷ പാര്‍ട്ടികളും രംഗത്തെത്തി. അതേസമയം മുഖ്യമന്ത്രിയുടെ പെരുമാറ്റത്തിനെതിരെ സോഷ്യല്‍ മീഡിയയിലും വന്‍ പ്രതിഷേധമാണ് വന്നു കൊണ്ടിരിക്കുന്നത്.

തെരഞ്ഞെടുപ്പ് റാലിക്കിടെ പൊതൂജനം നോക്കിനില്‍ക്കെയാണ് ചൗഹാന്‍ ഉദ്യോഗസ്ഥനെ മര്‍ദിച്ചത്. ഐ.പി.സി 353 പ്രകാരം ജോലി നിര്‍വ്വഹണത്തിനിടെ ഉദ്യോഗസ്ഥനെ മര്‍ദ്ദിക്കുന്നതും ജോലി തടസ്സപ്പെടുത്തുന്നതും കുറ്റകരമാണ് ആയതിനാല്‍ മുഖ്യമന്ത്രിക്കെതിരെ കേസെടുക്കണം പ്രതിപക്ഷ നേതാവ് അജയ് സിങ് പറഞ്ഞു.

മുഖ്യമന്ത്രിയുടെ പരുക്കേറ്റ കാലിന് രണ്ടു തവണ സുരക്ഷ ജീവനക്കാരന്‍ ചവിട്ടിയതുക്കൊണ്ടാണ് മുഖ്യമന്ത്രി പ്രതികരിച്ചത്. ഏതൊരു മനുഷ്യനും വേദനയാകുമ്പോള്‍ പെട്ടെന്ന് പ്രതികരിക്കുന്നതുപോലെ മാത്രമാണ് അദ്ദേഹം പ്രതികരിച്ചത്. അതില്‍ യാതൊരു ദുരുദ്ദേശവുമില്ല. മാധ്യമങ്ങള്‍ വസ്തുതകള്‍ വളച്ചൊടിക്കരുത്. മുതിര്‍ന്ന ബി.ജെ.പി നേതാവ് ഡോ. ഹിതേഷ് ബാജ്‌പേയ് സംഭവത്തില്‍ പ്രതികരിച്ചു. അതേസമയം മുഖ്യമന്ത്രിയുടെ ഓഫീസോ മുഖ്യമന്ത്രിയോ സംഭവത്തോട് പ്രതികരിച്ചിട്ടില്ല. ഇതിനും മുമ്പും മുഖ്യമന്ത്രി ചൗഹാന്‍ ഇത്തരത്തില്‍ പ്രവര്‍ത്തിച്ചിട്ടുണ്ട്.