shot student – Chandrika Daily

പരീക്ഷയെഴുതാന്‍ എത്തിയ വിദ്യാര്‍ത്ഥിനിയെ വിദ്യാര്‍ത്ഥി വെടിവെച്ചു കൊന്നു

chandrika — Sat, 26 Sep 2020 14:15:34 +0000

ജയ്പൂര്‍: പരീക്ഷയെഴുതാന്‍ എത്തിയ വിദ്യാര്‍ത്ഥിനിയെ യുവാവ് ആക്രമിച്ചു കൊലപ്പെടുത്തി. രാജസ്ഥാനിലെ ജയ്പൂര്‍ രാജാപാര്‍ക്കിലാണ് കൊലപാതകം നടന്നത്. അവസാന വര്‍ഷ ഡിഗ്രി പരീക്ഷ എഴുതാന്‍ എത്തിയ പെണ്‍കുട്ടിയെ വിഷ്ണു ചൗധരി എന്ന യുവാവ് കൊളേജിന് സമീപത്തുവെച്ചാണ് ആക്രമിച്ചത്. വഴിയില്‍ കാത്തുനിന്ന യുവാവ് പെണ്‍കുട്ടിയെ കത്തിയുമായി ആക്രമിക്കുയായിരുന്നു. പിന്നാലെ വെടിയുതിര്‍ക്കുകയും ചെയ്തു.

വെടിയേറ്റ് നിലത്തുവീണ പെണ്‍കുട്ടിയെ നാട്ടുകാരും പൊലീസും ചേര്‍ന്ന ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. കൊലപാതകവുമായി ബന്ധപ്പെട്ട് ധോല്‍പൂര്‍ സ്വദേശിയും ജയ്പൂരില്‍ മത്സരപരീക്ഷയ്ക്ക് തയ്യാറെടുക്കുന്നതുമായ വിഷ്ണു ചൗധരി പിടിയിലായതായി ഡിസിപി രാഹുല്‍ ജയിന്‍ പറഞ്ഞു.
രാവിലെ ഏഴു മുതല്‍ പത്തുവരെയായിരുന്നു പരീക്ഷാ സമയം. 10.30ഓടെയാണ് സംഭവം നടന്നത്. അതേസമയം കൊലപാതകത്തിന് പിന്നിലെ കാരണം വ്യക്തമായിട്ടില്ല. സംഭവത്തില്‍ പൊലീസ് അന്വേഷണം ആരംഭിച്ചു.

ഹരിയാനയില്‍ പ്രിന്‍സിപലിനെ പന്ത്രണ്ടാം ക്ലാസ്സുകാരന്‍ വെടിവെച്ച് കൊന്നു

chandrika — Sat, 20 Jan 2018 10:39:09 +0000

ചണ്ഡിഗഡ്: പന്ത്രണ്ടാം ക്ലാസ്സുകാരന്‍ സ്‌കൂള്‍ പ്രിന്‍സിപലിനെ വെടിവെച്ചു കൊന്നു. ഹരിയാനയിലെ യമുന നഗറിലെ വിവേകാനന്ദ പബ്ലിക് സ്‌കൂളിലെ പ്രിന്‍സിപല്‍ റിത്തു ചബ്രയാണ് വിദ്യാര്‍ഥിയുടെ വെടിയേറ്റ് മരിച്ചത്. ശനിയാഴ്ച ഉച്ചക്ക് 12മണിയോടെയാണ് സംഭവം.

പ്രിന്‍സിപലിന്റെ മുറിയിലേക്ക് കയറിയ വിദ്യാര്‍ഥി പ്രധാനധ്യാപികക്കെതിരെ മൂന്ന് റൗണ്ട് വെടിയുതിര്‍ക്കുകയായിരുന്നു. മൂന്ന് വെടിയുണ്ടകളേറ്റ പ്രിന്‍സിപല്‍ സംഭവസ്ഥലത്തുവെച്ച് തന്നെ മരിച്ചു. വിദ്യാര്‍ഥിയുടെ അച്ഛന്റെ ലൈസന്‍സുള്ള തോക്കുപയോഗിച്ചാണ് കൊല നടത്തിയത്.

സംഭവത്തില്‍ പൊലീസ് അന്വേഷണം ആരംഭിച്ചു. വിദ്യാര്‍ത്ഥിക്കെതിരെ അച്ചടക്ക നടപടിയെടുത്തതിന് പ്രതികാരമെന്നോണമാണ് പ്രിന്‍സിപലിനെ കൊലപ്പെടുത്തിയതെന്നാണ് വിവരം. കഴിഞ്ഞ ദിവസം വിദ്യാര്‍ത്ഥിയും പ്രിന്‍സിപലും തമ്മില്‍ വാക്ക്തര്‍ക്കമുണ്ടായതായും വിവരമുണ്ട്.
കൊല നടത്തിയ വിദ്യാര്‍ഥിയെ സ്‌കൂളിലെ ജീവനക്കാര്‍ ചേര്‍ന്നാണ് പിടികൂടിയത്. തുടര്‍ന്ന് പൊലീസില്‍ വിവരം അറിയിക്കുകയായിരുന്നു.

അമേരിക്കയില്‍ ഇന്ത്യന്‍ വിദ്യാര്‍ത്ഥിക്ക് വെടിയേറ്റു

chandrika — Sun, 10 Dec 2017 15:08:57 +0000

ഹൈദരാബാദ്: അമേരിക്കയിലെ ചിക്കാഗോയില്‍ ഇന്ത്യന്‍ വിദ്യാര്‍ത്ഥിക്ക് അജ്ഞാതന്റെ വെടിയേറ്റു. ഹൈദരബാദ് സ്വദേശിയായ മുഹമ്മദ് അക്ബറിനാണ്(30) വെടിയേറ്റത്. ഗുരുതരമായി പരിക്കേറ്റ അക്ബര്‍ ആസ്പത്രിയില്‍ ചികിത്സയിലാണ്. പ്രാദേശിക സമയം ശനിയാഴ്ച രാവിലെ 8.45ഓടെ ചിക്കാഗോ അല്‍ബനി പാര്‍ക്കിന് സമീപമാണ് സംഭവം.

സ്വന്തം കാറിനു സമീപത്തേക്ക് നടക്കുമ്പോഴാണ് അക്ബറിന് വെടിയേറ്റത്. ദെവ്രി സര്‍വകലാശാലയില്‍ കമ്പ്യൂട്ടര്‍ സിസ്റ്റം നെറ്റ്‌വര്‍ക്കിങ് ആന്റ് ടെലികമ്യൂണിക്കേഷനില്‍ ബിരുദാനന്തര ബിരുദ വിദ്യാര്‍ത്ഥിയാണ് അക്ബര്‍.

Hyderabad youth studying in Chicago (U.S.) shot at by assailants, presently under observation. Family members say ‘request Government of India to help us’ pic.twitter.com/L6JzZKLGw6

— ANI (@ANI) December 10, 2017

വിഷയത്തില്‍ കേന്ദ്ര സര്‍ക്കാര്‍ ഉടന്‍ ഇടപെടണമെന്ന് ബന്ധുക്കള്‍ ആവശ്യപ്പെട്ടു. യു.എസിലേക്ക് പോകാന്‍ അടിയന്തര വിസ അനുവദിക്കണമെന്ന് വിദേശകാര്യമന്ത്രി സുഷമാ സ്വരാജിനോട് കുടുംബം അഭ്യര്‍ത്ഥിച്ചു. കഴിഞ്ഞ ഫെബ്രുവരിയില്‍ തെലങ്കാനയില്‍ നിന്നുള്ള വംസി റെഡ്ഡി കാലിഫോര്‍ണിയയില്‍ വെച്ചും ഹൈദരാബാദ് സ്വദേശി ശ്രീനിവാസ് കുചിബോദ്‌ല കന്‍സാസില്‍ വെച്ചും വെടിയേറ്റ് മരിച്ചിരുന്നു.

യുഎസില്‍ ഇന്ത്യന്‍ വിദ്യാര്‍ത്ഥി വെടിയേറ്റു മരിച്ചു

chandrika — Thu, 16 Nov 2017 13:54:18 +0000

വാഷിങ്ടണ്‍: യുഎസിലെ കാലിഫോര്‍ണിയയില്‍ ഇന്ത്യന്‍ വിദ്യാര്‍ത്ഥി വെടിയേറ്റു മരിച്ചു. പഞ്ചാബ് സ്വദേശിയായ ധരംപ്രീത് സിങാണ്(21) കൊല്ലപ്പെട്ടത്. ഇന്ത്യന്‍ വംശജനുള്‍പ്പെടുന്ന നാലംഗസംഘമാണ് വെടിവെപ്പു നടത്തിയത്.
ഫ്രെസ്‌നോയിലെ ഗ്യാസ് സ്‌റ്റേഷനു സമീപമുള്ള കടയില്‍ പഠനത്തിനുശേഷം ധരംപ്രീത് ജോലി നോക്കിയിരുന്നു. കടയില്‍ മോഷ്ടിക്കാനെത്തിയ സംഘമാണ് ധരംപ്രീതിനെ കൊലപ്പെടുത്തിയത്. മോഷ്ടാക്കളില്‍ നിന്നും രക്ഷപ്പെടാനായി വിദ്യാര്‍ത്ഥി ക്യാഷ് കൗണ്ടറിനു പിന്നില്‍ ഒളിച്ചെങ്കിലും വെടിയേല്‍ക്കുകയായിരുന്നു.
കടയില്‍ സാധനങ്ങള്‍ വാങ്ങാനെത്തിയവരാണ് മൃതദേഹം കണ്ടത്. മൂന്നു വര്‍ഷം മുന്‍പാണ് ധരംപ്രീത് സ്റ്റുഡന്റ്‌സ് വിസയില്‍ യുഎസിലെത്തിയത്. സംഭവത്തില്‍ കുറ്റാരോപിതനായ ഇന്ത്യന്‍ സ്വദേശി അത്വാളിനെ(22) പൊലീസ് അറസ്‌റ്് ചെയ്തു. സിസിടിവി ദൃശ്യങ്ങളുടെ അടിസ്ഥാനത്തിലാണ് അറസ്റ്റ്.