ശക്തമായ മൊഴിയെടുപ്പ് തന്നെ വിഷയത്തില്‍ മനുഷ്യാവകാശ കമ്മിഷന്‍ നടത്തുമെന്നാണ് റിപ്പോര്‍ട്ട്. ആന്റി റാഗിംഗ് സെല്ലിന് ലഭിച്ച പരാതികളും പരിശോധിക്കും. സിദ്ധാര്‍ത്ഥന്റെ മരണത്തില്‍ അന്വേഷണം സിബിഐ ഏറ്റെടുത്തിരുന്നു. നാല് സിബിഐ ഉദ്യോഗസ്ഥര്‍ ഡല്‍ഹിയില്‍ നിന്ന് കേരളത്തിലെത്തി.

സിബിഐ എസ്പിയുടെ നേതൃത്വത്തിലുള്ളതാണ് അന്വേഷണ സംഘം. അന്വേഷണ ഉദ്യോഗസ്ഥനായിരുന്ന കല്‍പ്പറ്റ ഡിവൈഎസ്പി ടിഎന്‍ സജീവില്‍ നിന്ന് സിബിഐ സംഘം വിശദാംശങ്ങള്‍ ശേഖരിച്ചു. കണ്ണൂരില്‍ വച്ചാണ് കൂടിക്കാഴ്ച നടന്നത്. നാളെ സംഘം വയനാട്ടിലെത്തി അന്വേഷണം തുടങ്ങും.

സിദ്ധാര്‍ത്ഥന്റെ മരണം അന്വേഷിക്കുന്നതില്‍ നടപടിക്രമങ്ങള്‍ വൈകിയതില്‍ ആഭ്യന്തര സെക്രട്ടറി ഡിജിപിയോട് വിശദീകരണം തേടി. വീഴ്ച വരുത്തിയ ഉദ്യോഗസ്ഥരുടെ പേരുവിവരങ്ങള്‍ നല്‍കാനും നിര്‍ദേശമുണ്ട്.ആഭ്യന്തര സെക്രട്ടറി ഡിജിപിയോട് വിശദീകരണം തേടുന്നത് അസാധാരണ സംഭവമാണ്.

പതിനെട്ട് ദിവസം വൈകിയാണു സംസ്ഥാന സര്‍ക്കാര്‍ രേഖകള്‍ കൈമാറിയതെന്നും കോടതി ചൂണ്ടിക്കാട്ടി. ക്ലറിക്കല്‍ ജോലികള്‍ മാത്രമായിരുന്നില്ലേ ഇതെന്നും വൈകിയതിന് ആരാണ് ഉത്തരവാദിയെന്നും കോടതി ചോദിച്ചു. സിബിഐ അന്വേഷണത്തിനുള്ള നടപടികള്‍ സര്‍ക്കാര്‍ മനഃപൂര്‍വം വൈകിപ്പിക്കുകയാണെന്ന് ആരോപിച്ചു സിദ്ധാര്‍ഥന്റെ പിതാവ് ടി.ജയപ്രകാശ് നല്‍കിയ ഹര്‍ജിയിലാണ് ബെച്ചു കുര്യന്‍ തോമസിന്റെ നിര്‍ദേശം. ഹര്‍ജി 9ന് വീണ്ടും പരിഗണിക്കും.

അന്വേഷണം വേഗത്തില്‍ ഏറ്റെടുക്കാന്‍ നിര്‍ദേശം നല്‍കണമെന്നായിരുന്നു ഹര്‍ജിയിലെ ആവശ്യം. സിബിഐ അന്വേഷണം അട്ടിമറിക്കാന്‍ സര്‍ക്കാരിന്റെ ഭാഗത്തുനിന്ന് മനഃപൂര്‍വമായ ശ്രമം നടക്കുന്നുണ്ടെന്നും ഹര്‍ജിയില്‍ ആരോപിച്ചിരുന്നു. എന്തുകൊണ്ടാണ് രേഖകള്‍ കൈമാറാന്‍ വൈകിയത്? ആരാണ് ഉത്തരവാദി? ഔദ്യോഗികമായി രേഖകള്‍ കൈമാറുന്നതിന് എന്തിനാണ് താമസം വന്നത് എന്നും കോടതി ആരാഞ്ഞു.

മാര്‍ച്ച് 26ന് സംസ്ഥാന സര്‍ക്കാര്‍ രേഖകള്‍ കൈമാറിയെന്നു പബ്ലിക് പ്രോസിക്യൂട്ടര്‍ വ്യക്തമാക്കി. എന്നാല്‍ സിബിഐ അന്വേഷണം നടത്താന്‍ തീരുമാനിച്ചതിനുശേഷം 18 ദിവസത്തെ താമസമാണ് ഇതിനു വന്നതെന്ന് ഹര്‍ജിക്കാര്‍ പറഞ്ഞു. തുടര്‍ന്നാണ് അടിയന്തര നടപടി സ്വീകരിക്കാന്‍ കോടതി നിര്‍ദേശിച്ചത്. ഇക്കഴിഞ്ഞ ഫെബ്രുവരി 18നാണ് സിദ്ധാര്‍ഥനെ ഹോസ്റ്റലിലെ കുളിമുറിയില്‍ മരിച്ച നിലയില്‍ കണ്ടെത്തിയത്.

അവസാന 3 ദിവസം സിദ്ധാര്‍ഥനൊപ്പം ഉണ്ടായിരുന്നതും അക്ഷയ് ആണ്. പക്ഷെ കോളേജില്‍ ഇത്രയും പ്രശ്‌നം ഉണ്ടായിട്ടും അക്ഷയ് തങ്ങളെ ഒന്നും അറിയിച്ചില്ലെന്നും അവനും കൊലപാതകത്തില്‍ പങ്കുണ്ടെന്നും സിദ്ധാര്‍ഥന്റെ അമ്മാവന്‍ ഷിബു പറഞ്ഞു.

സിദ്ധാര്‍ഥനെ വിളിച്ച് കിട്ടാതിരിക്കുമ്പോഴൊക്കെ ഞങ്ങള്‍ അക്ഷയെ ആണ് വിളിച്ചിരുന്നത്. സിദ്ധാര്‍ഥനോടൊപ്പം പലപ്പോഴും വീട്ടില്‍ വന്നിട്ടുമുണ്ട്. മര്‍ദന വിവരം അവന് അറിയാമായിരുന്നുവെന്നും ഷിബു ചൂണ്ടിക്കാട്ടുന്നു. 18 പ്രതികളില്‍ ഏറ്റവും സൂത്രധാരനാണ് അക്ഷയ്.

അക്ഷയ് ആണ് അവസാന നിമിഷം വരെ അവന്റെ ഫോണ്‍ നിയന്ത്രിച്ചത്. പക്ഷെ എന്തുകൊണ്ടാണ് അവന്റെ പേര് പുറത്തുവരാത്തതെന്നും അവന്റെ അച്ഛന്‍ ഒരു പാര്‍ട്ടിയുടെ മുതിര്‍ന്ന നേതാവാണെന്ന് സിദ്ധാര്‍ഥ് തന്നോട് പറഞ്ഞിട്ടുണ്ടെന്നും സിദ്ധാര്‍ഥന്റെ പിതാവ് ജയപ്രാകാശ്  പ്രതികരിച്ചു.

അറസ്റ്റ് ചെയ്യപ്പെട്ട പ്രതികള്‍ക്കെതിരേ നിലവില്‍ ഗൂഢാലോചാ കുറ്റം ചുമത്തിയിട്ടുണ്ട്. പക്ഷെ കൊലപാതക കുറ്റം ചുമത്തണം. അപൂര്‍വങ്ങളില്‍ അപൂര്‍മെന്ന നിലയില്‍ കേസിനെ കാണം. എന്നാല്‍ മാത്രമേ പ്രതികള്‍ക്ക് കൊലക്കയര്‍ കിട്ടുകയുള്ളൂ. കൊലക്കയറില്‍ കുറഞ്ഞ ഒന്നും താന്‍ ആവശ്യപ്പെടുന്നില്ലെന്നും അല്ലാത്തപക്ഷം കുടുംബം സമരത്തിനിരിക്കുമെന്നും ടി.ജയപ്രകാശ് പ്രതികരിച്ചു.

കേസില്‍ 12 വിദ്യാര്‍ത്ഥികള്‍ക്കെതിരെ കൂടി നടപടിയെടുക്കും. 10 വിദ്യാര്‍ത്ഥികളെ ഒരു വര്‍ഷത്തേക്ക് വിലക്കുകയും ചെയ്തു. പ്രധാനപ്രതിയെ അന്വേഷിച്ച് പൊലീസ് കൊല്ലത്ത് എത്തി.

ഇവര്‍ക്ക് ക്ലാസില്‍ പങ്കെടുക്കാനും പരീക്ഷ എഴുതാനും സാധിക്കില്ല. പ്രതികള്‍ ഭീഷണിപ്പെടുത്തിയപ്പോള്‍ മര്‍ദിച്ചവരാണ് ഇവരെന്നാണ് വിവരം. മറ്റ് രണ്ട് പേരെ ഒരു വര്‍ഷത്തേക്ക് ഇന്റേണല്‍ പരീക്ഷ എഴുതുന്നതില്‍ നിന്നും വിലക്കിയിട്ടുണ്ട്. മര്‍ദനമേറ്റതായി കണ്ടിട്ടും ആശുപത്രിയില്‍ എത്തിക്കാത്തതിലാണ് നടപടി. ഈ 12 വിദ്യാര്‍ത്ഥികളേയും ഹോസ്റ്റലില്‍ നിന്ന് പുറത്താക്കി.

ഹോസ്റ്റലിലെ വിദ്യാര്‍ത്ഥികള്‍ക്കെതിരെയും ശിക്ഷ പ്രഖ്യാപിച്ചിട്ടുണ്ട്. അക്രമം നോക്കി നിന്ന മുഴുവന്‍ പേരെയും ഏഴ് ദിവസം കോളേജില്‍ നിന്ന് സസ്‌പെന്റ് ചെയ്തു. ഈ ദിവസങ്ങളില്‍ ഹോസ്റ്റലിലും പ്രവേശിക്കാന്‍ കഴിയില്ല. ഫെബ്രുവരി 16,17,18 തീയതികളില്‍ ഹോസ്റ്റലില്‍ ഉണ്ടായിരുന്നവര്‍ക്കാണ് ശിക്ഷ. റാഗിങ് വിരുദ്ധ സമിതിയുടേതാണ് നടപടി.