നേരത്തെ സിദ്ധീഖ് കാപ്പന് നിയമ സഹായം ആവശ്യപ്പെട്ട് അദ്ദേഹത്തിന്റെ ഭാര്യ റൈഹാനത്ത് യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവ്വറലി ശിഹാബ് തങ്ങളെയും ജനറല്‍ സെക്രട്ടറി പി.കെ ഫിറോസിനെും നേരിട്ട് വന്ന് കണ്ടിരുന്നു. കാപ്പന്റെ ഭാര്യയും ബന്ധുക്കളും വരുന്നതറിഞ്ഞ് സുപ്രീം കോടതി അഭിഭാഷകനും ഡല്‍ഹി കെ.എം.സി.സി പ്രസിഡന്റുമായ അഡ്വ. ഹാരിസ് ബീരാനെ വിളിച്ചു വരുത്തിയിരുന്നു. അതിന് ശേഷം തങ്ങളുടെ നിര്‍ദ്ദേശാനുസരണം ആണ് അഡ്വ. ഹാരിസ് ബീരാന്‍ ഈ കേസ് ഏറ്റെടുക്കുന്നത്. നീതിക്ക് വേണ്ടി അലയുന്ന റൈഹാനത്തിനെ ഒറ്റപ്പെടുത്തില്ലയെന്നും കേരളം ഒറ്റക്കെട്ടായി സിദ്ധീഖ് കാപ്പന്റെ മോചനത്തിനായി നില്‍ക്കുമെന്നും മുനവ്വര്‍ തങ്ങള്‍ അന്ന് റൈഹാനത്തിന് ഉറപ്പ് നല്‍കയിരുന്നു. ഈ ഉറപ്പുകള്‍ പാലിക്കപ്പെട്ടതില്‍ അതിയായ സന്തോഷവും കടപ്പാടുമുണ്ടെന്ന് കാപ്പനും ഭാര്യയും തങ്ങന്‍മാരെ അറിയിച്ചു. പാര്‍ലമെന്റില്‍ ലീഗ് എം.പിമാരുടെ ഇടപെടലിനും അവര്‍ നന്ദി രേഖപ്പെടുത്തി.

തുടര്‍ന്നും നിയമ സഹായത്തിനും രാഷ്ട്രീയ പോരാട്ടത്തിനും സിദ്ധീഖ് കാപ്പനോടൊപ്പം മുസ്ലിം ലീഗ് പാര്‍ട്ടി ഉണ്ടാകുമെന്ന് പാണക്കാട് സയ്യിദ് സാദിഖലി ശിഹാബ് തങ്ങള്‍ പ്രസ്താവിച്ചു. സിദ്ധീഖ് കാപ്പന്റെ സന്ദര്‍ശനത്തെ തുടര്‍ന്ന് മാധ്യമ പ്രവര്‍ത്തകരോട് സംസാരിക്കുകയായിന്നു തങ്ങള്‍. മുസ്ലിം യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ്, എം.എസ്.എഫ് ദേശീയ പ്രസിഡന്റ് പി.വി അഹമ്മദ് സാജു, യൂത്ത്ലീഗ് സംസ്ഥാന സെക്രട്ടറി ടി.പി.എം ജിഷാന്‍, അഡ്വ. ഡാനിഷ് എന്നിവരും സന്നിഹിതരായിരുന്നു.

ദീര്‍ഘമായ ഒരു സോഷ്യല്‍ മീഡിയ കുറിപ്പിലൂടെയാണ് റൈഹാന നന്ദി അറിയിച്ചത്. മുസ്ലിം ലീഗ് അടക്കമുള്ള രാഷ്ട്രീയ പാര്‍ട്ടികള്‍ പല സമയത്തും സഹായവുമായി എത്തിയിട്ടുണ്ടെന്ന് കുറിപ്പില്‍ അവര്‍ സൂചിപ്പിക്കുന്നു.

മുനവറലി ശിഹാബ് തങ്ങള്‍, ഇ.ടി മുഹമ്മദ് ബഷീര്‍ എംപി, അബ്ദുല്‍ വഹാബ് എംപി, ശശി തരൂര്‍, സി.പി.ഐ നേതാവ് ബിനോയ് വിശ്വം, മുതിര്‍ന്ന അഭിഭാഷകന്‍ കപില്‍ സിപില്‍ തുടങ്ങി നേതാക്കളെയും കുറുപ്പില്‍ അവര്‍ പരാമര്‍ശിക്കുന്നുണ്ട്.

റൈഹാന സിദ്ദീഖ് ഫേസ്ബുക്കില്‍ പങ്കുവെച്ച് കുറുപ്പിന്റെ പൂര്‍ണ്ണരൂപം.

പ്രിയപ്പെട്ടവരെ,

രണ്ടര വര്‍ഷമായി കൃത്യമായി പറഞ്ഞാല്‍ 2020ഒക്ടോബര്‍ 5നു ശേഷം ഞാന്‍ നിങ്ങളുമായി നിരന്തരം സംസാരിച്ചു കൊണ്ടേ ഇരിക്കുന്നു.. ഒരു സോഷ്യല്‍ മീഡിയയിലും അതിനു മുന്നേ നിങ്ങളെന്നെ കണ്ടിട്ടുണ്ടാവില്ല. സിദ്ധിഖ് കാപ്പന്‍ എന്ന ഒരു സാധാരണ മാധ്യമ പ്രവര്‍ത്തകന്‍, എന്റെ ജീവിത പങ്കാളി യുപി പോലീസിന്റെ കള്ളക്കേസില്‍ കുടുങ്ങി ഇരുട്ടറയില്‍ തളക്കപ്പെട്ടപ്പോള്‍, തീവ്രവാദിയായി മുദ്ര ചാര്‍ത്തപ്പെട്ടപ്പോള്‍, പലരും അദ്ദേഹത്തെ ഒരു തീവ്രവാദിയാക്കാന്‍ തിടുക്കം കാണിച്ചപ്പോള്‍ ഞാന്‍ പൊതുസമൂഹത്തോട് ഇതിന്റെ സത്യാവസ്ഥ വിളിച്ചു പറയണം എന്ന് ഉറപ്പിച്ചു. അന്ന് മുതല്‍ നിരന്തരം മാധ്യമങ്ങളോടും എല്ലാ രാഷ്ട്രീയ പാര്‍ട്ടികളോടും പൊതു സമൂഹത്തോടും കാപ്പന്റെ നിരപരാധിത്വം വിളിച്ചു പറഞ്ഞു കൊണ്ടേയിരുന്നു. എന്നെ കേള്‍ക്കാന്‍ നിങ്ങള്‍ സമയം കണ്ടെത്തി.. ഞങ്ങള്‍ക്ക് വേണ്ടി നിങ്ങളുടെ വിലപ്പെട്ട സമയങ്ങള്‍ നിങ്ങള്‍ നീക്കി വെച്ചു.. നിങ്ങളുടെ വലിയ പ്രതിസന്ധികളും വേദനകളും ദൈവത്തോട് പറയുമ്പോള്‍ ഞങ്ങള്‍ക്ക് വേണ്ടിയും ആത്മാര്‍ത്ഥമായി പ്രാര്‍ത്ഥിക്കാന്‍ നിങ്ങള്‍ മറന്നില്ല..

ഇതിന്റെയൊക്കെ ഫലമായി രണ്ടര വര്‍ഷങ്ങള്‍ക്ക് ശേഷം ഭാഗീകമായെങ്കിലും നമുക്ക് നീതി കിട്ടി. ദൈവത്തിനു സ്തുതി
ഇന്ന് കാപ്പന്‍ ഞങ്ങളുടെ കൂടെ ഉണ്ട്.നമുക്കറിയാം ഇന്ത്യയില്‍ യു എ പി എ കേസില്‍ അറസ്റ്റ് ചെയ്യപ്പെട്ടാല്‍ അതില്‍ നിന്ന് മോചനം ലഭിക്കാനുള്ള പ്രയാസം, നിരപരാധികള്‍ക്ക് മേല്‍ കരിനിയമങ്ങള്‍ ചാര്‍ത്തപ്പെട്ടാല്‍ പെട്ടെന്ന് മോചനം കിട്ടില്ല എന്നും ഇതിനു പിന്നില്‍ പ്രവര്‍ത്തിക്കുന്നവര്‍ക്കറിയാം. എനിക്ക് ഇത് വളരെ ദീര്‍ഘമായ സമയമായി തോന്നുമെങ്കിലും നിയമം പഠിച്ചവര്‍ക്കറിയാം ഇതൊരു ചെറിയ കാലയളവാണെന്ന്.

ഈ രണ്ടര വര്‍ഷം കടന്നു പോയത് വളരെ ദുര്‍ഘടമായ പാതകളിലൂടെയാണ്. എങ്കിലും എനിക്ക് ഉറച്ച കാല്‍വെപ്പുകളോടെ പ്രതിസന്ധികളില്‍ തളരാതെ മുന്നോട്ട് പോവാന്‍ ദൈവം എന്റെ കൈ പിടിച്ചു നടത്തിയിട്ടുണ്ട്.
ദൈവത്തിന്റെ മാലാഖമാരായി ഒരുപാട് മനുഷ്യര്‍ ഞങ്ങള്‍ക്കൊപ്പം ചേര്‍ന്ന് നിന്നു. എല്ലാവരുടെയും പേര് എഴുതാന്‍ കഴിയില്ല, അതിനു ഈ കുറിപ്പ് മതിയാവുകയില്ല.

കാപ്പന്‍ അറസ്റ്റിലായി എന്നറിഞ്ഞ നിമിഷം മുതല്‍ അദേഹത്തിന്റെ മോചനത്തിനായി നിയമ പരമായും മറ്റെല്ലാ തരത്തിലും മുന്നിട്ടിറങ്ങിയ KUWJ യൂണിയന്‍. പല സമ്മര്‍ദ്ദങ്ങളും അവര്‍ക്കുണ്ടായിട്ടുണ്ട് എങ്കിലും അവര്‍ അവരുടെ സുഹൃത്തിനു വേണ്ടി ഉറച്ചു നിന്നു. മണികണ്ഠന്‍, പ്രശാന്ത്, ജിഗീഷ്, മിജി, ധനസുമോദ്, അഴിമുഖത്തിലെ ജോസി ജോസഫ്, പ്രസൂണ്‍, ഡല്‍ഹി, തിരുവനന്തപുരം, കോഴിക്കോട് , മലപ്പുറം യൂണിയന്‍ അംഗങ്ങള്‍ അങ്ങനെ ഒരുപാട് മാധ്യമ സുഹൃത്തുക്കള്‍..

കാപ്പന്റെ അറസ്റ്റ് വിവരം അറിഞ്ഞ നിമിഷം മുതല്‍ വീട്ടില്‍ വന്നും ഫോണില്‍ സംസാരിച്ചും എനിക്ക് ധൈര്യവും സമാധാനവും തന്നു, അദ്ദേഹത്തിന് വേണ്ടി ഐക്യ ദാര്‍ഢ്യ സമിതി രൂപീകരിച്ചു, സമരങ്ങള്‍ നടത്തികൂടെ നിന്ന മനുഷ്യര്‍..മുതിര്‍ന്ന മാധ്യമ പ്രവര്‍ത്തകനും കാപ്പനെ നന്നായി അറിയുന്ന ചെക്കുട്ടി സര്‍, എന്നെയും കൊണ്ട് തിരുവനന്തപുരം ഉള്ള എല്ലാ നേതാക്കളുമായി കാര്യങ്ങള്‍ സംസാരിക്കാന്‍ ഓടി നടന്ന അതിനു വേണ്ടി കുറെ തെറി കേള്‍ക്കേണ്ടി വന്ന ശ്രീജ, സോണിയ ചേച്ചി, എന്റെ നിഴലായി നിന്ന അംബിക ചേച്ചി, ഹരിഹരന്‍ സഖാവ്, പി എ എം ഹാരിസ് ,കെ പി ഒ റഹ്മത്തുള്ള, റെനി ഐലിന്‍..അങ്ങിനെ കുറെ പേര്‍.

കാപ്പന്റെ അറസ്റ്റ് മുതല്‍ ഈ കേസ് ഞാന്‍ ഏറ്റെടുത്തു കൊള്ളാമെന്നു പറഞ്ഞ് തീര്‍ത്തും സൗജന്യമായി കേസ് വാദിച്ച ഇന്ത്യയിലെ ഏറ്റവും മുതിര്‍ന്ന വക്കീല്‍ ബഹു കപില്‍ സിബല്‍ സര്‍.അറസ്റ്റ് സമയത്തെ പ്രതിസന്ധികള്‍ ചെറുതല്ലായിരുന്നു. നാല്‍പത്തി അഞ്ചു ദിവസം കാപ്പന്‍ ജീവിച്ചിരിപ്പുണ്ടോ എന്നു പോലും നിശ്ചയമില്ലാത്ത സമയത്ത് സുപ്രിം കോടതിയില്‍ നിന്ന് ഒരു വക്കീല്‍ ഡല്‍ഹിയിലേക്കും യുപി യിലേക്കും ഓടിക്കൊണ്ടേ ഇരുന്നു. എന്റെ മനസീക സമ്മര്‍ദ്ദങ്ങള്‍ മുഴുവന്‍ അറിഞ്ഞ, നിയമ വശങ്ങള്‍ ക്ഷമയോടെ പറഞ്ഞു തന്ന അഡ്വ വില്‍സ് മാത്യു സര്‍, ലഖ് നൗ കോടതിയിലേക്ക് കേസ് മാറ്റിയപ്പോള്‍ അവിടെ ഒരു വക്കീലിനെ കണ്ടെത്താനും അന്വോഷിക്കാനും ബുദ്ധിമുട്ടിയ സമയത്ത് വക്കീലിനെ ഏര്‍പ്പാട് ചെയ്യാനും കണ്ടെത്താനും സഹായിച്ച മുതിര്‍ന്ന മാധ്യമ പ്രവര്‍ത്തകയും ചെക്കുട്ടി സാറിന്റെ സുഹൃത്തുമായ മുംബൈ സ്വദേശിനിയായ ഗീത മാഡം, ഡല്‍ഹിയിലുള്ള സാവിന്തി നൈനാന്‍,

എന്റെ അമ്മയെ പോലെ കൂടെ നിന്ന രമ സുന്ദരി മാഡം.ലഖ്‌നൗവില്‍ സൗജന്യമായി കേസ് വാദിക്കാന്‍ തയ്യാറായ അവിടത്തെ ഏറ്റവും മുതിര്‍ന്ന അറിയപ്പെടുന്ന വക്കീല്‍ ഐ ബി സിംഗ്, അദ്ദേഹത്തിന്റെ മകന്‍ ഇഷാന്‍ ഭാഗേല്‍, അഡ്വ ഖാലിദ് അടങ്ങിയ വലിയ ഒരു ടീം..

യു എ പി എ കേസില്‍ ഹൈകോടതി ജാമ്യം തള്ളി കേസ് വീണ്ടും സുപ്രിം കോടതിയില്‍ എത്തി, അഡ്വ ഹാരിസ് ബീരാന്‍ സര്‍ ആയിരുന്നു കേസ് നോക്കിയിരുന്നത്. കേസിന്റെ ഓരോ ഘട്ടത്തിലും സൂക്ഷ്മത പുലര്‍ത്തി സിബല്‍ സാറുമായുള്ള ബ്രീഫിങ്ങില്‍ വരെ എന്നെയും കൂടെ കൂട്ടി..
സിബല്‍ സാറിന്റെ ഓഫിസില്‍ തന്നെയുള്ള അഡ്വ. കോശി സര്‍..ഒന്നര വര്‍ഷമായിട്ടും കാപ്പനെ ഒന്ന് കാണാന്‍ വേണ്ടി ഞാന്‍ മുട്ടാത്ത വാതിലുകളില്ല.. ഒരു കണക്കിനും എനിക്ക് കാണാന്‍ പറ്റാത്ത അവസ്ഥയില്‍ നില്‍ക്കുന്ന സമയത്തു എന്റെ കൂടെ ലഖ്‌നൗ വരെ വന്നു കാപ്പനെ കാണാനും എല്ലാ വക്കീലുമാരുമായും കാര്യങ്ങള്‍ ചര്‍ച്ച ചെയ്ത് കേസ് ഏകോപിപ്പിച്ചു നിര്‍ത്താനും സഹായിച്ച എന്റെ കുടുംബാംഗം കൂടിയായ അഡ്വ. മുഹമ്മദ് ദാനീഷ്..

കാപ്പന്‍ മധുര ജയിലില്‍ കിടക്കുമ്പോള്‍ വക്കീലിന് പോലും അടുക്കാന്‍ കഴിയാത്ത സമയം ദൈവദൂതനെ പോലെ കാപ്പന് വേണ്ടി ഭക്ഷണവും വസ്ത്രവും പുസ്തകവും എത്തിച്ചു കൊണ്ടിരുന്ന സ്വാമി നാരായണ്‍ ദാസ്.ജാമ്യം ലഭിച്ചു, യുപി യിലുള്ള ജാമ്യക്കാരെ തന്നെ വേണമെന്ന കോടതിയുടെ നിര്‍ദേശത്തില്‍ പല ആളുകളുമായും നിരന്തരം അന്വോഷിച്ചു. പ്രമുഖ മാധ്യമ പ്രവര്‍ത്തകന്‍ കെ എ ഷാജി, അദ്ദേഹം വഴി സ്‌നേഹത്തിന്റെ നിറകുടമായ ഒരമ്മയെ ഞങ്ങള്‍ക്ക് ലഭിച്ചു- പ്രൊഫസര്‍ രൂപ് രേഘ വര്‍മ്മ.. നദീം ഖാന്‍ വഴി റിയാസ് ഖാനും അലീ മുള്ള ഖാനും, ഡല്‍ഹി പ്രസ് ക്ലബ് പ്രസിഡന്റ് ഉമാ കാന്ത്, അദ്ദേഹം വഴി ലഖ്‌നൗവിലെ മാധ്യമ പ്രവര്‍ത്തകന്‍ കുമാര്‍ സൗവീര്‍ സാറും ഞങ്ങള്‍ക്കൊപ്പം നിന്നു.

എല്ലാ രാഷ്ട്രീയ പാര്‍ട്ടിയിലെ നേതാക്കളുമായും, എംപി മാരുമായും, എം എല്‍ എ മാരുമായും ഞാന്‍ സംസാരിച്ചിട്ടുണ്ട്, കത്തെഴുതിയിട്ടുണ്ട്.അവര്‍ കാപ്പന് വേണ്ടി സംസാരിച്ചിട്ടുണ്ട്. യൂണിയനും ഐക്യ ദാര്‍ഢ്യ സമിതിയും നയിച്ച പരിപാടികളില്‍ അവര്‍ പങ്കെടുത്തിട്ടുണ്ട്.കാപ്പന് വേണ്ടി പാര്‍ലമെന്റിലും,നിയമസഭയിലും ശബ്ദിച്ചു..

ബഹുമാനപ്പെട്ട പാണക്കാട് മുനവ്വറലി തങ്ങളാണ് അഡ്വ ഹാരിസ് ബീരാന്‍ സാറെ കേസ് ഏല്പിച്ചത്.
ഇ ടി മുഹമ്മദ് ബഷീര്‍ എംപി പല കാര്യങ്ങളിലും കൂടെ നിന്നു.കാപ്പന്‍ കോവിഡ് ബാധിച്ചു എയിംസ് ഹോസ്പിറ്റലില്‍ കിടന്ന സമയത്ത് ഞാനും മോനും ഡല്‍ഹിയിലേക്ക് ഫ്‌ലൈറ്റ് കയറിയപ്പോള്‍ അപകടകരമായ ഒരു സാഹചര്യമായിരുന്നു. അന്ന് എംപി അബ്ദുല്‍ വഹാബ് സാറിന്റെ ഫ്‌ലാറ്റില്‍ ആയിരുന്നു താമസിച്ചിരുന്നത്.അദ്ദേഹത്തിന്റെ വാഹനത്തില്‍ സുരക്ഷിതമായി ഞങ്ങള്‍ ഹോസ്പിറ്റലിലേക്കും ഫ്‌ലാറ്റിലേക്കും സഞ്ചരിച്ചു.ബിനോയ് വിശ്വം സര്‍ എപ്പോഴും എനിക്ക് വിളിച്ചു ധൈര്യം നല്‍കികൊണ്ടിരുന്നു.

കോണ്‍ഗ്രസ് ആദ്യം മുതല്‍ ഞങ്ങളുണ്ട് നിങ്ങളുടെ കൂടെ എന്ന് പറഞ്ഞ് ഒപ്പം നിന്നു. കെ പി നൗഷാദ് അലി തുടക്കം മുതല്‍ ഞങ്ങളെ ചേര്‍ത്ത് നിര്‍ത്തി.കോണ്‍ഗ്രസ് എംപിമാര്‍ എല്ലാവരും കാപ്പന് വേണ്ടി സംസാരിച്ചു. കേ രളത്തില്‍ നിന്നുള്ള ഇരുപത് എംപി മാര്‍ ഒപ്പിട്ട കത്ത് ചീഫ് ജസ്റ്റിസിനു അയച്ചു.ശശി തരൂര്‍ എംപി കേസിന്റെ കാര്യങ്ങള്‍ കപില്‍ സിബല്‍ സാറുമായി ചര്‍ച്ച ചെയ്തു..
സിപിഎം എംപി മാരും, മുസ്ലിം ലീഗ് എംപി മാരും അദ്ദേഹത്തിന്റെ മോചനത്തിന് വേണ്ടി പ്രധാനമന്ത്രിക്ക് കത്തയച്ചു.
കോണ്ഗ്രസ് വനിതാ നേതാവ് ഷമ മുഹമ്മദ് ഒരു അനിയത്തിയോടുള്ള സ്‌നേഹത്തോടെ ചേര്‍ത്ത് പിടിച്ചു.. ഡല്‍ഹിയില്‍ വരുമ്പോള്‍ ഒക്കെ കാണാന്‍ വന്നു ധൈര്യം പകര്‍ന്നു.ഇന്ത്യയിലെ പല എംപി മാരും പാര്‍ലമെന്റില്‍ കാപ്പന് വേണ്ടി സംസാരിച്ചു.
തേജസ് പത്രത്തിലെ കാപ്പന്റെ സഹപ്രവര്‍ത്തകര്‍

ഇന്ത്യയിലും, ഇന്ത്യയുടെ പുറത്തുള്ള മാധ്യമങ്ങളും കാപ്പന് വേണ്ടി നിരന്തരം എഴുതികൊണ്ടിരുന്നു..ഒട്ടുമിക്ക മത സംഘടനകളും, എല്ലാ രാഷ്ട്രീയ പാര്‍ട്ടിയിലെ മനുഷ്യത്വം മരവിച്ചിട്ടില്ലാത്ത എല്ലാവരും കൂടെ നിന്നു, കാപ്പന് വേണ്ടി സംസാരിച്ചിട്ടുണ്ട്, പ്രതിഷേധങ്ങള്‍ സംഘടിപ്പിച്ചിട്ടുണ്ട്..

എന്റെ ഫാമിലി എല്ലാം കൊണ്ടും എനിക്ക് തുണയായി നിന്നു..കാപ്പന്റെ ഫാമിലി, ഞങ്ങളുടെ നാട്ടുകാര്‍, പ്രത്യേകിച്ച് എടുത്തു പറയേണ്ട എന്റെ അയല്‍വാസികള്‍ അവരായിരുന്നു എപ്പോഴും കൂടെ..എന്റെ പ്രിയപ്പെട്ട സുഹൃത്തുക്കള്‍നോമ്പ് നോറ്റും പ്രാര്‍ത്ഥിച്ചും ധൈര്യം പകര്‍ന്നു. എന്റെ മാതാപിതാക്കള്‍..സോഷ്യല്‍ മീഡിയ വഴി എനിക്ക് കിട്ടിയ സ്‌നേഹിക്കാന്‍ മാത്രമറിയുന്ന മനുഷ്യര്‍..
എന്റെ എല്ലാ സമ്മര്‍ദ്ദങ്ങളും വേദനകളും അനുഭവിച്ചറഞ്ഞ ഞങ്ങളുടെ മക്കള്‍.. ഏത് പ്രതിസന്ധിയും നേരിടാന്‍ അവരെ പ്രാപ്തരാക്കി എടുത്തു..

ശത്രുക്കള്‍ പല വ്യാജ പ്രചാരണങ്ങളും നിലക്കാതെ നടത്തികൊണ്ടിരുന്നപ്പോള്‍, ഞാന്‍ സത്യങ്ങള്‍ മാത്രം പറഞ്ഞു കൊണ്ടിരുന്നു.
ഇനിയും കടമ്പകള്‍ ഏറെയുണ്ട്.നിയമപരമായി അതിനെ നേരിടും
കോടതിയില്‍ അദ്ദേഹത്തിന്റെ നിരപരാധിത്വം തെളിയും വരെ മുന്നോട്ട് തന്നെ പോവണം.
ഇത് വരെ ഞങ്ങളുടെ കൂടെ നിന്ന, ഞങ്ങള്‍ക്ക് വേണ്ടി സംസാരിച്ച, പ്രാര്‍ത്ഥിച്ച എല്ലാവര്‍ക്കും ഹൃദയത്തിന്റെ ഭാഷയില്‍ നന്ദി അറിയിക്കുന്നു.. ഇനിയും നിങ്ങള്‍ ഞങ്ങളുടെ കൂടെ ഉണ്ടാവണം..
കാപ്പനെ പോലെ ഒരുപാട് നിരപരാധികളായ മനുഷ്യര്‍ ഇരുട്ടറയില്‍ ഇപ്പോഴും കിടക്കുന്നുണ്ട്. അവര്‍ക്ക് വേണ്ടി ഒരുമിച്ചു നില്‍ക്കേണ്ടതുണ്ട്.
വീണ്ടും പറയുന്നു.. തെറ്റ് ചെയ്തവര്‍ക്കുള്ളതാണ് ജയില്‍. നിരപരാധികള്‍ക്കുള്ളതല്ല.
ആയിരം കുറ്റവാളികള്‍ രക്ഷപ്പെട്ടാലും ഒരു നിരപരാധി പോലും ശിക്ഷിക്കപ്പെടാതിരിക്കട്ടെ

സ്‌നേഹത്തോടെ

റൈഹാന സിദ്ധിഖ്

ഇ.ഡി രജിസ്റ്റര്‍ ചെയ്ത കേസില്‍ കൂടി ജാമ്യം ലഭിച്ചാലാണ് സിദ്ദീഖ് കാപ്പന് ജയില്‍ മോചിതനാകാന്‍ കഴിയു. രണ്ടുവര്‍ഷം ജയിലില്‍ കഴിഞ്ഞ സിദ്ദീഖിന് ചീഫ് ജസ്റ്റിസ് യു.യു ലളിത് അധ്യക്ഷനായ സുപ്രീംകോടതി ബെഞ്ച് കഴിഞ്ഞ മാസം ഉപാധികളോടെ ജാമ്യം നല്‍കിയിരുന്നു. എന്നാല്‍ ഇ.ഡി കേസ് നിലനില്‍ക്കുന്നത് കാരണം സിദ്ദീഖിനും സിദ്ദീഖ് യാത്ര ചെയ്ത വാഹനത്തിന്റെ ഡ്രൈവറിനും ജയില്‍ മോചനം സാധ്യമാകാതിരിക്കുകയാണ്.

കൂട്ടബലാത്സംഗത്തിനിരയായി കൊല്ലപ്പെട്ട ദലിത് ബാലികയുടെ വാര്‍ത്ത രേഖപ്പെടുത്താന്‍ ഹാഥറാസിലേക്കു പോകുന്നതിനിടയിലാണ് സിദ്ദീഖ് കാപ്പന്‍ അറസ്റ്റിലായത്.

‘ഒരുപാട് ക്രിമിനലുകളുടെ കൂടെ ആണ് അദ്ദേഹം ഉള്ളത്. സിദ്ദീഖിന്റെ ജീവനില്‍ എനിക്ക് പേടിയുണ്ട്. 70ആളുകളെങ്കിലും അദ്ദേഹത്തിന്റെ സെല്ലില്‍ ഉണ്ട്. 9 വയസ്സുകാരിയെ പീഡിപ്പിച്ചു കൊന്ന ആള്‍ മുതല്‍ പല ക്രിമിനലുകളുടെ ഇടയിലുമാണ് അദ്ദേഹം നില്‍ക്കുന്നത്. ക്രിമിനലുകളുടെ കയ്യിലാണ് ജയില്‍. തീര്‍ച്ചയായും അദ്ദേഹത്തിനെ ജയില്‍ നിന്നും മാറ്റണം. സുരക്ഷിതമായ സ്ഥലത്തേക്ക് മാറ്റണമെന്നും റൈഹാന സിദ്ദീഖ് ആവശ്യപ്പെട്ടു.

സിദ്ദീഖ് കാപ്പന്റെ ജാമ്യഹരജി സുപ്രിം കോടതി ഇന്നും നീട്ടിവെച്ചിരുന്നു. അടുത്ത 11ലേക്കാണ് കേസ് നീട്ടിയത്. ഹാത്രസ് പീഡനവുമായി ബന്ധപ്പെട്ട വാര്‍ത്ത ശേഖരിക്കാന്‍ വേണ്ടി പുറപ്പെട്ടതിനെ പ്രതിയാണ് സിദ്ദീഖ് കാപ്പനെ ഉത്തര്‍പ്രദേശ് പോലീസ് അറസ്റ്റ് ചെയ്തത്. മലയാളി മാധ്യമപ്രവര്‍ത്തകനായ അദ്ദേഹം കേരള പത്രപ്രവര്‍ത്തക സംഘടനയായ കെയുഡബ്ല്യൂജെ ഡല്‍ഹി ഘടകം ഭാരവാഹി കൂടിയാണ്.

പൊലീസ് നിയമ വിരുദ്ധ നടപടികള്‍ സ്വീകരിച്ചത് അവര്‍ക്ക് കിട്ടിയ ചില നിര്‍ദേശങ്ങള്‍ പ്രകാരമാണെന്നും തന്റെ നിരപരാധിത്വം തെളിയിക്കാന്‍ സിദ്ധിഖ് കാപ്പന്‍ നുണ പരിശോധനക്ക് സമ്മതിച്ചിരുന്നുവെന്നും സംഘടന സുപ്രീംകോടതിയെ അറിയിച്ചു. പോപ്പുലര്‍ ഫ്രണ്ടുമായി സിദ്ധിഖീന് ബന്ധം ഇല്ലെന്നും അദ്ദേഹം മുഴു സമയ മാധ്യമപ്രവര്‍ത്തകനാണെന്നും സംഘടന സുപ്രീംകോടതിയെ അറിയിച്ചു.

കസ്റ്റഡിയില്‍ സീദ്ദീഖ് കാപ്പന്‍ നേരിട്ട പീഡനങ്ങളെ സംബന്ധിച്ചും സത്യവാങ്മൂലത്തില്‍ അറിയിച്ചു. അദ്ദേഹത്തിന് മരുന്നുകള്‍ നിഷേധിച്ചതായും പറയുന്നുണ്ട്. കസ്റ്റഡിയില്‍ സിദ്ധീഖ് കാപ്പനെ ഉറങ്ങാന്‍ പോലും പൊലീസ് അനുവദിച്ചില്ല. യുപി സര്‍ക്കാര്‍ വീഴ്ച മറച്ച് വക്കാന്‍ തെറ്റിദ്ധാരണജനകമായ സത്യവാങ്മൂലം നല്‍കിയെന്നും കെയുഡബ്ല്യൂജെ നല്‍കിയ സത്യവാങ്മൂലത്തിലുണ്ട്.

കെയുഡബ്ല്യുജെ ഡല്‍ഹി ഘടകമാണ് സിദ്ദീഖ് കാപ്പന് ജാമ്യം തേടി സുപ്രീംകോടതിയെ സമീപിച്ചത്. എന്തുകൊണ്ട് ഹര്‍ജിക്കാര്‍ ജാമ്യഹര്‍ജിയുമായി അലഹബാദ് ഹൈക്കോടതിയെ സമീപിക്കുന്നില്ല എന്ന് ചീഫ് ജസ്റ്റിസ് ചോദിച്ചു. എന്നാല്‍ ഗുരുതരമായ സാഹചര്യമാണ് നിലനില്‍ക്കുന്നതെന്നും, അഭിഭാഷകന് സിദ്ദിഖിനെ കാണാന്‍ പോലും അനുമതി ലഭിക്കുന്നില്ലെന്നും പത്രപ്രവര്‍ത്തക യൂണിയന് വേണ്ടി ഹാജരായ കപില്‍ സിബല്‍ കോടതിയെ അറിയിച്ചു. സിദ്ദിഖ് കാപ്പനെ കാണാതെ ജാമ്യഹര്‍ജി നല്‍കുന്നതെങ്ങനെയെന്നും കപില്‍ സിബല്‍ ചോദിച്ചു. തുടര്‍ന്ന് കാപ്പന്‍ ഇപ്പോള്‍ ഏത് ജയിലിലാണുള്ളതെന്ന് കോടതി ചോദിച്ചു. മഥുര ജയിലിലാണുള്ളതെന്ന് സിബല്‍ അറിയിച്ചു.

ഈ സാഹചര്യത്തിലാണ്, ഉത്തര്‍പ്രദേശ് സര്‍ക്കാരിനും പൊലീസിനും സുപ്രീംകോടതി നോട്ടീസയച്ചത്. അവര്‍ക്ക് പറയാനുള്ളതെന്തെന്ന് കേട്ട ശേഷം കേസില്‍ തീരുമാനമെടുക്കാമെന്നും, കോടതി വ്യക്തമാക്കി. കേസിന്റെ മെറിറ്റില്‍ ഇപ്പോള്‍ ഇടപെടുന്നില്ലെന്നും കോടതി അറിയിച്ചു.

റിപ്പബ്ലിക് ടിവി മേധാവി അര്‍ണബ് ഗോസ്വാമിക്ക് മനുഷ്യാവകാശം ചൂണ്ടിക്കാട്ടി ഉടന്‍ ജാമ്യം നല്‍കിയ, നടപടി ചൂണ്ടിക്കാട്ടി സമാനമായ അവകാശം സിദ്ദിഖ് കാപ്പനുമുണ്ടെന്ന് വാദിച്ചാണ് കെയുഡബ്ല്യുജെ വീണ്ടും സുപ്രീംകോടതിയെ സമീപിച്ചത്. സിദ്ദിഖ് കാപ്പനെ കാണാന്‍ അഭിഭാഷകനെ അനുവദിക്കണം, കെയുഡബ്ല്യുജെ പ്രതിനിധികള്‍ക്ക് കാപ്പനെ കാണാന്‍ അനുമതി നല്‍കണമെന്നും ഹര്‍ജിയില്‍ ആവശ്യപ്പെട്ടിരുന്നു.

മലപ്പുറം ഗസ്റ്റ് ഹൗസില്‍ വെച്ച് സിദ്ദിഖ് കാപ്പന്റെ വിഷയം ശ്രദ്ധയില്‍ പെടുത്തി നിവേദനം നല്‍കിയ കെ.പി.സി.സി സെക്രട്ടറി കെ.പി. നൗഷാദ് അലി, മഹിളാ കോണ്‍ഗ്രസ് നേതാവ് ഫാത്തിമ റോഷ്‌ന എന്നിവര്‍ക്കാണ് വിഷയത്തില്‍ പ്രിയങ്കാ ഗാന്ധി ഇടപെടുമെന്ന ഉറപ്പ് രാഹുല്‍ നല്‍കിയത്.

സിദ്ദിഖ് കാപ്പനെതിരെ യു.എ.പി.എ, രാജ്യദ്രോഹം എന്നീ വകുപ്പുകളാണ് ചുമത്തിയിരുന്നത്. ഇതിന് പിന്നാലെ ഹാത്രസില്‍ കലാപത്തിന് ശ്രമിച്ചെന്ന പേരില്‍ പുതിയ കേസും ചുമത്തിയിട്ടുണ്ട്.

സിദ്ദീഖിന് ജാമ്യം അനുവദിക്കണമെന്ന് ആവശ്യപ്പെട്ട് സമര്‍പ്പിച്ച കേരളാ പത്രപ്രവര്‍ത്തക യൂണിയന്‍ സമര്‍പ്പിച്ച ഹരജിയില്‍ കേസില്‍ അലഹബാദ് ഹൈക്കോടതിയെ സമീപിക്കാനാണ് സുപ്രിം കോടതിയുടെ നിര്‍ദേശം. ഉത്തര്‍പ്രദേശിലെ ഒരു കോടതിയും ഹരജിക്കാരന് ജാമ്യം അനുവദിക്കില്ലെന്നും അതിനാല്‍ ഭരണഘടനയുടെ 32ാം വകുപ്പ് പ്രകാരം സുപ്രിംകോടതി തന്നെ കേസ് കേള്‍ക്കണമെന്നും കേരളാ പത്രപ്രവര്‍ത്തക യൂണിയനു വേണ്ടി ഹാജരായ കപില്‍സിബല്‍ ആവശ്യപ്പെട്ടു.

എന്നാല്‍ ശരിയല്ലാത്ത കാര്യങ്ങള്‍ സംഭവിക്കുകയാണെങ്കില്‍ അക്കാര്യം നോക്കാന്‍ തങ്ങള്‍ ഇവിടെത്തന്നെയുണ്ടല്ലോ എന്നായിരുന്നു സുപ്രിംകോടതിയുടെ മറുപടി. ഹരജി ഫയലില്‍ സ്വീകരിച്ച കോടതി നാലാഴ്ച്ച കഴിഞ്ഞ് കേസ് വീണ്ടും പരിഗണിക്കും.

എന്നാല്‍ കുടുംബാംഗങ്ങള്‍ക്കു മാത്രമേ ഹേബിയസ് കോര്‍പ്പസ് ഹര്‍ജി നല്‍കാനാവൂ എന്ന് കോടതി ചൂണ്ടിക്കാട്ടി. തുടര്‍ന്നു ഹര്‍ജി ഭേദഗതി ചെയ്തു സമര്‍പ്പിക്കാം എന്ന്, യൂണിയനു വേണ്ടി ഹാജരായ സീനിയര്‍ അഭിഭാഷകന്‍ കപില്‍ സിബല്‍ അറിയിച്ചു.

ഹര്‍ജിയുമായി അലഹാബാദ് ഹൈക്കോടതിയെയാണ് സമീപിക്കേണ്ടതെന്ന് ചീഫ് ജസ്റ്റിസ് അഭിപ്രായപ്പെട്ടു. എന്നാല്‍ ഈ കേസില്‍ യുഎപിഎ ചുമത്തിയുണ്ടെന്നും ഹൈക്കോടതി ഇതില്‍ ജാമ്യം നല്‍കില്ലെന്നും കേസ് വര്‍ഷങ്ങളോളം നീളുമെന്നും കപില്‍ സിബല്‍ അറിയിച്ചു. തുടര്‍ന്ന് ഹര്‍ജി കേള്‍ക്കാമെന്ന് കോടതി അറിയിക്കുകയായിരുന്നു.