19കാരനായ സിഫ്‌നിയോസിന്റെ പിന്മാറ്റത്തിന്റെ കാരണം എന്താണെന്ന് പുറത്തുവന്നിട്ടില്ല. ഐഎസ്എല്ലിന്റെ പുതിയ അതിന്റെ അവസാന ഘട്ടത്തിലേക്ക് അടുക്കുമ്പോള്‍ മികച്ച ഒരു താരം പിന്മാറുന്നത് ബ്ലാസ്‌റ്റേഴ്‌സിന് കടുത്ത തലവേദനയായിരിക്കും. സിഫ്‌നിയോസിന്റെ അഭാവം ബ്ലാസ്‌റ്റേഴ്‌സിന് തിരിച്ചടി നല്‍കുമെന്ന കാര്യത്തില്‍ സംശയമില്ല. താരത്തിന്റെ പിന്മാറ്റം ബ്ലാസ്‌റ്റേഴ്‌സ് മുന്നേറ്റ നിരയുടെ കരുത്ത് കുറക്കും. സിഫ്‌നിയോസിന്റെ സംഭാവനകള്‍ക്ക് ബ്ലാസ്‌റ്റേഴ്‌സ് മാനേജ്‌മെന്റ് നന്ദി അറിയിച്ചു.

നേരത്തെ ടീമിന്റെ പരിശീലകനായിരുന്ന റെനെ മ്യൂളന്‍സ്റ്റീനും ബ്ലാസ്‌റ്റേഴ്‌സ് വിട്ടിരുന്നു. കേരള ബ്ലാസ്‌റ്റേഴ്‌സിന്റെ ആദ്യ രണ്ടു കളികളിലും സിഫ്‌നിയോസ്  പകരക്കാരനായിട്ടായിരുന്നു ഇറങ്ങിയത്. രണ്ടു മത്സരങ്ങളിലും ബ്ലാസ്‌റ്റേഴ്‌സിനു ഗോളൊന്നും നേടാന്‍ കഴിയാത്തതിനാല്‍ മൂന്നാം മത്സരത്തില്‍ റെനെ മ്യൂളന്‍സ്റ്റീന്‍ ആദ്യ ഇലവനില്‍ തന്നെ താരത്തെ പരീക്ഷിക്കുകയായിരുന്നു. റെനെയുടെ തീരുമാനത്തെ ശരി വെച്ച് സിഫ്‌നോസ് കേരള ബ്ലാസ്‌റ്റേഴ്‌സിന്റെ ആദ്യ ഗോളും മത്സരത്തില്‍ നേടിയിരുന്നു. ടീം വിടുന്ന കാര്യം സിഫിനിയോസിസ് മാനേജ്‌മെന്റുമായി ചര്‍ച്ച ചെയ്തിരുന്നതായും പരസ്പര ധാരണയോടെയാണ് തീരുമാനമെടുത്തതെന്നും കേരള ബ്ലാസ്‌റ്റേഴ്‌സ് മീഡിയ മാനേജര്‍ പറഞ്ഞു. നേരത്തെ ടീം വിട്ടതിന് പിന്നാലെ പരിശീലകന്‍ റെനെ മ്യൂളന്‍സ്റ്റീന്‍ ക്യാപ്റ്റന്‍ സന്ദേശ് ജിംഗനെതിരെ ഗുരുതര ആരോപണവുമായി രംഗത്തെത്തിയിരുന്നു. ജിംഗന്‍ പ്രൊഫഷണല്‍ താരമല്ലെന്നും മത്സര തലേന്ന് പുലരുവോളം പാര്‍ട്ടിയും മദ്യപാനവുമാണ് ജിംഗന്റെ വിനോദമെന്നും റെനെ ആരോപിച്ചിരുന്നു. എന്നാല്‍ ഇക്കാര്യം നിഷേധിച്ച് സി.കെ വിനീതും ജിംഗനും രംഗത്തു വന്നിരുന്നു.

Kerala Blasters and Mark Sifneos have mutually agreed to part ways. We are grateful for all his contributions to the club. The club would also like to wish him well for the future. pic.twitter.com/Zf9qqg5nNG

— Kerala Blasters FC (@KeralaBlasters) January 23, 2018

2015-ല്‍ 19-ാം വയസ്സില്‍ പ്രൊഫഷണല്‍ കരിയര്‍ ആരംഭിച്ച സിഫ്‌നിയോസ് ഡച്ച് ക്ലബ്ബ് ആര്‍.കെ.സി വാല്‍വിയ്ക്കില്‍ നിന്നാണ് ബ്ലാസ്‌റ്റേഴ്‌സിലെത്തുന്നത്. ഗ്രീക്ക് വേരുകളുള്ള ഡച്ച് താരമായ അദ്ദേഹം ഐ.എസ്.എലില്‍ കളിക്കുന്ന പ്രായം കുറഞ്ഞ താരമായിരുന്നു. ഈ സീസണില്‍ ഐ.എസ്.എല്ലിന്റെ നൂറാം ഗോള്‍ നേടിയതും അദ്ദേഹം തന്നെയാണ്.

യൂറോപ്യന്‍ ഫുട്‌ബോളില്‍ ജനുവരി ട്രാന്‍സ്ഫര്‍ കാലയളവ് ആയതിനാല്‍, നെതര്‍ലാന്റ്‌സിലെയോ ഗ്രീസിലെയോ ക്ലബ്ബുകളിലേക്ക് കൂടുമാറുന്നതിന്റെ ഭാഗമായാണ് സിഫ്‌നിയോസിന്റെ തീരുമാനം എന്ന് സൂചനകളുണ്ട്. എന്നാല്‍, ഇക്കാര്യത്തില്‍ ഔദ്യോഗിക സ്ഥിരീകരണമായിട്ടില്ല. ഒരു യൂറോപ്യന്‍ ക്ലബ്ബുമായി താരം ധാരണയിലെത്തിയിട്ടുണ്ടെന്നും ജനുവരി 31-ന് മുമ്പ് ചിത്രം വ്യക്തമാകുമെന്നും താരവുമായി ബന്ധപ്പെട്ട കേന്ദ്രങ്ങള്‍ പറയുന്നു.