sivasankar – Chandrika Daily

ശിവശങ്കറും സ്വപ്‌നയും തമ്മില്‍ നടത്തിയ ചാറ്റുകളില്‍ സ്വപ്ന മുഖ്യമന്ത്രിയെ ജോലിക്കായി കണ്ടതിന് തെളിവ്

Chandrika Web — Wed, 01 Mar 2023 09:24:34 +0000

മുഖ്യമന്ത്രി പിണറായി വിജയന്റെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറും സ്വപ്‌നയും തമ്മില്‍ നടത്തിയ ചാറ്റുകളില്‍ സ്വപ്ന മുഖ്യമന്ത്രിയെ ജോലിക്കായി കണ്ടതിന് തെളിവ്. സ്വപ്നയെ നോര്‍ക്കയുടെ നിക്ഷേപകമ്പനിയില്‍ നിയമിക്കാന്‍ ശിവശങ്കര്‍ നീക്കം നടത്തിയതായി തെളിവുകള്‍ പുറത്ത്. സ്വപ്‌നയുടേയും ശിവശങ്കറുടെയും തമ്മിലുള്ള ചാറ്റുകള്‍ ഇ.ഡി സ്ഥിരീകരിച്ചിട്ടില്ലെങ്കിലും വിവരങ്ങള്‍ ശരിയാണെന്നാണ് ഭരണവൃത്തങ്ങളില്‍ പ്രചരിപ്പിക്കുന്ന വര്‍ത്തമാനം. മുഖ്യമന്ത്രിയുടെ പ്രൈവറ്റ് സെക്രട്ടറി സി.എം രവീന്ദ്രനോട് ഏഴാംതീയതി ഹാജരാകാനാണ് ഇ.ഡി നിര്‍ദേശം. മുഖ്യമന്ത്രിയെ സ്വപ്‌ന കണ്ടത് രവീന്ദ്രനെ അറിയിച്ചതായി ശിവശങ്കര്‍ ചാറ്റില്‍ പറയുന്നുണ്ട്.
സ്വപ്നയെ നിയമിക്കുന്നതിനെക്കുറിച്ച് ഉദ്യോഗസ്ഥരെ അറിയിച്ചിരുന്നു. എം.ബി.എ ബിരുദധാരിയെ ആവശ്യമുണ്ടെന്ന് പറഞ്ഞപ്പോള്‍ എല്ലാവരും അംഗീകരിച്ചു. മുഖ്യമന്ത്രിയോട് നിയമനകാര്യം പറയാമെന്ന് ശിവശങ്കര്‍ പറയുമ്പോള്‍ സ്വപ്‌ന പറയുന്നത് മുഖ്യമന്ത്രി അതംഗീകരിക്കുമെന്നായിരുന്നു.നോര്‍ക്കയില്‍ ജോലി തന്നാല്‍ എതിര്‍പ്പുണ്ടാകുമെന്ന് സ്വപ്‌ന പറയുന്നതും ചാറ്റിലുണ്ട്. മുഖ്യമന്ത്രിയെ നേരത്തെ സ്വപ്‌ന കണ്ടിരുന്നത് രവീന്ദ്രനോട് പറഞ്്ഞതായും ശിവശങ്കര്‍ വെളിപ്പെടുത്തുന്നുണ്ട്. മുഖ്യമന്ത്രിക്ക് എല്ലാകാര്യവും അറിയാമെന്നും സ്വപ്‌ന രവീന്ദ്രനോട് പറഞ്ഞതായും ശിവശങ്കര്‍ ചാറ്റിലൂടെ പറയുന്നു.സ്വപ്‌ന രാജിവെക്കുന്നുവെന്ന് പറഞ്ഞപ്പോള്‍ രവീന്ദ്രന്‍ ഞെട്ടിയതായും ചാറ്റിലുണ്ട്.

ലൈഫ് മിഷന്‍ കോഴ കേസ്; എം ശിവശങ്കര്‍ അഞ്ചുദിവസത്തേക്ക് ഇ ഡി കസ്റ്റഡിയില്‍

webdesk12 — Wed, 15 Feb 2023 12:48:19 +0000

ലൈഫ് മിഷന്‍ കോഴ കേസില്‍ അറസ്റ്റിലായ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിനെ അഞ്ചുദിവസത്തേക്ക് ഇ ഡി യുടെ കസ്റ്റഡിയില്‍ വിട്ടു.അടിയന്തരമായി കസ്റ്റഡിയില്‍ വേണമെന്ന ഇഡിയുടെ ആവശ്യം പരിഗണിച്ചാണ് എറണാകുളം സിബിഐ കോടതിയുടെ നടപടി. ആറ് പ്രതികളുള്ള കേസില്‍ അഞ്ചാംപ്രതിയാണ് ശിവശങ്കര്‍. കേസില്‍ 3 കോടി 38 ലക്ഷത്തിന്റെ കള്ളപ്പണ ഇടപാട് നടന്നിട്ടുണ്ട് എന്നാണ് ഇ ഡിയുടെ കണ്ടെത്തല്‍.
വൈകിട്ട് നാലരയോടെ എറണാകുളം സിബിഐ കോടതിയില്‍ ഹാജരാക്കിയ ശിവശങ്കറിനെ അഞ്ചുദിവസത്തേക്ക് കസ്റ്റഡിയില്‍ വിട്ടു. ശാരീരിക പ്രശ്നങ്ങളുണ്ടെന്ന് അറിയിച്ച സാഹചര്യത്തില്‍ ചോദ്യം ചെയ്യലിന് ചില മാനദണ്ഡങ്ങളും കോടതി മുന്നോട്ടു വച്ചിട്ടുണ്ട്. രണ്ടുമണിക്കൂര്‍ ചോദ്യം ചെയ്യലിന് ശേഷം ഇടവേള അനുവദിക്കണം, ഇടവേളയില്‍ ശാരീരിക ബുദ്ധിമുട്ട് ഉണ്ടായാല്‍ വൈദ്യസഹായം നല്‍കണം തുടങ്ങിയവയാണ് നിര്‍ദ്ദേശങ്ങള്‍

ഡോളര്‍ കടത്ത് കേസില്‍ ശിവശങ്കര്‍ ഫെബ്രുവരി 9വരെ റിമാന്‍ഡില്‍

ചന്ദ്രിക വെബ് ഡെസ്‌ക്‌ — Thu, 28 Jan 2021 04:07:11 +0000

കൊച്ചി: നയതന്ത്ര ചാനലില്‍ വിദേശത്തേക്ക് ഡോളര്‍ കടത്തിയ കേസില്‍ കസ്റ്റംസ് അറസ്റ്റ് ചെയ്ത മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍ ഫെബ്രുവരി 9വരെ റിമാന്‍ഡില്‍ തുടരും. സാമ്പത്തിക കുറ്റവിചാരണ കോടതിയാണ് റിമാന്‍ഡ് ചെയ്തത്. ശിവശങ്കര്‍ സമര്‍പ്പിച്ച ജാമ്യാപേക്ഷ ഒന്നിന് പരിഗണിക്കും. പ്രതിയായ മറ്റു രണ്ട് കേസുകളില്‍ ശിവശങ്കറിന് നേരത്തെ ജാമ്യം ലഭിച്ചിരുന്നു.

യു.എ.ഇ കോണ്‍സുലേറ്റിലെ സാമ്പത്തികവിഭാഗം മേധാവി വിദേശത്തേക്ക് 1.9ലക്ഷം ഡോളര്‍ കടത്തിയ കേസിലാണ് സ്വപ്‌ന സുരേഷിന്റെ മൊഴിയുടെ അടിസ്ഥാനത്തില്‍ ശിവശങ്കര്‍ പ്രതിയായത്.

ഇ.ഡി രജിസ്റ്റര്‍ ചെയ്ത കള്ളപ്പണം വെളുപ്പിക്കല്‍ കേസിലും കസ്റ്റംസ് രജിസ്റ്റര്‍ ചെയ്ത സ്വര്‍ണകടത്ത് കേസിലും കോടതി അനുവദിച്ച ജാമ്യം നടപ്പിലാക്കുന്നതു തടയാനാണ് ഡോളര്‍ കേസില്‍ പ്രതിചേര്‍ത്തതെന്നാണ് ശിവശങ്കറിന്റെ ആരോപണം.

ഒന്‍പതു മണിക്കൂര്‍ നീണ്ട ചോദ്യം ചെയ്യല്‍ അവസാനിച്ചു; ശിവശങ്കറിനെ എന്‍ഐഎ വിട്ടയച്ചു, നാളെയും തുടരും

Test User — Mon, 27 Jul 2020 15:55:51 +0000

കൊച്ചി: സ്വര്‍ണക്കടത്ത് കേസില്‍ ഒന്‍പതു മണിക്കൂര്‍ നീണ്ട ചോദ്യം ചെയ്യലിനുശേഷം മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിനെ എന്‍ഐഎ വിട്ടയച്ചു. നാളെ രാവിലെ പത്തുമണിക്ക് ഹാജരാകണമെന്നാവശ്യപ്പെട്ടാണ് വിട്ടയച്ചിരിക്കുന്നത്. എന്‍ഐഎ ദക്ഷിണേന്ത്യാ മേധാവി കെ.ബി. വന്ദന ഐപിഎസിന്റെ നേതൃത്തിലുള്ള സംഘമാണ് ഇദ്ദേഹത്തെ നീണ്ട മണിക്കൂറുകള്‍ ചോദ്യം ചെയ്തത്.

വിഡിയോ കോണ്‍ഫറന്‍സ് വഴിയായിരുന്നു എന്‍ഐഎ ദക്ഷിണേന്ത്യാ മേധാവി ചോദ്യം ചെയ്യാന്‍ ഹാജരായത്. രാവിലെ പത്തു മണിക്കു തുടങ്ങിയ ചോദ്യം ചെയ്യല്‍ വൈകിട്ട് ഏഴുമണി വരെ നീണ്ടു. തിരുവനന്തപുരത്ത് വച്ച് നടത്തിയ ചോദ്യം ചെയ്യലില്‍ നല്‍കിയ മൊഴികളിലെ വൈരുധ്യങ്ങളില്‍ വ്യക്തത തേടാനാണ് എന്‍ഐഎയുടെ പ്രധാന ശ്രമം. മുന്‍കൂര്‍ ജാമ്യത്തിനു ശ്രമിക്കാതെ സ്വന്തം വാഹനത്തില്‍ കൊച്ചിയിലെത്തിയാണ് ശിവശങ്കര്‍ ചോദ്യം ചെയ്യലിനു ഹാജരായത്.