ഫിര്‍ദൗസ് കായല്‍പ്പുറം

തിരുവനന്തപുരം: സോളാര്‍ അന്വേഷണ കമ്മീഷന്‍ റിപ്പോര്‍ട്ടിനെ രാഷ്ട്രീയ ആയുധമാക്കാമെന്നും തെരഞ്ഞെടുപ്പ് കാലത്തടക്കം ഉയര്‍ത്തിക്കൊണ്ടുവന്ന് യു.ഡി.എഫിനെ സമ്മര്‍ദ്ദത്തിലാക്കാമെന്നും കരുതിയ സി.പി.എമ്മിനും മുഖ്യമന്ത്രി പിണറായി വിജയനുമേറ്റ തിരിച്ചടിയായി ഹൈക്കോടതി വിധി. വേങ്ങര ഉപതെരഞ്ഞെടുപ്പ് ദിവസമായ ഒക്‌ടോബര്‍ 11ന് രാവിലെ വാര്‍ത്താസമ്മേളനം വിളിച്ച് ഉമ്മന്‍ചാണ്ടിക്കും മറ്റ് യു.ഡി.എഫ് നേതാക്കള്‍ക്കുമെതിരെ കേസെടുക്കുമെന്ന പ്രഖ്യാപിച്ച പിണറായി, വിശദമായ നിയമോപദേശത്തിന് ശേഷം ഇതില്‍ നിന്ന് പിന്നാക്കം പോയി. എന്നാല്‍ ഇന്നലെ ഹൈക്കോടതി ഉന്നയിച്ച ചോദ്യങ്ങള്‍ റിപ്പോര്‍ട്ടിന്മേല്‍ സര്‍ക്കാര്‍ കാട്ടിയ തിടുക്കവും രാഷ്ട്രീയ ദുരുദ്ദേശവും വ്യക്തമാക്കുന്നതായിരുന്നു.
കമ്മീഷന്‍ റിപ്പോര്‍ട്ടില്‍ ഹൈക്കോടതിയില്‍ നിന്ന് മുഖ്യമന്ത്രി പിണറായി വിജയന് വിമര്‍ശനം നേരിടാന്‍ ഇടയാക്കിയത് അഡ്വക്കേറ്റ് ജനറലിന്റെയും ഡയറക്ടര്‍ ജനറല്‍ ഓഫ് പ്രോസിക്യൂഷന്റെയും നിയമോപദേശങ്ങളായിരുന്നു. ഇരുവരുടേയും ഉപദേശമനുസരിച്ചാണ് ഉമ്മന്‍ചാണ്ടി ഉള്‍പെടെയുള്ള യു.ഡി.എഫ് നേതാക്കള്‍ക്കെതിരെ കേസെടുക്കുമെന്ന് മുഖ്യമന്ത്രി പ്രഖ്യാപിച്ചത്. നിയമോപദേശത്തില്‍ ഉറച്ചുവിശ്വസിച്ച് മുഖ്യമന്ത്രി നടത്തിയ പ്രഖ്യാപനങ്ങളാണ് രണ്ടുമാസത്തിന് ശേഷം കോടതി ചോദ്യം ചെയ്തിരിക്കുന്നത്. കൂടുതല്‍ വിദഗ്ധ നിയമോപദേശം ലഭിച്ചതോടെ പ്രഖ്യാപിച്ച നടപടികള്‍ പിന്നീട് സര്‍ക്കാരിന് മരവിപ്പിക്കേണ്ടിവന്നെങ്കിലും സോളാര്‍ റിപ്പോര്‍ട്ടിനെ ചോദ്യം ചെയ്തുനല്‍കിയ ഹര്‍ജിയിലെ കോടതിയുടെ ആദ്യ ഇടപെടല്‍ സര്‍ക്കാരിനെ അമ്പരപ്പിച്ചിരിക്കുകയാണ്.
സര്‍ക്കാരിന്റെ തുടക്കം മുതല്‍ മുഖ്യമന്ത്രിയെ വെട്ടിലാക്കുന്നത് നിയമോപദേശകരും സ്വന്തം ഓഫീസിലെ ഉപദേശകരുമാണ്. സോളാര്‍ കമ്മീഷന്‍ റിപ്പോര്‍ട്ടില്‍ യാതൊരു കണ്ടെത്തലുകളും ഇല്ലെന്നും പലപ്പോഴായി പറഞ്ഞുകേട്ട ആരോപണങ്ങള്‍ രേഖപ്പെടുത്തുക മാത്രമായിരുന്നെന്നും യു.ഡി.എഫ് വ്യക്തമാക്കിയിരുന്നു. ഇത് ശരിവെക്കുന്നതിന്റെ സൂചനയാണ് ഇന്നലെയുണ്ടായ കോടതിവിധി. വിചാരണ നടക്കുന്നതിന് മുമ്പ് എങ്ങനെ നിഗമനത്തിലെത്താനായെന്ന ഹൈക്കോടതിയുടെ ചോദ്യം സര്‍ക്കാരിനേറ്റ കനത്ത തിരിച്ചടിയായി.

തനിക്കെതിരെ വന്ന പരാമര്‍ശം റിപ്പോര്‍ട്ട് റദ്ദാക്കണമെന്ന ഉമ്മന്‍ചാണ്ടിയുടെ ഹര്‍ജി പരിഗണിക്കുന്നതിനിടെയാണ് കോടതി മുഖ്യമന്ത്രിക്ക് നേരെ വിമര്‍ശനങ്ങള്‍ ഉന്നയിച്ചത്. അതേസമയം സോളാര്‍ കമ്മീഷന്‍ റിപ്പോര്‍ട്ടിലെ തുടര്‍നടപടികള്‍ തടയില്ലെന്ന് കോടതി വ്യക്തമാക്കി. സോളാര്‍ കമ്മീഷന്‍ റിപ്പോര്‍ട്ടും സര്‍ക്കാരിന്റെ അന്വേഷണ ഉത്തരവും റദ്ദാക്കണമെന്ന് ആവശ്യപ്പെട്ടാണ് മുന്‍മുഖ്യമന്ത്രി ഉമ്മന്‍ ചാണ്ടി ഹര്‍ജി സമര്‍പ്പിച്ചത്.

സര്‍ക്കാര്‍ പുറത്തിറക്കിയ വാര്‍ത്താക്കുറിപ്പ് അനുചിതമായെന്ന് വിലയിരുത്തിയ കോടതി, വ്യക്തിയെന്ന നിലയില്‍ പ്രതിച്ഛായ തകര്‍ക്കുന്ന രീതിയില്‍ കാര്യങ്ങള്‍ മുന്നോട്ടു പോകാന്‍ പാടില്ല. വ്യക്തിയുടെ പ്രതിച്ഛായ സംരക്ഷിക്കേണ്ട ഉത്തരവാദിത്തം സര്‍ക്കാരിനുമുണ്ടെന്നും കോടതി പറഞ്ഞു.

സോളാര്‍ കേസില്‍ ആരോപണ വിധേയരായ മുന്‍ മുഖ്യമന്ത്രി ഉമ്മന്‍ചാണ്ടി അടക്കമുള്ളവര്‍ക്കെതിരെ ഉടന്‍ നടപടികളൊന്നും വേണ്ടെന്നാണ് തുടരന്വേഷണരീതി നിശ്ചയിക്കാനുള്ള അന്വേഷണസംഘത്തിന്റെ ആദ്യയോഗത്തിലെ ധാരണ. കമ്മീഷന്‍ റിപ്പോര്‍ട്ടിലെ കണ്ടെത്തലുകളും പൊരുത്തക്കേടുമെല്ലാം വിശദമായി ചര്‍ച്ച ചെയ്തു. കത്തിന്റെ അടിസ്ഥാനത്തില്‍ മാത്രമായി കേസെടുക്കേണ്ടന്ന നിലപാടാണ് അവര്‍ക്കുള്ളത്. ഈ കത്തിലെ ലൈംഗിക ആരോപണം പിന്നീട് എഴുതിച്ചേര്‍ത്തതാണെന്ന് സരിതയുടെ അഭിഭാഷകനായിരുന്ന ഫെനി ബാലകൃഷ്ണന്‍ വെളിപ്പെടുത്തിയിരുന്നു. നിരന്തരം മൊഴിമാറ്റുകയും മുമ്പു നല്‍കിയ പരാതികളില്‍ മൊഴി നല്‍കാന്‍ എത്താതിരിക്കുകയും ചെയ്ത വ്യക്തിയാണ് സരിത. അതിനാല്‍ സരിതയില്‍ നിന്ന് ആദ്യം വിശദമായ മൊഴി രേഖപ്പെടുത്തണമെന്നും അതില്‍ പറയുന്ന കാര്യങ്ങള്‍ സത്യമാണോയെന്നും പരിശോധിക്കണമെന്നുമാണ് അന്വേഷണസംഘത്തിന്റെ തീരുമാനം. ആരോപണവിധേയര്‍ക്ക് പറയാനുള്ളതും കേള്‍ക്കണമെന്നും ആവശ്യമെങ്കില്‍ അതിനുശേഷം കേസെടുത്താല്‍ മതിയെന്നുമാണ് തീരുമാനമുള്ളത്.

ആരോപണങ്ങളുടെ നിജസ്ഥിതി അറിയാതെ തന്നെ ക്രൂശിക്കുന്ന രീതിയാണുണ്ടായത്. രാഷ്ട്രീയരംഗത്തുള്ളവരെ താറടിക്കുന്നതിന് സോളാര്‍ കമ്മീഷനെ കരുവാക്കിയിരിക്കുകയാണ്. സരിതയുടെ കത്തില്‍ ഗൂഢാലോന നടന്നതായും കേസില്‍ തന്നെ കുടുക്കുകയായിരുന്നുവെന്നും കെസി വേണുഗോപാല്‍ പറഞ്ഞു. നീതിരഹിതമായാണ് കമ്മീഷന്‍ അന്വേഷണം നടത്തിയത്. തന്റെ പേര് കത്തില്‍ ഇല്ലായിരുന്നെന്നും കത്ത് പരിശോധന നടത്താതെ റിപ്പോര്‍ട്ടിന്റെ ഭാഗമാക്കുകയായിരുന്നുവെന്നും അദ്ദേഹം പറഞ്ഞു.

നാലുകൊല്ലമായിട്ടും ഒരു കൊച്ച് തെളിവ് പോലും ഹാജരാക്കിയിട്ടില്ല. കമ്മീഷന്‍ റിപ്പോര്‍ട്ടില്‍ ടെലിഫോണ്‍ രേഖകളെക്കുറിച്ച് മാത്രമേ പറയുന്നുള്ളൂ. കമ്മീഷന്‍ നിഗമനങ്ങളിലോ ശുപാര്‍ശകളിലോ പ്രധാന കണ്ടെത്തലുകളില്ല. പക്ഷേ കത്ത് കൂടെചേര്‍ച്ച് തന്നെ വ്യക്തിപരമായി അധിക്ഷേപിക്കുകയാണ് കമ്മീഷന്‍ ചെയ്തതെന്നും വേണുഗോപാല്‍ പറഞ്ഞു.

21 പേജുള്ള സരിതയുടെ കത്ത് 25 പേജാക്കിയത് ഗണേഷിന്റെ വീട്ടില്‍ വെച്ചാണെന്ന് ഫെനി ആരോപിക്കുന്നു. 2015 മാര്‍ച്ച് 13-നായിരുന്നു സംഭവം. പത്തനംതിട്ട ജയിലില്‍ നിന്ന് കൊണ്ടുവന്ന കത്ത് തന്റെ കയ്യില്‍ നിന്ന് വാങ്ങിയത് ഗണേഷ്‌കുമാറിന്റെ പി.എ പ്രദീപാണ്. തന്റെ വാഹനത്തില്‍ വെച്ചാണ് ഇവര്‍ എഴുതിച്ചേര്‍ത്ത പേജുകള്‍കൂടി കത്തിലേക്ക് കൂട്ടിച്ചേര്‍ത്തത്. ടവര്‍ ലൊക്കേഷന്‍ പരിശോധിച്ചാല്‍ കാര്യങ്ങളൊക്കെ വ്യക്തമാകുമെന്നും ഫെനി വാര്‍ത്താസമ്മേളനത്തിലൂടെ അറിയിച്ചു.

കോണ്‍ഗ്രസ് നേതാക്കളുടെ പേരും അവര്‍ക്കെതിരെയുള്ള ലൈംഗിക ആരോപണവുമാണ് ഗണേഷ് കുമാര്‍ കത്തില്‍ എഴുതിച്ചേര്‍ത്തത്. ഗണേഷിനെ മന്ത്രിയാക്കാത്തതിലുള്ള വൈരാഗ്യമാണ് ഇതിനു പിന്നില്‍. കത്ത് ഗണേഷിന്റെ ബന്ധു ശരണ്യമനോജാണ് തയ്യാറാക്കിയതെന്നും ഫെനി കൂട്ടിച്ചേര്‍ത്തു. അതേസമയം, സരിതയും ശരണ്യമനോജും ഇത് നിഷേധിച്ച് രംഗത്തെത്തി.

തിരുവനന്തപുരം: സോളാര്‍ റിപ്പോര്‍ട്ട് നിയമസഭയില്‍ വെച്ചത് മല എലിയെ പ്രസവിച്ചപോലെയെന്ന് മുസ്‌ലിംലീഗ് ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടി എം.പി. ഒന്‍പതാം തിയതി റിപ്പോര്‍ട്ട് നിയമസഭയില്‍ വെക്കുമ്പോള്‍ എന്തോ വലുത് സംഭവിക്കാന്‍ പോകുന്നുവെന്ന നിലയിലായിരുന്നു ഇടതുപക്ഷത്തിന്റെ പ്രചരണം. എന്നാല്‍ ഒരു കത്തും പലപ്പോഴായി മാറ്റി മാറ്റി പറഞ്ഞ മൊഴിയും ആവര്‍ത്തിക്കുന്നതല്ലാതെ, സോളാര്‍ കമ്മീഷന്‍ റിപ്പോര്‍ട്ടില്‍ ഒന്നുമില്ല. കമ്മീഷന്റേതായ കണ്ടെത്തലുകളോ തെളിവുകളോ റിപ്പോര്‍ട്ടില്‍ ഇല്ല. നേരത്തെ നിശ്ചയിച്ച ടേംസ് ഓഫ് റഫറന്‍സില്‍ നിന്ന് സൗകര്യപ്രദമായത് മാത്രം കമ്മീഷന്‍ എടുക്കുകയായിരുന്നു. സോളാറുമായി ബന്ധപ്പെട്ട് 2005 മുതലുള്ള കേസുകളെല്ലാം അന്വേഷിക്കുമെന്നും ടേംസ് ഓഫ് റഫറന്‍സില്‍ ഉണ്ടായിരുന്നു. എന്നാല്‍ സോളാര്‍ റിപ്പോര്‍ട്ടില്‍ ആ ഭാഗം തൊട്ടിട്ടേയില്ല. അതേ പഴയ കത്തും അതേ വര്‍ണനയും മാത്രമാണ് റിപ്പോര്‍ട്ടിലുള്ളതെന്നും കുഞ്ഞാലിക്കുട്ടി വാര്‍ത്താസമ്മേളനത്തില്‍ പറഞ്ഞു.
സോളാര്‍ തട്ടിപ്പില്‍ സംസ്ഥാന സര്‍ക്കാറിന് നഷ്ടമുണ്ടായിട്ടുണ്ടോ എന്ന് ചോദിച്ചപ്പോള്‍, അന്നത്തെ മുഖ്യമന്ത്രിക്ക് സുരക്ഷ ഒരുക്കിയതിനും ജുഡീഷ്യല്‍ അന്വേഷണ കമ്മീഷനെ നിയോഗിച്ചതിനും പണം ചെലവായെന്ന മറുപടിയാണ് റിപ്പോര്‍ട്ടില്‍ പറയുന്നത്. ലൈംഗികകേസ് കൊണ്ടുവരാന്‍ വേണ്ടി ഇതു സംബന്ധിച്ച ആരോപണങ്ങളെ അഴിമതി കേസുമായി ബന്ധിപ്പിച്ചിരിക്കുന്നു. അച്ഛനെന്നും അമ്മാവനെന്നും മുത്തച്ഛനെന്നും പറഞ്ഞവര്‍ തന്നെ പീഡിപ്പിച്ചുവെന്നും പറയുന്നു. അതുമാത്രമാണ് വിശ്വാസത്തിലെടുത്തിട്ടുള്ളത്. റിപ്പോര്‍ട്ടിന്റെ പേരിലുള്ള ചര്‍ച്ച ഏതാനും മണിക്കൂറുകള്‍ മാത്രം നീണ്ടുനില്‍ക്കുന്നതാണ്. കമ്മീഷന് പോലും കണ്ടെത്താനാകാത്ത തെളിവുകള്‍ കണ്ടെത്താനാണ് അന്വേഷണ സംഘത്തെ നിയോഗിച്ചിരിക്കുന്നത്. നേതാക്കള്‍ ടെലിഫോണില്‍ സംസാരിച്ചുവെന്നതാണ് തെളിവായി പറയുന്നത്. ടെലിഫോണ്‍ സംഭാഷണം നടത്തിയത് പീഡനമാകില്ല. എല്‍.ഡി.എഫിന് രാഷ്ട്രീയ ആയുധമാക്കാനുള്ളതൊന്നും സോളാര്‍ റിപ്പോര്‍ട്ടിലില്ല. അധികംവൈകാതെ തന്നെ റിപ്പോര്‍ട്ടില്‍ ഒന്നുമില്ലെന്ന് തെളിയും. റിപ്പോര്‍ട്ടിന്റെ പേരില്‍ യു.ഡി.എഫ് നേതാക്കളെ കുറച്ചു ബുദ്ധിമുട്ടിക്കാം. അവരുടെ കുടുംബത്തില്‍ പ്രശ്‌നങ്ങളുണ്ടാകാം. കുറച്ചുനാള്‍ വാര്‍ത്തയായി നിലനിര്‍ത്താമെന്നതല്ലാതെ ഈ റിപ്പോര്‍ട്ട് കൊണ്ട് യാതൊരു ഫലവുമുണ്ടാകില്ല. യു.ഡി.എഫ് യഥാര്‍ത്ഥ വസ്തുതകള്‍ ജനങ്ങളോട് വിശദീകരിക്കും. യു.ഡി.എഫിന് ഭയപ്പെടേണ്ടതായി യാതൊന്നുമില്ല. റിപ്പോര്‍ട്ട് കൊണ്ടൊന്നും യു.ഡി.എഫിനെ തകര്‍ക്കാന്‍ കഴിയില്ല. അന്തരീക്ഷം മലിനപ്പെടുത്താമെന്നല്ലാതെ സര്‍ക്കാര്‍ നടപടി കൊണ്ട് യാതൊരു പ്രയോജനവും ഉണ്ടാകില്ലെന്നും പി.കെ. കുഞ്ഞാലിക്കുട്ടി പറഞ്ഞു.

കേസെടുക്കുന്നത് വെറും ഒരു കത്തിന്റെ പേരിലാണ്. കത്തിന്റെ വിശ്വാസ്യത എന്നും ചോദ്യം ചെയ്തിട്ടുണ്ട്. സരിതയുടെ കത്ത്മാത്രം റിപ്പോര്‍ട്ടില്‍ രണ്ടിടത്തുണ്ട്. കത്ത് കൃത്രിമമാണ്. ജയിലിലെ കത്ത് 21 പേജാണ്. എന്നാല്‍ കമ്മീഷന്‍ പരിഗണിച്ചത് 25 പേജുള്ള കത്താണ്. സോളാര്‍ റിപ്പോര്‍ട്ടല്ല, ഇത് സരിത റിപ്പോര്‍ട്ടാണ്. ഒരു ബുക്കില്‍ കമ്മീഷന്‍ ഒപ്പിടാത്തത് എന്തുകൊണ്ടാണ്. റിപ്പോര്‍ട്ട് ലഭിച്ചതിനുശേഷമുള്ള സര്‍ക്കാര്‍ നടപടി സുതാര്യമല്ല. മുഖ്യമന്ത്രി വൃത്തികെട്ട ധൃതി കാണിച്ചു. റിപ്പോര്‍ട്ടിനെക്കുറിച്ച് ബന്ധപ്പെട്ട വകുപ്പുകളെ അറിയിച്ചിട്ടില്ല. നിയമപരമായ അന്വേഷണത്തെ ഭയപ്പെടുന്നില്ല. താന്‍ കണ്ണാടിക്കൂട്ടില്‍ നില്‍ക്കുന്നയാളല്ലെന്നും ജനങ്ങളുടെ ഇടയില്‍ അമ്പതുവര്‍ഷമായി പ്രവര്‍ത്തിക്കുന്ന തന്റെ സമീപനങ്ങള്‍ ജനങ്ങള്‍ക്കറിയാമെന്നും ഉമ്മന്‍ചാണ്ടി പറഞ്ഞു.

അതേസമയം, സോളാര്‍ കമ്മീഷന്‍ അന്വേഷണ റിപ്പോര്‍ട്ട് അംഗീകരിക്കില്ലെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. റിപ്പോര്‍ട്ടില്‍ സര്‍ക്കാര്‍ തിരുത്തലുകള്‍ വരുത്തിയിട്ടുണ്ട്. സോളാര്‍ കമ്മീഷന്‍ റിപ്പോര്‍ട്ട് ജസ്റ്റിസ് ശിവരാജന്‍ മുഖ്യമന്ത്രിക്ക് കൈമാറിയ ശേഷം, ഒരു ഉദ്യോഗസ്ഥനെ ശിവരാജന്റെ വീട്ടിലേക്ക് അയച്ചത് എന്തിനാണെന്ന് രമേശ് ചെന്നിത്തല ചോദിച്ചു. ഉമ്മന്‍ ചാണ്ടിയെ പോലെയൊരു നേതാവിനെതിരെയുള്ള ലൈംഗികാരോപണത്തില്‍ കേസെടുക്കാനുള്ള തീരുമാനത്തെ അംഗീകരിക്കാനാവില്ല. ഇതിനെ നിയമപരമായി നേരിടുമെന്നും ചെന്നിത്തല പറഞ്ഞു. ലൈംഗികാരോപണത്തിന് തെളിവില്ല. അന്വേഷണം രാഷ്ട്രീയ പ്രേരിതമാണ്. ദുരുദ്ദേശപരവുമാണ്. രാഷ്ട്രീയ പ്രതികാരമായി ഉപയോഗിക്കാന്‍ ശ്രമിച്ചാല്‍ ശക്തമായി തിരിച്ചടിക്കുമെന്നും അദ്ദേഹം കൂട്ടിച്ചേര്‍ത്തു.

1073 പേജുള്ള റിപ്പോര്‍ട്ട് നാലു വാല്യങ്ങളിലായാണ് സഭയുടെ മേശപ്പുറത്ത് വെച്ചത്. റിപ്പോര്‍ട്ട് വെബ്‌സൈറ്റില്‍ പ്രസിദ്ധീകരിക്കുമെന്ന് സര്‍ക്കാര്‍ നേരത്തെ അറിയിച്ചിരുന്നു. ഇതിന്റെ അടിസ്ഥാനത്തിലാണ് റിപ്പോര്‍ട്ട് മേശപ്പുറത്തു വെച്ചതിനു പിന്നാലെ നിരവധി ആളുകള്‍ വെബ്‌സൈറ്റില്‍ സന്ദര്‍ശിക്കുകയായിരുന്നു.

ഇംഗ്ലീഷിലുള്ള നാലു ഭാഗങ്ങളാണ് ആദ്യം പ്രസിദ്ധീകരിച്ചത്. പിന്നീട് സമ്മേളനം അവസാനിച്ച ശേഷമാണ് മലയാളം പരിഭാഷ സൈറ്റില്‍ ചേര്‍ത്തത്. ഇതുസംബന്ധിച്ച് അറിയിപ്പ് വന്നതോടെ സൈറ്റിന്റെ വേഗം കുറഞ്ഞു. വലിപ്പമേറിയ ഫയല്‍ ആയതിനാലാണ് ഡൗണ്‍ലോഡ് ചെയ്യാന്‍ കാലതാമസം നേരിടുന്നതെന്നായിരുന്നു ഔദ്യോഗിക വൃത്തങ്ങളുടെ വിശദീകരണം. എന്നാല്‍ ഇപ്പോള്‍ സൈറ്റിന്റെ പ്രവര്‍ത്തനം പൂര്‍ണമായും നിശ്ചലമായിരിക്കുകയാണ്.