Somnath Chatterjee – Chandrika Daily

സോമനാഥ് ചാറ്റര്‍ജിയുടെ നില ഗുരുതരമായി തുടരുന്നു

chandrika — Fri, 29 Jun 2018 13:48:24 +0000

കൊല്‍ക്കത്ത: ലോക്സഭ മുന്‍ സപീക്കറും മുതിര്‍ന്ന കമ്മ്യൂണിസ്റ്റ് നേതാവുമായിരുന്ന സോമനാഥ് ചാറ്റര്‍ജിയുടെ നില അതീവഗുരുതരമായി തുടരുന്നു. മസ്തിഷ്‌കാഘാതത്തെ തുടര്‍ന്ന് തിങ്കളാഴ്ചയാണ് അദ്ദേഹത്തെ ബെല്ലേ വ്യൂ ആസ്പത്രിയില്‍ ആസ്പത്രിയില്‍ പ്രവേശിപ്പിച്ചത്.

മസ്തിഷ്‌കത്തിലുണ്ടായ രക്തസ്രാവത്തെ തുടര്‍ന്ന് ചാറ്റര്‍ജി തീവ്രപരിചരണ വിഭാഗത്തില്‍ ചികിത്സയില്‍ തുടരുകയാണെന്നും വിദഗ്ധ പരിശോധനകള്‍ക്ക് ഉള്‍പ്പെടെ വിധേയനാക്കിവരികയാണെന്നും ആസ്പത്രി വൃത്തങ്ങള്‍ അറിയിച്ചു. എന്‍പത്തി എട്ടുകാരനായ ചാറ്റര്‍ജി ഒന്നാം യു.പി.എ സര്‍ക്കാറില്‍ 2004-09 കാലത്ത് ലോക്സഭാ സ്പീക്കറായിരുന്നു. സര്‍ക്കാരിനുള്ള പിന്തുണ പിന്‍വലിക്കാനുള്ള സി.പി.എം തീരുമാനത്തിന്റെ ഭാഗമായി രാജിസമര്‍പ്പിക്കാനുള്ള നിര്‍ദേശം തള്ളിയതിനെ തുടര്‍ന്ന് അദ്ദേഹത്തെ പാര്‍ട്ടിയില്‍ നിന്നും പുറത്താക്കുകയായിയിരുന്നു.

സോമനാഥ് ചാറ്റര്‍ജിയെ ആസ്പത്രിയില്‍ പ്രവേശിപ്പിച്ചു; നില ഗുരുതരം

chandrika — Thu, 28 Jun 2018 08:14:04 +0000

കൊല്‍ക്കത്ത: ആരോഗ്യനില വഷളായതിനെത്തുടര്‍ന്ന് മുന്‍ ലോക്‌സഭാ സ്പീക്കര്‍ സോമനാഥ് ചാറ്റര്‍ജിയെ ആസ്പത്രിയില്‍ പ്രവേശിപ്പിച്ചു.

മസ്തിഷ്‌ക്കാഘാതത്തെത്തുടര്‍ന്ന് കൊല്‍ക്കത്തയിലെ ബെല്ലെ വ്യൂ ആസ്പത്രിയിലാണ് പ്രവേശിപ്പിച്ചത്.

തലച്ചോറിലെ ഞരമ്പ് പൊട്ടിയതു മൂലം അദ്ദേഹത്തിന് ഹെമറോജിക് സ്‌ട്രോക്ക് ഉണ്ടായതായും തലച്ചോറില്‍ രക്തം കട്ടപിടിച്ച അവസ്ഥയാണെന്നും ആസ്പത്രി വൃത്തങ്ങള്‍ പറഞ്ഞു. അദ്ദേഹത്തിന്റെ നില ഗുരുതരമായി തുടരുകയാണെന്ന് ആസ്പത്രി വൃത്തങ്ങള്‍ പറഞ്ഞു.

ഇന്നലെ രാത്രിയാണ് ചാറ്റര്‍ജിയെ ആസ്പത്രിയില്‍ പ്രവേശിപ്പിച്ചത്. മുന്‍ സിപിഎം നേതാവായ അദ്ദേഹം 2004 മുതല്‍ 2009 വരെ ലോക്‌സഭാ സ്പീക്കറായിരുന്നു.

ഇടതു പാളയത്തിലെ ചേരിത്തിരിവ്: കാരാട്ട് പക്ഷത്തിനെതിരെ ആഞ്ഞടിച്ച് സോമനാഥ് ചാറ്റര്‍ജി

chandrika — Thu, 25 Jan 2018 04:04:11 +0000

ന്യൂഡല്‍ഹി: ഇടതുപാളയത്തിലെ ചേരിത്തിരിവില്‍ അതൃപ്തി രേഖപ്പെടുത്തി മുന്‍ സിപിഎം നേതാവ് സോമനാഥ് ചാറ്റര്‍ജി. പ്രകാശ് കാരാട്ട് പക്ഷത്തിനെതിരെ ആഞ്ഞടിച്ചാണ് അദ്ദേഹം നിലപാട് വ്യക്തമാക്കിയത്. ദിവസം കഴിയുന്തോറും ഇടതു പാര്‍ട്ടികള്‍ ക്ഷയിച്ചു വരികയാണെന്നും അതിനാല്‍ ഇടതുപക്ഷത്തിനുമേലുള്ള കാരാട്ട് ലോബിയുടെ നിയന്ത്രണം ഭാവിയില്‍ നല്ലതല്ലെന്നും സോമനാഥ് ചാറ്റര്‍ജി പറഞ്ഞു. ബിജെപിയെ നേരിടുന്നതിന് കോണ്‍ഗ്രസ് സഹകരണം വേണമെന്ന ജനറല്‍ സെക്രട്ടറി സീതാറാം യെച്ചൂരിയുടെ നിലപാട് സിപിഎം കേന്ദ്ര കമ്മിറ്റി തള്ളിയ സംഭവത്തോട് പ്രതികരിക്കുകയായിരുന്നു അദ്ദേഹം. ‘പശ്ചിമ ബംഗാളില്‍ ഇടതു പാര്‍ട്ടികള്‍ അവഗണിക്കപ്പെടുകയാണ്. ഇതിനെ മറികടക്കുന്നതിനാണ് കോണ്‍ഗ്രസ് സഹകരണം ആവശ്യപ്പെട്ട് കൊണ്ട് യെച്ചൂരി കരടു രാഷ്ട്രീയ പ്രമേയം കൊണ്ടുവന്നത്. എന്നാല്‍ അത് അംഗീകരിക്കപ്പെട്ടില്ല. കാരാട്ട് പക്ഷത്തിന്റെ അനാവശ്യ ഇടപെടല്‍ മൂലമാണ് അത് പാസാകാതെ പോയത്. ഇത് ഇടതുപക്ഷത്തെ തന്നെ തിരിച്ചടിക്കും’, ചാറ്റര്‍ജി പറഞ്ഞു.

പ്രകാശ് കാരാട്ടിനെതിരെ ആഞ്ഞടിച്ച് സോമനാഥ് ചാറ്റര്‍ജി; രാഷ്ട്രപതിയാകുന്നത് തടഞ്ഞു

chandrika — Tue, 25 Jul 2017 03:38:01 +0000

കൊല്‍ക്കത്ത: സിപിഎം മുന്‍ ജനറല്‍ സെക്രട്ടറി പ്രകാശ് കാരാട്ടിനെതിരെ ആഞ്ഞടിച്ച് മുന്‍ ലോക്‌സഭാ സ്പീക്കര്‍ സോമനാഥ് ചാറ്റര്‍ജി. പ്രകാശ് കാരാട്ട് എതിര്‍ത്തില്ലായിരുന്നെങ്കില്‍ താന്‍ രാഷ്ട്രപതിയായേനെയെന്ന് സോമനാഥ് ചാറ്റര്‍ജി പറഞ്ഞു. ബംഗാളി ദിനപത്രമായ ആജ്കലിന് നല്‍കിയ അഭിമുഖത്തിലാണ് ചാറ്റര്‍ജിയുടെ വെളിപ്പെടുത്തല്‍.
2007ല്‍ ലോക്‌സഭാ സ്പീക്കറായിരിക്കെ ജെഡിയു നേതാവ് ശരത് യാദവ് തന്നെ വന്നു കണ്ടുവെന്നും രാഷ്ട്രപതി സ്ഥാനാര്‍ത്ഥിയാകണമെന്നും ആവശ്യപ്പെട്ടു. കോണ്‍ഗ്രസ് നേതൃത്വം ആവശ്യപ്പെട്ടത് അനുസരിച്ചാണ് അദ്ദേഹം തന്നെ വന്നു കണ്ടത്. ഡി.എം.കെ, ബിജെഡി, ശിരോമണി അകാലിദള്‍ തുടങ്ങിയ കക്ഷികളും പിന്തുണ അറിയിച്ചതായി ശരത് യാദവ് പറഞ്ഞു. ഇക്കാര്യം സിപിഎം നേതൃത്വവുമായി സംസാരിക്കാന്‍ താന്‍ അദ്ദേഹത്തോട് പറഞ്ഞു. എന്നാല്‍ തന്നെ സ്ഥാനാര്‍ത്ഥിയാക്കാനുള്ള നിര്‍ദേശം പാര്‍ട്ടി ജനറല്‍ സെക്രട്ടറിയായിരുന്ന കാരാട്ട് അത് തള്ളിക്കളഞ്ഞു. പിന്നീട് കാരാട്ട് നേരിട്ട് തന്നെ വന്നു കണ്ടു. രാഷ്ട്രപതി തെരഞ്ഞെടുപ്പില്‍ സിപിഎം ആരെയും സ്ഥാനാര്‍ത്ഥിയായി നിര്‍ദേശിക്കില്ലെന്ന് അറിയിച്ചു. പ്രധാനമന്ത്രിയാകുന്നതില്‍ നിന്ന് ജ്യോതി ബസുവിനെ തടഞ്ഞതില്‍വെച്ച് നോക്കുമ്പോള്‍ തന്റെ കാര്യം വളരെ ചെറിയ വിഷയം മാത്രമാണെന്നും സോമനാഥ് ചാറ്റര്‍ജി പറഞ്ഞു. ഇന്ത്യ-അമേരിക്ക ആണവ കരാറിന്റെ പേരില്‍ ഒന്നാം യുപിഎ സര്‍ക്കാറിനുള്ള പിന്തുണ പിന്‍വലിച്ച കാരാട്ടിന്റെ തീരുമാനത്തിനെതിരെയും ചാറ്റര്‍ജി ആഞ്ഞടിച്ചു.