വിവാദപരമായ ട്വീറ്റുകള്‍ നടത്തിയതിന്റെ പേരില്‍ കുരുക്കിലായ ഗായകന്‍ അഭിജിത്ത് ഭട്ടാചാര്യയുടെ അക്കൊണ്ട് ട്വീറ്റര്‍ നീക്കെ ചെയ്തതിനു പിന്നാലെ ഗയകന്‍ സോനു നിഗവും ട്വിറ്റര്‍ അക്കൗണ്ട് ഡിലീറ്റ് ചെയ്തു. ഇവിടെ മനുഷ്യരില്ല, ഹിന്ദുക്കളും മുസ്ലിംകളും മാത്രമേ ഉള്ളൂവെന്നായിരുന്നു സോനു നിഗത്തിന്റെ അവസാന പോസ്റ്റ്.

ജെ.എന്‍.യു വിദ്യാര്‍ത്ഥി നേതാവ് ഷഹല റാഷിദിനെതിരെയും ബി.ജെ.പി നേതാക്കള്‍ക്കെതിരെയും അശ്ലീലച്ചുവയുള്ള ട്വീറ്റുകള്‍ പോസ്റ്റിയ അഭിജിത്ത് ഭട്ടാചാര്യയുടെ അക്കൊണ്ട് ട്വിറ്റര്‍ ഒഴിവാക്കിയിരുന്നു.

.@sonunigam row: Bengal Muslim leader who announced Rs 10 lakh bounty is no imam https://t.co/ba9Qenpup7 pic.twitter.com/iwf9jzdiVH

— Hindustan Times (@htTweets) April 21, 2017

ബംഗാള്‍ മുസ്ലിംകള്‍ക്ക് അപരചിതിനായ സയ്യിദ് ഷായുടെ ആഹ്വാനത്തോടുള്ള വെല്ലുവിളി എന്ന നിലയില്‍ സോനു നിഗം സ്വയം തന്നെ തലമുണ്ഡനം ചെയ്യാന്‍ സന്നദ്ധനായത് വാര്‍ത്താ പ്രാധാന്യം നേടിയിരുന്നു. പ്രമുഖ ഹെയര്‍ സ്റ്റൈലിസ്റ്റ് ആലിം ഹക്കിം ആണ് മാധ്യമങ്ങളുടെ സാന്നിധ്യത്തില്‍ സോനുവിന്റെ തല മൊട്ടയടിച്ചത്. ആലിം ഹക്കിമിന് 10 ലക്ഷം നല്‍കാന്‍ സോനു നിഗം സയ്യിദ് ഷാ ആതിഫിനോട് ആവശ്യപ്പെട്ടിരുന്നു. എന്നാല്‍, മുണ്ഡനം ചെയ്തതിനൊപ്പം ചെരുപ്പുമാലയിട്ട് നടത്തിക്കുക്കുക കൂടി ചെയ്താല്‍ പണം നല്‍കാമെന്ന് സയ്യിദ് ഷാ മറുപടി നല്‍കി.

ഖുര്‍ആന്‍, ഹദീസ് തുടങ്ങിയ പ്രമാണങ്ങളുടെ അടിസ്ഥാനത്തില്‍ മതവിധി പറയുന്നതിനെയാണ് ഇസ്ലാമില്‍ ഫത്‌വ എന്നു പറയുന്നത്. ഖുര്‍ആന്‍, പ്രവാചകവചനങ്ങള്‍, കര്‍മശാസ്ത്രം തുടങ്ങിയവയില്‍ അഗാധ പാണ്ഡിത്യമുള്ളവര്‍ക്കേ ഫത്‌വ നല്‍കാനുള്ള അവകാശമുള്ളൂ. സാധാരണ നിലയില്‍ മഹല്ലുകളിലെ ഖാസിമാരോ പണ്ഡിത സഭകളോ ആണ് ഫത്‌വ നല്‍കാറുള്ളത്. എന്നാല്‍, സോനു നിഗം വിഷയത്തിലൂടെ പ്രസിദ്ധനായ സയ്യിദ് ഷാ ആതിഫ് മതപണ്ഡിതനോ ഏതെങ്കിലും പണ്ഡിത സഭയില്‍ അംഗമോ അല്ല. സ്വന്തം നിലയില്‍ ഇദ്ദേഹം നടത്തിയ ഒരു ആഹ്വാനത്തെ കേട്ടപാതി മാധ്യമങ്ങള്‍ ഫത്‌വ എന്നു പേരിട്ട് വാര്‍ത്ത നല്‍കുകയായിരുന്നു.

അതിനിടെ, വ്യത്യസ്ത മതങ്ങളിലെ പുരോഹിതര്‍ക്കൊപ്പം സയ്യിദ് ഷാ ഖാദിരി ഇന്നലെ മാധ്യമങ്ങളെ കണ്ടു. സോനു നിഗം വിഷയത്തില്‍ സയ്യിദ് ഷായ്ക്ക് പിന്തുണ അറിയിച്ചാണ് ഹിന്ദു, ബുദ്ധ, ക്രിസ്ത്യന്‍ മതനേതാക്കള്‍ ഷാക്കൊപ്പം പത്രസമ്മേളനത്തിനെത്തിയത്. പ്രവാചകന്റെ 35-ാം പിന്‍തലമുറയിലെ അംഗമാണ് താന്‍ എന്ന് സയ്യിദ് ഷാ ഖാദിരി അവകാശപ്പെട്ടു.

മൗലവിയുടെ പ്രഖ്യാപനം കേട്ട സോനു അദ്ദേഹത്തെ വെല്ലുവിളിക്കുകയായിരുന്നു. താന്‍ മൊട്ടയടിച്ച് ജനങ്ങള്‍ക്കുമുമ്പില്‍ എത്തുമെന്നും മൗലവി പത്തുലക്ഷം നല്‍കാന്‍ തയ്യാറായിക്കോളൂ എന്നും സോനു രാവിലെ ട്വീറ്റ് ചെയ്തിരുന്നു. തുടര്‍ന്നാണ് നാടകീയ രംഗങ്ങള്‍ അരങ്ങേറിയത്. ഉച്ചക്കു രണ്ടിന് നടത്തിയ വാര്‍ത്താ സമ്മേളനത്തിലാണ് സോനു തലമൊട്ടയടിച്ചെത്തിയത്. താന്‍ ഒരു സാമൂഹ്യ വിഷയത്തിലാണ് പ്രതികരിച്ചതെന്നും മതപരമായ വിഷയത്തിലല്ല പരാമര്‍ശം നടത്തിയതെന്നും പറഞ്ഞു. അഭിപ്രായ പ്രകടനത്തിനുള്ള സ്വാതന്ത്ര്യമാണ് എടുത്തത്. ഒരു മതത്തേയും അപമാനിച്ചിട്ടില്ല. തന്റെ അഭിപ്രായമാണ് പറഞ്ഞത്. പ്രവാചകന്‍ മുഹമ്മദിനെ അപമാനിക്കാന്‍ ശ്രമിച്ചിട്ടില്ലെന്നും സോനുനിഗം വാര്‍ത്താസമ്മേളനത്തില്‍ വിശദീകരിച്ചു.

കഴിഞ്ഞ ദിവസമാണ് ബാങ്കുവിളിയെ അധിക്ഷേപിച്ച് ബോളിവുഡ് ഗായകന്‍ സോനുനിഗം രംഗത്തെത്തിയത്. എല്ലാവരേയും ദൈവം അനുഗ്രഹിക്കട്ടെ. താനൊരു മുസ്‌ലിം അല്ല. രാവിലെ ബാങ്കുവിളികേള്‍ക്കുന്നതുമൂലം ഉറക്കത്തില്‍ നിന്നും എഴുന്നേല്‍ക്കുകയാണെന്നും എന്നാണ് ഇന്ത്യയില്‍ ഇതിനൊരു അവസാനം ഉണ്ടാവുകയെന്നുമായിരുന്നു സോനുവിന്റെ ട്വീറ്റ്. ട്വീറ്റ് പുറത്തുവന്നതോടെ സോനുവിനെതിരെ വിമര്‍ശനങ്ങളും ഉയര്‍ന്നു. ഈ വിമര്‍ശനങ്ങളുടെ പശ്ചാത്തലത്തിലാണ് മൗലവിയുടെ വിമര്‍ശനവും പ്രഖ്യാപനവും പുറത്തുവരുന്നത്.