റോഹിന്‍ഗ്യ കൂട്ടക്കുഴിമാടങ്ങള്‍ക്ക് തെളിവുമായി അന്വേഷണ റിപ്പോര്‍ട്ട്

മ്യാന്മറിലെ റോഹിന്‍ഗ്യ മുസ്്‌ലിം ഗ്രാമങ്ങളില്‍ സൈന്യം നടത്തിയ കൂട്ടക്കൊലകള്‍ക്ക് തെളിവുണ്ടെന്ന് അസോസിയേറ്റഡ് പ്രസ്. റോഹിന്‍ഗ്യ മുസ്്‌ലിംകളെ കൊന്നൊടുക്കി അഞ്ച് കൂട്ടക്കുഴിമാടത്തില്‍ തള്ളിയതായി അസോസിയേറ്റഡ് പ്രസ് നടത്തിയ പ്രത്യേക അന്വേഷണത്തില്‍ കണ്ടെത്തി.

കൊല്ലപ്പെട്ടവരുടെ ബന്ധുക്കളും ദൃക്‌സാക്ഷികളും നല്‍കിയ വിവരങ്ങളുടെ അടിസ്ഥാനത്തിലാണ് റിപ്പോര്‍ട്ട് തയാറാക്കിയത്. ഗ ദാര്‍ പിന്‍ ഗ്രാമത്തില്‍ ഫുട്‌ബോളിന് സമാനമായ കളിയില്‍ ഏര്‍പ്പെട്ടിരുന്നവര്‍ക്കുനേരെ സൈന്യം വെടിവെക്കുകയായിരുന്നു. സ്ഥലത്തുണ്ടായിരുന്ന ഭൂരിഭാഗം പേരും കൊല്ലപ്പെട്ടു. സുഹൃത്തുക്കളില്‍ ആറുപേരുടെ മൃതദേഹങ്ങള്‍ രണ്ട് വ്യത്യസ്ത കൂട്ടക്കുഴിമാടങ്ങളില്‍ അടക്കം ചെയ്ത നിലയില്‍ കണ്ടതായി നൂര്‍ കാദിര്‍ എന്നയാള്‍ പറയുന്നു. കൂട്ടക്കുരുതികളുടെ തെളിവുകള്‍ മുഴുവന്‍ തേച്ച്മായ്ച്ചു കളയാനാണ് സൈന്യം ശ്രമിച്ചത്. ആസിഡ് ഉപയോഗിച്ച് മൃതദേഹങ്ങള്‍ ദഹിപ്പിച്ചുകളയുന്ന വീഡിയോ ദൃശ്യവും അസോസിയേറ്റഡ് പ്രസിന് ലഭിച്ചിട്ടുണ്ട്.

കനത്ത മഴയില്‍ മണ്ണ് ഇളകി നീങ്ങിയപ്പോഴാണ് കൂട്ടക്കുഴിമാടങ്ങള്‍ കണ്ടതെന്ന് ദൃക്‌സാക്ഷികള്‍ പറയുന്നു. റാഖൈന്‍ സ്റ്റേറ്റില്‍ നടന്ന വംശഹത്യയുടെ വ്യക്തമായ അടയാളങ്ങളാണ് റിപ്പോര്‍ട്ടിലുള്ളതെന്ന് മ്യാന്മറിലെ യു.എന്‍ മനുഷ്യാവകാശ പ്രതിനിധി യാങ്കീ ലീ അഭിപ്രായപ്പെട്ടു. മുന്‍കൂട്ടി തയാറാക്കിയ പദ്ധതി പ്രകാരമാണ് കൊലപാതകങ്ങള്‍ നടത്തിയതെന്ന് വ്യക്തമാണെന്നും ലീ പറഞ്ഞു.

റോഹിന്‍ഗ്യ കൂട്ടക്കുരുതിക്കു പിന്നില്‍ പ്രവര്‍ത്തിച്ച പ്രതികളെ നിയമത്തിനു മുന്നില്‍ കൊണ്ടുവരണമെന്ന് യു.എന്‍ മനുഷ്യാവകാശ കമ്മീഷണര്‍ സെയ്ദ് റഅദ് അല്‍ ഹുസൈന്‍ ആവശ്യപ്പെട്ടുകഴിഞ്ഞു. അന്താരാഷ്ട്ര ക്രിമിനല്‍ കോടതിയില്‍ കേസ് വരികയാണെങ്കില്‍ ആദ്യം പ്രതിക്കൂട്ടില്‍ കയറേണ്ടിവരിക സൂകിയും മ്യാന്മര്‍ സൈനിക മേധാവി ജനറല്‍ ആങ് മിന്‍ ഹ്ലാങുമായിരിക്കും.

റോഹിന്‍ഗ്യ മുസ്്‌ലിംകളെ ആസൂത്രിതമായി കൂട്ടക്കൊല ചെയ്തത് വംശഹത്യയാണെന്ന വസ്തുത തള്ളിക്കളയാനാവില്ലെന്ന് യു.എന്‍ മനുഷ്യാവകാശ കൗണ്‍സിലില്‍ റഅദ് വ്യക്തമാക്കിയിരുന്നു. സൈനിക നടപടിയുടെ വ്യാപ്തി പരിശോധിക്കുമ്പോള്‍, ഉന്നതതലത്തിലാണ് തീരുമാനമെടുത്തതെന്ന് വ്യക്തമാണെന്നും അദ്ദേഹം ചൂണ്ടിക്കാട്ടി. ഭീകരമായ കുറ്റകൃത്യങ്ങളാണ് മ്യാന്മറിലെ റോഹിന്‍ഗ്യ മേഖലയില്‍ നടന്നത്. യു.എന്‍ അഭിപ്രായപ്രകാരം ഏതെങ്കിലുമൊരു വിഭാഗത്തെ നശിപ്പിക്കുകയെന്ന ഉദ്ദേശ്യത്തോടെ നടത്തുന്ന ഏത് പ്രവര്‍ത്തനവും വംശഹത്യയുടെ പരിശിധിയില്‍ വരും. റാഖൈന്‍ സ്റ്റേറ്റില്‍ നടന്നത് വംശഹത്യയാണെന്ന് തെളിയിക്കുന്നതിനും തുടര്‍ നടപടി സ്വീകരിക്കുന്നതിനും അന്താരാഷ്ട്ര അന്വേഷണം വേണമെന്ന് റഅദ് അല്‍ ഹുസൈന്‍ ആവശ്യപ്പെട്ടു. വംശഹത്യക്ക് നേതൃത്വം നല്‍കിയതിന് ഏതെങ്കിലും വ്യക്തികള്‍ക്കെതിരെ തെളിവു കൊണ്ടുവരാന്‍ പ്രയാസമാണ്.

കാരണം കൂട്ടക്കുരുതികള്‍ നടത്തുന്നത് രേഖാമൂലമുള്ള ഉത്തരവിലൂടെയോ പ്രത്യേക നിര്‍ദേശത്തിലൂടെയോ അല്ല. പക്ഷെ, ഭാവിയില്‍ നിലവിലുള്ള വസ്തുതകളുടെ അടിസ്ഥാനത്തില്‍ ഒരു കോടതിക്ക് നിയമനടപടി സ്വീകരിക്കാവുന്നതാണെന്ന് അദ്ദേഹം പറഞ്ഞു. ആഗസ്്ത് 25ന് റാഖൈനില്‍ സൈന്യം നരനായാട്ട് തുടങ്ങിയ ശേഷം ആറര ലക്ഷം റോഹിന്‍ഗ്യ മുസ്്‌ലിംകളാണ് മ്യാന്മര്‍ വിട്ട് ബംഗ്ലാദേശിലെത്തിയത്. സൈന്യത്തിന്റെ ആക്രമണത്തില്‍ ഒമ്പതിനായിരത്തിലേറെ മുസ്്‌ലിംകള്‍ കൊല്ലപ്പെട്ടിട്ടുണ്ടെന്നാണ് അന്താരാഷ്ട്ര മെഡിക്കല്‍ സന്നദ്ധ സംഘടന ഡോക്ടേഴ്‌സ് വിത്തൗട്ട് ബോര്‍ഡേഴ്‌സിന്റെ കണക്ക്. ആഗസ്റ്റില്‍ അക്രമങ്ങള്‍ തുടങ്ങുന്നതിനു ആറുമാസം മുമ്പ് തന്നെ സൂകിയെ ഫോണില്‍ വിളിച്ച് റോഹിന്‍ഗ്യകളെ സംരക്ഷിക്കാന്‍ നടപടി സ്വീകരിക്കണെന്ന് ആവശ്യപ്പെട്ടിരുന്നതായി റഅദ് വെളിപ്പെടുത്തി.

ജീവിതത്തിന്റെ വിവിധ തുറകളില്‍ മികച്ച സംഭാവനകള്‍ പരിഗണിച്ച് നല്‍കുന്ന പുരസ്‌കാരത്തിന് സൂകിയും അര്‍ഹയായിരുന്നു. ഡബ്ലിന്‍ നഗരവുമായി സൂകിക്കുള്ള ബന്ധം തങ്ങള്‍ക്കെല്ലാം അപമാനമാണെന്ന് പുരസ്‌കാരം തിരിച്ചുനല്‍കിക്കൊണ്ട് ഗെല്‍ഡോഫ് വ്യക്തമാക്കി. റോഹിന്‍ഗ്യ മുസ്്‌ലിംകളുടെ ദുരിതത്തിന് പരിഹാരം കാണുന്നതിന് സൈനിക നടപടിയെ ന്യായീകരിക്കാന്‍ ശ്രമിച്ച സൂകിക്കെതിരെ അന്താരാഷ്ട്രതലത്തില്‍ പ്രതിഷേധം ശക്തമാണ്.

ഡബ്ലിന്‍ നഗരം സൂകിയെ ആദരിച്ചെങ്കിലും അവരിപ്പോള്‍ നമ്മെ അമ്പരപ്പിക്കുകയും അപമാനിക്കുകയുമാണ് ചെയ്യുന്നതെന്ന് അദ്ദേഹം പറഞ്ഞു. അയര്‍ലന്റിന്റെ തലസ്ഥാനമായ ഡബ്ലിനിലെ സിറ്റി ഹാളില്‍ ഗെല്‍ഡോഫ് പുരസ്‌കാരം തിരിച്ചുനല്‍കി. സൂകിയുടെ നൊബേല്‍ പുരസ്‌കാരവും തിരിച്ചുവാങ്ങണമെന്ന ആവശ്യം ശക്തമായിട്ടുണ്ട്. റോഹിന്‍ഗ്യ വിഷയത്തില്‍ ശക്തമായ നിലപാട് സ്വീകരിക്കണമെന്ന് ഒരുസംഘം ഐറിഷ് ഗായകര്‍ സൂകിയോട് അഭ്യര്‍ത്ഥിച്ചു.

കഴിഞ്ഞ മാസം ഓക്‌സ്ഫഡ് സിറ്റി കൗണ്‍സിലും സൂകിക്ക് നല്‍കിയ ഫ്രീഡം ഓഫ് ദ സിറ്റി പുരസ്‌കാരം റദ്ദാക്കാന്‍ തീരുമാനിച്ചിട്ടുണ്ട്. ലണ്ടന്‍ നഗരവും സമാന നടപടി സ്വീകരിക്കുകയുണ്ടായി. ഓക്‌സ്ഫഡ് സര്‍വകലാശാല സൂകിയുടെ ഛായാചിത്രം നീക്കിയിരുന്നു.

പ്രിയ സൂകി നിങ്ങള്‍ സമാധാനത്തിന്റെ നൊബേല്‍ പുരസ്‌കാരം നേടിയ വര്‍ഷമാണ് ഞാന്‍ ജനിച്ചത്. നമ്മുടെ രാജ്യത്തേക്ക് ഒരാള്‍ കൊണ്ടു വരുന്ന ഏറ്റവും വലിയ ബഹുമതിയായിരുന്നു അത്. ഞാന്‍ താമസിച്ചിരുന്ന റാകിനെ മേഖലയിലെ മോങ്ദാവുവില്‍ എല്ലാവര്‍ക്കും നിങ്ങളുടെ പുരസ്‌കാര ലബ്ധി സന്തോഷം നല്‍കിയിരുന്നു. നിങ്ങള്‍ക്ക് ലഭിച്ച പുരസ്‌കാരം തങ്ങളുടേത് കൂടിയായാണ് ഏവരും കണ്ടത്. സ്വാതന്ത്ര്യത്തിന് ശേഷം ഞങ്ങള്‍ക്ക് (റോഹിംഗ്യകള്‍) ആദ്യമായി ഈ രാജ്യത്തിന്റെ പൗരന്‍മാരാണെന്ന തോന്നല്‍ അന്നുണ്ടായി.

മ്യാന്‍മറികളെന്ന് വിളിക്കുന്നതില്‍ അഭിമാനം തോന്നി. സൈന്യത്തില്‍ നിന്നും വര്‍ഷങ്ങളായി ലഭിച്ചു കൊണ്ടിരുന്ന കൊടിയ പീഡനത്തില്‍ നിന്നും നിങ്ങളുടെ പുരസ്‌കാരം ഞങ്ങളെ പ്രചോദിപ്പിച്ചു. ഞാന്‍ വളര്‍ച്ചയുടെ ഓരോ ഘട്ടത്തിലും എന്റെ മുത്തച്ഛനില്‍ നിന്നും കേട്ടത് നിങ്ങളെ കുറിച്ചുള്ള വലിയ വാക്കുകളായിരുന്നു. നിങ്ങളുടെ പാര്‍ട്ടിയിലെ നേതാക്കന്‍മാര്‍ സന്ദര്‍ശനത്തിന് എത്തുമ്പോള്‍ വലിയ ആടിനേയോ മാടിനേയോ അറുത്ത് വിഭവങ്ങളൊരുക്കി അദ്ദേഹം അവരെ സ്വാഗതം ചെയ്തിരുന്നു.

നിങ്ങള്‍ തെരഞ്ഞെടുത്ത രീതി പിന്തുടരാനായിരുന്നു എന്റെ പിതാവും മുത്തച്ഛനും തീരുമാനിച്ചത്. നിങ്ങളുടെ ശക്തമായ വാക്കുകളില്‍ എന്റെ മാതാവ് ഏറെ ആകൃഷ്ടയായിരുന്നു. 2010ല്‍ നിങ്ങളെ വീട്ടു തടങ്കലില്‍ നിന്നും സൈന്യം മോചിപ്പിച്ചപ്പോള്‍ ഞങള്‍ ഏറെ സന്തോഷിച്ചു. പക്ഷേ കഴിഞ്ഞ ഏഴു വര്‍ഷമായി ഞങ്ങള്‍ (റോഹിംഗ്യന്‍ മുസ്്‌ലിംകള്‍) പീഡിതരായി ക്രൂരമായ വംശഹത്യയുടെ ഇരകളായി തുടരുകയാണ്. ഇപ്പോള്‍ പക്ഷേ ഒരു മാറ്റമുണ്ട്. നിങ്ങള്‍ കൂടിയാണ് ഇതിന് നേതൃത്വം നല്‍കുന്നത്.

2015ല്‍ പൊതു തെരഞ്ഞെടുപ്പില്‍ നിങ്ങള്‍ ജയിച്ചപ്പോള്‍ മുസ്്‌ലിം പ്രതിനിധികളെ പാര്‍ട്ടിയില്‍ നിന്നും പുറത്താക്കി രാഷ്ട്രീയ ഭീരുത്വത്തിന്റെ ആദ്യ സൂചന നിങ്ങള്‍ പ്രകടിപ്പിച്ചിരുന്നു. മാസങ്ങള്‍ക്കു ശേഷം നിങ്ങളുടെ ഭരണകൂടം റോഹിംഗ്യകളെ തുടച്ചു നീക്കാനുള്ള പദ്ധതി ആരംഭിച്ചു. പ്രത്യേകിച്ചും വടക്കന്‍ റാകിനെ സംസ്ഥാനത്തു നിന്നും. ഈ കാലയളവില്‍ എണ്ണമറ്റ സിവിലിയന്‍മാരാണ് കൊല്ലപ്പെട്ടത്.

പിഞ്ചുകുഞ്ഞുങ്ങടക്കം നിരവധി സ്ത്രീകള്‍ ബലാത്സംഗത്തിനിരയായി. ലോക വ്യാപകമായി ഇതിനെതിരെ പ്രതിഷേധം ഉയര്‍ന്നപ്പോഴും നിങ്ങള്‍ മാത്രം അത് നിരാകരിച്ചു. നൂറ്റാണ്ടുകളായി റാകിനെയില്‍ വസിക്കുന്ന ഞങ്ങളെ റോഹിംഗ്യ എന്നു ഉച്ചരിക്കാന്‍ പോലും നിങ്ങള്‍ക്ക് ആയിരുന്നില്ല. ആഗസ്റ്റ് 25ന് വംശീയ കലാപം ആരംഭിച്ചതിനു ശേഷം അഞ്ചു ലക്ഷം പേരാണ് ബംഗ്ലാദേശിലേക്ക് പലായനം ചെയ്തത്.

ആയിരത്തിലധികം റോഹിംഗ്യകള്‍ കൊല്ലപ്പെട്ടു. 15.000ല്‍ അധികം ഭവനങ്ങള്‍ നാമാവശേഷമായി. സെപ്തംബര്‍ ഒന്നിന് ഞാനും മാതാപിതാക്കളോടൊപ്പം വീട് വിട്ട് അഭയാര്‍ത്ഥി ക്യാമ്പിലെത്തിയ മൂന്ന് പകലും രണ്ട് രാത്രിയും യാത്ര ചെയ്ത് നാഫ് നദി വഴി ബംഗ്ലാദേശിലെത്തി. ഇപ്പോള്‍ കുതുപലോങ് അഭയാര്‍ത്ഥി ക്യാമ്പില്‍ കഴിയുന്നു. ഞങ്ങളുടെ വീട് ചാരമായെന്ന് ഞാന്‍ അറിഞ്ഞു. പലരും പറയുന്നു സൈന്യമാണ് വീടുകള്‍ ചാമ്പലാക്കുന്നതെന്ന്. പക്ഷേ ഞാന്‍ അതിന് കുറ്റപ്പെടുത്തുന്നത് നിങ്ങളെയാണ്.

നിങ്ങള്‍ എന്റെ വീട് മാത്രമല്ല ചുട്ട് ചാമ്പലാക്കിയത്. എന്റെ പുസ്തകങ്ങളേയുമാണ്. ഒരു എഴുത്തുകാരനാവുക എന്നതായിരുന്നു എന്റെ എക്കാലത്തേയും സ്വപ്‌നം. സിത്ത് വെ യൂണിവേഴ്‌സിറ്റിയില്‍ ഇംഗ്ലീഷ് പഠിക്കുകയായിരുന്നു ഞാന്‍. പക്ഷേ ഇപ്പോള്‍ നിങ്ങള്‍ പറയുന്നു റോഹിംഗ്യകള്‍ക്ക് അവിടേക്ക് പ്രവേശനമില്ലെന്ന്. അതിനാല്‍ ഞാന്‍ പുസ്തകങ്ങളില്‍ നിന്നും പ്രചോദനം ഉള്‍ക്കൊള്ളുകയായിരുന്നു.

നിങ്ങള്‍ കത്തിച്ചത് നെല്‍സന്‍ മണ്ടേലയുടെ ലോങ് വാക് ടു ഫ്രീടമാണ്, നിങ്ങള്‍ കത്തിച്ചത് മഹാത്മാ ഗാന്ധിയുടെ എന്റ സത്യാന്വേഷണ പരീക്ഷണങ്ങളാണ്, ലേയ്മ ബോവീയുടെ മൈറ്റി ബി അവര്‍ പവറാണ് നിങ്ങള്‍ ചാമ്പലാക്കിയത്. അല്ല നിങ്ങള്‍ നിങ്ങളുടെ തന്നെ സ്വന്തം പുസ്തകമായ ഫ്രീഡം ഫ്രം ഫിയറാണ് കത്തിച്ചത്. എന്റെ പ്രതീക്ഷകളേയും സ്വപ്‌നങ്ങളേയും ഒരുപിടി ചാരമാക്കാനായി എന്നതാണ് നിങ്ങളുടെ നേട്ടം.
ഇപ്പോള്‍ ഞങ്ങളുടെ പേര് അഭയാര്‍ത്ഥികളെന്നാണ്. എന്റെ പിതാവിന് നിങ്ങളോട് ചോദിക്കാന്‍ ഒരു ചോദ്യമുണ്ട്. എന്തു കൊണ്ട് റോഹിംഗ്യകളെ സന്ദര്‍ശിക്കുന്നില്ല. ഞങ്ങളുടെ അവസ്ഥ നിങ്ങള്‍ അറിയുന്നുണ്ടോ?. ലോകത്തെ ഏറ്റവും പീഡിത വിഭാഗം എന്നതല്ല എന്റെ ഹൃദയ വേദനക്കു കാരണം. പകരം ആങ് സാങ് സൂകിയുടെ മ്യാന്‍മറില്‍ പീഡനമേല്‍ക്കുന്നവരെന്നതാണ്.

ആകാധനയോടെ കണ്ടിരുന്ന സൂകി എന്ന നിങ്ങളുടെ പേര് സ്വരാജ്യത്തു നിന്നും അഭയം തേടി മറ്റു രാജ്യങ്ങളില്‍ ചിന്നിച്ചിതറി തെറിച്ചു കിടക്കുന്ന ലക്ഷക്കണക്കിന് റോഹിംഗ്യകളുടെ മനസില്‍ എണ്ണമറ്റ ഏകാധിപതികളുടേയും സ്വാഛാധിപതികളുടേയും കൂടേയാണ്.