രാജ്യത്ത് കര്‍ഷകര്‍ക്കും, പാവപ്പെട്ടവര്‍ക്കും വിദ്യാര്‍ഥികള്‍ക്കുമുള്‍പ്പെടെ നല്‍കിയ വാഗ്ദാനങ്ങള്‍ പ്രധാനമന്ത്രിക്ക് നിറവേറ്റാന്‍ കഴിഞ്ഞില്ലെന്ന് മായാവതി പറഞ്ഞു. ഓരോ റാലികളിലും വാഗ്ദാനങ്ങള്‍ നടത്തുമെങ്കിലും മോദി പിന്നീടത് മറക്കുകയാണ് ചെയ്യുന്നത്. സംസ്ഥാനത്തെ ക്രമസമാധാനനില തകര്‍ന്നിരിക്കുകയാണ്. ജാതിയുടേയും മതത്തിന്റേയും പേരില്‍ ജനങ്ങളെ ഭിന്നിപ്പിച്ച് രാഷ്ട്രീയ നേട്ടങ്ങളുണ്ടാക്കുകയാണ് ബി.ജെ.പി. ഇതിനായി അവര്‍ സി.ബി.ഐയെ വരെ ഉപയോഗിക്കുകയാണെന്നും മായാവതി പറഞ്ഞു.

ലക്‌നൗവ്വില്‍ നടത്തിയ വാര്‍ത്താസമ്മേളനത്തില്‍ പിറന്നാള്‍ ആശംസിച്ച എല്ലാവര്‍ക്കും മായാവതി നന്ദി പറഞ്ഞു. പാര്‍ട്ടിയുടെ അടിസ്ഥാനതത്വങ്ങള്‍ ഉള്‍ക്കൊണ്ട് പാവപ്പെട്ടവര്‍ക്കു വേണ്ടി പ്രവര്‍ത്തിക്കണമെന്ന് മായാവതി പാര്‍ട്ടിപ്രവര്‍ത്തകരോട് ആഹ്വാനം ചെയ്തു. ലോക്‌സഭാ തെരഞ്ഞെടുപ്പ് അടുത്തുനില്‍ക്കുമ്പോഴാണ് ഇത്തവണത്തെ പിറന്നാള്‍ എത്തിയിരിക്കുന്നത്. യു.പിയില്‍നിന്നും ബി.ജെ.പിയെ പുറത്താക്കാന്‍ എസ്.പിയും ബി.എസ്.പിയും കൈകോര്‍ത്തിരിക്കുകയാണ്. കഴിഞ്ഞ കാലങ്ങളിലെ അകല്‍ച്ചമാറി ഇത്തവണ രാജ്യത്തിന്റെ താല്‍പ്പര്യത്തിനായി കൈകോര്‍ത്തിരിക്കുകയാണ്. ഇതായിരിക്കാം ഒരുപക്ഷേ തനിക്കു കിട്ടിയ ഏറ്റവും വലിയ പിറന്നാള്‍ സമ്മാനമെന്നും മായാവതി പറഞ്ഞു.

ഉച്ചക്കുശേഷം എസ്.പി നേതാവ് അഖിലേഷ് യാദവ് മായാവതിയുമായി കൂടിക്കാഴ്ച്ച നടത്തും. മായാവതിയും അഖിലേഷും നടത്തിയ സംയുക്ത വാര്‍ത്താസമ്മേളനത്തിലാണ് ഇരുവരും കൈകോര്‍ക്കുന്നുവെന്ന് പ്രഖ്യാപിച്ചത്.

വാര്‍ത്താ സമ്മേളനത്തില്‍ സഖ്യപ്രഖ്യാപനം നടക്കുമെന്ന സൂചനകള്‍ ഇതിനകം വന്നു കഴിഞ്ഞു. അഖിലേഷ് യാദവിന്റെ സമാജ്‌വാദി പാര്‍ട്ടിയും മായാവതിയുടെ ബഹുജന്‍ സമാജ്‌വാദി പാര്‍ട്ടിയും സഖ്യമായി ഉപതെരഞ്ഞെടുപ്പുകളെ നേരിട്ടപ്പോള്‍ മികച്ച പ്രതികരണമാണ് ഉണ്ടാക്കാനായത്.

ഇതോടെ വരുന്ന ലോക്‌സഭ തെരഞ്ഞെടുപ്പിലും ഈ സഖ്യം തുടരാനുള്ള തീരുമാനത്തില്‍ ഇരു സംഘങ്ങളും എത്തിച്ചേര്‍ന്നതായുള്ള റിപ്പോര്‍ട്ടുകള്‍ ദേശീയ മാധ്യമങ്ങള്‍ പുറത്ത് വിട്ടിരുന്നു. നേരത്തെ, ഡല്‍ഹിയില്‍ മായാവതിയും അഖിലേഷ് യാദവും മൂന്ന് മണിക്കൂറോളം ചര്‍ച്ച നടത്തിയിരുന്നു.

ഇതില്‍ സീറ്റുകള്‍ വിഭജിക്കുന്നത് സംബന്ധിച്ചുള്ള ധാരണളായിട്ടുണ്ട്.ആകെയുള്ള 80 സീറ്റില്‍ 37 സീറ്റുകളില്‍ വീതം മത്സരിക്കാനുള്ള ധാരണയാണ് എസ്പിയും ബിഎസ്പിയും തമ്മില്‍ ഉരുത്തിരിഞ്ഞിരിക്കുന്നതെന്നാണ് സൂചനകള്‍. കോണ്‍ഗ്രസ് ഈ സഖ്യത്തിന്റെ ഭാഗമാകില്ലെന്നും ഉറപ്പായിട്ടുണ്ട്. കഴിഞ്ഞ തവണ 80ല്‍ 73 സീറ്റുകളാണ് ബിജെപി സഖ്യം നേടിയത്.

25 വര്‍ഷങ്ങള്‍ക്ക് ശേഷമാണ് ഇരുപാര്‍ട്ടികളും ബി.ജെ.പിക്കെതിരെ വീണ്ടും ഒന്നിക്കുന്നത് നേരത്തെ മുതിര്‍ന്ന നേതാക്കളായ മുലായാംസിങ് യാദവും കാന്‍ഷിറാമും പ്രയോഗിച്ച തന്ത്രം വിജയിച്ചിരുന്നു. സഖ്യം വിജയിക്കുകയാണെങ്കില്‍ ബി.ജെ.പിക്ക് കേന്ദ്രഭരണം എളുപ്പമാവില്ലെന്നാണ് റിപ്പോര്‍ട്ടുകള്‍.