ഐ.ജി വിജയ് സാക്കറെയാണ് ഇതു സംബന്ധിച്ച് ഉത്തരവ് ഇറക്കിയിരിക്കുന്നത്. അതേസമയം, സി.ബി.ഐ അന്വേഷണമാണ് വേണ്ടതെന്ന മുന്‍നിലപാടില്‍ ഉറച്ച് നില്‍ക്കുകയാണെന്ന് ശ്രീജിത്തിന്റെ അമ്മ പറഞ്ഞു.

ശ്രീജിത്തിന്റെ കസ്റ്റഡി മരണത്തെ തുടര്‍ന്ന് മെയ് 14നാണ് ജോര്‍ജ്ജിനെ സര്‍വ്വീസില്‍ നിന്ന് സസ്‌പെന്‍ഡ് ചെയ്തത്. ജോര്‍ജ്ജിന്റെ കീഴില്‍ പ്രവര്‍ത്തിച്ച റൂറല്‍ ടൈഗര്‍ ഫോഴ്‌സ് ആയിരുന്നു ശ്രീജിത്തിനെ കസ്റ്റഡിയില്‍ എടുത്തത്. തുടര്‍ന്ന് ശ്രീജിത്ത് മരണപ്പെടുകയിരുന്നു. സംഭവത്തില്‍ ജോര്‍ജ്ജിന് വീഴ്ച്ച പറ്റിയെന്നും നടപടി വേണമെന്നും ആവശ്യപ്പെട്ടുള്ള പ്രത്യേക അന്വേഷണ സംഘത്തിന്റെ റിപ്പോര്‍ട്ടിന്റെ അടിസ്ഥാനത്തിലായിരുന്നു സസ്‌പെന്‍ഷന്‍.

ശ്രീജിത്തിനെ ആശുപത്രിയിലെത്തിക്കാനായി 25,000 രൂപയാണ് പ്രദീപ് ആവശ്യപ്പെട്ടത്. ബന്ധുക്കള്‍ 15000 രൂപ പ്രദീപിന് കൈമാറിയിരുന്നു. എന്നാല്‍ ശ്രീജിത്ത് മരിച്ചതോടെ ഇയാള്‍ പണം തിരിച്ചു നല്‍കി. സംഭവം വിവാദമായതോടെ പ്രദീപിനെ അന്വേഷണ വിധേയമായി സസ്‌പെന്‍ഡ് ചെയ്തിരുന്നു.

സുപ്രീം കോടതിയുടെ മാര്‍ഗ നിര്‍ദ്ദേശങ്ങള്‍ക്ക് വിരുദ്ധമായി ഇയാള്‍ പ്രതികളെ അറസ്റ്റ് ചെയ്യുന്നത് പതിവായിരുന്നു. ഇക്കാര്യത്തിന് എസ്‌ഐയ്ക്ക് പലതവണ താന്‍ മുന്നറിയിപ്പ് നല്‍കിയിട്ടുണ്ടെന്നും മജിസ്‌ട്രേറ്റിന്റെ മൊഴിയില്‍ വിശദീകരിച്ചു.

മജസ്‌ട്രേറ്റിന്റെ മൊഴി ശ്രീജിത്തിന്റെ കസ്റ്റഡി മരണക്കേസില്‍ നിര്‍ണായകമാകും. കേസ് അന്വേഷിക്കുന്ന പ്രത്യേക സംഘം മജിസ്‌ട്രേറ്റിന്റെ മൊഴി രേഖപ്പെടുത്തുമെന്നാണ് റിപ്പോര്‍ട്ട്. അവധിയിലുണ്ടായിരുന്ന എസ്‌ഐ ദീപക് ശ്രീജിത്തിനെ പിടികൂടിയ ദിവസം സ്‌റ്റേഷനിലെത്തിയതായി ഐ.ജി ശ്രീജിത്തിന്റെ റിപ്പോര്‍ട്ടിലുണ്ടായിരുന്നു. ദീപക് ശ്രീജിത്തിനെ മര്‍ദ്ദിച്ചതായ തെളിവ് നേരത്തെ ലഭിച്ചിരുന്നു.

എ.എസ്.ഐമാരായ ജയാനന്ദന്‍, സന്തോഷ്, സി.പി.ഒമാരായ ശ്രീരാജ്, സുനില്‍കുമാര്‍ എന്നിവര്‍ കൂടി ഇതോടെ കേസില്‍ പ്രതിയാവും. മര്‍ദ്ദനത്തിനിരയായി കൊല്ലപ്പെട്ട ശ്രീജിത്തിനെ അന്യായമായി തടങ്കലില്‍ വെക്കാന്‍ കൂട്ടുനിന്നു എന്നതാണ് ഇവര്‍ക്കെതിരെ ചുമത്തിയിരിക്കുന്ന കുറ്റം. കേസില്‍ നാട്ടുകാരായ സാക്ഷികളുടെ രഹസ്യമൊഴിയെടുക്കാനും കോടതി അനുമതി നല്‍കി.

പരാതി പിന്‍വലിച്ചില്ലെങ്കില്‍ ശ്രീജിത്തിന്റെ ഗതി തന്നെയാകും അനുജനുമെന്നാണ് കത്തിലെ ഭീഷണി. തിരുവനന്തപുരം റൂറല്‍ എസ്.പിയുടെ ഷാഡോ സ്‌ക്വാഡിലെ അംഗങ്ങളായ ജയന്‍, സുനില്‍ലാല്‍, സുവിന്‍, ഷിബു എന്നിവരുടെ പേരിലാണ് കത്ത്. ഇതിന് മുമ്പും സമാനമായ ഭീഷണിക്കത്ത് ഇതേ ഉദ്യോഗസ്ഥരുടെ പേരില്‍ ലഭിച്ചിരുന്നു.

മാധ്യമങ്ങളുടെ സഹായത്തോടെ കളിക്കാന്‍ നില്‍ക്കേണ്ടെന്നും മുന്‍പും സമാനമായ കേസുകളില്‍ സര്‍ക്കാരിന് തങ്ങളെ ഒരു ചുക്കും ചെയ്യാന്‍ സാധിച്ചിട്ടില്ലെന്നും കത്തില്‍ പറയുന്നു. ശ്രീജിത്തിന്റെ കസ്റ്റഡിമരണവുമായി ബന്ധപ്പെട്ടു മൂന്ന് ആര്‍.ടി.എഫുകാര്‍, വരാപ്പുഴ എസ്.ഐ ജി.എസ്.ദീപക്, പറവൂര്‍ സി.ഐ ക്രിസ്പിന്‍ സാം എന്നിവരാണ് ഇതുവരെ അറസ്റ്റിലായത്.

മുമ്പും ശ്രീജിത്തിന്റെ കുടുംബത്തിനു ഭീഷണിക്കത്ത് ലഭിച്ചിരുന്നു. പൊലീസുകാര്‍ക്കെതിരായ പരാതി പിന്‍വലിക്കണമെന്നായിരുന്നു അന്നും ആവശ്യം. പരാതിയില്‍ പൊലീസ് കേസെടുത്തിരുന്നു. ഈ കത്തും പൊലീസിന് കൈമാറുമെന്ന് ശ്രീജിത്തിന്റെ ഭാര്യ വ്യക്തമാക്കി..

അതേസമയം ശ്രീജിത്തിന്റെ വീട് സന്ദര്‍ശിക്കുമോ എന്ന ചോദ്യത്തിന് കൃത്യമായ മറുപടി പറയാന്‍ കോടിയേരി തയ്യാറായില്ല. ശ്രീജിത്തിന്റെ വീടിന്റെ ഏതാനും കിലോ മീറ്റര്‍ മാത്രം അകലെയുള്ള ലുലു കണ്‍വന്‍ഷന്‍ സെന്റര്‍ ഉദ്ഘാടനത്തിന് വന്നിട്ടും ശ്രീജിത്തിന്റെ വീട് സന്ദര്‍ശിക്കാന്‍ പിണറായി തയ്യാറായിരുന്നില്ല. എറണാകുളത്ത് നിന്ന് വടക്കന്‍ പറവൂരിലെ പരിപാടിയില്‍ പങ്കെടുക്കാന്‍ വരാപ്പുഴ ഒഴിവാക്കി, വൈപ്പിന്‍ വഴി ചുറ്റിക്കറങ്ങിയായിരുന്നു മുഖ്യമന്ത്രിയുടെ യാത്ര. മുഖ്യമന്ത്രി ശ്രീജിത്തിന്റെ വീട് സന്ദര്‍ശിക്കാന്‍ തയ്യാറാവാത്തതിനെതിരെ ശ്രീജിത്തിന്റെ കുടുംബം രംഗത്ത് വന്നിരുന്നു.

കേസ് അട്ടിമറിക്കാന്‍ സി.പി.എം പ്രാദേശി നേതാക്കള്‍ ശ്രമിക്കുന്നുവെന്ന ആരോപണവും ശക്തമാണ്. കേസ് സി.ബി.ഐക്ക് വിടണമെന്ന് ആവശ്യം കുടുംബം ഉന്നയിക്കുന്നുണ്ടെങ്കിലും ചെവിക്കൊള്ളാന്‍ ഇതുവരെ സര്‍ക്കാര്‍ തയ്യാറായിട്ടില്ല. പൊലീസ് പ്രതിസ്ഥാനത്തുള്ള കേസ് പൊലീസുകാര്‍ തന്നെ അന്വേഷിക്കുന്നത് കേസ് അട്ടിമറിക്കപ്പെടാന്‍ കാരണമാകുമെന്നാണ് ശ്രീജിത്തിന്റെ ബന്ധുക്കള്‍ പറയുന്നത്. കേസ് സി.ബിഐക്ക് വിടില്ലെന്ന സര്‍ക്കാറിന്റെ വാശിക്ക് പിന്നില്‍ പ്രതികളെ സംരക്ഷിക്കാനുള്ള സി.പി.എം നീക്കമാണെന്നും ആരോപണമുണ്ട്.

പൊലീസിനെതിരായ കേസുകള്‍ സ്വതന്ത്ര ഏജന്‍സികള്‍ അന്വേഷിക്കണമെന്ന 2010- ലെ സുപ്രീം കോടതി വിധി മുന്‍ നിര്‍ത്തിയാണ് ഹൈക്കോടതി നിരീക്ഷണം. പൊലീസ് സ്വന്തം നിലക്ക് കേസന്വേഷണം നടത്തുന്നത് ശരിയായ രീതിയല്ല. അതിനാല്‍ ഇക്കാര്യത്തില്‍ നിലപാട് വ്യക്തമാക്കണമെന്നാവശ്യപ്പെട്ടാണ് സര്‍ക്കാരിനും സി.ബി.ഐക്കും നോട്ടീസ് നല്‍കിയത്.

ശ്രീജിത്തിന്റെ കൊലപാതകത്തില്‍ ഉന്നത പൊലീസുദ്യോഗസ്ഥര്‍ക്ക് പങ്കുണ്ടെന്നും കേരള പൊലീസ് അന്വേഷിച്ചാല്‍ നീതി ലഭിക്കില്ലെന്നും ചൂണ്ടികാട്ടി ശ്രീജിത്തിന്റെ ഭാര്യയാണ് ഹൈക്കോടതിയെ സമീപിച്ചത്. കേസന്വേഷണം സ്വതന്ത്ര ഏജന്‍സി അന്വേഷിക്കണമെന്നും ഒരു കോടി രൂപ നഷ്ടപരിഹാരം നല്‍കണമെന്നുമാവശ്യപ്പെട്ടാണ് ഹര്‍ജി.

ചോരത്തിളപ്പുള്ള ഒരുയുവാവിനെ പിണറായിവിജയന്റെ പൊലീസ് കൊലപ്പെടുത്താന്‍ കാരണമായത് അവന്‍ കേരളത്തിലെ വരാപ്പുഴയില്‍ ജനിച്ചുവെന്നതുകൊണ്ടുമാത്രമായിരുന്നു. ഏപ്രില്‍ ആറിന് സ്ഥലത്ത് വീടുകയറി ആക്രമിച്ച സംഭവത്തില്‍ വീട്ടുടമസ്ഥന്‍ ആത്മഹത്യചെയ്തതുമായി ബന്ധപ്പെട്ടാണ് പൊലീസ് ഇതിലൊരിടത്തും ഭാഗഭാക്കാകാത്ത ശ്രീജിത്തടക്കമുള്ള ഏതാനുംപേരെ കസ്റ്റഡിയിലെടുക്കുന്നത്. വെള്ളി രാത്രി പതിനൊന്നോടെ പൊലീസ് പിടിച്ചുകൊണ്ടുപോയ യുവാവിന്റെ മൃതശരീരമാണ് തിങ്കളാഴ്ച കൊച്ചിയിലെ ആസ്പത്രിയില്‍ ബന്ധുക്കള്‍ക്ക് കാണാന്‍കഴിഞ്ഞത്. ഇരുപത്തൊന്നാം നൂറ്റാണ്ടില്‍ കുറ്റാന്വേഷണത്തിനും തെളിവുശേഖരണത്തിനും ശാസ്ത്രീയമായ നൂറുകൂട്ടം മാര്‍ഗങ്ങള്‍ അവലംബിക്കാമെന്നിരിക്കെയാണ് പൊലീസുദ്യോഗസ്ഥരുടെ അഹന്തക്കും അക്രമത്തിനും പാത്രീഭൂതനായി യുവാവ് കൊലചെയ്യപ്പെടുന്നത്. പതിനാറ് മുറിവുകളടക്കം കടുത്ത മര്‍ദനമുറകളാണ് യുവാവിന്റെ ശരീരത്തില്‍ പൗരന്മാരെ സംരക്ഷിക്കേണ്ട പൊലീസ് അടിച്ചേല്‍പിച്ചത്. നെഞ്ചിലും വാരിയെല്ലിലും തുടയിലും വൃഷണത്തിലുമൊക്കെ ഏറ്റ കനത്ത ആഘാതമാണ് മരണത്തിലെത്തിച്ചതെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്.

നമ്മുടെ സംസ്ഥാനത്ത് ഭരണഘടനാപരമായി ചുമതലയേറ്റിരിക്കുന്ന മനുഷ്യാവകാശകമ്മീഷന് സ്വാഭാവികമായും പ്രശ്‌നത്തില്‍ ഇടപെടേണ്ടിവന്നു. തിങ്കളാഴ്ച എറണാകുളം മെഡിക്കല്‍ കോളജ് ആസ്പത്രിയില്‍നിന്ന് ആസ്റ്റര്‍മെഡിസിറ്റിയിലേക്ക് മാറ്റിയപ്പോള്‍ തന്നെ കമ്മീഷന്‍ ആക്ടിംഗ് ചെയര്‍മാന്‍ പി. മോഹന്‍ദാസ് അബോധാവസ്ഥയിലായിരുന്ന യുവാവിനെ സന്ദര്‍ശിച്ച് ഐ.സി.യുവിലെയും മറ്റും ഡോക്ടര്‍മാരോട് വിവരം തിരക്കി. കസ്റ്റഡി മരണമാണ് ശ്രീജിത്തിന്റേതെന്ന് സംശയിക്കുന്നതായി മോഹന്‍ദാസ് പറയുകയും ചെയ്തു.ശ്രീജിത്തിന്റെ ഭാര്യയും ചെയര്‍മാനോട് തന്റെ ഭര്‍ത്താവിനേറ്റ കൊടുംമര്‍ദനത്തെക്കുറിച്ച് പറയുകയും പൊലീസ് സ്റ്റേഷനില്‍ ചെന്നപ്പോള്‍ വയറുവേദനയെക്കുറിച്ചും വെള്ളം ചോദിച്ച് കൊടുക്കാതിരുന്നതിനെക്കുറിച്ചും വ്യക്തമാക്കുകയുമുണ്ടായി. അവര്‍ സ്വമേധയാ കേസെടുത്തു. വരാപ്പുഴ പൊലീസ് സ്റ്റേഷന്‍ സബ്ഇന്‍സ്‌പെക്ടര്‍ ജി.എസ് ദീപക്കിനെ 23ന് മൊഴിയെടുക്കലിന് ഹാജരാകാന്‍ കമ്മീഷന്‍ ആവശ്യപ്പെട്ടു. എസ്.പി തലത്തില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ കമ്മീഷന്‍ പിറ്റേന്നുതന്നെ ഉത്തരവ് നല്‍കി. പൊലീസടക്കമുള്ളവരുടെ മനുഷ്യാവകാശലംഘനങ്ങളെക്കുറിച്ച് നിരവധി പരാതികള്‍ ഉയര്‍ന്നുകൊണ്ടിരിക്കുന്ന പശ്ചാത്തലത്തില്‍ കമ്മീഷന്‍ എത്രയും പെട്ടെന്നുതന്നെ വിഷയത്തില്‍ നടപടിയെടുത്തത് പ്രശംസിക്കപ്പെടേണ്ടതാണ്. സംസ്ഥാന സര്‍ക്കാരാകട്ടെ ക്രൂരമര്‍ദനംനടത്തിയ എസ്.ഐയെ ആദ്യം രക്ഷിക്കുന്നതിനാണ് പരിശ്രമിച്ചത്. പകരംയുവാവിനെ ആദ്യം കസ്റ്റഡിയിലെടുത്ത റാപ്പിഡ് ടൈഗര്‍ ഫോഴ്‌സിലെ മൂന്ന് പൊലീസുകാരെ പ്രതിയാക്കുകയാണ് ചെയ്തത്. ശ്രീജിത്തിന്റെ കുടുംബാംഗങ്ങളും കേരളമൊട്ടാകെയും കനത്ത പ്രതിഷേധവുമായി രംഗത്തുവന്നതോടെയായിരുന്നു ദീപക്കിന്റെ പ്രതിചേര്‍ക്കല്‍. ആര്‍.ടി.എഫിനെ നിയോഗിച്ച ആലുവ റൂറല്‍ എസ്.പി എ.വി ജോര്‍ജിനെ അക്കാരണത്താലാണ് പൊലീസ് അക്കാദമിയിലേക്ക് സ്ഥലംമാറ്റിയത്. മറിച്ച് അദ്ദേഹത്തിന്റെ മേലുദ്യോഗസ്ഥനായ എറണാകുളം റെയ്ഞ്ച് ഐ.ജിയെ സംരക്ഷിക്കുന്ന നിലപാടായിരുന്നു ആഭ്യന്തരവകുപ്പിന്റേത്.

പ്രശ്‌നത്തില്‍ സര്‍ക്കാരിന്റെ ഇരട്ടത്താപ്പ് തിരിച്ചറിഞ്ഞതാണ് മനുഷ്യാവകാശകമ്മീഷനെതിരെ തുറന്ന വിമര്‍ശനവുമായി രംഗത്തുവരാന്‍ മുഖ്യമന്ത്രിയെ പ്രേരിപ്പിച്ചതെന്ന് വ്യക്തം. ഇതുവരെയെടുത്ത നടപടിയുടെ വിശ്വാസ്യത തകര്‍ത്ത്, സ്വയം ചെളിതെറിപ്പിക്കുകയാണ് മുഖ്യമന്ത്രി ചെയ്തിരിക്കുന്നത്. ഇത്തരമൊരു അവസരത്തില്‍ പൊലീസില്‍നിന്നും സര്‍ക്കാരില്‍നിന്നും നീതി ലഭിക്കില്ലെന്ന് ശ്രീജിത്തിന്റെ ബന്ധുക്കളും കമ്മീഷനും സംശയിച്ചതില്‍ തെറ്റ് കാണാനാവില്ല. കൊച്ചി നഗരത്തില്‍ നടി ആക്രമിക്കപ്പെട്ട കേസില്‍ ശക്തമായ നടപടികളുമായി മുന്നോട്ടുപോയ ആര്‍ജവവമുള്ള പൊലീസുദ്യോഗസ്ഥനാണ് ജോര്‍ജ്. കേസ് അട്ടിമറിക്കാനുള്ള സാധ്യതയും ഇതിനുപിന്നില്‍ സംശയിക്കണം. സ്വാഭാവികമായും എസ്.പിയുടെ സ്ഥലംമാറ്റത്തെ വിമര്‍ശിക്കാന്‍ മനുഷ്യാവകാശകമ്മീഷനും തയ്യാറായി. കമ്മീഷനെ സംബന്ധിച്ച് മനുഷ്യാവകാശലംഘനം സംസ്ഥാനഭൂപരിധിക്കുള്ളില്‍ എവിടെ നടന്നാലും അതിലിടപെട്ട് ഭരണഘടനാപരമായിതന്നെ ഇരകള്‍ക്ക് നീതി വാങ്ങിച്ചുകൊടുക്കേണ്ട ബാധ്യതയുണ്ട്. പൗരന് മനുഷ്യാവകാശം നിഷേധിക്കപ്പെടുമ്പോള്‍ കയ്യും കെട്ടി നോക്കിയിരിക്കലല്ലല്ലോ ഖജനാവില്‍നിന്ന് ചെല്ലും ചെലവും കൊടുത്ത് നിയമിച്ചിരിക്കുന്ന കമ്മീഷനുകളുടെ ജോലി. എന്തിനും റാന്‍ മൂളുന്ന രാഷ്ട്രീയാധികാരം വെച്ചുനീട്ടുന്ന യുവജനകമ്മീഷനല്ല മനുഷ്യാവകാശകമ്മീഷനെന്ന് മുഖ്യമന്ത്രി മനസ്സിലാക്കണം.

കമ്മീഷന് അനുകൂലമായി ശ്രീജിത്തിന്റെ കുടുംബവും രംഗത്തുവന്നത് സര്‍ക്കാരിനേറ്റ കനത്ത പ്രഹരമാണ്. തുടക്കം മുതല്‍ കമ്മീഷന്റെ ജാഗ്രത ഉണ്ടായതുകൊണ്ടാണ് ഇത്രയും മുന്നോട്ടുപോകാന്‍ സര്‍ക്കാര്‍ നിര്‍ബന്ധിതമായതെന്ന ശ്രീജിത്തിന്റെ മാതാവിന്റെ വാക്കുകള്‍ പിണറായിവിജയനും കോടിയേരി ബാലകൃഷ്ണനും കാതുതുറന്നുകേള്‍ക്കണം. താന്‍ ഉദ്യോഗസ്ഥര്‍ക്കെതിരെയാണ് പ്രതികരിച്ചതെന്നും സര്‍ക്കാര്‍ കമ്മീഷന്റെ പ്രവര്‍ത്തനത്തിന് സഹായം നല്‍കുന്നില്ലെന്നും മോഹന്‍ദാസ് പറയുമ്പോള്‍ അത് യാഥാര്‍ത്ഥ്യം മാത്രമേ ആകുന്നുള്ളൂ. സി.പി.എമ്മുകാര്‍ക്ക് മരണത്തില്‍ പങ്കുള്ളതുകൊണ്ടാണ് ആ പാര്‍ട്ടിയുടെ മുതിര്‍ന്ന നേതാക്കളാരും ഇത്രയായിട്ടും ശ്രീജിത്തിന്റെ വീട് സന്ദര്‍ശിക്കാത്തതെന്ന ആരോപണം ശരിവെക്കുന്നതാണ് കോടിയേരിയുടെയും പ്രസ്താവന. ഭരണവും പൊലീസും മര്‍ദനോപാധികളാണെന്ന സ്വന്തംനേതാവ് കാള്‍ മാര്‍ക്‌സിന്റെ ആശയമെങ്കിലും ഒരുതവണ വായിച്ചിട്ടുണ്ടെങ്കില്‍ സ്വന്തം പ്രജ കടുത്ത പീഡനമേറ്റുവാങ്ങി മരണത്തിന് കീഴടങ്ങേണ്ടിവന്ന സംഭവത്തില്‍ ഇത്രയും വാദകോലാഹലങ്ങള്‍ക്ക് നില്‍ക്കാതിരിക്കലായിരുന്നു ഒരു കമ്യൂണിസ്റ്റ് ഭരണാധികാരിയുടെ ബുദ്ധി.

അവശനിലയിലായ ശ്രീജിത്തിനെ ആശുപത്രിയിലെത്തിക്കാന്‍ തങ്ങള്‍ ആവശ്യപ്പെട്ടിട്ടും പൊലീസ് തയാറായില്ല. പിന്നീട് ഏറെ നേരം കഴിഞ്ഞ് ആസ്പത്രിയിലേക്ക് കൊണ്ടുപോയ പൊലീസുകാരും ശ്രീജിത്തിനെ മര്‍ദ്ദിച്ചു. ശ്രീജിത്തിന്റെ ശരീരത്തില്‍ പരിക്കുകള്‍ കണ്ടത് ഇതിനു ശേഷമാണെന്നും സുഹൃത്തുക്കള്‍ പറഞ്ഞു.

കസ്റ്റഡിയിലെടുത്ത ശ്രീജിത്തിനെ പൊലീസ് സ്റ്റേഷനില്‍വെച്ച് എസ്.ഐ ദീപക് മര്‍ദ്ദിച്ചിരുന്നുവെന്ന് അന്വേഷണസംഘം നല്‍കിയ റിമാന്‍ഡ് റിപ്പോര്‍ട്ടില്‍ വ്യക്തമാക്കിയിരുന്നു. കൊലക്കുറ്റം, അന്യായമായി തടങ്കലില്‍ വെക്കല്‍, മര്‍ദ്ദനം എന്നീ കുറ്റങ്ങളാണ് ദീപക്കിനെതിരെ ചുമത്തിയിട്ടുള്ളത്.