933 പോയിന്റോടെ ഒന്നാം സ്ഥാനത്താണ് കോഴിക്കോട് ഇപ്പോള്‍. 913 പോയന്റുമായി കണ്ണൂര്‍ തൊട്ടു പിറകിലുണ്ട്. 911 പോയിന്റുമായി പാലക്കാട് മൂന്നാമതും, 907 പോയിന്റുമായി തൃശ്ശൂര്‍ നാലാമതും 870 പോയിന്റുമായി മലപ്പുറം അഞ്ചാമതുമുണ്ട്.

ഏഷ്യയിലെ തന്നെ ഏറ്റവും വലിയ കലാമേളക്ക് ഇത് ഏട്ടാം തവണയാണ് കോഴിക്കോട് വേദിയാകുന്നത്.

കലോത്സവ വേദികളില്‍ മാപ്പിളപ്പാട്ട്, ലളിതഗാനം, ശാസ്ത്രീയസംഗീതം, ഒപ്പന മത്സരങ്ങളില്‍ തിളങ്ങിയ രാധിക ഗാനമേളകളിലും റിയാലിറ്റി ഷോ കളിലും പാടി.സംവിധായകന്‍ ആര്‍ എസ് വിമലിന്റെ പുതിയ സിനിമയില്‍ പാടാന്‍ ഉള്ള ഒരുക്കത്തിലാണ് രാധിക നാരായണ്‍.

കോഴിക്കോട് : 61ാം സംസ്ഥാന സ്‌കൂള്‍ കലോത്സവത്തിന് തിരശീല വീഴുന്ന ഇന്ന് വിക്രം മൈതാനത്തു നിരവധി പേരാണ് എത്തിച്ചേര്‍ന്നിരിക്കുന്നത്. കലോത്സവ വേദികള്‍ തിരഞ്ഞു നടക്കുന്ന വിദ്യാര്‍ത്ഥികള്‍ക്ക് സ്‌നേഹതണലേകാന്‍ നടക്കാവ് പോലീസുകാരും.

വിവിധ ജില്ലകളില്‍ നിന്നായെത്തുന്ന മത്സരാര്‍ഥികളെയും അധ്യാപകരെയും നിറഞ്ഞ ചിരിയോടെ സ്വാഗതം ചെയ്യുകയും അവര്‍ക്കു വേണ്ട സഹായങ്ങള്‍ ചെയ്തു നല്‍കി, തീര്‍ത്തും ജനമൈത്രി പോലിസ്.

മലബാര്‍ ജില്ലയുടെ രുചികലവറയും സൗന്ദര്യമേളവും അധ്യാപകര്‍ക്കും വിദ്യാര്‍ത്ഥികള്‍ക്കും പകര്‍ന്നു നല്‍കാന്‍ നടക്കാവ് എസ് ഐ അനില്‍കുമാര്‍ മറന്നില്ല. തിരക്കാര്‍ന്ന സാധാരണ പോലീസ് സ്റ്റേഷന്‍ സാഹചര്യങ്ങളില്‍ നിന്നും കലയുടെയും കലാകാരന്‍മാരുടെയും നിഷ്‌കളങ്കമാര്‍ന്ന ചിരികള്‍ മനസിന് കുളിരേകുന്നു എന്ന് എസ് ഐ പറഞ്ഞു. എ എസ് ഐ ഭുവനേശ്വരി,സിപിഒ മാരായ ഷാമാന അഹമ്മദ്, രമ്യ എം കെ, ഷമില്‍ എം, അതുല്‍ എന്നിവരും കലാകാരന്‍മാരെ നിറഞ്ഞ ചിരിയോടെ വരവേല്‍ക്കാന്‍ ഹെല്‍പ് ഡെസ്‌കിലുണ്ട്.

കലോത്സവത്തിന്റെ നാലാം ദിനം മുഴുവന്‍ വേദികളും കാലുകുത്താന്‍ ഇടമില്ലാത്ത രീതിയില്‍ നിറഞ്ഞു കവിഞ്ഞിരുന്നു. രണ്ടാം വേദിയായ സമൂതിരി സ്‌കൂളിലെ ‘ഭൂമി’യില്‍ നാടകം കാണാന്‍ ഒഴുകിയെത്തിയത് ആയിരങ്ങളാണ്. വിദ്യാര്‍ത്ഥികള്‍ തന്മയത്വത്തോടെ ഓരോ നാടകങ്ങളും കാണികള്‍ക്ക് മുന്നിലെത്തിച്ചു. സമൂതിരി സ്‌കൂള്‍ ഗ്രൗണ്ടിലും സ്ഥിതി വ്യത്യസ്തമായിരുന്നില്ല.

പ്രധാന വേദിയായ വിക്രം മൈതാനിയിലെ അതിരാണിപ്പാടത്ത് ഇരിപ്പിടങ്ങള്‍ നിറഞ്ഞ് കവിഞ്ഞു. വേദിക്ക് പുറത്തേക്കും നിറഞ്ഞ് കവിഞ്ഞ ജനലക്ഷങ്ങള്‍ക്ക് മുന്നില്‍ മിടുക്കികള്‍ സംഘനൃത്തവും തിരുവാതിര കളിയും ചുവട് തെറ്റാതെ അവതരിപ്പിച്ചു. നിറഞ്ഞ കൈയ്യടികളാണ് ഓരോ ടീമിനും മത്സര ശേഷം വേദിയില്‍ നിന്ന് ലഭിച്ചത്.

നാളെ (ജനുവരി ഏഴ് ) കലോത്സവത്തിന് സമാപനമാവും. അഞ്ചു നാള്‍ നീണ്ട കലയുടെ മാമാങ്കം കോഴിക്കോട്ടുകാരുടെ മാത്രമല്ല കേരളത്തിലെ മുഴുവന്‍ ജനങ്ങളുടെയും മനസ്സില്‍ മികച്ച കലോത്സവങ്ങളിലൊന്നായി നിലനില്‍ക്കും.

സ്റ്റേജ് മാനേജ്‌മെന്റ്, ആങ്കറിംഗ് ഉള്‍പ്പെടെ ഓരോ വേദികളിലും അവര്‍ നിറഞ്ഞു നിന്നു. 24 വേദികളിലായാണ് കലാ മത്സരങ്ങള്‍ അരങ്ങേറിയത്. എട്ട് മുതല്‍ പത്ത് പേര്‍ വീതമുളള സംഘങ്ങളാണ് വേദികളുടെ മുഴുവന്‍ സംഘാടനവും നിര്‍വഹിച്ചത്. 190-ന് മുകളില്‍ അധ്യാപികമാരാണ് കര്‍മ്മ നിരതരായി രംഗത്തെത്തിയത്. 24 അധ്യാപികമാരാണ് സംഘത്തെ നയിച്ചത്.

കേരള സാരിയിലാണ് ഇവര്‍ എത്തിയത്. രാവിലെ ഒമ്പത് മണി മുതലാണ് മത്സരങ്ങള്‍ വേദികളില്‍ നടക്കുന്നതെങ്കിലും രാവിലെ 7.30 നു തന്നെ അധ്യാപികമാര്‍ വേദിയില്‍ എത്തിയിരുന്നു. ചരിത്രത്തില്‍ പുതു ഏടുകള്‍ എഴുതി ചേര്‍ക്കുന്നവര്‍ക്ക് പൂര്‍ണ്ണ പിന്തുണയേകി പ്രവര്‍ത്തനങ്ങളെ കുറിച്ചുള്ള നിര്‍ദേശങ്ങള്‍ നല്‍കി പൊതു വിദ്യാഭ്യാസ ഡയറക്ടര്‍ കെ. ജീവന്‍ ബാബുവും പ്രോഗ്രാം കമ്മിറ്റിയുമുണ്ടായിരുന്നു.

രണ്ട് വര്‍ഷത്തെ ഇടവേളയ്ക്ക് ശേഷം നടക്കുന്ന കലോത്സവത്തില്‍ പുതുമ കൊണ്ടുവരിക എന്ന ആശയത്തിന്റെ ഭാഗമായാണ് വേദികളുടെ മുഴുവന്‍ നിയന്ത്രണവും അധ്യാപികമാര്‍ക്ക് നല്‍കിയതെന്ന് സംഘാടകര്‍ പറഞ്ഞു. പ്രധാന വേദിയായ അതിരാണിപ്പാടത്ത് രണ്ട് ഷിഫ്റ്റുകളിലും അധ്യാപികമാര്‍ക്കായിരുന്നു പൂര്‍ണ്ണ ചുമതല. ആര്‍ക്കും പരാതികള്‍ക്കിട നല്‍കാതെ മികച്ച സംഘാടനമാണ് അധ്യാപികമാര്‍ നടത്തിയത്.

ഏറ്റവും കൂടുതല്‍ പോയിന്റ്‌റുകള്‍ നേടുന്ന ജില്ലയ്ക്കുള്ള സ്വര്‍ണക്കപ്പ് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവന്‍കുട്ടി സമ്മാനിക്കും. വിജയികള്‍ക്കുള്ള സമ്മാനദാനം മന്ത്രിമാരും മുഖ്യാതിഥിയായ ഗായിക കെ എസ് ചിത്രയും നിര്‍വഹിക്കും. കലോത്സവ സുവനീര്‍ ഗതാഗത വകുപ്പ് മന്ത്രി അഡ്വ. ആന്റണി രാജു പ്രകാശനം ചെയ്യും. എംപിമാരായ എളമരം കരീം,എം കെ രാഘവന്‍, കോഴിക്കോട് മേയര്‍ ഡോ. ബീന ഫിലിപ്, സംഘാടക സമിതി വര്‍ക്കിങ് ചെയര്‍മാന്‍ തോട്ടത്തില്‍ രവീന്ദ്രന്‍ എം എല്‍ എ, പൊതു വിദ്യാഭ്യാസ പ്രിന്‍സിപ്പല്‍ സെക്രട്ടറി എ പി എം മുഹമ്മദ് ഹനീഷ് തുടങ്ങിയവര്‍ യോഗത്തില്‍ സംബന്ധിക്കും. പൊതു വിദ്യാഭ്യാസ ഡയറക്ടര്‍ കെ ജീവന്‍ ബാബു ഐഎഎസ് സ്വാഗതം പറയും.

സംസ്ഥാന സ്‌കൂള്‍ കലോത്സവം വന്‍ വിജയമാക്കി തീര്‍ത്ത എല്ലാവര്‍ക്കും പൊതു വിദ്യാഭ്യാസവും തൊഴിലും വകുപ്പ് മന്ത്രി വി ശിവന്‍കുട്ടി നന്ദി അറിയിച്ചു. കലോത്സവവുമായി ബന്ധപ്പെട്ട ഗൗരവമുള്ള ഒരു പരാതിയും ഉയര്‍ന്നു വന്നില്ല എന്നത് ഏറെ ശ്രദ്ധേയമാണ്. ചെറിയ പരാതികള്‍ അപ്പപ്പോള്‍ തന്നെ പരിഹരിച്ചു. എല്ലാ കമ്മിറ്റികളും മികച്ച രീതിയില്‍ പ്രവര്‍ത്തിച്ചു. മാധ്യമങ്ങളുടെ അകമഴിഞ്ഞ സഹകരണം ലഭിച്ചു.

പ്രതിദിനം ഏതാണ്ട് മുപ്പതിനായിരത്തില്‍ പരം പേര്‍ക്കാണ് ഊട്ടുപുരയില്‍ ഭക്ഷണം നല്‍കിയത്. പഴയിടം മോഹനന്‍ നമ്പൂതിരിയുടെ നേതൃത്വത്തില്‍ രുചികരമായ ഭക്ഷണം ഏവരും ആസ്വദിച്ചു. ജനപങ്കാളിത്തം കൊണ്ട് കോഴിക്കോട് അമ്പരപ്പിച്ചുവെന്നും മന്ത്രി വി ശിവന്‍കുട്ടി പ്രസ്താവനയില്‍ ചൂണ്ടിക്കാട്ടി.

ആറാട്ടുപുഴ വേലായുധ പണിക്കര്‍ എന്ന നവോത്ഥാന നായകന്റെ ജീവിതകഥ കഥാ പ്രസംഗ മത്സരത്തില്‍ അവതരിപ്പിച്ചാണ് ഗരിമ മനോജ് വെന്നിക്കൊടി പാറിച്ചത്. താഴെ തട്ടില്‍ തഴയപ്പെട്ടതിന്റെ മധുര പ്രതികാരം കൂടിയായി ഗരിമയുടെ വിജയം. ഗരിമ മനോജിനോടൊപ്പം ഗൗരവ് മനോജ്, മിഥുന്‍ പ്രസാദ്, ആദിദേവ്,ശ്രേയസ് എന്നിവരാണ് ടീമിലുണ്ടായത്. തൃത്താല ഡോ.കെ.ബി മേനോന്‍ മെമ്മോറിയല്‍ ഹയര്‍ സെക്കണ്ടറി സ്‌കൂളിലെ ഒമ്പതാം ക്ലാസ് വിദ്യാര്‍ത്ഥികളാണിവര്‍.

ഫോക് ലോര്‍ അക്കാദമി അവാര്‍ഡ് ജേതാവ് തൃശൂരിലെ പോള്‍സണ്‍ താണിക്കലാണ് ഗുരു.
പഠനകാലത്ത് തഴയപ്പെട്ടതിന്റെ നൊമ്പരം ഇന്നും മനസ്സില്‍ സൂക്ഷിക്കുന്ന അക്ഷര ജാലകം ബുക്‌സിന്റെ അമരക്കാരനും പൊതുപ്രവര്‍ത്തകനുമായ ഹുസൈന്‍ തട്ടത്താഴത്ത് ആണ് നിയമ പോരാട്ടത്തിന് ഊര്‍ജ്ജം പകര്‍ന്ന് ഈ വിജയത്തിനുള്ള മുഴുവന്‍ സഹായവും ചെയ്തതെന്ന് ഗരിമ മനോജ് പറഞ്ഞു.

യു.പി വിഭാഗത്തില്‍ ജില്ലയില്‍ എ.ഗ്രേഡ്, നന്മ ബാലയരങ്ങ് കലോത്സവത്തില്‍ സംസ്ഥാന തലത്തില്‍ ഫസ്റ്റ് എ ഗ്രേഡ്,
മോണോ ആക്റ്റില്‍ ഫസ്റ്റ് എന്നിവ ഗരിമക്ക് ലഭിച്ചിട്ടുണ്ട്. കഥ, കവിത, ലേഖന രചനയിലും നാടകാഭിനയത്തിലും ഗരിമ സജീവമാണ്.

ട്രാഫിക്കും മത്സര നഗരികളിലെ ശുചിത്വവും കാവലും എല്ലാം ഇവരുടെ കൂടെ നിയന്ത്രണത്തിലായിരുന്നു. വെയിലും ചൂടും കനത്ത് നില്‍ക്കുമ്പോഴും ഇവര്‍ പ്രവര്‍ത്തനച്ചൂടിലാകും. അധ്യാപകര്‍ക്കും കലാസ്വാദകര്‍ക്കും സഹായത്തിന് ഓടിയെത്തും. മത്സരാര്‍ഥികള്‍ക്കും കരുതലായി ഇവര്‍ തന്നെ. കലാസ്വദകരായി വിരുന്നെത്തിയവര്‍ക്ക് വഴി കാട്ടികളും ഇവരാണ്.

കേരളാ പോലീസിനൊപ്പം കലോത്സവ ദിനങ്ങളില്‍ പ്രവര്‍ത്തിക്കാനായതില്‍ വളരെ സന്തോഷത്തിലാണ് ഗ്രീന്‍ പ്രോട്ടോക്കോളും എന്‍.സി.സി, എസ്.പി.സി സംഘവും.

കോഴിക്കോട്: 1998 ല്‍ സംസ്ഥാന സ്‌കൂള്‍ കലോത്സവം എവിടെ നടന്നു, കലാതിലകം ,കലാപ്രതിഭ പട്ടം തുടങ്ങിയതും അവസാനിച്ചതും എന്ന്, ഒരു വര്‍ഷം 2 കലോത്സവം നടന്ന വര്‍ഷമേത് …തുടങ്ങി സ്‌കൂള്‍ കലോത്സവവുമായി ബന്ധപ്പെട്ട നിങ്ങളുടെ ഏത് ചോദ്യത്തിനും ഉത്തരം റെഡി.

കോഴിക്കോട് സ്വദേശി ഓര്‍മ ബുക്‌സിന്റെ പ്രസാധകന്‍ ജി. അനൂപാണ് സര്‍ക്കാരിന് പോലുമറിയാത്ത ഈ വിവരങ്ങളുടെ സൂക്ഷിപ്പുകാരന്‍. കോഴിക്കോട്ടെ കലോത്സവ വേദിയിലും അനൂപുണ്ട്. പത്തു വര്‍ഷമായി ഈ രംഗത്ത് ഗവേഷണം നടത്തുന്ന അനൂപ് ഒന്നര വര്‍ഷമെടുത്താണി വിവരങ്ങളും ചിത്രങ്ങളും ശേഖരിച്ചത്. അനൂപിന്റെ ഈ ശേഖരം പുസ്തകമായും ലഭിക്കും. അയ്യായിരത്തോളം ചിത്രങ്ങളും ഒപ്പമുണ്ട്. വെസ്റ്റ് ഹില്‍ പ്രധാന വേദിക്കരികിലെ സര്‍ക്കാര്‍ ഇന്‍ഫര്‍മേഷന്‍ വകുപ്പിന്റെ സ്റ്റാളില്‍ 1200 രൂപയുടെ പുസ്തകം 600 രൂപക്ക് വില്‍ക്കുന്നു.

പൊതുവിദ്യാഭ്യാസ വകുപ്പ് ഡയറക്ടറായിരുന്ന മുഹമ്മദ് ഹനീഷാണ് ഈ ദൗത്യത്തിന് പ്രോത്സാഹനം തന്നത്. എം.സി.ജെ ,എം.ബി.എ ബിരുദധാരിയായ അനൂപ് ഇപ്പോള്‍ പൂര്‍ണ സമയം പുസ്തക പ്രകാശന രംഗത്താണ് .

കോഴിക്കോട് : സംസ്ഥാന സ്‌കൂള്‍ കലോത്സവ നഗരികള്‍ ഒന്നിനൊന്ന് മികച്ച പ്രകടനവുമായി മുന്നോട്ട് കുതിക്കുകയാണ്. ടൗണ്‍ ഹാളില്‍ ഉച്ചയ്ക്ക് രണ്ട് മണി മുതല്‍ വന്‍ ജനത്തിരക്കാണ് അനുഭവപ്പെടുന്നത്. ഹൈസ്‌കൂള്‍ വിഭാഗത്തിന്റെ മാപ്പിളപ്പാട്ട് വേദിയില്‍ രംഗം കൊഴുപ്പിക്കുമ്പോള്‍ ഹാളിനുള്ളില്‍ ജനത്തിരക്ക് കാരണം നിന്ന് തിരിയാനുള്ള സ്ഥലമില്ലാതിരിക്കുകയാണ്. പുറത്ത് നിന്ന് തലയെത്തി നോക്കുന്നവരും പഴുത് കിട്ടിയാല്‍ ഉള്ളില്‍ കയറി പാട്ട് ആസ്വദിക്കാനും നിരവധി പേരാണ് കാത്തു നില്‍ക്കുന്നത്.

3:00 മണിക്ക് ഹൈസെക്കണ്ടറി വിഭാഗം മാപ്പിളപ്പാട്ടും  ഹാളില്‍ നടക്കാനിരിക്കുകയാണ്. തിരക്ക് ഇനിയും കൂടാനാണ് സാധ്യത. ഇത്തരം വലിയ പരിപാടികള്‍ക്ക് ടൗണ്‍ ഹാളിനേക്കാള്‍ വലിയ സദസൊരുക്കാത്തതില്‍ പല കാണികളും അമര്‍ശത്തിലാണ്. വേദിയിലെ രാസകരമായ ഇത്തരം പരിപാടികള്‍ കാണാന്‍ കഴിയാത്തതിന്റെ സങ്കടവും പുറത്ത് നില്‍ക്കുന്ന കലാസ്‌നേഹികളുടെ മുഖത്ത് കാണാം.