സംസ്ഥാന സ്‌കൂള്‍ കലോത്സവം ഡിസംബര്‍ അഞ്ചു മുതല്‍ ഒന്‍പതു വരെ നടത്താനും യോഗം തീരുമാനിച്ചു. അവസാന പാദത്തില്‍ പഠനപ്രവര്‍ത്തനങ്ങള്‍ മാത്രം നടത്തിയാല്‍ മതിയെന്നും സ്‌കൂള്‍ കലാ, കായിക മത്സരങ്ങള്‍ ഡിസംബറില്‍ തന്നെ പൂര്‍ത്തിയാക്കാനും തീരുമാനിച്ചു. സ്‌കൂള്‍ കായിക മേള ദേശീയ സ്‌കൂള്‍ കായിക മേളയുടെ കൂടി തിയതി അനുസരിച്ച് ക്രമീകരിക്കാനും തീരുമാനിച്ചു. ശാസ്ത്രമേള നവംബര്‍ ഒന്‍പതുമുതല്‍ 11 വരെയും സ്‌പെഷ്യല്‍ സ്‌കൂള്‍ കലോത്സവം ഒക്‌ടോബര്‍ 26 മുതല്‍ 28 വരെയും നടത്തും.

പത്താം ക്ലാസ് പരീക്ഷ മാര്‍ച്ച് ആറിന് ആരംഭിച്ച് 25 ന് പൂര്‍ത്തിയാക്കും. മോഡല്‍ പരീക്ഷകള്‍ ഫെബ്രുവരി ഏഴ് മുതല്‍ 13വരെ നടക്കും. സ്‌കൂള്‍ പാദവാര്‍ഷിക പരീക്ഷ ആഗസ്റ്റ് 30 മുതലും അര്‍ധവാര്‍ഷിക പരീക്ഷ ഡിസംബര്‍ 12 മുതലും ഒന്ന് മുതല്‍ ഒന്‍പതുവരെ ക്ലാസുകള്‍ക്ക് വാര്‍ഷിക പരീക്ഷ ഫെബ്രുവരി അവസാനത്തോടെയും നടത്തും.

ഡി.പി.ഐ കെ.വി മോഹന്‍ കുമാറിന്റെ അധ്യക്ഷതയില്‍ ചേര്‍ന്ന യോഗത്തില്‍ വിവിധ അധ്യാപക സംഘടനാ ഭാരവാഹികളായ കെ.സി ഹരികൃഷ്ണന്‍, സി. ഹരിഗോവിന്ദന്‍, എ.കെ സൈനുദ്ദീന്‍, എന്‍. ശ്രീകുമാര്‍, ഇടവം ഖാലിദ് കുഞ്ഞ്, ജയിംസ് കുര്യന്‍ തുടങ്ങിയവര്‍ പങ്കെടുത്തു.

കണ്ണൂര്‍:ഒപ്പനപ്പാട്ടിന്റെ ഇശലിനൊത്ത് കൈകൊട്ടിയാടുമ്പോള്‍ സുകന്യ യുടെ നെഞ്ച് പൊട്ടുന്നുണ്ടായിരുന്നു. എങ്കിലും ചിതയുടെ കനലെരിഞ്ഞു തീരും മുമ്പ് അവള്‍ അച്ഛനു നല്‍കിയ വാക്കു പാലിച്ചു. പുഞ്ചിരിയഭിനയിച്ചതിന്റെ വേദനയാവും. വേദിക്ക് പിറകിലിരുന്ന് അവള്‍ കരഞ്ഞു തീര്‍ത്തു. സഹപാഠികള്‍ക്ക് പോലും ആശ്വസിപ്പിക്കാനാവാത്ത വല്ലാത്ത അവസ്ഥ. ”അച്ഛന് കൊടുത്ത വാക്ക് പാലിച്ചില്ലേ… അമ്മേടെ മോള്‍ ഇനി തിരികെ പോര്”- അധ്യാപകന്റെ ഫോണില്‍ വിളിച്ച് അമ്മ പുഷ്പ പറഞ്ഞപ്പോള്‍ അവള്‍ കരച്ചില്‍ നിര്‍ത്തി. കണ്ണീരു വീണ് പരന്ന കണ്‍മഷി ഒപ്പനതുണിയുടെ കോന്തല കൊണ്ട് തുടച്ച് വേദി വിട്ടു.

വേദി ഒന്നില്‍ നടന്ന ഹയര്‍സെക്കന്ററി വിഭാഗം ഒപ്പന മത്സരത്തിലാണ് ആലപ്പുഴ മാവേലിക്കര ബിഷപ് ഹോഡ്ജസ് എച്ച്.എസ്.എസിലെ പി.എസ് സുകന്യ കാഴ്ചക്കാരുടെ കണ്ണീരായത്. ഞായറാഴ്ചയാണ് സുകന്യയുടെ അച്ഛന്‍ മരിച്ചത്. തിങ്കളാഴ്ച ഉച്ചക്ക് രണ്ട് മണിക്കായിരുന്നു സംസ്‌കാരം. അച്ഛന്‍ മരിച്ചതിനെ തുടര്‍ന്ന് സുകന്യ നയിക്കുന്ന ആലപ്പുഴ ജില്ലയുടെ ഒപ്പന ടീം മത്സരത്തില്‍ പങ്കെടുക്കുന്നില്ലെന്ന് സ്‌കൂള്‍ അധികൃതര്‍ തീരുമാനിച്ചിരുന്നു. എന്നാല്‍ സുകന്യയാണ് പങ്കെടുക്കണമെന്ന് നിര്‍ബന്ധിച്ചത്. ”ഒപ്പന അച്ഛന്റെ ആഗ്രഹമായിരുന്നു. കളി മുടക്കുന്നത് അച്ഛന്റെ ആത്മാവിന് ഇഷ്ടപ്പെടില്ലെ”ന്നു പറഞ്ഞപ്പോള്‍ അമ്മ പുഷ്പയും പോകാന്‍ സമ്മതം നല്‍കി. ഇന്നലെ വൈകുന്നേരം ആറ് മണിക്കാണ് മാവേലിക്കരയില്‍ നിന്ന് സുകന്യയും സംഘവും ട്രെയിന്‍ കയറിയത്. പതിനൊന്ന് മണിയോടെ കണ്ണൂരിലെത്തി.

നാടന്‍പാട്ടില്‍ ജില്ലാ തലത്തില്‍ സമ്മാനങ്ങള്‍ നേടിയ സുകന്യ അച്ഛന്‍ സുബാഷിന്റെ താല്‍പര്യ പ്രകാരമാണ് ഒപ്പനയില്‍ പങ്കെടുത്തത്. ”നിറഞ്ഞ സന്തോഷത്തോടെയാണ് ഒപ്പനയില്‍ പങ്കെടുക്കാന്‍ അച്ഛന്‍ സമ്മതം നല്‍കിയത്. സുഖമില്ലാതെ ആസ്പത്രിയിലേക്ക് കൊണ്ടു പോകുമ്പോഴും മത്സരത്തില്‍ വിജയിച്ചു വരണമെന്ന് അച്ഛന്‍ പറഞ്ഞിരുന്നു. അച്ഛന്റെ പിന്തുണയാണ് സംസ്ഥാന തലം വരെ ടീം എത്താന്‍ കാരണം” – സുകന്യ പറഞ്ഞു. ടി.ബി രോഗ ബാധിതനായ സുബാഷ് മാവേലിക്കരയിലെ ചുമട്ട് തൊഴിലാളിയായിരുന്നു. സുബാഷിന്റെ രണ്ടാമത്തെ മകളാണ് സുകന്യ. ഞായറാഴ്ച രാവിലെയാണ് രക്തം ഛര്‍ദ്ദിച്ച് സുബാഷിനെ ആസ്പത്രിയില്‍ പ്രവേശിപ്പിച്ചത്. വൈകുന്നേരത്തോടെ മരിച്ചു. ഒപ്പനയില്‍ ലഭിച്ച എ ഗ്രേഡ് അച്ഛന് സമര്‍പ്പിച്ചാണ് കണ്ണൂരിന്റെ കണ്ണീരായി സുകന്യ മടങ്ങിയത്.
മത്സരശേഷം വേദിക്കു പിറകില്‍ വിതുമ്പുന്ന സുകന്യയെ
ടീമംഗങ്ങള്‍ ആശ്വസിപ്പിക്കുന്നു

പത്ത് വര്‍ഷത്തിനിപ്പുറമാണ് ഏഷ്യയിലെ തന്നെ ഏറ്റവും വലിയ കലാമേളക്ക് കണ്ണൂര്‍ വേദിയാകുന്നത്. ഇരുപത് വേദികളിലായി 232 മത്സരങ്ങളും 12,000 കുട്ടികളും മേളയില്‍ പങ്കെടുക്കും.

രാവിലെ പൊതുവിദ്യാഭ്യാസ ഡയറക്ടര്‍ കെ.വി മോഹന്‍കുമാര്‍ പതാകയുയര്‍ത്തി മേളയുടെ ഔപചാരിക ഉദ്ഘാടനം നടത്തി. തുടര്‍ന്ന് കണ്ണൂരിന്റെ രാഷ്ട്രീയ പ്രബുദ്ധതയും കലാസാസംകാരിക പൈതൃകവും വിളിച്ചോതുന്ന തരത്തില്‍ വന്‍ ഘോഷയാത്ര നടന്നു.

ഉദ്ഘാടന ചടങ്ങില്‍ വിദ്യാഭ്യാസ മന്ത്രി സി രവീന്ദ്രനാഥ് അധ്യക്ഷത വഹിച്ചു. ഗായിക കെ.എസ് ചിത്ര മുഖ്യാതിഥിയായി. പ്ലാസ്റ്റിക് മുക്ത ഹരിതമേളയാണ് അമ്പത്തിയേഴാമത് സംസ്ഥാന സ്‌കൂള്‍ കലോല്‍സവം എന്നതാണ് ഏറ്റവും വലിയ പ്രത്യേകത. നദികളുടെ
പേരിലാണ് കലോത്സവ വേദികള്‍ അറിയപ്പെടുന്നത്‌

കണ്ണൂര്‍: സബീനയുടെ ഹൃദയത്തിലിപ്പോള്‍ ഓര്‍മകളുടെ തിരയിളക്കമാണ്. സ്വന്തം നാട്ടിലേക്ക് വീണ്ടും കൗമാര കലാ മാമാങ്കം കടന്നുവരുമ്പോള്‍ കണ്ണൂര്‍ ആര്‍.ടി ഓഫീസിലെ സീനിയര്‍ ക്ലര്‍ക്ക് സബീനയ്ക്കു പറയാനുള്ളത് 30 വര്‍ഷം പഴക്കമുള്ള കഥ. കലയില്‍ ഏറെയൊന്നും അഹങ്കരിക്കാനില്ലാത്ത കാലത്ത് കണ്ണൂരിലേക്ക് കലാ തിലകം പട്ടം കൊണ്ടുവന്നത് 1987ല്‍ സബീനയാണ്.
അന്ന് കോഴിക്കോടായിരുന്നു കലോത്സവം. ഇഞ്ചേടിഞ്ചുള്ള പോരാട്ടത്തില്‍ സ്വന്തം നാട് പിന്‍തള്ളപ്പെട്ടെങ്കിലും കലാതിലക പട്ടം സബീനയ്ക്കായിരുന്നു. അതും നൃത്ത നൃത്യങ്ങളിലൊന്നും പങ്കെടുക്കാതെ തന്നെ.
കീച്ചേരി ഹൈസ്‌കൂളിലെ ഒമ്പതാം ക്ലാസ് വിദ്യാര്‍ത്ഥിയായിരുന്നു സബീന.മോണോ ആക്റ്റ് ,ഓയില്‍ പെയിന്റിങ്ങ്, തബല, പദ്യപാരായണം എന്നീ ഇനങ്ങളില്‍ ഒന്നാം സ്ഥാനം നേടിയാണ് തിലക പട്ടം നേടിയത്. ”എല്ലാം കഴിഞ്ഞുനാട്ടിലെത്തിയപ്പോള്‍ കണ്ണൂര്‍ നഗരത്തില്‍ ഗംഭീര സ്വീകരണമായിരുന്നു. പ്രമുഖരെല്ലാം പങ്കെടുത്ത വലിയ സ്വീകരണം. പിന്നീട് ഒരുമാസത്തോളം സ്വീകരണങ്ങളുടെ തിരക്കായിരുന്നു. അതെല്ലാം ഓര്‍ക്കുമ്പോഴിപ്പോള്‍ ഉള്ളിലൊരു തിരയൊഴുകുന്നു”
1988ല്‍ കൊല്ലത്ത് നടന്ന കലോത്സവത്തിലും സബീനയ്ക്കായിരുന്നു തിലകപട്ടം. അതോടെ സ്‌കൂളില്‍ താരമായി . പത്താംതരം കഴിഞ്ഞു തളിപ്പറമ്പ് സര്‍സയ്യിദ് കോളജിലെത്തിയപ്പോഴും വേദികളിലെ നിറസാന്നിധ്യമായിരുന്നു. ബി സോണ്‍ മേളയില്‍ തിളങ്ങി നിന്ന ഈ പ്രതിഭ കണ്ണൂര്‍ ചിന്‍മയ മിഷനില്‍ ബിരുദത്തിനു ചേര്‍ന്നപ്പോഴും മികവ് തെളിയിച്ചു.
വേളാപുരത്തെ നലവടത്ത് നാരായണന്‍-നളിനി ദമ്പതികളുടെ മകളാണ് സബീന. അച്ഛന്‍ തന്നെയായിരുന്നു ഗുരു. തളിപ്പറമ്പ് ടാഗോര്‍ വിദ്യാനികേതനിലെ ചിത്രകലാ അധ്യാപകനായ പിതാവിന്റെ ഒഴിവുനേരങ്ങളില്‍ പരിശീലനം നല്‍കിയിരുന്നു. പിന്നീട് ജോലികിട്ടി വിവാഹം കഴിഞ്ഞപ്പോഴും കലയെയും സാഹിത്യത്തെയും അകറ്റി നിര്‍ത്തിയില്ല. അധ്യാപകനും കലാകാരനുമായ ഭര്‍ത്താവ് കണ്ണപുരത്തെ ഉല്ലാസ് ബാബു എല്ലാ പിന്തുണയും നല്‍കിയതോടെ വരയില്‍ സജീവമായി. പിന്നീട് ദമ്പതികളുടെ ചിത്രപ്രദര്‍ശനം സംസ്ഥാനമൊട്ടുക്കും നടത്തി.

കണ്ണൂര്‍: പാചകത്തിലെ നളന്‍ പഴയിടത്തിന്റെ അടുക്കളയില്‍ പാല്‍ തിളച്ചുമറിഞ്ഞു. പിന്നാലെ കൈക്കാര്‍ സദ്യവട്ടമൊരുക്കി. പ്രതിഭകളുമെത്തിത്തുടങ്ങിയതോടെ കലാപൂരത്തിന് അരങ്ങൊരുങ്ങി. കൗമാരം ചിരിതൂകുന്ന വര്‍ണ്ണോത്സവത്തിന് ഇന്ന് കൊടിയേറ്റം.
രാവിലെ 9.30ന് പ്രധാന നഗരിയില്‍ പൊതുവിദ്യാഭ്യാസ ഡയറക്ടര്‍ കെ.വി മോഹന്‍കുമാര്‍ പതാക ഉയര്‍ത്തും. ഉച്ചയ്ക്ക് 2.30ന് സെന്റ് മൈക്കിള്‍സ് ആംഗ്ലോ ഇന്ത്യന്‍ ഹയര്‍സെക്കന്ററി സ്‌കൂള്‍ പരിസരത്തുനിന്ന് വര്‍ണാഭമായ ഘോഷയാത്ര ആരംഭിക്കും. വൈകുന്നേരം നാലിന് പ്രധാന വേദിയായ ‘നിള’യില്‍ മുഖ്യമന്ത്രി പിണറായി വിജയന്‍ 57-ാമത് സംസ്ഥാന സ്‌കൂള്‍ കലോത്സവത്തിന്റെ ഉദ്ഘാടനം നിര്‍വഹിക്കും. വിദ്യാഭ്യാസമന്ത്രി സി.രവീന്ദ്രനാഥ് അധ്യക്ഷത വഹിക്കും.
കണ്ണൂരിന്റെ കലാ-സാംസ്‌കാരിക പാരമ്പര്യത്തിന് നൃത്ത ചുവടുകളൊരുക്കി 57 സംഗീത അധ്യാപകര്‍ സ്വാഗത ഗാനം ആലപിക്കും. ഉദ്ഘാടന ചടങ്ങിനുശേഷം പ്രധാന വേദിയില്‍ ഹൈസ്‌കൂള്‍ വിഭാഗം പെണ്‍കുട്ടികളുടെ മോഹിനിയാട്ടത്തോടെ മത്സരങ്ങള്‍ തുടങ്ങും. ഇതേ സമയം ഒന്‍പത് വേദികളിലും മത്സരങ്ങള്‍ നടക്കും.
ഇന്നലെ ഉച്ചയ്ക്ക് 2.25ഓടെ നാഗര്‍കോവില്‍-മംഗളൂരു ഏറനാട് എക്‌സ്പ്രസില്‍ കണ്ണൂരിലെത്തിയ കഴിഞ്ഞ വര്‍ഷത്തെ സ്വര്‍ണ്ണക്കപ്പ് ജേതാക്കളായ കോഴിക്കോട് ജില്ലാ ടീമിന് മന്ത്രി രാമചന്ദ്രന്‍ കടന്നപ്പള്ളിയുടെ നേതൃത്വത്തില്‍ റെയില്‍വെ സ്റ്റേഷനില്‍ ഊഷ്മള സ്വീകരണം നല്‍കി.

നീരാടി നിള…

ഇന്ന് അരങ്ങുണരുന്ന സംസ്ഥാന സ്‌കൂള്‍ കലോത്സവത്തിനായി കണ്ണൂര്‍ പൊലീസ് മൈതാനിയിയില്‍ ഒരുക്കിയ പ്രധാന വേദിയായ ‘നിള’ രാത്രി ദീപാലങ്കാരങ്ങളില്‍ നീരാടിയപ്പോള്‍
(ചിത്രം: കെ ശശി)

ഇന്നലെ രാവിലെ 11.10ന് ഭക്ഷണ കമ്മിറ്റി ചെയര്‍മാന്‍ ടി.വി രാജേഷ് എം.എല്‍.എയാണ് ജവഹര്‍ സ്റ്റേഡിയത്തിലെ പാചകപുരയില്‍ പാല് കാച്ചിയത്. ചടങ്ങിന് എത്തിയവര്‍ക്ക് കല്‍ക്കണ്ടം ചേര്‍ത്ത പഴയിടം സ്‌പെഷല്‍ അരവണയാണ് മധുരമായി നല്‍കിയത്. മേയര്‍ ഇ.പി ലത, പൊതുവിദ്യാഭ്യാസ വകുപ്പ് ഡയറക്ടര്‍ കെ.വി മോഹന്‍കുമാര്‍, അഡീഷനല്‍ ഡയറക്ടര്‍ ജെസി ജോസഫ്, ജില്ലാ കലക്ടര്‍ മീര്‍ മുഹമ്മദലി, തുടങ്ങി ജനപ്രതിനിധികളും വിവിധ സബ്കമ്മിറ്റി ഭാരവാഹികളും ചടങ്ങിന് സാക്ഷിയായി.
ഊണ്‍ ഉള്‍പ്പടെയുള്ളവ തയ്യാറാക്കുന്നതിന് ജില്ലയിലെ വിദ്യാലയങ്ങളില്‍ നിന്ന് ശേഖരിച്ച പച്ചക്കറികള്‍ വെള്ളിയാഴ്ച മുതല്‍ പാചകപുരയില്‍ എത്തിതുടങ്ങിയിരുന്നു. പച്ചക്കറി കൂടാതെ 10 ടണ്ണിലധികം പഞ്ചസാരയും വെല്ലവും 10,000ലധികം നാളികേരവും പാചകപുരയിലെത്തി. അഞ്ച് ഉപജില്ലകളില്‍ നിന്നുള്ള കലവറ വണ്ടി ഇന്ന് എത്തും. വിഭവ ശേഖരണത്തിന് കലവറ വണ്ടികള്‍ പോയിടത്തെല്ലാം ആവേശകരമായ പ്രതികരണമാണ് വിദ്യാര്‍ത്ഥികളില്‍ നിന്നും രക്ഷിതാക്കളില്‍ നിന്നും ലഭിച്ചത്. ഒരു ദിവസം 25,000 പേര്‍ക്കുള്ള ഭക്ഷണമാണ് തയ്യാറാക്കുക. ഊട്ടുപുരയില്‍ ഒരേസമയം 3000 പേര്‍ക്ക് ഊണ്‍ വിളമ്പാനുള്ള സൗകര്യം ഒരുക്കിയിട്ടുണ്ട്.