stock exchange – Chandrika Daily

ഓഹരി വിപണി: കിങ്ഫിഷര്‍ അടക്കം 18 കമ്പനികളെ ഡീ ലിസ്റ്റ് ചെയ്തു

chandrika — Tue, 22 May 2018 09:08:45 +0000

മുംബൈ: കോടികളുടെ സാമ്പത്തിക തട്ടിപ്പ് നടത്തി രാജ്യം വിട്ട വിവാദ വ്യവസായി വിജയ് മല്യയുടെ ഉടമസ്ഥതയിലുള്ള കിങ്ഫിഷര്‍ എയര്‍ലൈന്‍സ് അടക്കം 18 കമ്പനികളെ ഡീ ലിസ്റ്റ് ചെയ്യാന്‍ നാഷണല്‍ സ്റ്റോക്ക് എക്‌സ്‌ചേഞ്ച് തീരുമാനിച്ചു. ഇതോടെ നാഷണല്‍ സ്‌റ്റോക്ക് എക്‌സ്‌ചേഞ്ച് പട്ടികയില്‍ നിന്ന് ഈ കമ്പനികള്‍ പൂര്‍ണമായും പുറത്താകും. മെയ് 30 മുതലാണ് ഇത് നിലവില്‍ വരിക. മെയ് 11 മുതല്‍ 200 കമ്പനികളെ ബോംബെ സ്‌റ്റോക്ക് എക്‌സ്‌ചേഞ്ച് ഡീലിസ്റ്റ് ചെയ്തിരുന്നു.

കിങ്ഫിഷറിനു പുറമെ പ്ലെത്തിക്കോ ഫാര്‍മസ്യൂട്ടിക്കല്‍സ്, ആഗ്രോ ഡച്ച് ഇന്‍ഡസ്ട്രീസ്, ബ്രോഡ്കാസ്റ്റ് ഇനിഷ്യേറ്റീവ്‌സ്, ക്രെസ്റ്റ് അനിമേഷന്‍ സ്റ്റുഡിയോ, കെ.ഡി.എല്‍ ബയോടെക്, കംറോക് ഇന്‍ഡസ്ട്രീസ് ആന്റ് എക്‌സ്‌പോര്‍ട്ട്‌സ്, ലുമെക്‌സ് ഓട്ടോമോട്ടീവ് സിസ്റ്റം, നിസ്സാന്‍ കോപ്പര്‍, ശ്രീ ആസ്റ്റര്‍ സിലിക്കേറ്റ്‌സ്, സൂര്യ ഫാര്‍മസ്യൂട്ടിക്കല്‍സ് തുടങ്ങിയവയാണ് ഡീ ലിസ്റ്റ് ചെയ്യപ്പെട്ട കമ്പനികളുടെ പട്ടികയിലുള്ളത്.

കൂടാതെ പാപ്പരായി പ്രഖ്യാപിക്കപ്പെട്ട ബ്രാന്‍ഡ് ഹൗസ് റീട്ടേല്‍സ്, എല്‍ഡര്‍ ഫാര്‍മസ്യൂട്ടിക്കല്‍സ്, ഫസ്റ്റ് ലീസിങ് കമ്പനി ഇന്ത്യ, ഗ്ലോഡൈന്‍ ടെക്‌നോസെര്‍വ്, ഹിലിയോസ് ആന്റ് മാത്തെസണ്‍ ഇന്‍ഫോര്‍മേഷന്‍ ടെക്‌നോളജി, ടുലിപ് ടെലികോം, വരുണ്‍ ഇന്‍ഡസ്ട്രീസ് എന്നീ ഏഴു കമ്പനികളെയും ഡീ ലിസ്റ്റ് ചെയ്തിട്ടുണ്ട്.

ആറു മാസമായി ഈ കമ്പനികളുടെ ഓഹരികളില്‍ ട്രേഡിങ് നിരോധിച്ചിരുന്നു. നേരത്തെ 331 ഷെല്‍ കമ്പനികള്‍ക്കെതിരെ നടപടി വേണമെന്ന് സെക്യൂരിറ്റീസ് എക്‌സ്‌ചേഞ്ച് ബോര്‍ഡ് ഓഫ് ഇന്ത്യ (സെബി) സ്റ്റോക്ക് എക്‌സ്‌ചേഞ്ചുകള്‍ക്ക് കത്ത് അയച്ചിരുന്നു. ഇതിനു പിന്നാലെയാണ് നാഷണല്‍ സ്റ്റോക്ക് എക്‌സ്‌ചേഞ്ച് നടപടി.

ആര്‍ബിഐ വായ്പാ നയം: ഓഹരി വിപണിക്ക് തകര്‍ച്ച

chandrika — Thu, 05 Oct 2017 13:45:46 +0000

ന്യൂഡല്‍ഹി: റിസര്‍വ് ബാങ്ക് ഓഫ് ഇന്ത്യ വായ്പാ നയം പ്രഖ്യാപിച്ചതിനു പിന്നാലെ രാജ്യത്തെ ഓഹരി വിപണിക്ക് തകര്‍ച്ച. ബോംബെ സ്‌റ്റോക്ക് എക്‌സ്‌ചേഞ്ച് സൂചികയായ സെന്‍സെക്‌സ് 79.08 പോയിന്റ് നഷ്ടത്തില്‍ 31592.03ലാണ് ക്ലോസ് ചെയ്തത്. ദേശീയ ഓഹരി സൂചികയായ നിഫ്റ്റി 26.20 താഴ്ന്ന് 9,888.70ലുമാണ് വ്യാപാരം അവസാനിപ്പിച്ചത്.
ബി.എസ്.ഇയിലെ 1151 ഓഹരികള്‍ നഷ്ടത്തിലായിരുന്നു. എസ്ബിഐ, ഐ.സി.ഐ.സി.ഐ ബാങ്ക്, ടെക് മഹീന്ദ്ര, ബജാജ് ഓട്ടോ, ഹീറോ മോട്ടോര്‍കോര്‍പ്പ്, ആക്‌സിസ് ബാങ്ക്, എച്ച്.ഡി.എഫ്.സി, ഹിന്ദുസ്ഥാന്‍ യൂണിലിവര്‍, ഐ.ടി.സി, സണ്‍ ഫാര്‍മ തുടങ്ങിയവ വന്‍ നഷ്ടത്തിലാണ് വ്യാപാരം അവസാനിപ്പിച്ചത്. 1500 കമ്പനികളുടെ ഓഹരികള്‍ക്ക് നേരിയ നേട്ടത്തോടെ വ്യാപാരം അവസാനിപ്പിക്കാനായി. അവസാന മണിക്കൂറിലെ വില്‍പ്പന സമ്മര്‍ദ്ദമാണ് ഓഹരികളെ നഷ്ടത്തിലാക്കിയത്.

സാമ്പത്തിക മാന്ദ്യം: സെന്‍സെക്‌സ് കൂപ്പുകുത്തി; നിഫ്റ്റി നിലംപതിച്ചു

chandrika — Fri, 22 Sep 2017 11:03:02 +0000

മുംബൈ: സാമ്പത്തികമാന്ദ്യ സൂചന നല്‍കി പ്രധാനമന്ത്രി നരേന്ദ്രമോദിയുടെ നേതൃത്വത്തില്‍ കേന്ദ്രസര്‍ക്കാര്‍ യോഗം വിളിച്ചതിനു പിന്നാലെ ഓഹരി വിപണിയില്‍ കനത്ത തിരിച്ചടി.

സെന്‍സെക്‌സ് 450 പോയന്റ് നഷ്ടത്തില്‍ 31922.44ല്‍ വ്യാപാരം അവസാനിപ്പിച്ചു. നിഫ്റ്റി 157.50 പോയിന്റ് താഴ്ന്ന് 9964.40 -ലുമാണ് വ്യാപാരം അവസാനിപ്പിച്ചത്.

രൂപയുടെ മൂല്യത്തില്‍ സംഭവിച്ച ഇടിവും ഓഹരി വിപണിയെ പ്രതികൂലമായി ബാധിച്ചിട്ടുണ്ട്.

ടാറ്റ സ്റ്റീല്‍, റിലയന്‍സ്, ഐ.സി.ഐ.സി.ഐ ബാങ്ക്, എസ്.ബി.ഐ, ആക്‌സിസ് ബാങ്ക്, ഹിന്‍ഡാല്‍കോ, വേദാന്ത, എല്‍.ആന്റ്.ടി, ഹിന്ദുസ്ഥാന്‍ യൂണിലിവര്‍, ഹീറോ മോട്ടോര്‍കോര്‍പ് തുടങ്ങിയ മിക്ക കമ്പനികളുടെയും ഓഹരികള്‍ നഷ്ടത്തിലാണ് ക്ലോസ് ചെയ്തത്.

വിപ്രോ, എച്ച്.സി.എല്‍, ഭാരതി ഇന്‍ഫ്രാടെല്‍ തുടങ്ങിയവയുടെ ഓഹരി മാത്രമാണ് നേട്ടത്തിലുള്ളത്.

ഓഹരി വിപണി നഷ്ടത്തില്‍

chandrika — Thu, 15 Dec 2016 12:04:14 +0000

മുംബൈ: ഇന്ത്യന്‍ ഓഹരി വിപണിയില്‍ വന്‍ ഇടിവ്. സെന്‍സെക്‌സ് 83.77 പോയിന്റ് നഷ്ടത്തില്‍ 26519.07 പോയിന്റിലും നിഫ്റ്റി 28.85 പോയിന്റ് താഴ്ന്ന് 8153.60 പോയിന്റിലുമാണ് ഇന്നു വ്യാപാരം അവസാനിപ്പിച്ചത്. ഫെഡ് റിസര്‍വ് പലിശ നിരക്ക് ഉയര്‍ത്തിയതാണ് ഓഹരി സൂചികകള്‍ ഇടിയാന്‍ കാരണമായത്. രാവിലെ വ്യാപാരം ആരംഭിച്ചപ്പോള്‍ ഭേദപ്പെട്ട നിലവാരത്തിലായിരുന്നെങ്കിലും ഉച്ചയോടെ ഓഹരി സൂചികകള്‍ നഷ്ടത്തിലായി. ബോംബെ സ്‌റ്റോക്ക് എക്‌സ്‌ചേഞ്ചിലെ 1290 കമ്പനികളുടെ ഓഹരികളാണ് നഷ്ടത്തിലായത്. ടാറ്റാ മോട്ടോഴ്‌സ്, ഏഷ്യന്‍ പെയിന്റ്‌സ്, സണ്‍ ഫാര്‍മ, ഡോ.റെഡ്ഡീസ് ലാബ് തുടങ്ങിയ കമ്പനികളാണ് നഷ്ടത്തില്‍ വ്യാപാരം അവസാനിപ്പിച്ചത്. അതേസമയം ആക്‌സിസ് ബാങ്ക്, ടിസിഎസ്, എച്ച്‌സിഎല്‍ ടെക്, എസ്ബിഐ, ബജാജ് ഓട്ടോ, മാരുതി, ടാറ്റാ സ്റ്റീല്‍ കമ്പനികളുടെ ഓഹരികള്‍ ചെറിയ തോതില്‍ നേട്ടം കൈവരിച്ചു.