ലാന്‍ഡ് ബോര്‍ഡ് ഭൂമി പിടിച്ചെടുക്കുന്നത് തടയാനായിരുന്നു മുന്‍ സി.പി.എം എല്‍.എയുടെ നടപടി. പിതാവിന്റെ മിച്ചഭൂമി തിരിച്ച് പിടിക്കാന്‍ ലാന്‍ഡ് ബോര്‍ഡ് നടപടി തുടങ്ങിയത്തോടെ 2001ല്‍ അഗസ്റ്റിന്‍ എന്നയാള്‍ക്ക് ഈ ഭൂമി കൈമാറി. പിന്നീട് 2022 ല്‍ ഇതേ ഭൂമി ഭാര്യയുടെ പേരില്‍ ജോര്‍ജ് എം തോമസ് തിരിച്ച് വാങ്ങുകയായിരുന്നു. ഇതേ ഭൂമിയില്‍ പുതിയ വീട് നിര്‍മിക്കുകയും ചെയ്തു.

ഈ ആരോപണം വന്നതിന് പിന്നാലെ നടത്തിയ വിശദമായ അന്വേഷണത്തിനൊടുവിലാണ് പരാതി വാസ്തവമാണെന്നും ആക്ഷേപ ഭൂമിയില്‍ ഇരുനില വീടിന്റെ നിര്‍മാണം നടക്കുന്നുവെന്നുമുള്ള റിപ്പോര്‍ട്ട് ലാന്‍ഡ് ബോര്‍ഡ് നല്‍കിയത്.

സംഭവത്തില്‍ വിജിലന്‍സും അന്വേഷണം ആരംഭിച്ചു. 16 ഏക്കറില്‍ കൂടുതല്‍ മിച്ചഭൂമി ജോര്‍ജ് കൈവശം വെച്ചു എന്നായിരുന്നു പരാതി. പാര്‍ട്ടി നിലപാടിന് ചേരാത്ത നടപടികളുടെ പേരില്‍ ജോര്‍ജിനെ 2023ലാണ് സി.പി.എം പാര്‍ട്ടിയില്‍ നിന്നും വിവിധ സ്ഥാനങ്ങളില്‍ നിന്നും നീക്കിയത്.

മിച്ചഭൂമിയെന്ന് 2000ല്‍ ലാന്‍ഡ് ബോര്‍ഡ് കണ്ടെത്തുകയും തിരിച്ചുപിടിക്കാന്‍ 2003ല്‍ ഹൈക്കോടതി ഉത്തരവിടുകയും ചെയ്ത കേസിലാണ് താലൂക്ക് ലാന്‍ഡ് ബോര്‍ഡ് ഉദ്യോഗസ്ഥരുടെ ഒത്തുകളി. മിച്ചഭൂമിയായ 16 ഏക്കര്‍ 40 സെന്റ് സ്ഥലം ജോര്‍ജ് എം തോമസ് കൈവശം വച്ചെന്നായിരുന്നു കണ്ടെത്തല്‍. ഈ ഭൂമിയില്‍ തന്നെയാണ് ജോര്‍ജ് എം തോമസ് വീട് വച്ച് താമസിക്കുന്നതും.

പരിശോധനയ്ക്ക് ഉദ്യോഗസ്ഥരെത്തുമ്പോള്‍ ഇവിടെയെത്തി പരാതിക്കാരോട് തെളിവ് ഹാജരാക്കണമെന്ന വിചിത്ര നിര്‍ദ്ദേശമാണ് ലാന്‍ഡ് ബോര്‍ഡ് ഉദ്യോഗസ്ഥര്‍ നല്‍കിയത്.

ഇതുപ്രകാരം രേഖകളുമായെത്തിയ പരാതിക്കാരെ കാണാനോ, അവരുടെ ഭാഗം കേള്‍ക്കാനോ ഉദ്യോഗസ്ഥര്‍ തയ്യാറായില്ല. ഓതറൈസ്ഡ് ഓഫീസര്‍ ഉള്‍പ്പെടെ പരാതിക്കാരുടെ മുന്നില്‍പ്പെടാതെ കാറില്‍ക്കയറി മടങ്ങാന്‍ ശ്രമിക്കുന്നതിനിടെയായിരുന്നു പ്രതിഷേധം.

മിച്ചഭൂമി കേസില്‍ അന്വേഷിച്ച് അടിയന്തര നടപടിയെടുക്കാന്‍ ലാന്‍ഡ് ബോര്‍ഡ് കമ്മീഷണര്‍ നേരത്തെ ഉത്തരവിട്ടിരുന്നു. ഇതുപ്രകാരം കഴിഞ്ഞ മാസം 26ന് ഉദ്യോഗസ്ഥര്‍ പരിശോധനക്കെത്തുമെന്ന് അറിയിച്ചിരുന്നെങ്കിലും അവസാനനിമിഷം പിന്മാറി.

രാഷ്ട്രീയ സ്വാധീനം കൊണ്ടാണ് ജോര്‍ജ് എം തോമസിനെ സംരക്ഷക്കുന്ന നിലപാട് ഉദ്യോഗസ്ഥര്‍ സ്വീകരിക്കുന്നതെന്നാണ് ആരോപണം. സംഭവത്തെക്കുറിച്ച് വിശദീകരിക്കാന്‍ താലൂക്ക് ലാന്‍ഡ് ബോര്‍ഡ് ഉദ്യോഗസ്ഥര്‍ തയ്യാറായിട്ടില്ല.