കേരളത്തില്‍ തുടക്കമിട്ട എല്ലാ ‘കെ’ പദ്ധതികളും ‘വി’ പദ്ധതികള്‍ ആണെന്ന് ചാനല്‍ അഭിമുഖത്തില്‍ സ്വപ്ന സുരേഷ് ആരോപിച്ചു. പദ്ധതി ആലോചിക്കുമ്പോള്‍ തന്നെ അതിനു താല്പര്യമുള്ള വന്‍ മത്സ്യം ആരെന്നു കണ്ടെത്തി പണം കൈപ്പറ്റും. ശിവശങ്കരന്റെ നേതൃത്വത്തില്‍ ഐടി വകുപ്പിലാണ് ഇത്തരത്തില്‍ കൂടുതല്‍ പദ്ധതികള്‍ നടപ്പിലാക്കിയത്. ദുബായിലും ചര്‍ച്ചകള്‍ നടന്നിട്ടുണ്ടെന്ന് അവര്‍ പറയുന്നു.

വീണയുടെ കമ്പനിയെ സഹായിക്കാന്‍ തന്നെ ബാംഗ്ലൂരില്‍ നിയമിക്കാന്‍ പറഞ്ഞതായും സ്വപ്‌ന പറഞ്ഞു. മുഖ്യമന്ത്രിയുമായി ബന്ധപ്പെട്ട കൂടുതല്‍ കാര്യങ്ങള്‍ വൈകാതെ വെളിപ്പെടുത്തുമെന്നും സ്വപ്ന പറയുന്നു.

സ്വപ്നസുരേഷ് ഉന്നയിച്ച ആരോപണങ്ങള്‍ തള്ളി മുന്‍ സ്പീക്കര്‍ ശ്രീരാമകൃഷ്ണന്‍ നടത്തിയ പ്രതികരണങ്ങള്‍ക്ക് പിന്നാലെയാണ് ഫെയ്‌സ്ബുക്ക് പോസ്റ്റ് വന്നിരിക്കുന്നത്. ഒറ്റയ്ക്ക് വീട്ടിലേക്ക് ക്ഷണിച്ചു എന്നായിരുന്നു സ്വപ്ന ഒരു ടിവി ചാനലിന് നല്‍കിയ അഭിമുഖത്തില്‍ പറഞ്ഞത്.

എന്നാല്‍ ഇതിനെ ശ്രീരാമകൃഷ്ണന്‍ തള്ളിയിരുന്നു. സത്യത്തിന്റെ ഒരു കണികപോലും ഇല്ലാത്ത അസത്യങ്ങള്‍ മാത്രമാണ് സ്വപ്നയുടെത് എന്നായിരുന്നു ശ്രീരാമകൃഷ്ണന്‍ പറഞ്ഞത്.

ശ്രീരാമകൃഷ്ണന് പുറമേ കടകംപള്ളി സുരേന്ദ്രന്‍, തോമസ് ഐസക്ക് എന്നിവര്‍ക്കെതിരെയും സ്വപ്ന ലൈംഗിക ആരോപണം ഉന്നയിച്ചിരുന്നു.

മുന്‍ മന്ത്രിമാരായ കടകംപള്ളി സുരേന്ദ്രന്‍, തോമസ് ഐസക്, മുന്‍ നിയമസഭാ സ്പീക്കര്‍ പി.ശ്രീരാമകൃഷ്ണന്‍ എന്നിവര്‍ക്കെതിരെ സ്വപ്‌ന ഉന്നയിച്ച പരാതിയില്‍ കഴമ്പുണ്ടെന്നോ ഇല്ലെന്നോ സി.പി.എം ഇനിയും വ്യക്തമാക്കിയിട്ടില്ല. അതേസമയം അന്വേഷണത്തിന് ‘പാര്‍ട്ടി കമ്മീഷന്‍’ പ്രഖ്യാപിക്കാനുള്ള സാധ്യതയുള്ളതായി അറിയുന്നു. കടകംപള്ളിയുമായി അടുത്ത തലസ്ഥാനത്തെ ചില നേതാക്കളാണ് ഇക്കാര്യത്തില്‍ സൂചന നല്‍കുന്നത്. ആരോപണം പാര്‍ട്ടിതലത്തില്‍ അന്വേഷിച്ചേക്കുമെന്നാണ് ഇവര്‍ പറയുന്നത്. അങ്ങനെയെങ്കില്‍ മുന്‍പ് പി.കെ ശശിക്കെതിരായ പരാതി അന്വേഷിച്ച എ.കെ ബാലന്‍- പി.കെ ശ്രീമതി കമ്മീഷന് സമാനമായ ഒരു അന്വേഷണം പ്രഖ്യാപിച്ച് തല്‍ക്കാലം തടിയൂരാനാകും സി.പി.എം ശ്രമിക്കുക.

പി.കെ ശശിക്കെതിരെ ഉയര്‍ന്ന ആരോപണത്തില്‍ തീവ്രത കുറഞ്ഞ പീഡനമാണ് നടന്നതെന്നായിരുന്നു പാര്‍ട്ടി കമ്മീഷന്റെ കണ്ടെത്തല്‍. ഈ റിപ്പോര്‍ട്ടിന്റെ ബലത്തില്‍ പി.കെ ശശി പിന്നീട് പാര്‍ട്ടി വേദികളില്‍ തിരിചെത്തുകയും ചെയ്തിരുന്നു. എന്നാല്‍ ഇത്തവണ കാര്യങ്ങള്‍ അങ്ങനെയല്ല. അതുകൊണ്ടുതന്നെ തീവ്രത കുറവാണെന്ന് പറഞ്ഞ് ഒതുക്കിത്തീര്‍ക്കാനും കഴിയില്ല.

മൂവര്‍ക്കുമെതിരെ കേസെടുക്കണമെന്ന ആവശ്യം ശക്തമായിരിക്കെ സി.പി.എം കേന്ദ്രങ്ങള്‍ ഇതുമായി ബന്ധപ്പെട്ട് പ്രതികരിക്കാന്‍ പോലും തയാറാകുന്നില്ല. മുഖ്യമന്ത്രി പിണറായി വിജയനോ സി.പി.എം സംസ്ഥാന സെക്രട്ടറി എം.വി ഗോവിന്ദനോ വിഷവുമായി ബന്ധപ്പെട്ട് ഇനിയും മിണ്ടിയിട്ടില്ല. സ്വര്‍ണക്കടത്ത് കേസില്‍ നിയമനടപടി നേരിടുന്നയാള്‍ എന്നതിനപ്പുറം സ്വപ്‌ന സുരേഷ് എന്ന വ്യക്തിയുടെ സത്രീത്വത്തെ അപമാനിച്ച സംഭവത്തില്‍ സി.പി.എമ്മിന്റെ വനിതാ സംഘടനയും വായ തുറക്കുന്നില്ല. സ്ത്രീപക്ഷക്കാരെന്ന് കൊട്ടിഘോഷിക്കുകയും നവോത്ഥാന മതില്‍ സംഘടിപ്പിക്കുകയും ചെയ്ത പാര്‍ട്ടിയും സര്‍ക്കാരും വളരെ ഗുരുതരമായ ആരോപണത്തിന് മറുപടി നല്‍കാന്‍ തയറാകാത്തത് സി.പി.എമ്മിന്റെ ഇരട്ടത്താപ്പ് കൂടിയാണ് പുറത്താക്കിയത്. സി.പി.എം ഭരിക്കുന്ന സര്‍ക്കാരിനു കീഴില്‍ പ്രവര്‍ത്തിക്കുന്ന വനിതാ കമ്മീഷനും വിഷയം അറിഞ്ഞഭാവം കാട്ടിയിട്ടില്ല. കടകംപള്ളിക്കെതിരെ നേരത്തെ സമാനമായ ആരോപണം ഉണ്ടാവുകയും ഓഡിയോ ക്ലിപ്പുകള്‍ വ്യാപകമായി പ്രചരിക്കുകയും ചെയ്തിരുന്നു. എന്നാല്‍ അതുമായി ബന്ധപ്പെട്ട് പരാതിയുണ്ടായില്ല. ലൈംഗികാതിക്രമം ഉണ്ടാകുന്ന സമയത്ത് താന്‍ ഉയര്‍ന്ന പദവിയിലായിരുന്നെന്നും തനിക്ക് ഇതാണ് അവസ്ഥയെങ്കില്‍ സാധാരണ സ്ത്രീകളുടെ സ്ഥിതി എന്താകുമെന്നും സ്വപ്‌ന സുരേഷ് ചോദിക്കുന്നുണ്ട്. ഇതാണ് വെളിപ്പെടുത്തലിന് വളരെ ഗുരുതര സ്വഭാവം നല്‍കുന്നത്.

എല്‍ദോസ് കുന്നപ്പിള്ളില്‍ എം.എല്‍.എക്കെതിരെ കേസെടുക്കാന്‍ ആര്‍ജ്ജവം കാട്ടിയ സര്‍ക്കാര്‍, സമാനപദവിയിലുള്ള കടകംപള്ളിക്കെതിരെ എന്തുകൊണ്ട് എഫ്.ഐ.ആര്‍ പോലും രജിസ്റ്റര്‍ ചെയ്യുന്നില്ലെന്ന ചോദ്യം പല കോണുകളില്‍ നിന്നും ഉയരുന്നുണ്ട്. എല്‍ദോസിനും കടകംപളളിക്കും നിയമം ഒന്നുതന്നെയല്ലേയെന്ന് കെ.പി.സി.സി പ്രസിഡന്റ് കെ. സുധാകരന്‍ ചോദിച്ചു. സി.പി.എമ്മില്‍ നേരത്തെയും ലൈംഗികാരോപണങ്ങള്‍ ഉയര്‍ന്നുവന്നിട്ടുണ്ട്. എന്നാല്‍ പാര്‍ട്ടിയുടെ ഒന്നാംനിരയില്‍ പ്രവര്‍ത്തിക്കുന്ന മൂന്ന് പ്രമുഖര്‍ കുടുങ്ങുന്നത് ഇതാദ്യമാണ്. മൂന്ന് നേതാക്കളുടെയും ഘടകം സംസ്ഥാന കമ്മിറ്റി ആയതിനാല്‍ സി.പി.എം കേന്ദ്രനേതൃത്വം വിഷയത്തില്‍ ഇടപെടാനുള്ള സാധ്യതയുമില്ല.

ഷാര്‍ജയിലെ റോയല്‍ ഫാമിലി ഹിസ് ഹൈനസും ഹെര്‍ ഹൈസനസും കേരളത്തില്‍ വന്നപ്പോള്‍ ഹെര്‍ ഹൈനസിനെ സ്‌പോണ്‍സറാക്കി മുഖ്യമന്ത്രിയുടെ മകള്‍ വീണയ്ക്ക് ഷാര്‍ജയില്‍ ഐ.ടി ഹബ്ബ് തുടങ്ങാനുള്ള അവസരം ഈ സന്ദര്‍ശനത്തിനിടയില്‍ ഒപ്പിച്ചെടുക്കണമെന്ന് ശിവശങ്കര്‍ നിര്‍ദ്ദേശിച്ചു. അക്കാര്യങ്ങള്‍ സംസാരിച്ചത് ക്ലിഫ് ഹൗസില്‍വെച്ചാണ്. അന്നത്തെ ചീഫ് സെക്രട്ടറി, ശിവശങ്കര്‍, മുഖ്യമന്ത്രി, കുടുംബാംഗങ്ങള്‍ എന്നിവരായിരുന്നു ചര്‍ച്ചയില്‍ പങ്കെടുത്തത്. കൂടാതെ അവര്‍ വരുമ്പോള്‍ എങ്ങിനെ പെരുമാറണം ആതിഥ്യമര്യാദകള്‍ എങ്ങിനെ എന്നെല്ലാം കമലയെയും വീണയെയും പറഞ്ഞു പഠിപ്പിക്കാനൊക്കെയായി വീണ്ടും അനൗദ്യേഗികമായ സന്ദര്‍ശനവും ക്ലിഫ്ഹൗസില്‍ ആ സമയം നടത്തിയിട്ടുണ്ട്. എന്നാല്‍ ഹെര്‍ ഹൈനസിനെ സ്‌പോണ്‍സറാക്കികൊണ്ടുള്ള വീണയുടെ സ്വകാര്യ പദ്ധതിയുടെ ചര്‍ച്ചയില്‍ കമലയുടെ അമിതാവേശവും പെരുമാറ്റ രീതിയുമൊന്നും ഹെര്‍ ഹൈനസിന് ഇഷ്ടമായില്ല. അവര്‍ക്ക് സമ്മാനമായി കരുതിയ ആഭരണപ്പെട്ടിയും അവര്‍ സ്വീകരിച്ചില്ല.

ചീഫ് മിനിസ്റ്റര്‍ അദ്ദേഹത്തിന്റെ കുടുംബം, സി.എം രവീന്ദ്രന്‍, നളിനി നെറ്റോ, പി. ശ്രീരാമകൃഷ്ണന്‍, കെ.ടി ജലീല്‍ തുടങ്ങിയവരൊക്കെ പലതരത്തിലും വിധത്തിലും കോണ്‍സുലേറ്റുമായി ബന്ധപ്പെട്ട കണ്‍സൈന്‍മെന്റുകളുടെ ഭാഗമായിരുന്നു. കോണ്‍സുലേറ്റും മുഖ്യമന്ത്രിയുമായുള്ള അഗാധ ബന്ധത്തിന്റെ ഭാഗമായാണ് അസാധാരണ കനമുള്ള ബിരിയാണി ചെമ്പുകള്‍ ക്ലിഫ് ഹൗസിലേക്ക് പോയിരുന്നത്. ഈ കാര്യങ്ങളെല്ലാം നിറവേറ്റപ്പെട്ടിരുന്നത് ശിവശങ്കറിന്റെ കര്‍ശന നിര്‍ദ്ദേശത്തിലും നിയന്ത്രണത്തിലുമായിരുന്നു. ഏതുകാര്യത്തിനും മുഖ്യമന്ത്രി ഏര്‍പ്പാടാക്കിയ ഇടനിലക്കാരനായിരുന്നു ശിവശങ്കര്‍. ശിവശങ്കറിനൊക്കെ ശമ്പളത്തേക്കാള്‍ എത്രയോ ഇരട്ടിയാണ് കമ്മീഷനായി കിട്ടുന്നതെന്നും ആത്മകഥയില്‍ പറയുന്നു.