tanurboataccident – Chandrika Daily

താനൂർ ബോട്ട് ദുരന്തം അന്വേഷിക്കുന്ന ജുഡീഷ്യൽ കമ്മീഷൻ ആലപ്പുഴയിൽ ഹൗസ്ബോട്ട് അപകടമുണ്ടായ സ്ഥലം സന്ദർശിച്ചു

webdesk15 — Wed, 31 May 2023 00:56:49 +0000

താനൂർ ബോട്ട് ദുരന്തം അന്വേഷിക്കുന്ന ജുഡീഷ്യൽ കമ്മീഷനായ ജസ്റ്റിസ് വികെ മോഹനൻ ആലപ്പുഴയിൽ ഹൗസ്ബോട്ട് അപകടമുണ്ടായ സ്ഥലം സന്ദർശിച്ചു. വിനോദസഞ്ചാര മേഖലയിൽ അപകടങ്ങൾ ഉണ്ടാകാതിരിക്കാനുള്ള നിർദ്ദേശങ്ങൾ കമ്മീഷൻ റിപ്പോർട്ടിൽ ഉൾപ്പെടുത്തുന്നതിന്റെ ഭാഗമായാണ് സന്ദർശനം.കഴിഞ്ഞദിവസം വേമ്പനാട്ടുകായലിൽ ഹൗസ് ബോട്ട് അപകടത്തിൽപ്പെട്ട സ്ഥലമാണ് കമ്മീഷൻ സന്ദർശിച്ചത്. ഈ മേഖലയിൽ ഉള്ളവർ ദീർഘവീക്ഷണത്തോടെ വ്യവസായത്തെ കണ്ടാൽ മാത്രമേ പ്രശ്നങ്ങൾക്ക് പരിഹാരം കാണാൻ കഴിയൂ എന്ന് അദ്ദേഹം പറഞ്ഞു. താൽക്കാലിക ലാഭത്തിനുവേണ്ടി ചെയ്യുന്ന കാര്യങ്ങൾ ഈ മേഖലയിലുള്ളവരുടെ തന്നെ ഭാവിക്ക് ദോഷം ചെയ്യും. ഇക്കാര്യങ്ങൾ പരിഗണിച്ചാണ് റിപ്പോർട്ട് സമർപ്പിക്കുകയെന്നും കമ്മീഷൻ വ്യക്തമാക്കി.

റിപ്പോർട്ട് സമർപ്പിക്കുന്നതിന് മുന്നോടിയായി എല്ലാവരിൽ നിന്നും കമ്മീഷൻ മൊഴിയെടുക്കും. ഇതുമായി ബന്ധപ്പെട്ട വിവരങ്ങൾ ആർക്കും കമ്മീഷനെ ബോധ്യപ്പെടുത്താം.

താനൂർ ബോട്ട് ദുരന്തം: നിയമലംഘനങ്ങൾ ഉടമയുടെ അറിവോടെയെന്ന് സ്രാങ്ക് ദിനേശൻ

webdesk15 — Thu, 11 May 2023 03:05:54 +0000

താനൂർ ബോട്ട് അപകടത്തിൽ നിർണായക വെളിപ്പെടുത്തലുമായി സ്രാങ്ക് ദിനേശൻ. ബോട്ടുടമ നാസറിന്റെ അറിവോടെയും സമ്മതത്തോടെയുമായണ് നിയമലംഘനങ്ങൾ നടത്തിയതെന്നും നേരത്തെയും നിരവധി തവണ ആളുകളെ കുത്തിനിറച്ചും ഡക്കിൽ കയറ്റിയും സർവീസ് നടത്തിയിട്ടുണ്ടെന്നും ദിനേശൻ മൊഴി നൽകി. 22 പേർക്ക് സഞ്ചരിക്കാൻ ശേഷിയുള്ള ബോട്ടിലാണ് 37 പേരെ കയറ്റിയത്.അറസ്റ്റിലായ ബോട്ട് സ്രാങ്ക് ദിനേശനെ പരപ്പനങ്ങാടി കോടതി റിമാൻഡ് ചെയ്തു.

അപകടത്തിന് ഇടയാക്കിയ ബോട്ടിലെ സഹായികളായ മൂന്ന് പേരെ കൂടി അറസ്റ്റ് ചെയ്തിരുന്നു. അപ്പു, അനിൽ, ബിലാൽ എന്നിവരെയാണ് അറസ്റ്റ് ചെയ്തത്.മത്സ്യബന്ധന ബോട്ട് രൂപമാറ്റം വരുത്തി സർവീസ് നടത്താൻ ഉദ്യോഗസ്ഥരിൽ നിന്നും ലഭിച്ച സഹായങ്ങളെക്കുറിച്ച് കൂടുതലറിയാൻ നാസറിനെ ചോദ്യം ചെയ്യും.ഇയാളെ കസ്റ്റഡിയിൽ ലഭിക്കാൻ പൊലീസ് ഇന്ന് അപേക്ഷ നൽകും

താനൂർ ബോട്ടപകടം ജസ്റ്റിസ് വി കെ മോഹനൻ അന്വേഷിക്കും

webdesk15 — Wed, 10 May 2023 08:03:08 +0000

താനൂർ ബോട്ടപകടം ജസ്റ്റിസ് വി കെ മോഹനനെ കൊണ്ട് അന്വേഷിപ്പിക്കാൻ ഇന്ന് ചേര്‍ന്ന മന്ത്രിസഭായോഗം തീരുമാനിച്ചു.സംസ്ഥാനത്തെ മുഴുവൻ ബോട്ടുകളും പരിശോധിക്കാൻ സ്പെഷ്യൽ സ്ക്വാഡ് രൂപീകരിക്കാനും തീരുമാനിച്ചു.അതെ സമയം താനൂർ ബോട്ടപകടത്തിൽ ഉദ്യോഗസ്ഥ തലത്തിൽ വീഴ്ച്ച ഉണ്ടായിട്ടുണ്ടെന്ന് പ്രാഥമികമായി ബോധ്യപ്പെട്ടെന്ന് സ്ഥലം സന്ദർശിച്ച മനുഷ്യാവകാശ കമ്മീഷൻ അറിയിച്ചു. സംഭവത്തില്‍ എസ്പി, ചീഫ് പോർട്ട് സർവേയർ എന്നിവരില്‍ നിന്നും മനുഷ്യാവകാശ കമ്മീഷൻ റിപ്പോർട്ട് തേടി.

ബോട്ട് ദുരന്തം; കാണാതായ എട്ടുവയസുകാരനെ കണ്ടെത്തി; തിരച്ചില്‍ അവസാനിപ്പിക്കും

webdesk14 — Mon, 08 May 2023 09:53:01 +0000

താനൂർ ബോട്ട് ദുരന്തത്തിൽപ്പെട്ട് കാണാതായ എട്ടുവയസുകാരനെ കണ്ടെത്തിയതായി കുടുംബം. പരുക്കേറ്റ കുട്ടിയെ ചികിൽസയ്ക്കായി കോഴിക്കോട് മെഡിക്കൽ കോളജിലേക്ക് മാറ്റിയതിനാലാണ് കാണാനില്ലെന്ന അഭ്യൂഹം പരന്നത്. ഇതോടെ ബോട്ടിലുണ്ടായിരുന്ന ആരെയും കാണാനില്ലെന്ന പരാതിയില്ല.

രക്ഷാസംഘത്തിന്റെ തിരച്ചിൽ ഇന്ന് അവസാനിപ്പിക്കുമെന്ന് ഫയർഫോഴ്സ് ഡിജിപി. ദുരന്തത്തിൽ ഒരു കുടുംബത്തിലെ 11 പേരടക്കം 22 പേർ മരിച്ചതായി ഔദ്യോഗിക സ്ഥിരീകരണം. പത്തുപേർക്ക് പരുക്കേറ്റു. ഇതിൽ നാലുപേരുടെ നില ഗുരുതരമായി തുടരുകയാണ്. അഞ്ചുപേർ നീന്തി രക്ഷപെട്ടെന്നും സർക്കാർ.

താനൂരിലേത് മനുഷ്യ നിര്‍മ്മിത ദുരന്തം; നിയമവിരുദ്ധ ബോട്ടിന് പിന്തുണ നല്‍കിയത് ആരെന്ന് അന്വേഷിക്കണം- വി.ഡി സതീശന്‍

webdesk14 — Mon, 08 May 2023 09:48:39 +0000

താനൂരിലുണ്ടായത് മനുഷ്യ നിര്‍മ്മിതമായ ദുരന്തമാണെന്ന് പ്രതിപക്ഷ നേതാവ് വി.ഡി സതീശന്‍. താനൂര്‍ ബോട്ടപകടത്തില്‍ മരിച്ചവരുടെ വീടുകള്‍ സന്ദര്‍ശിച്ച ശേഷം പ്രതിപക്ഷ നേതാവ് മാധ്യമങ്ങളോട് പ്രതികരിക്കുകയായിരുന്നു. ഇത്തരം ദുരന്തങ്ങള്‍ സംസ്ഥാനത്ത് ഒരിടത്തും ആവര്‍ത്തിക്കാതിരിക്കാനുള്ള നടപടികളാണ് സര്‍ക്കാര്‍ സ്വീകരിക്കേണ്ടത്. ബോട്ടിന് ലൈസന്‍സുണ്ടോയെന്ന് പോലും ബന്ധപ്പെട്ടവര്‍ക്ക് അറിയില്ല. ലൈസന്‍സുണ്ടെങ്കില്‍ പോലും ഒരിടത്തും വൈകിട്ട് ആറ് മണിക്ക് ശേഷം ബോട്ടോടിക്കാന്‍ അനുവദിക്കാറില്ല. വൈകിട്ട് ഏഴ് മണിക്ക് ശേഷവും വെളിച്ചം പോലും ഇല്ലാത്ത സ്ഥലത്താണ് ബോട്ട് സര്‍വീസ് നടത്തിയത്. മത്സ്യബന്ധന ബോട്ടിനെ യാത്രാ ബോട്ടാക്കി മാറ്റിയതും നിയമാനുസൃതമായല്ല. താനൂരില്‍ മാത്രമല്ല കേരളത്തില്‍ എല്ലായിടത്തും ആര്‍ക്കും എന്തും ചെയ്യാമെന്ന അവസ്ഥയാണിപ്പോഴെന്ന് അദ്ദേഹം പറഞ്ഞു.

കപ്പാസിറ്റിയേക്കാള്‍ ഇരട്ടിയിലധികം ആളുകളാണ് ബോട്ടില്‍ കയറിയത്. തേക്കടി, തട്ടേക്കാട് ബോട്ടപകടങ്ങള്‍ ഉണ്ടായിട്ടും ഇതൊന്നും പരിശോധിക്കാനുള്ള സംവിധാനം ഇല്ലാത്തത് ദൗര്‍ഭാഗ്യകരമാണ്. നിയമവിരുദ്ധമായും ലൈസന്‍സില്ലാതെയുമാണ് ബോട്ട് സര്‍വീസെന്ന് നാട്ടുകാര്‍ പരാതി പറഞ്ഞിട്ടും അത് പരിശോധിക്കാന്‍ അധികൃതര്‍ തയാറായില്ല. ഇനിയും ഇത്തരം ദുരന്തങ്ങള്‍ സംഭവിക്കാമെന്ന അവസ്ഥയാണ് സംസ്ഥാനത്തുള്ളത്. ലൈസന്‍സുകള്‍ പരിശോധിക്കാനും ലൈസന്‍സുള്ളവ നിബന്ധനകള്‍ പാലിക്കുന്നുണ്ടോയെന്നും സുരക്ഷാ സംവിധാനങ്ങള്‍ ഉണ്ടോയെന്നും അടിയന്തിരമായി പരിശോധിക്കണം. ആരുടെ ശിപാര്‍ശയിലാണ് നിയമവിരുദ്ധ സര്‍വീസിന് ഉദ്യോഗസ്ഥര്‍ കണ്ണടച്ചതെന്നും അന്വേഷിക്കണമെന്നും പ്രതിപക്ഷ നേതാവ് ആവശ്യപ്പെട്ടു.

പാവങ്ങളായ കുടുംബങ്ങളിലെ അംഗങ്ങളാണ് മരിച്ചത്. അവരുടെ കുടുംബങ്ങള്‍ക്ക് ആവശ്യമായ സഹായവും പിന്തുണയും സര്‍ക്കാര്‍ നല്‍കണം. സര്‍ക്കാര്‍ ഇപ്പോള്‍ പ്രഖ്യാപിച്ചിരിക്കുന്ന ജുഡീഷ്യല്‍ അന്വേഷണത്തിന് സമയപരിധി നിശ്ചയിക്കണം. കമ്മീഷന്റെ കാലവധി നീട്ടിക്കൊടുക്കുന്ന അവസ്ഥയുണ്ടാകരുത്. ജുഡീഷ്യല്‍ റിപ്പോര്‍ട്ട് വരുന്നതു വരെ കാത്തിരിക്കാതെ നിയമപരമായ എല്ലാ നടപടികളും സ്വീകരിച്ച് സംസ്ഥാനത്ത് ഒരിടത്തും ഇത്തരം ദുരന്തങ്ങള്‍ ആവര്‍ത്തിക്കപ്പെടില്ലെന്ന് സര്‍ക്കാര്‍ ഉറപ്പാക്കണമെന്നും അദ്ദേഹം കൂട്ടിച്ചേര്‍ത്തു.

താനൂർ ബോട്ട് അപകടത്തിൽ ജുഡീഷ്യൽ അന്വേഷണം പ്രഖ്യാപിച്ചു ;മരിച്ചവരുടെ കുടുംബങ്ങൾക്ക് സംസ്ഥാന സർക്കാർ 10 ലക്ഷം രൂപ ധനസഹായം നൽകും

webdesk15 — Mon, 08 May 2023 06:30:21 +0000

താനൂർ ബോട്ട് അപകടത്തിൽ ജുഡീഷ്യൽ അന്വേഷണം നടത്തുമെന്ന് മുഖ്യമന്ത്രി പിണറായി വിജയൻ അറിയിച്ചു.അപകടത്തിൽ മരിച്ചവരുടെ കുടുംബങ്ങൾക്ക് സംസ്ഥാന സർക്കാർ 10 ലക്ഷം രൂപ ധനസഹായം നൽകുമെന്നും മുഖ്യമന്ത്രി അറിയിച്ചു. ചികിത്സയിലുള്ളവരുടെ മുഴുവൻ ചികിത്സാ ചെലവും സർക്കാർ വഹിക്കും. അപകടത്തിൽ പെട്ട് ചികിത്സയിൽ കഴിയുന്നവരെയും , മരിച്ചവരുടെ വീടും സന്ദർശിച്ച ശേഷം സംസാരിക്കുകയായിരുന്നു അദ്ദേഹം.

താനൂർ ബോട്ടപകടം; കുവൈത്ത് കെ.എം.സി.സി.നടുക്കം രേഖപ്പെടുത്തി

webdesk14 — Mon, 08 May 2023 06:27:58 +0000

കുവൈത്ത് സിറ്റി: മലപ്പുറം താനൂരിൽ ഇന്നലെയുണ്ടായ ബോട്ടപകടത്തിൽ കുവൈത്ത് കെ.എം.സി.സി. നടുക്കം രേഖപ്പെടുത്തി. മരിച്ചവരുടെ കുടുംബത്തിന്റെ
ദുഃഖത്തിൽ പങ്കു ചേരുന്നതായി കുവൈത്ത് കെ.എം.സി.സി.പ്രസിഡന്റ് ശറഫുദ്ധീൻ കണ്ണേത്തും ജനറൽ സെക്രട്ടറി എം.കെ.അബ്ദുൽ റസാക്ക് പേരാമ്പ്രയും ട്രഷറർ എം.ആർ.നാസറും അനുശോചന സന്ദേശത്തിൽ പറഞ്ഞു. കുറ്റക്കാരായ ബോട്ടുടമയേയും തൊഴിലാളികളെയും മാതൃകാപരമായി ശിക്ഷിച്ച് ഭാവിയിലെങ്കിലും ഇത്തരം ദുരന്തങ്ങളില്ലാതാക്കാൻ സർക്കാർ നിയമങ്ങൾ കർശനമാക്കണമെന്നും കുവൈത്ത് കെ.എം.സി.സി. ആവശ്യപ്പെട്ടു.

ബോട്ടപകടത്തിൽ മരിച്ചവരിൽ ചെട്ടിപ്പടി വെട്ടികുത്തിവീട്ടിലെ അമ്മയും മൂന്ന് മക്കളും ; മറ്റൊരു മകൻ ചികിത്സയിൽ

webdesk15 — Mon, 08 May 2023 05:59:09 +0000

താനൂർ ബോട്ടപകടത്തിൽ ജീവൻ പൊലിഞ്ഞ ഇരുപത്തിരണ്ട് പേരിൽ അമ്മയും മക്കളുമടക്കം ഒരു കുടുംബത്തിലെ നാല് പേർ . മലപ്പുറം ചെട്ടിപ്പടിയിൽ വെട്ടികുത്തി വീട്ടിൽ ആയിഷാബി (38 ), ഇവരുടെ മക്കളായ ആദില ഷെറിൻ (13), അർഷാൻ (3) അദ്നാൻ (10) എന്നിവരാണ് മരിച്ചത്. ഇവരുടെ മറ്റൊരു മകൻ സ്വകാര്യ ആശുപത്രിയിൽ ഗുരുതരാവസ്ഥയിൽ ചികിത്സയിലാണ്. ആയിഷാബിയുടെ അമ്മ സീനത്തും ഗുരുതരാവസ്ഥയിൽ ചികിത്സയിലാണ്. അമ്മയും മക്കളുമടങ്ങിയ ആറ് പേരടങ്ങുന്ന സംഘമായിരുന്നു അപകടത്തിൽപെട്ട ബോട്ടിൽ കയറിയത്.

അപകടത്തിൽപെട്ടവരുടെ കൃത്യമായ കണക്കില്ല: കാണാതായവരെ കുറിച്ച് പൊലീസിൽ അറിയിക്കണമെന്ന് മന്ത്രി കെ.രാജൻ

webdesk15 — Mon, 08 May 2023 05:33:51 +0000

സ്വകാര്യ ബോട്ടായതിനാൽ ബോട്ടപകടത്തിൽ പെട്ട ആളുകളുടെ കൃത്യമായ കണക്ക് കണ്ടെത്താൻ കഴിഞ്ഞിട്ടില്ലെന്ന് മന്ത്രി കെ.രാജൻ. കാണാതായവരെ കുറിച്ച് വിവരമറിയിക്കണമെന്ന് മന്ത്രി ആവശ്യപ്പെട്ടു.37 പേരുടെ കാര്യത്തില്‍ വ്യക്തതയുണ്ടെന്ന് മന്ത്രി പറഞ്ഞു.37ല്‍ 22 പേര്‍ മരണപ്പെട്ടു. പത്ത് പേര്‍ വിവിധ ആശുപത്രികളില്‍ ചികിത്സയിലുണ്ട്. ഇവരെ തിരിച്ചറിഞ്ഞിട്ടുണ്ട്. ബാക്കി അഞ്ച് പേര്‍ നീന്തി രക്ഷപ്പെട്ടവരാണെന്ന് പൊലീസും ഫയര്‍ഫോഴ്‌സും സ്ഥീകരിച്ചതായും മന്ത്രി പറഞ്ഞു. അപകടസ്ഥലം സന്ദര്‍ശിച്ച ശേഷം മാധ്യമങ്ങളോട് സംസാരിക്കുകയായിരുന്നു മന്ത്രി.

മരിച്ചവരിൽ 9 പേർ ഒരു വീട്ടിൽ നിന്ന് ; മൂന്ന് ബന്ധുക്കളും മരിച്ചു

webdesk15 — Mon, 08 May 2023 05:13:11 +0000

താനൂർ ബോട്ടപകടത്തിൽ മരിച്ചവരിൽ 9 പേർ ഒരു വീട്ടിൽ നിന്നുള്ളവർ.പരപ്പനങ്ങാടി കുന്നുമ്മൽ വീട്ടിൽ സെയ്തവലിയുടേയും സഹോദരൻ സിറാജിന്റെയും ഭാര്യമാരും മക്കളുമടക്കം ഒമ്പത് പേരാണ് മരിച്ചത്. സൈതലവിയുടെ ഭാര്യ സീനത്ത് (43) മക്കളായ ഹസ്ന ( 18 ), ഷഫല (13) ഷംന(12), ഫിദ ദിൽന (7) സഹോദരൻ സിറാജിന്റെ ഭാര്യ റസീന ( 27 ) മക്കളായ സഹറ, (8) നൈറ (7), ഒന്നര വയസുകാരി റുഷ്ദ എന്നിവരാണ് മരിച്ചത്. സൈതലവിയുടെ ബന്ധുക്കളായ ജൽസിയ (45), ജരീർ (12), ജന്ന (8 ) എന്നിവരാണ് മരിച്ച മറ്റ് മൂന്നുപേർ. കുടുംബത്തിലെ 15 പേർ ഒരുമിച്ചാണ് വിനോദയാത്രക്ക് പോയത്. മൂന്ന് പേർ അപകടത്തിൽ പരിക്കേറ്റ് ചികിത്സയിലാണ് മുഖ്യമന്ത്രി കുന്നുമ്മൽ വീട് സന്ദർശിക്കും.