tea – Chandrika Daily

കട്ടന്‍ ചായ കുടിക്കുന്നത് ഹൃദ്രോഗം മൂലമുണ്ടാകുന്ന മരണ സാധ്യത കുറയ്ക്കുമെന്ന് പഠനം

Test User — Sun, 30 Oct 2022 06:58:55 +0000

കട്ടന്‍ ചായ കുടിക്കുന്നത് ഹൃദ്രോഗം മൂലമുണ്ടാകുന്ന മരണ സാധ്യത കുറയ്ക്കുമെന്ന് ഹാഫ് മില്യണ്‍ ബ്രിട്ടീഷുകാരുടെ പഠനം. 40-69 പ്രായത്തിനിടയിലുള്ളവരില്‍ നടത്തിയ നിരീക്ഷണത്തിലാണ്് പുതിയ പഠനം. ദിവസവും രണ്ട് കപ്പ് കട്ടന്‍ ചായ കുടിക്കുന്നത് ആരോഗ്യ സംരക്ഷണത്തെ സഹായിക്കുമെന്നും പഠനം പറയുന്നു. ഇത്തരക്കാരില്‍ ചായ കുടിക്കാത്തവരേക്കാള്‍ ഹൃദയ സംബന്ധമായ രോഗം മുലമുണ്ടാകുന്ന മരണ സാധ്യത കുറവായിരിക്കും. ഒമ്പത് മുതല്‍ 13 ശതമാനം സാധ്യതയാണ് കാണുന്നത്.

സമാനമായ പഠനത്തില്‍ മുമ്പ് തുല്യ ഫലം ലഭ്യമായിരുന്നു. പതിനാല് വര്‍ഷത്തെ നിരീക്ഷണമാണ് പുതിയ കണ്ടെത്തലിന്റെ അടിസ്ഥാനം. പരീക്ഷണത്തില്‍ പങ്കെടുത്തവരുടെ ജീവിത ശൈലി, ആരോഗ്യ വിവരങ്ങള്‍ എന്നിവ ഉള്‍കൊള്ളിച്ച രീതിയായിരുന്നു ഗവേഷകര്‍ അവലംബിച്ചത്. ദിവസവും രണ്ട് കപ്പ് ചായ കുടിക്കുന്നവര്‍ക്ക് ഹൃദയ സംബന്ധമായ രോഗങ്ങള്‍ മൂലം ഉണ്ടാകുന്ന മരണ സാധ്യത കുറവാണെന്ന കണ്ടെത്തി. എന്നാല്‍ ഇത് മറ്റു രോഗങ്ങളെ ബാധിക്കുന്നില്ല. കൂടുതല്‍ പഠനം ആവശ്യമാണെന്നും വിദഗ്ധര്‍ പറയുന്നു.

ദുബൈയില്‍ 24 കാരറ്റ് ഗോള്‍ഡ് ടീ; വില ആയിരം രൂപ!

Test User — Thu, 12 Nov 2020 13:37:37 +0000

ദുബൈ: സുലൈമാനി, വിത്ത്, വിത്തൗട്ട്, പൊടിച്ചായ, മസാലച്ചായ… എന്തെല്ലാം തരത്തിലുള്ള ചായയാണ്! എന്നാല്‍ സ്വര്‍ണച്ചായ എന്നു കേട്ടിട്ടുണ്ടോ? അങ്ങനെ ചായയുടെ നീണ്ട വകഭേദങ്ങൡലേക്ക് അതും അവതരിച്ചു. സ്വര്‍ണം ലങ്കുന്ന ചായ. അങ്ങ് ദുബൈയിലാണ് കക്ഷി ജന്മമെടുത്തത്. ദുബൈ കറാമയിലെ ഫുഡ് കാ മൂഡ് റസ്റ്ററന്‍ഡില്‍.

24 കാരറ്റ് സ്വര്‍ണത്തിന്റെ ജ്വാലയുള്ള ചായയാണ് റസ്റ്ററന്‍ഡ് അവതരിപ്പിച്ചത്. ദുബൈയില്‍ പ്രശസ്തമായ കരക് ചായയില്‍ നിന്ന് മറ്റൊരു പതിപ്പ്. ‘കുങ്കുമകരക് ചായ’ (സഫ്‌റോണ്‍ കരക് ടീ) എന്നാണ് ഇതിനെ റസ്റ്ററന്‍ഡ് പരിചയപ്പെടുത്തുന്നത്. റസ്റ്ററന്‍ഡില്‍ കയറി അതൊന്നു മോന്തിക്കുടിക്കാം എന്നു കരുതുന്നവര്‍ രണ്ടു വട്ടം ആലോചിക്കണേ. വില അല്‍പ്പം കൂടുതലാണ്. അമ്പത്തിയൊന്ന് ദിര്‍ഹം. നാട്ടിലെ ആയിരം രൂപ. പരമാവധി അഞ്ചു ദിര്‍ഹം വരെ ഒരു ചായയ്ക്ക് ഈടാക്കുന്ന സ്ഥലത്താണ് 51 ദിര്‍ഹം വച്ച് ചായ വില്‍ക്കുന്നത്.

ടീ ഷെഫായ സന്‍കാര്‍ ഉഛട് ആണ് പുതിയ വിഭവം മെനുവില്‍ അവതരിപ്പിച്ചത്. ദീപാവലിക്ക് മുമ്പ് ആഘോഷപൂര്‍വ്വമാണ് പുതിയ ഷെഫിന്റെ വരവ് റസ്റ്ററന്‍ഡ് സാമൂഹിക മാധ്യമങ്ങളിലൂടെ അറിയിച്ചത്.

ഇതേക്കുറിച്ച് റസ്റ്ററന്‍ഡ് ഉടമകളില്‍ ഒരാളായ ഭാര്‍വി ഭട്ടിന് പറയാനുള്ളത് ഇങ്ങനെ; ‘അടിസ്ഥാനപരമായി, ദുബൈയെ കുറിച്ച് ചിന്തിക്കുമ്പോള്‍ സ്വര്‍ണമാണ് ഒരു പര്യായമായി വരാറുള്ളത്. സ്വര്‍ണ നഗരമാണ് ദുബൈ. സ്വര്‍ണവുമായി ബന്ധപ്പെട്ട എല്ലാം ശ്രദ്ധയാകര്‍ഷിക്കുമെന്ന് ഞങ്ങള്‍ ചിന്തിച്ചു. അങ്ങനെയാണ് ഇതുണ്ടായത്. ഇത് നല്ല ആശയമാണ് എന്നുറപ്പുണ്ട്’

ട്രെയിനില്‍ കാപ്പിക്കും ചായക്കും ഇനി കൂടുതല്‍ വില നല്‍കണം

chandrika — Thu, 20 Sep 2018 14:54:26 +0000

ന്യൂഡല്‍ഹി: ട്രെയിനിലെ ചായയുടെയും കാപ്പിയുടെയും വില ഐ.ആര്‍.സി.ടി.സി വര്‍ധിപ്പിച്ചു. നിലവിലെ ഏഴു രൂപയില്‍ നിന്ന് പത്തുരൂപയായാണ് വര്‍ധിപ്പിച്ചത്. ഔദ്യോഗിക പ്രഖ്യാപനം വന്നിട്ടില്ലെങ്കിലും ട്രെയിനുകളിലും ഇപ്പോള്‍ തന്നെ പത്തു രൂപ ഈടാക്കുന്നുണ്ടെന്ന് ആരോപണം ഉയര്‍ന്നിട്ടുണ്ട്. രാജ്യത്ത് 350 തീവണ്ടികളിലാണ് ഐ.ആര്‍.സി.ടി.സിയുടെ പാന്‍ട്രി കാറുള്ളത്. ട്രെയിന്‍ യാത്രക്കാര്‍ക്ക് ഉപകാരപ്രദമായ രീതിയില്‍ അഞ്ചിന്റെ ഗുണിതങ്ങളായി ഭക്ഷണസാധനങ്ങള്‍ക്ക് വില നിശ്ചയിക്കണമെന്ന് കോര്‍പ്പറേഷന്‍ ആവശ്യപ്പെട്ടിരുന്നു. ഊണ്, കുപ്പിവെള്ളം, ചായ, കാപ്പി തുടങ്ങിയവക്ക് വില്‍പനക്കാര്‍ കൂടുതല്‍ നിരക്ക് ഈടാക്കുന്നതായി പരാതി ഉയര്‍ന്നപ്പോഴാണ് ഈ നിര്‍ദേശം മുന്നോട്ടുവെച്ചത്. ഇതിന് പിന്നാലെയാണ് ചായയുടെയും കാപ്പിയുടെയും വില ഐ.ആര്‍.സി.ടി.സി വര്‍ധിപ്പിക്കാന്‍ തീരുമാനിച്ചത്.

മഴ കൂടി; തേയില ഉത്പാദനം ഗണ്യമായി വര്‍ദ്ധിച്ചു

chandrika — Fri, 06 Jul 2018 06:33:59 +0000

ഗൂഡല്ലൂര്‍: നീലഗിരി ജില്ലയില്‍ രണ്ട് മാസത്തില്‍ 47 കോടി കിലോ തേയില ചപ്പ് ഫാക്ടറികളിലെത്തി. മഞ്ചൂര്‍, എടക്കാട്, ബിക്കട്ടി, ഗൂഡല്ലൂര്‍, പന്തല്ലൂര്‍, എരുമാട്, ബിദര്‍ക്കാട് തുടങ്ങിയ പതിനഞ്ച് ഫാക്ടറികളുടെ കണക്കാണിത്. കഴിഞ്ഞ വര്‍ഷത്തെ അപേക്ഷിച്ച് എട്ട് കോടി കിലോ അധികമാണിത്. ഈ വര്‍ഷത്തില്‍ ആവശ്യത്തിന് മഴ ലഭിച്ചതിനെത്തുടര്‍ന്ന് ഉത്പാദനം ഗണ്യമായി വര്‍ധിച്ചിരുന്നു. അതേസമയം ഫാക്ടറികളില്‍ ചപ്പ് എടുക്കുന്നതില്‍ പ്രത്യേക ക്വാട്ട നിശ്ചയിച്ചത് കര്‍ഷകരെ സാരമായി ബാധിച്ചിരിക്കുകയാണ്. ഇതിന്റെ അടിസ്ഥാനത്തില്‍ 30 ലക്ഷം കിലോ തേയില തോട്ടങ്ങളില്‍ തന്നെ കിടക്കുകയാണ്. കര്‍ഷകര്‍ ചപ്പ് എടുക്കാതെ വിട്ടിരിക്കുകയാണ്. എടുക്കുന്ന ചപ്പ് കൃത്യമായി ഫാക്ടറിയില്‍ എടുക്കാത്തതാണ് ഇതിന് കാരണം. തേയിലയുടെ വില കുറവും കര്‍ഷകരെ കാര്യമായി ബാധിച്ചിട്ടുണ്ട്.

അതേസമയം തേയില വ്യവസായത്തിന് ഉണര്‍വേകാന്‍ വിവിധ സഹായ പദ്ധതികള്‍ ടീ ബോര്‍ഡ് പ്രഖ്യാപിച്ചു. തേയിലയുടെ ഉല്‍പാദനവും ഉല്‍പാദനക്ഷമതയും ഗുണമേന്മയും വര്‍ധിപ്പിക്കുന്നതിനായി സബ്‌സിഡി, ഗ്രാന്റ് തുടങ്ങിയവയാണ് ടീ ബോര്‍ഡ് പ്രഖ്യാപിച്ചത്. വലുതും ചെറുതുമായ തേയിലത്തോട്ടങ്ങള്‍ക്ക് പറിച്ചുനടീല്‍, അടിക്കവാത്ത്, ജലസേചനം, യന്ത്രവത്കരണം, ഓര്‍ഗാനിക് സര്‍ട്ടിഫിക്കേഷന്‍ തുടങ്ങി വിവിധ കാര്‍ഷിക വൃത്തികള്‍ക്കും ചെറുകിട തേയില കര്‍ഷകരുടെ സ്വയം സഹായ സംഘങ്ങളും ഉല്‍പാദകസംഘങ്ങളും വഴി വിവിധ സബ്‌സിഡികള്‍ ലഭ്യമാവും.

ചെറുകിട തേയില കര്‍ഷകര്‍ക്ക് സ്വന്തമായോ സംഘമായോ മിനി ടീ ഫാക്ടറികള്‍ സ്ഥാപിക്കുന്നതിന് ഇതാദ്യമായി പദ്ധതിയില്‍ തുകവകയിരുത്തിയിട്ടുള്ളതായും അധികൃതര്‍ വാര്‍ത്തക്കുറിപ്പില്‍ അറിയിച്ചു. ഉല്‍പാദനരംഗത്ത് ഗുണനിലവാരം ഉറപ്പുവരുത്തുന്നതിനും മൂല്യവര്‍ധിത ഉല്‍പാദനത്തെ പ്രോത്സാഹിപ്പിക്കുന്നതിനുമായി ടീ ഫാക്ടറികളുടെ പുനരുദ്ധാരണത്തിനും പുതിയ ഫാക്ടറികള്‍ ആരംഭിക്കുന്നതിനും സര്‍ട്ടിഫിക്കേഷനും തുടങ്ങി വിവിധ പ്രവര്‍ത്തനങ്ങള്‍ക്ക് ആനുകൂല്യമുണ്ട്.

അന്താരാഷ്ട്ര വിപണിയിലെ ഇന്ത്യന്‍ തേയിലയുടെ പങ്കാളിത്തം വര്‍ധിപ്പിക്കുന്നതിനും ടീ ബൊട്ടീക്കുകള്‍ ആരംഭിക്കുന്നതിനും തേയിലയുടെ പ്രദര്‍ശന വിപണനങ്ങള്‍ക്കുമായി പദ്ധതിയില്‍ തുക വകയിരുത്തിയിട്ടുണ്ട്. വന്‍കിട തേയിലത്തോട്ടം മേഖലയിലെ തൊഴിലാളികളുടെ ആശ്രിതര്‍ക്ക് വിവിധ ഗ്രാന്റുകള്‍ നല്‍കും.

അര്‍ബുദം, ഹേൃദ്രാഗം, വൃക്ക സംബന്ധമായ രോഗങ്ങളുടെ ചികിത്സക്കും ഭിന്നശേഷിക്കാര്‍ക്ക് ഉപകരണങ്ങള്‍ വാങ്ങുന്നതിനും സാമ്പത്തിക സഹായം ലഭിക്കും. വിദ്യാര്‍ഥികള്‍ക്ക് സ്‌റ്റൈപന്‍ഡ്, 10, 12 ക്ലാസുകളില്‍ മികച്ച വിജയം നേടുന്നവര്‍ക്ക് നെഹ്‌റു അവാര്‍ഡ്, സ്‌കൗട്ട് ആന്‍ഡ് ഗൈഡുകള്‍ക്കും തൊഴിലധിഷ്ഠിത പരിശീലനം നേടാനാഗ്രഹിക്കുന്നവര്‍ക്കുമുള്ള ധനസഹായം എന്നിവയും ലഭ്യമാണ്. സ്‌കീമുകളെ സംബന്ധിച്ച് കൂടുതല്‍ വിവരങ്ങള്‍ക്കും അപേക്ഷ ഫോറങ്ങള്‍ക്കും അടുത്തുള്ള ടീ ബോര്‍ഡ് ഓഫിസുമായി ബന്ധപ്പെടണം.