മുനിസിപ്പല്‍ പരിധിയിലുള്ള എല്ലാ സ്‌കൂളുകളും ഓരോ അധ്യാപകനെ ‘നോഡല്‍ ഓഫീസര്‍’ ആയി നിയോഗിക്കണമെന്നാണ് ഉത്തരവിലുള്ളത്. സ്‌കൂളിനകത്തും പരിസരത്തുമുള്ള തെരുവുനായ്ക്കളുടെ എണ്ണം, അവയുടെ ആരോഗ്യസ്ഥിതി, നിയന്ത്രണത്തിനുള്ള മാര്‍ഗ്ഗങ്ങള്‍ തുടങ്ങിയ വിശദാംശങ്ങള്‍ ഈ അധ്യാപകര്‍ ശേഖരിച്ച് മുനിസിപ്പാലിറ്റിക്ക് കൈമാറണം. നഗരത്തില്‍ തെരുവുനായ്ക്കള്‍ക്കായി സംരക്ഷണ കേന്ദ്രം ആരംഭിക്കുന്ന പദ്ധതിയുടെ ഭാഗമായാണ് ഈ വിവരശേഖരണം നടത്തുന്നതെന്ന് അധികൃതര്‍ അറിയിച്ചു.

സര്‍ക്കാര്‍ മാര്‍ഗ്ഗനിര്‍ദ്ദേശങ്ങള്‍ക്കനുസരിച്ചാണ് നടപടി സ്വീകരിച്ചതെന്ന് സാസാരം മുനിസിപ്പല്‍ കമ്മീഷണര്‍ വികാസ് കുമാര്‍ വിശദീകരിച്ചു. കൃത്യമായ പ്രാദേശിക ഡാറ്റ ലഭിക്കുന്നത് നായ നിയന്ത്രണ പദ്ധതികള്‍ ആസൂത്രണം ചെയ്യാന്‍ സഹായിക്കുമെന്നും അദ്ദേഹം പറഞ്ഞു. എന്നാല്‍, അധ്യാപക സംഘടനകള്‍ ഈ തീരുമാനത്തിനെതിരെ കടുത്ത എതിര്‍പ്പാണ് രേഖപ്പെടുത്തുന്നത്. ക്ലാസ് റൂമുകളില്‍ പഠിപ്പിക്കാന്‍ സമയം ലഭിക്കാതെ അനധ്യാപക ജോലികള്‍ അടിച്ചേല്‍പ്പിക്കുകയാണെന്ന് അധ്യാപകര്‍ ആരോപിക്കുന്നു. ‘പഠിപ്പിക്കാനെത്തിയ ഞങ്ങളെക്കൊണ്ട് തെരുവുനായ്ക്കളുടെ കണക്കെടുപ്പിക്കുന്നത് അധ്യാപകവൃത്തിക്ക് യോജിച്ചതല്ല’ എന്നാണ് പലരുടെയും പ്രതികരണം.