thamrassery – Chandrika Daily

താമരശ്ശേരിയില്‍ ലഹരി സംഘവും നാട്ടുകാരും ഏറ്റുമുട്ടി; ഒരാള്‍ക്ക് പരിക്ക്

webdesk11 — Sun, 10 Sep 2023 04:33:34 +0000

കോഴിക്കോട് താമരശ്ശേരിയില്‍ വീണ്ടും ലഹരി സംഘവും നാട്ടുകാരും ഏറ്റുമുട്ടി. ബഹളം കേട്ട് ഓടിയെത്തിയ നാട്ടുകാര്‍ക്ക് നേരെ ലഹരി സംഘത്തിന്റെ കയ്യേറ്റ ശ്രമം ഉണ്ടായതായി പരാതി. സംഭവത്തില്‍ ഒരാള്‍ക്ക് പരിക്കേറ്റിട്ടുണ്ട്. ആളൊഴിഞ്ഞ വീട്ടില്‍ ലഹരി ഉപയോഗിച്ചത് ചോദ്യം ചെയ്തതാണ് പ്രകോപനത്തിന് ഇടയാക്കിയതെന്നാണ് പറയുന്നത്.

മഴക്കെടുതി; മരിച്ചത് 56 പേര്‍ നഷ്ടം 80 കോടി

chandrika — Tue, 19 Jun 2018 05:34:41 +0000

തിരുവനന്തപുരം: സംസ്ഥാനത്ത് ഒരു മാസമായി നിലനില്‍ക്കുന്ന മഴക്കെടുതികളില്‍ മരിച്ചത് 56 പേര്‍. നാലുപേരെ കാണാതാകുകയും ചെയ്തു. 115 ദുരിതാശ്വാസ ക്യാമ്പുകളിലായി 5520 പേരെ മാറ്റിപ്പാര്‍പ്പിച്ചു. നിയമസഭയില്‍ അടിയന്തരപ്രമേയ നോട്ടീസിന് മറുപടി നല്‍കിയ റവന്യുമന്ത്രി അറിയിച്ച കണക്കുകളാണിത്. ഇതുവരെ 80 കോടിയോളം രൂപയുടെ നഷ്ടമുണ്ടായി. 71.39 കോടിയുടെ കൃഷിനാശനഷ്ടവും വീടുകള്‍ നശിച്ചതില്‍ 8.48 കോടിയുടെ നഷ്ടവുമാണുണ്ടായതെന്നും മന്ത്രി പറഞ്ഞു. കര്‍ണ്ണാടകത്തിലേക്കുള്ള മാക്കൂട്ടം -പെരുമ്പാടി-മൈസൂര്‍-തലശ്ശേരി പാത ഗതാഗതസജ്ജമാക്കണമെന്ന് ആവശ്യപ്പെട്ട് കര്‍ണ്ണാടക മുഖ്യമന്ത്രിക്ക് കേരളം കത്തയച്ചതായി കാലവര്‍ഷക്കെടുതി ബാധിച്ച മണ്ഡലങ്ങളിലെ അംഗങ്ങളുടെ ശ്രദ്ധക്ഷണിക്കലിനും സബ്മിഷനും മറുപടിയായി മുഖ്യമന്ത്രി പിണറായി വിജയനും അറിയിച്ചു. ഈ റോഡില്‍ കുടക് ജില്ലാ ഭരണകൂടം സമ്പൂര്‍ണ്ണ ഗതാഗത നിരോധനം ഏര്‍പ്പെടുത്തിയിട്ടുണ്ട്. താമരശ്ശേരി ചുരം വഴിയുള്ള റോഡില്‍ ഏകദേശം 50 മീറ്റര്‍ നീളത്തില്‍ സംരക്ഷണഭിത്തി തകര്‍ന്ന നിലയാണുള്ളത്.

ഉരുള്‍പൊട്ടല്‍: അവസാന മൃതദേഹവും കണ്ടെത്തി; കട്ടിപ്പാറയില്‍ മരിച്ചവരുടെ എണ്ണം പതിനാലായി

chandrika — Mon, 18 Jun 2018 13:51:41 +0000

കോഴിക്കോട്: കക്കയത്തിനടുത്ത് കട്ടിപ്പാറ കരിഞ്ചോലമലയില്‍ വ്യാഴാഴ്ച പുലര്‍ച്ചെയുണ്ടായ ഉരുള്‍പൊട്ടലില്‍ മരിച്ചവരുടെ എണ്ണം പതിനാലായി.
ഉരുള്‍പൊട്ടലില്‍ കാണാതായവരില്‍ അവസാനത്തെയാളുടെ മൃതദേഹവും കിട്ടിയതോടെയാണ് മരണസംഖ്യ ഉയര്‍ന്നത്. വെട്ടിയൊഴിഞ്ഞതോട്ടം കരിഞ്ചോല ഉമ്മിണി അബ്ദുറഹിമാന്റെ ഭാര്യ നഫീസ(55)യുടെ മൃതദേഹമാണ് തിങ്കളാഴ്ച നടത്തിയ തിരച്ചിലില്‍ കണ്ടെത്തിയത്. ഉരുള്‍പൊട്ടലില്‍ കാണാതായ എല്ലാവരുടെയും മൃതദേഹം കണ്ടെത്തിയതോടെ നാളുകളായി തുടരുന്ന തിരച്ചിലിന് അവസാനമായി.

മണ്ണിനടിയില്‍പെട്ടു മരിച്ച കരിഞ്ചോല അബ്ദുറഹിമാന്‍(60), മകന്‍ ജാഫര്‍(35), ജാഫറിന്റെ മകന്‍ മുഹമ്മദ് ജാസിന്‍(അഞ്ച്),കരിഞ്ചോല ഹസന്‍(65), മകള്‍ ജന്നത്ത്(17), കരിഞ്ചോല ജാഫറിന്റെ മകന്‍ മുഹമ്മദ് ജാസിന്‍(അഞ്ച്), അബ്ദുല്‍സലീമിന്റെ മക്കളായ ദില്‍നാ ഷെറിന്‍(9), മുഹമ്മദ് ഷഹബാസ്(മൂന്ന്), ഹസന്റെ ഭാര്യ ആസ്യ(54), നിയാ ഫാത്തിമ, ഹസന്റെ മകള്‍ നുസ്രത്ത്, നുസത്തിന്റെ മക്കളായ റിഫ മറിയം, റിന്‍ഷാ ഷെറിന്‍ എന്നിവരുടെ മൃതദേഹങ്ങള്‍ നേരത്തെ കണ്ടെത്തിയിരുന്നു. ദേശീയ ദുരന്ത നിവാരണ സേനയുടെ രണ്ടു യൂണിറ്റുകള്‍, പൊലീസ്, അഗ്‌നിരക്ഷാസേന എന്നിവര്‍ക്കൊപ്പം നാട്ടുകാരും രക്ഷാപ്രവര്‍ത്തനത്തിനു രംഗത്തുണ്ടായിരുന്നു.

വെള്ളിയാഴ്ച രാവിലെ നടത്തിയ തെരച്ചിലില്‍ ഒരു കുട്ടിയുടെ മൃതദേഹം കണ്ടെത്തിയിരുന്നു. ശേഷം മൂന്നുപേരുടെ മൃതദേഹം കൂടി തെരച്ചിലില്‍ കണ്ടെത്തി. മരിച്ച ഹസന്റെ മകളും സുധീറിന്റെ ഭാര്യയുമായ നുസ്രത്ത്(26), മകള്‍ റിന്‍ഷ മെഹറിന്‍(നാല്), റാഫി-ഷംന ദമ്പതികളുടെ മകള്‍ നിയ ഫാത്തിമ(മൂന്ന്) എന്നിവരുടെ മൃതദേഹങ്ങളാണ് കണ്ടെത്തിയത്. കാണാതായ മറ്റ് മൂന്ന് പേര്‍ക്കായി ദുരിതനിവാരണസേനയും പൊലീസും ഫയര്‍ഫോഴ്സും ചേര്‍ന്ന് പിന്നീട് തെരച്ചില്‍ തുടരുകയായിരുന്നു.

ദുരിതനിവാരണസേനയും പൊലീസും ഫയര്‍ഫോഴ്സും ആറു ടീമായി തിരിഞ്ഞാണ് തെരച്ചില്‍ നടത്തുന്നത്.
മന്ത്രിമാരായ ടി.പി രാമകൃഷ്ണന്‍, എ.കെ ശശീന്ദ്രന്‍, ജോര്‍ജ് എം. തോമസ് എം.എല്‍.എ തുടങ്ങിയവര്‍ സ്ഥലത്തെത്തി സ്ഥിതിഗതികള്‍ വിലയിരുത്തി. പ്രതിപക്ഷനേതാവ് രമേശ് ചെന്നിത്തല, എം.പിമാരായ എം.കെ രാഘവന്‍, എം.ഐ. ഷാനവാസ്, എന്നിവര്‍ വെള്ളിയാഴ്ച സ്ഥലം സന്ദര്‍ശിച്ചു. മുസ്ലിംലീഗ് സംസ്ഥാന പ്രസിഡണ്ട് പാണക്കാട് സയ്യിദ് ഹൈദരലി തങ്ങള്‍, ഇ.ടി മുഹമ്മദ് ബഷീര്‍ എം.പി, പ്രതിപക്ഷ ഉപനേതാവ് ഡോ. എം.കെ മുനീര്‍ എന്നിവര്‍ ഇന്നലെ കരഞ്ചേലമലയില്‍ സന്ദര്‍ശനം നടത്തി. മുസ്ലിംലീഗ് ജില്ലാ പ്രസിഡണ്ട് ഉമ്മര്‍ പാണ്ടികശാല, ജനറല്‍ സെക്രട്ടറി എം.എ റസാഖ് മാസ്റ്റര്‍, യൂത്ത്ലീഗ് സംസ്ഥാന സീനിയര്‍ വൈസ് പ്രസിഡണ്ട് നജീബ് കാന്തപുരം എന്നിവര്‍ കൂടെയുണ്ടായിരുന്നു. മൂന്ന് ദുരിതാശ്വാസ ക്യാമ്പുകള്‍ ഇവിടെ പ്രവര്‍ത്തിക്കുന്നുണ്ട്. വെട്ടി ഒഴിഞ്ഞ തോട്ടം ജി.എല്‍.പി സ്‌കൂളില്‍ 54 കുടുംബങ്ങളാണ് കഴിയുന്നത്.

കട്ടിപ്പാറയില്‍ കാര്‍ഷിക മേഖലക്ക് മാത്രം അരക്കോടി രൂപയുടെ നാശനഷ്ടം

chandrika — Mon, 18 Jun 2018 12:11:01 +0000

താമരശ്ശേരി: മലയോര കുടിയേറ്റ മേഖലയായ കട്ടിപ്പാറ ഗ്രാമപഞ്ചായത്തില്‍ ഉരുള്‍പൊട്ടല്‍ നിരവധി പേരുടെ ജീവനെടുത്തതിന് പുറമെ കര്‍ഷകരുടെ സ്വപ്‌നങ്ങളും തകര്‍ത്തെറിഞ്ഞു. കൃഷി വകുപ്പിന്റെ പ്രാഥമിക കണക്കുപ്രകാരം കാര്‍ഷിക മേഖലക്ക് മാത്രം അരക്കോടി രൂപയുടെ നഷ്ടമാണുണ്ടായത്.
ഉരുള്‍പൊട്ടല്‍ നടന്ന കരിഞ്ചോല ഭാഗത്ത് 17 പേരുടെ 34.5 ഏക്കര്‍ കൃഷിസ്ഥലമാണ് നശിച്ചത്. ഇവിടെ മാത്രം 40 ലക്ഷം രൂപയുടെ നഷ്ടം കണക്കാക്കുന്നു. തെങ്ങ് , കുരുമുളക്, റബര്‍, കൊക്കോ തുടങ്ങിയ വിളകളാണ് പ്രധാനമായും നശിച്ചത്. ഗ്രാമപഞ്ചായത്തിലെ താഴ് വാരം, കാല്‍വരി ഭാഗങ്ങളിലായി എട്ടുപേരുടെ നാല് ഏക്കറും ചമല്‍ ഭാഗത്ത് നാലുപേരുടെ രണ്ട് ഏക്കറും കൃഷി സ്ഥലം നശിച്ചു. മൊത്തം 40.5 ഏക്കറിലായി അരക്കോടി രൂപയുടെ നഷ്ടം കണക്കാക്കുന്നതായി കൃഷി വകുപ്പിന്റെ കണക്കില്‍ പറയുന്നു.
റവന്യൂ വകുപ്പിന്റെ കണക്കു പ്രകാരം ഉരുള്‍പൊട്ടിയ പ്രദേശത്ത് ഏഴു വീടുകള്‍ പൂര്‍ണ്ണമായും 30 വീടുകള്‍ ഭാഗികമായും നശിച്ചിട്ടുണ്ട്. ഇവയുടെ മൂല്യം കണക്കാന്‍ ഗ്രാമപഞ്ചായത്ത് ഓവര്‍സിയറോട് ആവശ്യപ്പെട്ടതായി താലൂക്ക് തഹസില്‍ദാര്‍ സി.മുഹമ്മദ് റഫീഖ് അറിയിച്ചു. ഇതുകൂടി ലഭിച്ചാല്‍ മാത്രമേ നാശത്തിന്റെ മൊത്തം കണക്ക് ലഭ്യമാവുകയുള്ളൂ.

കട്ടിപ്പാറ ഉരുള്‍പൊട്ടല്‍ മരണം പതിനൊന്നായി

chandrika — Sat, 16 Jun 2018 13:01:07 +0000

കോഴിക്കോട്: കക്കയത്തിനടുത്ത് കട്ടിപ്പാറ കരിഞ്ചോലമലയില്‍ വ്യാഴാഴ്ച പുലര്‍ച്ചെയുണ്ടായ ഉരുള്‍പൊട്ടലില്‍ മരിച്ചവരുടെ എണ്ണം പതിനെന്നായി.വെള്ളിയാഴ്ച രാവിലെ നടത്തിയ തെരച്ചിലില്‍ ഒരു കുട്ടിയുടെ മൃതദേഹം കണ്ടെത്തിയിരുന്നു. ഇന്നലെ മൂന്നുപേരുടെ മൃതദേഹം കൂടി തെരച്ചിലില്‍ കണ്ടെത്തി. മരിച്ച ഹസന്റെ മകളും സുധീറിന്റെ ഭാര്യയുമായ നുസ്രത്ത്(26), മകള്‍ റിന്‍ഷ മെഹറിന്‍(നാല്), റാഫി-ഷംന ദമ്പതികളുടെ മകള്‍ നിയ ഫാത്തിമ(മൂന്ന്) എന്നിവരുടെ മൃതദേഹങ്ങളാണ് കണ്ടെത്തിയത്. കാണാതായ മറ്റ് മൂന്ന് പേര്‍ക്കായി ദുരിതനിവാരണസേനയും പൊലീസും ഫയര്‍ഫോഴ്‌സും ചേര്‍ന്ന് തെരച്ചില്‍ തുടരുകയാണ്.

മണ്ണിനടിയില്‍പെട്ടു മരിച്ച കരിഞ്ചോല അബ്ദുറഹിമാന്‍(60), മകന്‍ ജാഫര്‍(35), ജാഫറിന്റെ മകന്‍ മുഹമ്മദ് ജാസിന്‍(അഞ്ച്),കരിഞ്ചോല ഹസന്‍(65), മകള്‍ ജന്നത്ത്(17), കരിഞ്ചോല ജാഫറിന്റെ മകന്‍ മുഹമ്മദ് ജാസിന്‍(അഞ്ച്), അബ്ദുല്‍സലീമിന്റെ മക്കളായ ദില്‍നാ ഷെറിന്‍(9), മുഹമ്മദ് ഷഹബാസ്(മൂന്ന്്്) എന്നിവരുടെ മൃതദേഹങ്ങള്‍ വ്യാഴാഴ്ച തന്നെ കണ്ടെത്തിയിരുന്നു. അബ്ദുറഹിമാന്റെ ഭാര്യ നഫീസ(55), ഹസന്റെ ഭാര്യ ആസ്യ(54), നിയാ ഫാത്തിമ, ഹസന്റെ മകള്‍ നുസ്രത്ത്, റിന്‍ഷാ ഷെറിന്‍ എന്നിവരെയാണ് ഇനി കണ്ടെത്താനുള്ളത്.

മഴ മാറി വന്ന പ്രസന്നമായ കാലാവസ്ഥ തെരച്ചിലിന് അനുകൂലമായിരിക്കുകയാണ്. ദുരിതനിവാരണസേനയും പൊലീസും ഫയര്‍ഫോഴ്‌സും ആറു ടീമായി തിരിഞ്ഞാണ് തെരച്ചില്‍ നടത്തുന്നത്.
മന്ത്രിമാരായ ടി.പി രാമകൃഷ്ണന്‍, എ.കെ ശശീന്ദ്രന്‍, ജോര്‍ജ് എം. തോമസ് എം.എല്‍.എ തുടങ്ങിയവര്‍ സ്ഥലത്തെത്തി സ്ഥിതിഗതികള്‍ വിലയിരുത്തി. പ്രതിപക്ഷനേതാവ് രമേശ് ചെന്നിത്തല, എം.പിമാരായ എം.കെ രാഘവന്‍, എം.ഐ. ഷാനവാസ്, എന്നിവര്‍ വെള്ളിയാഴ്ച സ്ഥലം സന്ദര്‍ശിച്ചു. മുസ്‌ലിംലീഗ് സംസ്ഥാന പ്രസിഡണ്ട് പാണക്കാട് സയ്യിദ് ഹൈദരലി തങ്ങള്‍, ഇ.ടി മുഹമ്മദ് ബഷീര്‍ എം.പി, പ്രതിപക്ഷ ഉപനേതാവ് ഡോ. എം.കെ മുനീര്‍ എന്നിവര്‍ ഇന്നലെ കരഞ്ചേലമലയില്‍ സന്ദര്‍ശനം നടത്തി. മുസ്‌ലിംലീഗ് ജില്ലാ പ്രസിഡണ്ട് ഉമ്മര്‍ പാണ്ടികശാല, ജനറല്‍ സെക്രട്ടറി എം.എ റസാഖ് മാസ്റ്റര്‍, യൂത്ത്‌ലീഗ് സംസ്ഥാന സീനിയര്‍ വൈസ് പ്രസിഡണ്ട് നജീബ് കാന്തപുരം എന്നിവര്‍ കൂടെയുണ്ടായിരുന്നു. മൂന്ന് ദുരിതാശ്വാസ ക്യാമ്പുകള്‍ ഇവിടെ പ്രവര്‍ത്തിക്കുന്നുണ്ട്. വെട്ടി ഒഴിഞ്ഞ തോട്ടം ജി.എല്‍.പി സ്‌കൂളില്‍ 54 കുടുംബങ്ങളാണ് കഴിയുന്നത്.

ഉരുള്‍പൊട്ടല്‍; കലിതുള്ളാന്‍ കാത്ത് കൊളമലയും

chandrika — Sat, 16 Jun 2018 10:21:47 +0000

താമരശ്ശേരി: കരിഞ്ചോല പ്രദേശത്തെ നക്കിത്തുടച്ച ഉരുള്‍പൊട്ടല്‍ ഖനന മാഫിയ കയ്യടക്കിയ കൊളമല വനമേഖലയേയും കലിതുള്ളിക്കുമെന്ന് ആശങ്ക. ഏറെ പരിസ്ഥിതി പ്രാധാന്യമുള്ള കൊളമലയില്‍ നാട്ടുകാരെ ഭീതിയിലാക്കിയാണ് ക്വാറി മാഫിയയുടെ പ്രവര്‍ത്തനം. രാപകല്‍ ഭേദമന്യേ കൊളമലയെ തച്ചുടച്ച് ഇവിടെ ഖനനം തുടരുകയാണ്. കരിഞ്ചോല സ്ഥിതിചെയ്യുന്ന പൂവന്‍മലക്ക് എതിര്‍വശത്താണ് കൊളമലയുടെ സ്ഥാനം. പരിസ്ഥിതി പ്രാധാന്യം ഏറെയുള്ള ഈ കുന്ന് വയനാടിനോട് ചേര്‍ന്ന് കിടക്കുന്ന പ്രദേശം കൂടിയാണ്. കട്ടിപ്പാറ പഞ്ചായത്തില്‍ ഒരുകാലത്ത് തലയെടുപ്പോടെ നിന്ന ഈ മല ഇന്ന് മരണത്തോട് മല്ലിടുകയാണ്. മല തുരന്ന് നൂറുകണക്കിന് ലോഡ് കല്ലാണ് ക്വാറി മാഫിയ ഇവിടെ നിന്നും കടത്തുന്നത്. ഇതോടെ പ്രദേശത്തിന്റെ സന്തുലനാവസ്ഥ തന്നെ തകരാറിലായി. ഒരു മഴ പെയ്താല്‍ മലവെള്ളം കുത്തിയൊലിക്കാന്‍ തുടങ്ങും. ക്വാറിയിലെ തുടര്‍ച്ചയായ സ്‌ഫോടനങ്ങള്‍ താഴ്‌വാരത്തുള്ള ചമല്‍, വെണ്ടേക്കുംചാല്‍, പൂലോട്, വേനക്കാവ്, കേളന്‍മൂല, ഈങ്ങാപ്പുഴ പ്രദേശങ്ങളെ പോലും പ്രകമ്പനം കൊള്ളിക്കാറുണ്ട്. സ്ഫോടനങ്ങളില്‍ വീടുകളിലെ കോണ്‍ക്രീറ്റ് ഉള്‍പ്പെടെയുള്ള ഭാഗങ്ങളില്‍ വിള്ളല്‍ വീഴ്ത്തുന്നതായും നാട്ടുകാര്‍ പറയുന്നു. വേനല്‍ക്കാലത്ത് ക്വാറിയില്‍ നിന്നുയരുന്ന പൊടി സമീപവാസികള്‍ക്ക് ആരോഗ്യ പ്രശ്നങ്ങള്‍ സൃഷ്ടിക്കുന്നുണ്ട്. 2014 ജൂണ്‍ 4ന് കൊളമലയുടെ വനപ്രദേശത്തുണ്ടായ ഉരുള്‍പൊട്ടലില്‍ ഒരുവീട് പൂര്‍ണമായും രണ്ട് വീടുകള്‍ ഭാഗികമായും തകര്‍ന്നിരുന്നു. അന്ന് രണ്ട് കൂറ്റന്‍ പാറക്കല്ലുകളാണ് അരകിലോമീറ്ററോളം താഴേക്ക് ഒഴുകിയെത്തിയത്. വീട്ടുകാര്‍ ബന്ധുവീട്ടില്‍ പോയതിനാല്‍ അന്ന് ദുരന്തം വഴിമാറുകയായിരുന്നു. ആഴ്ചകള്‍ക്കുള്ളില്‍ ഈ വീടുകള്‍ പുനര്‍നിര്‍മ്മിച്ച് നല്‍കി ക്വാറി മാഫിയ പ്രതിഷേധം തണുപ്പിച്ചു. മഴ കനത്തതോടെ ഇന്ന് ഉരുള്‍പൊട്ടല്‍ ഭീഷണിയിലാണ് കൊളമലയുടെ താഴ്‌വാരങ്ങള്‍. മഴ വകവെക്കാതെ കൊളമലയില്‍ ഖനനവും സ്‌ഫോടനങ്ങളും തകൃതിയായി തുടരുകയാണ്. ഇനിയൊരു ദുരന്തത്തിന് കാത്തുനില്‍ക്കാതെ അധികൃതര്‍ നടപടിയെടുക്കണമെന്നാണ് നാട്ടുകാരുടെ ആവശ്യം