കാലമെത്ര കഴിഞ്ഞാലും ഹൃദയാന്തരങ്ങളില്‍ പാണക്കാട് സയ്യിദ് മുഹമ്മദലി ശിഹാബ് തങ്ങള്‍ നിറഞ്ഞുനില്‍ക്കുമെന്ന് തീര്‍ച്ചയാണ്. എന്റെ ജീവതത്തില്‍ അത്രമേല്‍ സ്വാധീനിച്ച മനുഷ്യനായിരുന്നു തങ്ങള്‍, തങ്ങളോടൊപ്പം ഒരു സന്തത സഹചാരിയെ പോലെ നടക്കാന്‍ സാധിച്ചു എന്നത് ഇന്നും ഭാഗ്യമായി കാണുകയാണ്. വിദേശ പഠനം കഴിഞ്ഞു നാട്ടില്‍ വന്നകാലം തൊട്ടെ എല്ലാ ദിവസവും അദ്ദേഹത്തോടൊപ്പം ഞാനുമുണ്ടായിട്ടുണ്ട്. ചുരുക്കം ദിവസങ്ങളില്‍ മാത്രമെ കാണാതിരുന്നിട്ടുള്ളു. കൂടെയുള്ള സമയങ്ങളിലെല്ലാം അദ്ദേഹത്തിന്റെ പ്രവര്‍ത്തനങ്ങളെയും നിലപാടുകളെയും വീക്ഷിച്ചു. തങ്ങള്‍ അത്ഭുത പ്രതിഭാസമായിരുന്നു.

അറിവും പത്രാസും കൂടിയാല്‍ ഗമ കൂടുന്ന കാലമായിരുന്നു ഞങ്ങളുടെ ചെറുപ്പം. സാധാരക്കാരോടൊപ്പം ചേര്‍ന്നിരിക്കാന്‍ ഇത്തരക്കാരില്‍ പലര്‍ക്കും മടിയായിരുന്നു. എന്നാല്‍ വിവിധ സര്‍വകലാശാലകളില്‍നിന്നും ഒന്നിലധികം ഡിഗ്രികള്‍, അറബിയിലും ഇംഗ്ലീഷിലും അപാരമായ പാണ്ഡിത്യം. കേരളത്തിലെ ഏറ്റവും വലിയ പണ്ഡിതരുടെ ശിഷ്യത്വം സ്വീകരിച്ചയാള്‍. അങ്ങിനെ എന്ത്‌കൊണ്ടും വലിയ വ്യക്തിത്വമായി നിറഞ്ഞു. നിന്ന നേതാവായിരുന്നു തങ്ങള്‍. എന്നാല്‍ സൗമ്യത കൊണ്ടാണ് അദ്ദേഹം തന്റെ അരികിലെത്തിയവരെ സ്വീകരിച്ചത്. രാഷ്ട്രീയ കേരളം കണ്ണും കാതും കൂര്‍പ്പിച്ചുനിന്ന പല ചൂടുപിടിച്ച ചര്‍ച്ചകളെ ആ സൗമ്യതയില്‍ തണുപ്പിച്ചെടുത്തു തങ്ങള്‍. ആ സ്‌നേഹത്തില്‍ പെയ്‌തൊഴിയാ ആ വിവാദങ്ങളുണ്ടായിരുന്നില്ല.

തങ്ങള്‍ ഒരു വിഷയത്തില്‍ നിലപാടെടുത്താല്‍ എന്തു പ്രതിസന്ധി വന്നാലും അതില്‍ ഉറച്ചു നില്‍ക്കും. കാര്യങ്ങളെ കൃത്യമായി പഠിച്ച് മെറിറ്റിനെ പരിഗണിക്കും. ബാബരി മസ്ജിദ് വിഷയത്തില്‍ തങ്ങള്‍ എടുത്ത നിലപാടുകള്‍ മുമ്പിലുണ്ട്. അണികളെ തീവ്ര ചിന്താഗതിയിലേക്ക് പോകാതിരിക്കാന്‍ ഇമചിമ്മാതെ കാവലിരുന്നു. സമുദായത്തെ മതേതര കാഴ്ചപാടില്‍ ഉറപ്പിച്ചുനിര്‍ത്തി. തങ്ങളുടെ നിലപാട് ശരിയല്ലെന്നും സൗഹാര്‍ദത്തിന്റെ താരാട്ട് നിര്‍ത്തണമെന്നും പലരും കളിയാക്കി പറഞ്ഞു. പ്രതിഷേധിച്ച് പലരും മുസ്ലിംലീഗില്‍നിന്നും രാജിവെച്ചു. ഈ നിലപാടിന്റെ പേരിലാണ് അവര്‍ പാര്‍ട്ടിവിടുന്നതെങ്കില്‍ പോവട്ടെ എന്ന് തങ്ങളും പറഞ്ഞു. പല രാഷ്ട്രീയക്കാരും വര്‍ഗീയവാദികളെ പിന്തുണച്ചു മുന്നോട്ടു വന്നു. എന്നാല്‍ തങ്ങള്‍ ആ നിലപാടില്‍ നിന്നും അണുമണി മാറിയില്ല. തങ്ങളെടുത്ത നിലപാടായിരുന്നു ശരിയെന്ന് പിന്നീട് കാലം തെളിയിച്ചു.

തങ്ങളോടൊപ്പമുള്ള യാത്രകള്‍ ഇന്നും ഓര്‍മയില്‍ നിറയുന്നുണ്ട്. എല്ലാറ്റിനോടും സ്‌നേഹമായിരുന്നു തങ്ങള്‍ക്ക്. ഒരു പച്ചപ്പ് കണ്ടാല്‍, ഭംഗിയുള്ള പൂക്കളെ കണ്ടാല്‍, വഴിയരികിലൂടെ ഓടി നടക്കുന്ന സഹജീവികളെ കണ്ടാല്‍ തങ്ങളതില്‍ അലിഞ്ഞുചേരും. അതിനെ കാവ്യത്മകമായി വര്‍ണിക്കും. പ്രകൃതിയെ ആസ്വദിച്ചും പൂക്കളെ ലാളിച്ചും സഹജീവികളോട് കരുണയോടെ പെരുമാറിയുമുള്ള തങ്ങളുടെ നിര്‍മലമായ ഹൃദയശുദ്ധി അറിയാതെ നോക്കിനിന്നിട്ടുണ്ട്. പരന്ന വായന തങ്ങളുടെ പ്രത്യേകതയായിരുന്നു. യാത്രകളില്‍ നിറയെ പുസ്തകങ്ങള്‍ തങ്ങളുടെ വാഹനത്തിലുണ്ടാവും. ലോക പ്രശസ്തരായ എഴുത്തുകാരുടെ സാഹിത്യകൃതികള്‍, കഥകള്‍, കവിതകള്‍ എല്ലാം തങ്ങള്‍ വായിക്കും. അതിന്റെ അഭിപ്രായങ്ങള്‍ സഹയാത്രികരുമായി പങ്കുവെക്കും. എല്ലാറ്റിന്റെയും അവസാനം സ്‌നേഹവും സൗഹാര്‍ദവും നിറഞ്ഞതായിരിക്കും. കൂടെ സഞ്ചരിക്കുമ്പോള്‍ ഇത്രയധികം തമാശ പറയുന്ന നേതാവിനെ ഇന്നേ വരെകണ്ടിട്ടില്ല. ഒരോ യാത്രയിലും ചിരിക്കാനും ചിന്തിക്കാനും നിരവധി കാര്യങ്ങളുണ്ടാവും, മതസൗഹാര്‍ദമായിരുന്നു തങ്ങളുടെ മുഖമുദ്ര. ബാബരി വിഷയത്തിനുശേഷം അങ്ങാടിപുറത്തെ ക്ഷേത്ര വാതില്‍ ചില സാമൂഹ്യ ദ്രോഹികള്‍ തീയിട്ടു നശിപ്പിച്ചപ്പോള്‍ ആശ്വാസവാക്കുകളുമായി ക്ഷേത്ര മുറ്റത്തേക്കോടിയത് ആ സൗഹ്യദത്തിനു പോറലേല്‍ക്കാതിരിക്കാന്‍ വേണ്ടിയായിരുന്നു. പാണക്കാട്ടെ തിരുമുറ്റത്ത് സാന്ത്വനം തേടി അന്യമതക്കാരുള്‍പ്പെടെ ഓടിയെത്തുന്ന ആ സ്‌നേഹമരത്തിന്റെ തണല്‍ തേടിയായിരുന്നു. തങ്ങളുടെ വീട്ടിലെയും മറ്റും പ്രധാനകൈകാര്യക്കാരില്‍ പലരും അമുസ്ലിം സുഹ്യത്തുക്കളായിരുന്നു. ഇന്നും പാണക്കാട്ടെത്തിയാല്‍ ആ വീടിനോട് ചുറ്റിപ്പറ്റി സഹോദരസമുദായക്കാരെ കാണാം. വിവിധ പ്രയാസങ്ങളും പ്രശ്നങ്ങളുമായി പാണക്കാട് വരുന്നവര്‍ക്ക് ജാതിയും മതവും നോക്കാതെ തങ്ങള്‍ ആശ്വാസമായി ഒരോ മധ്യസ്ഥ ചര്‍ച്ചകളിലും സമുദായം നോക്കിയല്ല അദ്ദേഹം തീരുമാനമെടുത്തത്. മെറിറ്റുമാത്രമായിരുന്നു മാനദണ്ഡം.

തന്റെ സമുദായത്തെ വിദ്യസമ്പന്നരാക്കുന്നതില്‍, അവര്‍ക്ക് ജീവിത മാര്‍ഗം കണ്ടെത്താനുള്ള തൊഴിലിടമൊരുക്കുന്നതില്‍, നാട്ടിലെ വികസന കാര്യങ്ങള്‍ നടപ്പിലാക്കുന്നതില്‍ പാണക്കാട് കുടുംബം പ്രത്യേകിച്ച് മുഹമ്മദലി ശിഹാബ് തങ്ങള്‍ വഹിച്ച പങ്ക് ചെറുതല്ല. മന്ത്രിയും എം.എല്‍.എയായുമെല്ലാം പ്രവര്‍ത്തിച്ച കാലത്ത് തങ്ങളിടപെട്ടിരുന്ന ഓരോ കേസുകളും അത്തരത്തിലുള്ളതായിരുന്നു. പല ഓണംകേറാമലകളും വികസിത പ്രദേശങ്ങളാക്കിമാറ്റിയതില്‍ തങ്ങളുടെ ഇടപെടല്‍ ചെറുതല്ല. സ്ത്രീ വിദ്യാഭ്യാസത്തിന്റെ കാര്യത്തില്‍ പൂക്കോയ തങ്ങളുടെ അതേ നിലപാടായിരുന്നു തങ്ങള്‍ക്കും. കേരളത്തില്‍ ഇന്ന് ഉയര്‍ന്നു നില്‍ക്കുന്ന പല വിദ്യാഭ്യാസ സ്ഥാപനങ്ങളും പിറവിയെടുക്കുന്നതില്‍ ഈ കുടുംബവും ശിഹാബ് തങ്ങളും വഹിച്ച പങ്ക് ചെറുതല്ല. കാരുണ്യമായിരുന്നു തങ്ങള്‍. സി.എച്ച് സെന്റര്‍ ഉള്‍പ്പെടെ തങ്ങളുടെ നിര്‍ദേശ പ്രകാരം തുടങ്ങിയ നിരവധി കാരുണ്യ സ്ഥാപനങ്ങള്‍ ഇന്നും കേരളത്തില്‍ പ്രവര്‍ത്തിക്കുന്നുണ്ട്. ഓര്‍മയായി ഒന്നര പതിറ്റാണ്ടു കഴിഞ്ഞിട്ടും ശിഹാബ് തങ്ങള്‍ ഇന്നും ജനഹൃദയങ്ങളില്‍ മരണമില്ലാതെ ജീവിക്കുകയാണ്. തങ്ങളുടെ പേരില്‍ ജീവകാരുണ്യ, സാമൂഹ്യ സേവന പ്രവര്‍ത്തനങ്ങള്‍ അനുസ്യൂതം തുടരുന്നു. ബൈത്തുറഹ്‌മകള്‍ പിറവിയെടുക്കുന്നു.

തങ്ങള്‍ എന്നും മുറുകെപ്പിടിച്ച ഐഡിയോളജി മതേതരത്വവും മതസൗഹാര്‍ദവും മതവിശ്വാസവും തന്നെയാണ്. എല്ലാം സമന്വയിച്ചുപോകുന്ന ബഹുസ്വര സമൂഹത്തിലാണ് യഥാര്‍ത്ഥ മതവിശ്വാസിയുടെ സ്ഥാനമെന്ന് തങ്ങള്‍ അടിവരയിട്ടു. ഏകാധിപത്യവും വര്‍ഗീയതയും വലിയ അപകടമാണെന്ന് തങ്ങള്‍ ഓര്‍മിപ്പിച്ചു. അതുതന്നെയാണ് പാണക്കാട്ടെ സ്‌നേഹത്തണലിലിരുന്ന് ഹൈദരലി ശിഹാബ് തങ്ങളും ഇപ്പോള്‍ സാദിഖലി ശിഹാബ് തങ്ങളും പറഞ്ഞുകൊണ്ടിരിക്കുന്നത്. കാലം എത്ര കഴിഞ്ഞാലും, കാലയവനികക്കുള്ളില്‍ ശിഹാബ് തങ്ങളുടെ ഓര്‍മകള്‍ക്ക് മരണമില്ല.

നജ്മുദ്ദീൻ മാസ്റ്ററുടെ ഖിറാഅത്തോട് കൂടി ആരംഭിച്ച സമ്മേളനത്തിന് ആക്റ്റിങ് പ്രസിഡന്റ്‌ ഖാദർ ആണങ്കൂർ അദ്ധ്യക്ഷത വഹിച്ചു. കെഎംസിസി ഈസ്റ്റെൺ പ്രൊവിൻസ് ആക്ടിങ് പ്രസിഡന്റ്‌ മജീദ് കൊടുവള്ളി ഉൽഘാടനം ചെയ്തു.
പത്ര പ്രവർത്തകനും എഴുത്തുകാരനുമായ സാജിദ് ആറാട്ടുപുഴ ശിഹാബ് തങ്ങൾ അനുസ്മരണ പ്രഭാഷണം നടത്തി.

ജനാധിപത്യ കേരളത്തിന്റെ രാഷ്ട്രീയ നഭോ മണ്ഡലത്തിലെ മതേതരത്വ ത്തിന്റെ ബ്രാൻഡ് അംബാസ്സിഡർ ആയിരുന്നു ശിഹാബ് തങ്ങളെന്നും
കാലത്തിനു മായ്ക്കാൻ കഴിയാത്ത കർമ്മ യോഗി ആയിരുന്നു തങ്ങളെന്നും അദ്ദേഹം അനുസ്മരിച്ചു. വയനാട്ടിലെ ദുരന്തബാധിതർക്ക് വേണ്ടിയുള്ള പ്രാർത്ഥനാ സദസ്സിന് മുസ്തഫാ ദാരിമി നേതൃത്വം നൽകി.

1980 ജൂലൈ 30 ന് നടന്ന അറബി ഭാഷാ സമരവും തുടർന്നു പോലീസ് നടത്തിയ വെടിവെയ്പിൽ ഷഹീദായ മജീദ്, റഹ്മാൻ, കുഞ്ഞിപ്പ എന്നിവരുടെ മരിക്കാത്ത ഓർമ്മകളും പങ്കു വെച്ചുകൊണ്ട് കെഎംസിസി സൗദി നാഷണൽ കമ്മിറ്റി സാംസ്കാരിക വിഭാഗം ചെയർമാൻ മാലിക് മഖ്ബൂൽ സംസാരിച്ചു. വയനാട് ദുരന്ത ബാധിത പ്രമേയം അമീറലി കൊയിലാണ്ടി അവതരിപ്പിച്ചു.

സിദ്ദിഖ് പാണ്ടികശാല, റഹ്മാൻ കാര്യാട് എന്നിവർ പങ്കെടുത്തു. സൈനു കുമളി, സലാഹുദ്ദീൻ വേങ്ങര എന്നിവർ നേതൃത്വം നൽകി. ആക്റ്റിങ് സെക്രട്ടറി മഹ്മൂദ് പൂക്കാട് സ്വാഗതവും അബ്ദുറഹ്മാൻ പൊന്മുണ്ടം നന്ദിയും പറഞ്ഞു.

ശൂന്യത മാത്രമുണ്ടായിരുന്നപ്പോള്‍ പ്രത്യാശയുടെ വെളിച്ചം പകര്‍ന്നത് ചന്ദ്രികയാണ്. മതേതര, ജനാധിപത്യ കേരളത്തിന്റെ ശബ്ദമായ ഈ പത്രം ഒരു ഘട്ടത്തിലും നിലപാടുകളില്‍ നിന്ന് പിന്നാക്കം പോയിട്ടില്ല. ബാബരി മസ്ജിദ് തകര്‍ക്കപ്പെട്ട ഘട്ടത്തില്‍ പോലും മതേതരത്വത്തിനോ ജനാധിപത്യത്തിനോ പോറലേല്‍ക്കുന്ന ഒരു വരിപോലും ചന്ദ്രികയില്‍ അച്ചടിച്ചു വന്നില്ല എന്നത് അഭിമാനപൂര്‍വം പറയാനാവും. ന്യൂനപക്ഷ രാഷ്ട്രീയ സംഘാടനം ചോദ്യം ചെയ്യുന്ന ഘട്ടത്തില്‍ പ്രതിരോധം തീര്‍ത്തതും ഈ പത്രമാണ്. സമുദായത്തിന്റെ എല്ലാ മേഖലയിലുള്ള പുരോഗതിയിലും വളര്‍ച്ചയിലും വലിയ പങ്കാണ് ചന്ദ്രിക വഹിച്ചതെന്ന് തങ്ങള്‍ പറഞ്ഞു.

ഈമാസം 24ന് തലശ്ശേരിയിലെ ചരിത്രമുറങ്ങുന്ന മുബാറക് സ്‌കൂള്‍ അങ്കണത്തില്‍ വെച്ചാണ് നവതി ആഘോഷങ്ങളുടെ ഔദ്യോഗിക ഉദ്ഘാടനം. ഒരു വര്‍ഷം ദീര്‍ഘിക്കുന്ന ആഘോഷനാളുകളില്‍ വിത്യസ്തങ്ങളായ പരിപാടികളാണ് ആസുത്രണം ചെയ്തിരിക്കുന്നത്. കോവിഡ് ഉള്‍പ്പെടെ പ്രതികൂല സാഹചര്യങ്ങളെയെല്ലാം തരണം ചെയ്ത് മുന്നേറുന്ന മാധ്യമലോകത്തെ മുത്തശ്ശിയെ പൊതുസമൂഹം ഇരു കൈകളും നീട്ടി സ്വീകരിക്കുന്നതില്‍ അതിയായ സന്തോഷമുണ്ടെന്നും ആഘോഷ പരിപാടികള്‍ വന്‍ വിജയമാക്കണമെന്നും സാദിഖലി തങ്ങള്‍ അഭ്യര്‍ത്ഥിച്ചു.

രാജ്യത്തിന് വേണ്ടി ഉഴിഞ്ഞുവെച്ച കുടുംബമാണ് രാഹുലിന്റേത്: സാദിഖലി തങ്ങള്‍

രാഹുല്‍ഗാന്ധിയെ അയോഗ്യനാക്കിയ നടപടി രാജ്യത്തെ എതിര്‍ശബ്ദങ്ങളെ ഇല്ലാതാക്കാനുള്ള നീക്കമാണെന്ന് പാണക്കാട് സയ്യിദ് സാദിഖലി തങ്ങള്‍ പറഞ്ഞു. പ്രതിപക്ഷബഹുമാനം എന്നൊന്നില്ലാതായിരിക്കുന്നത്. ഇത് പ്രതിപക്ഷത്തിന്‍രെ ഐക്യത്തിന് വഴിവെക്കുമെന്ന് തങ്ങള്‍ പറഞ്ഞു. രാജ്യത്തിന് വേണ്ടി ഉഴിഞ്ഞുവെച്ച കുടുംബമാണ് രാഹുലിന്റേതെന്ന് തങ്ങള്‍ പറഞ്ഞു. ഇതിനെതിരെ നില്‍ക്കുകയാണ് ഓരോ ജനാധിപത്യവിശ്വാസിയുടെയും കടമ. മുസ്‌ലിം ലീഗ് കോണ്‍ഗ്രസിനും രാഹുല്‍ഗാന്ധിക്കും സര്‍വപിന്തുണയും നല്‍കുമെന്നും തങ്ങള്‍ പറഞ്ഞു.

നിഷ്‌കളങ്കമായ പൊതുപ്രവര്‍ത്തനത്തിലൂടെ മത സാമൂഹിക രാഷ്ട്രീയ മേഖലകളില്‍ വ്യക്തിമുദ്ര പതിപ്പിച്ച നേതാവായിരുന്നു ഹൈദരലി ശിഹാബ് തങ്ങള്‍. സമൂഹത്തിലെ സാധാരണക്കാരായ പതിനായിരക്കണക്കിന് മനുഷ്യര്‍ക്ക് ആശ്വാസത്തിന്റെ തണലേകിയ തങ്ങള്‍ കഴിഞ്ഞ വര്‍ഷം മാര്‍ച്ച് ആറിനാണ് വിടപറഞ്ഞത്.

കര്‍മനിരതവും ഉജ്ജ്വലവുമായ ഹൈദരലി തങ്ങളുടെ ജീവിതത്തിന്റെ ഓര്‍മകളുമായി സംഘടിപ്പിക്കുന്ന അനുസ്മരണ സമ്മേളനം സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും.

ഡി.എം.കെയുടെ രാജ്യസഭാ ലീഡര്‍ ത്രിച്ചി ശിവ എം.പി, പ്രതിപക്ഷ നേതാവ് വി.ഡി സതീശന്‍, പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ്, കെ. മുരളീധരന്‍ എം.പി, ബിനോയ് വിശ്വം എം.പി, സി.പി ജോണ്‍ തുടങ്ങിയവര്‍ സംബന്ധിക്കും. മുസ്ലിംലീഗ് ദേശീയ, സംസ്ഥാന നേതാക്കള്‍ സംബന്ധിക്കും.

സമ്മേളനത്തിന് പ്രൗഢമായ തുടക്കം. ഡോ.ഇ.കെ. അലവി മൗലവി പതാക ഉയര്‍ത്തി. സ്വദഖത്തുല്ല മൗലവിയുടെ മഖാം സിയാറത്തിന് സയ്യിദ് ഒ.പി.കെ. തങ്ങള്‍ നേതൃത്വം നല്‍കി. സി. ഉമ്മര്‍ മുസ്‌ലിയാര്‍, ഇ.കെ. മൊയ്തുട്ടി മുസ്‌ലിയാര്‍, പി. അസൈനാര്‍ മൗലവി, കെ.പി അബ്ദുല്‍ അസീസ് മൗലവി, കെ.ടി.ഹസൈനാര്‍ ഹാജി, കെ.ടി.അഹമ്മദ്, കെ.ടി.ഹുസൈന്‍, കെ.ടി.അബ്ദുല്‍ മജീദ്, ടി. ഉമ്മര്‍, എ.പി.എ നജീബ്, സി.ടി.പി. ഉണ്ണി കമ്മു, സയ്യിദ് ബഷീര്‍ തങ്ങള്‍, സി.അബ്ദുറഹ്മാന്‍, സി.എച്ച് ബാപ്പുട്ടി, ടി. അബൂബക്കര്‍ ഹാജി പങ്കെടുത്തു. ഉദ്ഘാടന സെഷന്‍ തദ്ദേശ സംഗമം പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്തു. കെ.കെ.സുലൈമാന്‍ അധ്യഷനായി. ജാമിഅയുടെ സ്ഥാപകന്‍ കെ.കെ.സദഖത്തുല്ല മൗലവിയുടെ അനുസ്മരണ സമ്മേളനം സയ്യിദ് മുഹമ്മദ് ത്വയ്യിബ് തങ്ങള്‍ അല്‍ ജലാലി ഉദ്ഘാടനം ചെയ്തു. ഇ.എം.അബൂബക്കര്‍ മൗലവി അധ്യക്ഷനായി.
സയ്യിദ് വി.പി.എ തങ്ങള്‍ ആട്ടീരി, സി.എച്ച് അബ്ദുറഹ്മാന്‍ മുസ്‌ലിയാര്‍ വറ്റലൂര്‍, കെ. വീരാന്‍കുട്ടി മുസ്‌ലിയാര്‍ ആയുര്‍, അബൂഹന്ന മൗലവി കാസര്‍കോട്, അബ്ദുറഹ്മാന്‍ ഫൈസി വണ്ടൂര്‍, പി. ഹസ്ബുല്ല ബാഖവി (കെ.ജി.എന്‍. ദഅവ കോളജ്, ഷാഹിന്‍കുന്ന്), പി.വി മസ്ഊദ് ഫലാഹി നാദാപുരം, ജെ.പി. ഇസ്മാഈല്‍ മൗലവി ജാതിയേരി പ്രസംഗിച്ചു. കെ. മുഹദ് മൗലവി കരുവാരക്കുണ്ട്, ടി.എം. അലി മൗലവി പൊല്ലൂര്‍, പി.പി കുഞ്ഞിമൊയ്തു മൗലവി ചളവറ, കെ.പി. ലുഖ്മാനുല്‍ ഹകീം മാസ്റ്റര്‍ പുല്ലാര, എം. അയ്യൂബ് വടക്കേമണ്ണ, എം. കുഞ്ഞാപ്പു മാസ്റ്റര്‍ അമയൂര്‍, കെ. കുഞ്ഞിമുഹമ്മദ് മൗലവി തണ്ടുകോട് പങ്കെടുത്തു.

ജാമിഅ നഗരിയില്‍ ഇന്ന് ഖുര്‍ആന്‍ ബോധത്തോടെ ആരംഭിക്കും. ഗഹനമായ പഠനങ്ങള്‍, നവോത്ഥാന ചിന്തകള്‍ എന്നിവക്ക് വേദിയാകും. മതരാഷ്ട്രീയ സാമൂഹിക രംഗത്തെ പ്രമുഖര്‍ സംവദിക്കുന്ന സെമിനാറുകളും ചര്‍ച്ചകളും പഠനങ്ങളും നടക്കും. സയ്യിദ് ഹാശിം ബാഫഖി തങ്ങള്‍ കൊയിലാണ്ടി അധ്യക്ഷത വഹിക്കുന്ന സെക്ഷന്‍ പി ഉബൈദുല്ല എം.എല്‍.എ ഉദ്ഘാടനം ചെയ്യും. സി. ഹംസ, യു. ജാഹ്ഫറലി മുഈനി പുല്ലൂര്‍, സി.എം. അഷ്റഫ് ബാഖവി ഓടിയപാറ പ്രസംഗിക്കും.

കേരളത്തില്‍ മുമ്പ് വന്നിട്ടുണ്ടെങ്കിലും മലപ്പുറത്തും കോട്ടക്കലിലും ആദ്യമായാണ്. ശാന്തമായ ഈ സ്‌നേഹതീരത്ത് ഇനിയും വരാനുള്ള ആഗ്രഹം അവര്‍ സാദിഖലി തങ്ങളുമായി പങ്കുവെച്ചു. മലപ്പുറം ജില്ലാപഞ്ചായത്ത് വൈസ്പ്രസിഡന്റ് ഇസ്മയില്‍ മൂത്തേടം, കോട്ടക്കലിലെ മുന്‍പഞ്ചായത്ത് പ്രസിഡന്റ് കൂടിയായ പി. ഉസ്മാന്‍കുട്ടി എന്നിവരും തങ്ങളോടൊപ്പമുണ്ടായിരുന്നു. പാണക്കാട് കുടുംബവും ആര്യവൈദ്യശാലയും തമ്മില്‍ പതിറ്റാണ്ടുകളായി നിലനില്‍ക്കുന്ന ഊഷ്മളബന്ധത്തെ തങ്ങള്‍ ഓര്‍മിച്ചു. മൂന്നാഴ്ച നീണ്ടുനിന്ന ആയുര്‍വ്വേദചികിത്സയില്‍ പൂര്‍ണസംതൃപ്തയാണ് പ്രതിഭപാട്ടീല്‍. മുന്‍രാഷ്ട്രപതി പ്രതിഭപാട്ടീലിന് ആയുരാരോഗ്യ സൗഖ്യങ്ങള്‍ നേര്‍ന്നുകൊണ്ടാണ് സാദിഖലിശിഹാബ് തങ്ങള്‍ മടങ്ങിയത്.

മേപ്പാടി: വീടും വിവാഹവസ്ത്രങ്ങളും മുക്കിക്കളഞ്ഞ് പ്രളയം താണ്ഡവമായിടിയെങ്കിലും റാബിയയുടെ വിവാഹം മുടക്കാന്‍ മാത്രം അതിന് ശക്തിയുണ്ടായില്ല. സഹൃദയര്‍ നീട്ടിനല്‍കിയ കൈപിടിച്ച് അവള്‍ നാളെ പുതുമണവാട്ടിയാവും. മൈലാഞ്ചിദിനങ്ങളുടെ സ്വപ്‌നലോകത്ത് നിന്നും ഒറ്റരാത്രികൊണ്ട് ഒറ്റപ്പെടലിന്റെ ആഴത്തിലാണ്ട ചൂരല്‍മലയിലെ തോട്ടം തൊഴിലാളി ജുമൈലത്തിന്റെ മകളാണ് നാളെ മുഴുവന്‍ പ്രതിസന്ധികളെയും അതിജയിച്ച് വൈവാഹിക ജീവിതത്തിലേക്ക് കടക്കുന്നത്. റാബിയക്കായി അഞ്ചുപവന്‍ സ്വര്‍ണ്ണാഭരണങ്ങളും വിവാഹവസ്ത്രങ്ങളും സമ്മാനിച്ച് ദുബൈ കെ.എം.സി.സി ഭാരവാഹികള്‍ വിവാഹാഘോഷങ്ങള്‍ക്ക് നേതൃത്വം നല്‍കും.

ആഗസ്ത് ഏഴിനാണ് റാബിയയുടെ വീട് വെള്ളത്തില്‍ മുങ്ങിയത്. 12 വര്‍ഷം മുമ്പ് പഞ്ചായത്ത് നല്‍കിയ പണി തീരാത്ത വീട്ടില്‍ നിന്ന് ഉടുത്തിരുന്ന വസ്ത്രം മാത്രമെടുത്ത് നാട്ടുകാര്‍ വലിച്ചെറിഞ്ഞ് കൊടുത്ത കയറില്‍ തൂങ്ങിയാണ് റാബിയയും ഉമ്മയും രക്ഷപ്പെട്ടത്. പെരുംമഴയില്‍ വീടും വിവാഹവസ്ത്രങ്ങളടക്കം സകലതും വെള്ളത്തില്‍ മുങ്ങി. മണ്ണിടിഞ്ഞ് വഴിയാകെ തകര്‍ന്ന പുത്തുമലയില്‍ നിന്ന് നാട്ടുകാരുടെ സഹായത്തോടെയാണ് ജുമൈലത്തും റാബിയയും മേപ്പാടി സെന്റ് ജോസഫ്‌സ് സ്‌കൂളിലെ ദുരിതാശ്വാസ ക്യാമ്പിലെത്തിയത്.

സമുനസ്സുകളുടെ സഹായത്തോടെ ആഗസ്ത് നാലിന് നികാഹ് കഴിഞ്ഞിരുന്ന റാബിയയുടെ വിവാഹചടങ്ങുകള്‍ 18ലേക്ക് നിശ്ചയിച്ചിരുന്നു. ആയുസ്സിന്റെ മുഴുവന്‍ സമ്പാദ്യങ്ങളും മഴെയെടുത്ത കുടുംബത്തിന് വിവാഹം മാറ്റിവെക്കേണ്ടിവരുമെന്ന ആധി നോവായി വിങ്ങി. ക്യാമ്പില്‍ നിന്ന് വിവരമറിഞ്ഞ് നാട്ടുകാരും മുസ്്‌ലിം ലീഗ് പ്രവര്‍ത്തകരും വിവാഹം കേമമായി നടത്താന്‍ തീരുമാനിക്കുകയായിരുന്നു. വിവരങ്ങളറിഞ്ഞ ദുബൈ കെ.എം.സി.സി ഭാരവാഹികള്‍ സ്വര്‍ണ്ണാഭരണവും വിവാഹവസ്ത്രങ്ങളും നല്‍കാമെന്നറിയിക്കുകയായിരുന്നു.

ഇന്നലെ മേപ്പാടി ക്യാമ്പില്‍ നടന്ന ചടങ്ങില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ മാതാവിന് സ്വര്‍ണ്ണാഭരണങ്ങള്‍ കൈമാറുകയും ചെയ്തു. ക്യാമ്പില്‍ ഇന്ന് മൈലാഞ്ചികല്യാണവും നാളെ ആഘോഷമായി വിവാഹവും നടത്താന്‍ തീരുമാനിക്കുകയും ചെയ്തു. എന്നാല്‍ മഴയൊഴിഞ്ഞതിനെത്തുടര്‍ന്ന് ക്യാമ്പ് ഇന്ന് പൂട്ടാന്‍ തീരുമാനിച്ചതോടെ മറ്റൊരിടത്ത് വിവാഹചടങ്ങുകള്‍ നടത്തുമെന്ന് ക്യാമ്പില്‍ ആദ്യാവസാനം സന്നദ്ധസേവനത്തിന് നേതൃത്വം നല്‍കുന്ന അലി ഫഌര്‍ അറിയിച്ചു. നാളെ വിവാഹസ്വപ്‌നത്തിലേക്ക് റാബിയ കാലെടുത്തുവെക്കുമ്പോള്‍ ജയിക്കുന്നത് നന്മ വറ്റാത്ത നല്ല മനുഷ്യരാണ്. തോല്‍ക്കുന്നത് കലിതുള്ളിയെത്തിയ പ്രളയവും.